Rahu-Rahu moroi ba Waʼaboto ba Dödö si No Tebohouni

Faʼaboto ba dödö ba zilalö: Ero sambua mbawa ndra malaʼika mazui kerubi eluahania sambua moroi ba zi öfa ngawalö gamuata Yehowa siföföna.

Faʼaboto ba dödö si bohou: Ero sambua mbawa ndra malaʼika, eluahania sambua moroi ba gamuata Yehowa siföföna. Hizaʼi, na mufaigi ia maʼafefu, si öfa bawa ndra malaʼika andrö, eluahania fefu gamuata Yehowa. Daʼa zangoromaʼö faʼabölö ba faʼamolakhömi Yehowa sahöli-höli dödö.

Wa tola mubohouni: Asese iʼogunaʼö Taromali Lowalangi numero öfa ba wanutunö faʼafönu. Na mufaigi zi öfa bawa andrö maʼafefu, eluahania tenga amuata Yehowa si no mufasafi-safi. Hizaʼi, daʼö zi tobali dane-dane gamuata Yehowa sahöli-höli dödö. Ero sambua bawa, laʼokhögö zikhala gomböila danga Lowalangi soʼamaedolagö faʼamolakhömi, faʼebua kuaso ba faʼabölö. Hewaʼae simanö, barö dadaoma Yehowa so zi öfa ngawalö niwöwöi fondrege zabölö andrö, niʼamaedolagö si öfa bawa ero sambua kerubi. Daʼa zangoromaʼö wa Yehowa andrö Samatörö Fondrege Zabölö.

Faʼaboto ba dödö ba zilalö: Ira matua solohe naha fena sekretaris eluahania sawuyu si lö faröi sauri ba gulidanö nasa. Ba wanuriaigö hegöi ba wombaliʼö nifahaʼö, amaedola no lafotandro niha si fao ba ”ngawawa sato”.​—Fam. 7:9.

Faʼaboto ba dödö si bohou: Ira matua solohe naha fena sekretaris eluahania Yesu Keriso. Ba ”wamakao sabölö-bölö” dania, ifalua Yesu wanguhuku mazui ba wamotandro ngawawa sato si tobali biri-biri.​—Mat. 24:21.

Wa tola mubohouni: No itouʼö Yehowa wanguhuku andrö ba danga Nononia. (Yoh. 5:22, 23) Moloʼö Mataiʼo 25:31-33, Yesu zangai angetula safuria ba wotatugöi haniha ”mbiri-biri” ba haniha ”nambi”.

Faʼaboto ba dödö ba zilalö: Töi ziaʼa yaʼia daʼö Ohola (Samaria, ibu kota Gizaraʼeli) eluahania Gereja Katolik. Töi nakhinia, Oholiba (Yeruzalema, ibu kota Yehuda) eluahania Gereja Protestan.

Faʼaboto ba dödö si bohou: Darua zi fatalifusö si tobali sohorö-horö andre, tenga gereja geluahania. Hizaʼi, salua khöra andre zangoromaʼö hewisa dödö Yehowa ba nono mbanuania si faröi ba sohorö ba wamati. Simane daʼö göi dödönia ba agama sofaya maʼafefu.

Wa tola mubohouni: Lö nitutunö Zura Niʼamoniʼö wa Ohola ba Oholiba eluahania Gereja. Izaraʼeli hegöi Yehuda, no irai tobali ira foʼomo Yehowa si lö faröi. Hizaʼi, lö irai simane daʼö wahuwusa Gereja khö Yehowa. Baero daʼö, duma-duma nisura ba Hezekieli faza 16 ba 23 daʼö zangoromaʼö wa sohorö-horö andrö yaʼia daʼö ono mbanua Lowalangi si faröi, sangokhögö fanötöna ba samalalini era-era enaʼö tebohouni. Hizaʼi, satonia Gereja si farahu ba Mbabilona Sebua, lö hadöi khöra fanötöna simane daʼö.

Faʼaboto ba dödö ba zilalö: Yeruzalema si no faröi eluahania Gereja. Faʼadudu Yeruzalema muʼamaedolagö ia faʼadudu Gereja.

