Yesu Tobali Mesia

Lö iböhöli wanuriaigö daʼa Yohane: ’Lö ara tö tohare niha sabölö ebua kuaso moroi khögu.’ Me mato 30 fakhe ndröfi Yesu, iʼotarai Galilaia möi ia ba Nungo Nidanö Yoridano nahia Yohane ba wamayagö niha idanö. Iʼandrö khö Yohane ba wombayagö ia idanö, hizaʼi imane Yohane, ’Sinangeania tenga yaʼo zombayagö yaʼugö idanö, hizaʼi yaʼugö zombayagö yaʼo idanö.’ Imane Yesu, ’Omasi Yehowa na yaʼugö zombayagö yaʼo idanö.’ Börö daʼö, möi ira bakha ba nidanö andrö, ilömö mboto Yesu maʼasageu ba nidanö.

Me no kalua Yesu moroi bakha ba nidanö, mangandrö ia. Ba ginötö daʼö, teboka mbanua, ba so waʼabölö niʼamoniʼö si hulö marafadi si möi khönia. Aefa daʼö, fahuhuo khönia Yehowa moroi ba zorugo, ”Onogu ndraʼugö, niʼomasiʼögu, omuso dödögu khöu.”

Me no itema Yesu geheha Yehowa, tobali ia Keriso mazui Mesia. Iadaʼa, ibörögö ifalua halöwö nibeʼe Yehowa me mufatenge ia ba gulidanö.

Me no aefa mubayagö idanö Yesu, möi ia ba danö si mate ba toröi ia ba daʼö 40 hari. Me mangawuli ia, ifalukhaisi Yohane. Me iʼondrasi ia Yesu, imane Yohane, ’Daʼa Nono Mbiri-biri Lowalangi, sangeheta horö niha gulidanö.’ Me iwaʼö wehede daʼö Yohane, ifatunö ba niha wa Yesu andrö Mesia. Öʼila hadia zalua me so Yesu ba danö si mate? Datafaigi.