FAMAHAʼÖ 06
Hewisa Mböröta Waʼauri?
Lowalangi andrö ’umbu waʼauri’. (Sinunö 36:9) Hadia faduhu dödöu ba daʼö? So niha sangumaʼö wa so manö waʼauri ba zi lö mudöna-döna, tenga börö me so zomböi. Na simanö, lö si tola manutunö hadia mbörö wa so ita ba daʼa. Hizaʼi, na Lowalangi Yehowa zomböi faʼauri, hasambalö so dane-dane saro hadia mbörö wa iwöwöi ita.a Datatutunö niwaʼö Zura Niʼamoniʼö hewisa me awena tewöwöi waʼauri ba hadia mbörö wa tefaudu nitutunö Zura Niʼamoniʼö andrö.
1. Hewisa mböröta mbanua si yawa awö danö?
Imane Sura Niʼamoniʼö, ”Ba mböröta, ifazökhi Lowalangi mbanua si yawa awö danö.” (1 Moze 1:1) Ato niha sagatua-tua zi fao tödö wa faʼauri andre so mbörötania. Hadia nifalua Lowalangi ba wamazökhi banua si yawa awö danö? Iʼogunaʼö ”waʼabölö” mazui ehehania niʼamoniʼö ba wamazökhi fefu si so ba mbanua si yawa awö danö, simane galaksi, döfi hegöi planet.—1 Moze 1:2.
2. Hadia mbörö wa ifazökhi gulidanö Lowalangi?
”Tenga si lö eluaha wamazökhi [Yehowa gulidanö], hizaʼi enaʼö mowanua niha ba daʼö.” (Yesaya 45:18) Ihaogö wamazökhi ulidanö andre Yehowa enaʼö tobali nahia si sökhi hegöi ba wangaʼasogö soguna ba niha irege auri ira sagötö faʼara. (Baso Yesaya 40:28; 42:5.) Ahöli-höli dödö niha sagatua-tua ba wamaigi ulidanö andre. Ha ba gulidanö andre tola auri niha.
3. Hadia gamaehuta niha moroi ba gurifö?
Me no aefa ifazökhi gulidanö Yehowa, ifazökhi göi ngawalö zaliwa-liwa ba danö. Si oföna, ifazökhi zinanö hegöi urifö. Aefa daʼö, ”ifazökhi niha Lowalangi famaedonia”. (Baso 1 Moze 1:27.) Hadia mbörö wa tohude niha gulidanö? Börö me tewöwöi ita si fakhili-khili khö Lowalangi, andrö wa taʼokhögö gamuatania simane faʼomasi hegöi faʼatulö. Me iwöwöi ita Yehowa, ibeʼe khöda waʼatua-tua ba wamomaha yaʼita ba ngawalö li, ba worasoi faʼahöli-höli dödö ba ngawalö zi sökhi hegöi ba wamondrondrongo musik. Tola göi tafosumange Zomböi yaʼita, tenga simane urifö.
ODÖDÖGÖ NASA WANGALUI
Tatutunö dania hadia zangoromaʼö wa Lowalangi zomböi faʼauri ba hewisa wa fatema ba dödöda nitutunö Zura Niʼamoniʼö sanandrösa ba womböwöi. Tatutunö göi hadia manö gamuata si sökhi niʼokhögö niha sangoromaʼö amuata Lowalangi.
4. Lowalangi zomböi ngawalö zaliwa-liwa ba danö
Na so zi bohou nifazökhi zi samösa niha, ba lasuno-suno ia niha sato. Sindruhunia fefu nifazökhinia andrö ihalö moroi ba duma-duma niwöwöi Lowalangi. Börö me Lowalangi zomböi daʼö fefu, na simanö haniha zinangea nisuno? Futa VIDEO, ba beʼe wanema li ba wanofu daʼa:
Hadia manö nifazökhi niha sagatua-tua nihalöra duma-duma moroi ba niwöwöi Lowalangi?
Fefu nomo so zamazökhi yaʼia. Hizaʼi, haniha zamazökhi fefu si so ba mbanua si yawa awö danö? Baso Heberaiʼo 3:4, ba beʼe wanema li ba wanofu-nofu daʼa:
Hadia zabölö adöni dödöu moroi ba niwöwöi Lowalangi?