Faʼaboto ba dödö si bohou: Banua Yeruzalema safönu fanömba adu ba faʼalösökhi, daʼö zamasugi ba dödöda sanandrösa ba Gereja. Hizaʼi, lö saʼae tawaʼö wa Yeruzalema sondröi sindruhu eluahania Gereja.

Wa tola mubohouni: Duma-duma ba famaedo simane daʼö lö teʼodane-dane ia ba Zura Niʼamoniʼö. Faböʼö ia ba Yeruzalema mböröta, lö irai ifalua wamosumange satulö Gereja. Baero daʼö, no irai iʼefaʼö zala Yeruzalema Yehowa, hizaʼi lö irai iʼefaʼö zala Gereja.

Faʼaboto ba dödö ba zilalö: Me döfi 1918, tefakao niha nibayoini ba teʼoloiʼö ira ba Mbabilona Sebua. Hulö zi mate ira börö me arakhagö laböhöli halöwö nifaluara. Teʼefaʼö ira moroi ba wangoloiʼö si lö arara andrö me 1919, me luo daʼö no amaedola iʼorifi ira Yehowa tobali sanuriaigö Famatörö Lowalangi.

Faʼaboto ba dödö si bohou: Fangoloiʼö ba wamati si no amaedola waʼamate andrö ara maʼifu ginötönia, fatua lö 1918. Tebörögö daʼö me abad si dua ba afuriata me 1919. Inötö daʼa tola mufaedogö ia simane faʼatumbu gandru hegöi oʼo ba gamaedola Yesu.

Wa tola mubohouni: Ara teʼoloiʼö ndraono Gizaraʼeli me föna iʼotarai 740 SM irugi 537 SM. No ’oköli’ mazui ’oköli sibai’ döla si so ba wamaʼeleʼö Hezekieli. Daʼa zangoromaʼö wa no ara mate niha niʼamaedolagö döla si so ba gangilata andrö. Ba tezara-zara wangorifi töla andrö ba ginötö si no mutatugöi.

Faʼaboto ba dödö ba zilalö: Hewaʼae no muzawili niha nibayoini si lö faröi sagötö Wasuwöta Gulidanö I, ifuli teʼowuloi ira me 1919.

Faʼaboto ba dödö si bohou: Famaʼeleʼö daʼa zangoromaʼö wa ifuli iʼosambuaʼö niha samosumange yaʼia Yehowa. Me no aefa 1919, tezara-zara waʼamonönö niha sanötöna faʼauri ba gulidanö ba teʼosambuaʼö ira khö ndra niha nibayoini sauri ba gulidanö nasa. Si dombua ngawawa andrö, teʼosambuaʼö ira ba wamosumange Yehowa.

Wa tola mubohouni: Famaʼeleʼö daʼa tenga sanandrösa ba ziʼo si sara si no mubagi dua ba mufuli muʼosambuaʼö. Börö daʼö, eluahania tenga si sambua ngawawa si no tebagi ba mufuli muʼosambuaʼö, hizaʼi sanandrösa ba zi dombua ngawawa si no muʼosambuaʼö.

Faʼaboto ba dödö ba zilalö: Gogi moroi ba Magogi yaʼia daʼö töi Zatana me no tetiboʼö ia moroi ba zorugo.

Faʼaboto ba dödö si bohou: Gogi moroi ba Magogi yaʼia daʼö angorudua ngawalö soi ba gulidanö. Lasuwö dania niha samalua famosumange satulö ba wamakao sabölö-bölö.

Wa tola mubohouni: Moloʼö famaʼeleʼö Zura Niʼamoniʼö, tobali balazo wofo si manga nagole dania Gogi ba lakoʼo ia ba gulidanö. Na simanö, Gogi andrö tenga boto eheha. Baero daʼö, fasuwöta nifalua Gogi ba nono mbanua Lowalangi, fagölö ia ba wasuwöta nifalua ngawalö soi simane nisura ba mbuku Danieli hegöi ba Wamaʼeleʼö.​—Dan. 11:40, 44, 45; Fam. 17:14; 19:19.