KOTAK FAMAHAʼÖ 14A

Famahaʼö moroi ba Gosali ba Gangilata Hezekieli

Simane si No Mufazökhi

Diagram sangoromaʼö ngawalö zadöni dödöda si so ba gosali niʼila Hezekieli. 1. Hili salawa. 2. Towa ba zi fasui osali. 3. Nahia sebolo ba zi fasui osali. 4. Ungo nidanö sangele moroi ba naha niʼamoniʼö. 5. Bawa göli tanö baero. 6. Towa gosali hegöi si fasuinia. 7. Olayama tanö baero. 8. Nahia wemanga ba golayama tanö baero. 9. Bawa göli tanö bakha. 10. Olayama tanö bakha. 11. Naha wanunu sumange. 12. Naha niʼamoniʼö. Sara göfa sihombo jumbo jet (mato 75 meter waʼanau), no ide-ide sibai daʼö na mufaedogö ba waʼebua gosali ba faʼebolo danö ba zi fasuinia (arakhagö 1,6 kilometer).

Teʼalawaʼö ba Telumöʼö Wamosumange Satulö

Osali ba gangilata daʼa so ia ba ”hili fondrege zalawa” (faigi numero 1). Hadia no taʼalawaʼö wamosumange satulö yaʼia na taʼofönaiʼö ia ba waʼaurida?

Towa ba zi fasui osali (faigi numero 2) tobali folumöʼö golayama gosali sebolo si so bakha ba gotaluania (faigi numero 3). Tobali famasugi ba dödö khöda daʼa enaʼö böi tatehegö gofu hadia ia zi möi fanaisi ba wamosumangeda Yehowa. Moloʼö Hezekieli 40:20, ”nahia si toʼölö” (salua sero maʼökhö si lö moʼamakhaita ba wamati) enaʼö tefasambua moroi ba ”nahia niʼamoniʼö”. Na daʼö manö mufasafi moroi ba wamosumange satulö, mendrua manö saʼae gamuata si raʼiö mazui amuata wohorö. Lö tola löʼö laʼaröuʼö gamuata simane daʼö ira samosumange Yehowa!

Howu-howu si Lö Tebulö

Abölö-bölö wangele nidanö moroi ba naha niʼamoniʼö si so ba gosali solohe faʼauri hegöi fangatabö zinanö ba soi daʼö (faigi numero 4). Mufatunö howu-howu daʼa ba Faza 19.

Goi-Goi si Fagölö ba Niha Fefu

Faʼalawa mbawa göli tanö baero (faigi numero 5) hegöi bawa göli tanö bakha (faigi numero 9) daʼö zangoromaʼö wa no ihonogöi Yehowa goi-goi salawa sanandrösa ba gamuata ba nono mbanuania somasi mamalua famosumange satulö. Nehegö atö wa fagölö zuʼa-suʼa mbawa göli tanö baero hegöi tanö bakha. Tefaudu sibai daʼa, börö me fagölö niʼandrö Yehowa ba nono mbanuania fefu hewaʼae faböʼö dadaoma mazui halöwöra zamösana.

Manga ba Meza Yehowa

Nahia wemanga (faigi numero 8) zamasugi ba dödöda wa niha solohe sumange, tola laʼa ösa zumange niʼohera andrö ba gosali. Amaedola zi falulu manga ira khö Yehowa ba daʼö. Iadaʼa, lö lafalua daʼö ira niha Keriso samosumange Lowalangi ba gosali wamati, börö me no mubeʼe ’zumange si ha sambua’. (Heb. 10:12) Hewaʼae simanö, tola tabeʼe ”zumange fanuno”.—Heb. 13:15.

Weʼe-Weʼe Dödö moroi khö Lowalangi

Te abua khöu wangila eluaha ngawalö zuʼa-suʼa si no muzara-zara wanutunö ba gangilata daʼa. Hizaʼi, so sambua zi tobali weʼe-weʼe dödöda: Hasambalö tebohouni wamosumange satulö simane ohitö dödö Yehowa. No itatugöi daʼö Yehowa wa tebai tebulö, simane suʼa-suʼa gosali andrö. Hewaʼae na lö nitutunö Hezekieli hadia so niha böʼö ba gangilatania andrö, hizaʼi no isura degu-degu sabeʼe moroi khö Yehowa nitandrösaigönia ba nono mbanuania, khö ndra ere hegöi sondröniaʼö. Fefu nono mbanua Yehowa, lö tola löʼö laʼoʼö goi-goinia satulö.

Mangawuli ba faza 14, ngenoli 13,14