FAMAHAʼÖ 12
Hadia Zanolo Yaʼugö Enaʼö Lö Öböhöli Wamahaʼö Yaʼugö ba Zura Niʼamoniʼö?
So mbua nitemau na öfahaʼö ndraʼugö ba Zura Niʼamoniʼö. Hizaʼi tola manö abua khöu wamalua daʼö. Te aombö dödöu hewisa enaʼö lö öböhöli wamahaʼö yaʼugö ba Zura Niʼamoniʼö. Hadia zi tola manolo yaʼugö ba wamalua daʼö hewaʼae oya zi tobali taha-taha?
1. Hana wa moguna öfahaʼö ndraʼugö ba Zura Niʼamoniʼö?
”Sauri sa daromali Lowalangi andrö ba sabölö.” (Heberaiʼo 4:12) Moguna öfahaʼö ndraʼugö ba Zura Niʼamoniʼö enaʼö öʼila lala wangera-ngera Lowalangi ba hewisa dödönia khöu. Itolo göi ndraʼugö Sura Niʼamoniʼö enaʼö öʼokhögö waʼaboto ba dödö sindruhu hegöi tötönafö. Sabölö mogunania, itolo ndraʼugö Sura Niʼamoniʼö enaʼö tobali si fahuwu khö Yehowa. Na öfahaʼö ndraʼugö ba Zura Niʼamoniʼö, itugu sökhi lala waʼauriu.
2. Hana wa moguna sibai taʼameʼegö tödö zindruhu moroi ba Zura Niʼamoniʼö?
Sindruhu moroi ba Zura Niʼamoniʼö amaedola girö-girö sebua böli. Daʼö mbörö wa ifarou ita Sura Niʼamoniʼö enaʼö ’taʼöli zindruhu ba böi tafamawa’. (Amaedola 23:23) Na lö tebulö so ba wangera-ngerada wa ebua sibai mböli zindruhu moroi ba Zura Niʼamoniʼö, taforege wamahaʼö yaʼita hewaʼae na oya zi tobali taha-taha.—Baso Gamaedola 2:4, 5.
3. Hadia nifalua Yehowa enaʼö lö öböhöli wamahaʼö yaʼugö ba Zura Niʼamoniʼö?
Börö me Yehowa andrö si Fahuwu ba Somböi Fondrege Zabölö, omasi ia itolo ndraʼugö enaʼö öfahaʼö ndraʼugö sanandrösa khönia. Ibeʼe khöu ”waʼedöna ba faʼabölö ba wamalua somasi ia”. (Baso Wilifi 2:13.) Na itaria abua khöu ba wamalua famahaʼö mazui ba woloʼö si no öfahaʼö yaʼugö tola itolo ndraʼugö Yehowa. Tola ibeʼe khöu waʼabölö ba wanaögö taha-taha mazui abula dödö. Böi böhöli wangandrö khö Yehowa enaʼö tola itolo ndraʼugö irege lö tebulö öfahaʼö ndraʼugö ba Zura Niʼamoniʼö.—1 Tesalonika 5:17.
ODÖDÖGÖ NASA WANGALUI
Tatutunö dania hewisa enaʼö lö öböhöli wamahaʼö yaʼugö ba Zura Niʼamoniʼö hewaʼae oya halöwöu mazui so wanaisi moroi ba niha böʼö. Aefa daʼö, tafatunö göi hewisa Yehowa wanolonia yaʼugö enaʼö lö öböhöli wamahaʼö yaʼugö ba Zura Niʼamoniʼö.
4. Ofönaiʼö wamahaʼö yaʼugö ba Zura Niʼamoniʼö
Itaria börö waʼoya halöwö, lö inötöda wamahaʼö yaʼita ba Zura Niʼamoniʼö. Na simanö, hadia zi tola tafalua? Baso Wilifi 1:10, ba beʼe wanema li ba wanofu-nofu daʼa:
Moloʼö yaʼugö, hadia manö ”zabölö moguna” ba waʼauri andre?
Hewisa enaʼö tola öʼofönaiʼö wamahaʼö yaʼugö ba Zura Niʼamoniʼö?