Hadia fatema ba dödöu na tawaʼö wa niwöwöi Lowalangi fefu zi so ba mbanua si yawa awö danö? Hadia mbörö?
Hadia öʼila?
Enaʼö öʼila video sanandrösa ba duho daʼa, bokai jw.org ba faigi seri video moroi ba duho ”Niwöwöi”.
”Fefu nomo ba so zamazökhi yaʼia, ba samazökhi fefu hadia ia ba yaʼia Lowalangi”
5. Fatema ba dödöda nifatunö Zura Niʼamoniʼö sanandrösa ba womböwöi
Ba 1 Moze faza 1, itutunö khöda Sura Niʼamoniʼö hewisa mböröta gulidanö andre hegöi ngawalö zauri ba daʼö. Hadia faduhu dödöu waö-waö nisura ba daʼö mazui ha manö-manö? Futa VIDEO, ba beʼe wanema li ba wanofu-nofu daʼa:
Hadia ifahaʼö ita Sura Niʼamoniʼö wa tefazökhi gulidanö awö ngawalö zauri ba daʼö ha ba zi önö hari?
Hadia fatema ba dödöu nidunö-dunö Zura Niʼamoniʼö sanandrösa ba womböwöi? Hadia mbörö?
Baso 1 Moze 1:1, ba beʼe wanema li ba wanofu daʼa:
Lawaʼö ira sagatua-tua wa so mböröta mbanua si yawa awö danö. Hadia tefaudu niwaʼöra andrö ba ayati sawena öbaso?
So niha sangumaʼö wa iʼogunaʼö evolusi andrö Lowalangi ba womböi faʼauri. Baso 1 Moze 1:21, 25, 27, ba beʼe wanema li ba wanofu-nofu daʼa:
Hadia ifahaʼö ita Sura Niʼamoniʼö wa iʼogunaʼö evolusi Lowalangi ba wamazökhi niha, iʼa hegöi urifö tanö böʼö? Mazui, hadia yaʼia samösa zamazökhi ngawalö zaliwa-liwa ba danö?
6. Sahöli-höli dödö niwöwöi Lowalangi yaʼia daʼö niha
Yehowa zamazökhi niha hegöi urifö. Hizaʼi, so gamaehuta niha moroi ba gurifö. Baso 1 Moze 1:26, ba beʼe wanema li ba wanofu daʼa:
Börö me iwöwöi ita Lowalangi si fakhili-khili khönia, tola taʼokhögö waʼomasi hegöi faʼahakhö dödö. Na simanö, hadia rahu-rahu si tola tahalö sanandrösa ba gamuata Lowalangi?
SO ZANGUMAʼÖ: ”Ha manö-manö fefu zi no tesura ba Zura Niʼamoniʼö sanandrösa ba womböwöi.”
Hewisa moloʼö yaʼugö? Hadia mbörö?
RAHU-RAHU WAMAHAʼÖ
Yehowa zamazökhi banua si yawa awö danö hegöi ngawalö zaliwa-liwa ba danö.
Hadia Wamahaʼö si Tola Öhalö?
Hadia nifahaʼö Zura Niʼamoniʼö sanandrösa ba mböröta mbanua si yawa awö danö?
Hadia iʼogunaʼö evolusi Lowalangi ba wamazökhi ngawalö zaliwa-liwa ba danö? Mazui, hadia yaʼia samösa zamazökhi daʼö?
Hadia gamaehuta niha gulidanö?
ALUI NASA DANÖ BÖʼÖ
Hewisa niwöwöi wangoromaʼönia wa so Zomböi?
”Hadia Nifahaʼö Mbanua si Yawa awö Danö?” (Sedarlah! Baŵa si Siwa 2006, tehenaigö ba li Indonesia)
Faigi hadia nifalua zi samösa ama ba wangombakha khö nononia sanandrösa ba womböwöi nitutunö Zura Niʼamoniʼö.
Hadia tefaudu wamahaʼö evolusi moloʼö Sura Niʼamoniʼö?
Moroi ba fosil hegöi penelitian ilmiah, hadia so manö fefu zaliwa-liwa ba danö mazui niwöwöi?
Asal Mula Kehidupan—Lima Pertanyaan yang Patut Direnungkan (brosur)
a Ba Wamahaʼö 25 tafatunö dania hadia mbörö wa ifazökhi niha Lowalangi.