Duma-dumania, na oföna öfoʼösi gawu bakha ba embe ba awena öbeʼe gara, tatu lö monaha fefu gara andrö
Hizaʼi, na oföna öbeʼe bakha gara, tola monaha fefu gawu andrö. Simane daʼö göi na öʼofönaiʼö zabölö moguna ba waʼaurimö, tola öʼasiwai daʼö fefu ba so nasa ginötömö ba wamalua tanö böʼö
Na tafahaʼö ita ba Zura Niʼamoniʼö, tola tabönökhi zoguna khöda ba wamati yaʼia daʼö ba wangokhögö faʼaboto ba dödö sanandrösa khö Lowalangi hegöi ba wamosumange yaʼia. Baso Mataiʼo 5:3, ba beʼe wanema li ba wanofu daʼa:
Hadia gunania khöu na öʼofönaiʼö wamahaʼö yaʼugö ba Zura Niʼamoniʼö?
5. Böi böhöli hewaʼae so wanaisi
Itaria so niha sanaisi yaʼugö enaʼö öbato wamahaʼö yaʼugö ba Zura Niʼamoniʼö. Faigi duma-duma Francesco. Futa VIDEO, ba beʼe wanema li ba wanofu-nofu daʼa:
Ba video andrö mege, hadia nifalua nösi nomo Francesco hegöi ira awönia me laʼila wa ifahaʼö ia ba Zura Niʼamoniʼö?
Börö me anau gölönia, hadia howu-howu nitema Francesco?
Baso 2 Timoteo 2:24, 25, ba beʼe wanema li ba wanofu-nofu daʼa:
Hadia nifalua nösi nomou hegöi ira awöu me laʼila öfahaʼö ndraʼugö ba Zura Niʼamoniʼö?
Moloʼö ayati no mege, hadia nifaluamö na so niha sanaisi yaʼugö ba wamahaʼö ba Zura Niʼamoniʼö? Hadia mbörö?
6. Andrö wanolo moroi khö Yehowa
Na itugu aro wahuwusada khö Yehowa, itugu omasi ita ba wangomusoiʼö tödönia. Hizaʼi, te abua khöda ba wombulöʼö faʼaurida moloʼö somasi Yehowa. Na daʼö nirasoimö, böi awuwu ndraʼugö. Hasambalö itolo ndraʼugö Yehowa. Futa VIDEO, ba beʼe wanema li ba wanofu-nofu daʼa:
Ba video no mege, hadia nifalua Jim ba wombulöʼö faʼaurinia enaʼö omuso dödö Yehowa?
Hadia zadöni dödöu ba zi no alua khönia?
Baso Heberaiʼo 11:6, ba beʼe wanema li ba wanofu-nofu daʼa:
Hadia nifalua Yehowa ba niha ”sangalui yaʼia soroi ba dödö”, mazui samorege ba wangokhögö faʼaboto ba dödö ba sangomusoiʼö tödönia?
Moloʼö ayati no mege, hadia omuso dödö Yehowa na iʼila wa öʼodödögö ba lö öböhöli wamahaʼö yaʼugö ba Zura Niʼamoniʼö? Hadia mbörö wa öwaʼö daʼö?
SO ZANGUMAʼÖ: ”Hana wa khö ndra Samaduhuʼö Yehowa öfahaʼö ndraʼugö ba Zura Niʼamoniʼö?”
Hadia öbeʼe fanema li?
RAHU-RAHU WAMAHAʼÖ
Hewaʼae na itaria abua wamalua famahaʼö ba Zura Niʼamoniʼö, hizaʼi na lö öbato, tola ösöndra waʼohahau dödö sagötö faʼara. Odaligö Yehowa ba hasambalö ifahowuʼö ndraʼugö.
Hadia Wamahaʼö si Tola Öhalö?
Hana wa ebua sibai mböli zindruhu moroi ba Zura Niʼamoniʼö?
Hadia nifaluamö ’enaʼö tola ötatugöi hadia zabölö moguna’?
Hana wa moguna öʼandrö wanolo moroi khö Yehowa enaʼö lö öböhöli wamahaʼö yaʼugö ba Zura Niʼamoniʼö?
ALUI NASA DANÖ BÖʼÖ
Baso zi öfa ngawalö lala si no manolo niha sato ba wombagisi inötöra.
”Lala si Tefaudu ba Wombagi Inötö” (Sedarlah! Baŵa si Dua 2014)
Faigi duma-duma salua khö zi samösa ira alawe samahaʼö yaʼia ba Zura Niʼamoniʼö hewaʼae lö omasi woʼomonia. Nehegö hadia nifalua Yehowa ba wanolo yaʼia.
Faigi duma-duma salua khö zi samösa ira matua sanema bua börö me anau gölö woʼomonia wamahaʼö yaʼia ba Zura Niʼamoniʼö.