Tola Ölawa Zatana ba Möna Ndraʼugö!
”Milawa [Zatana], miʼabeʼeʼö ami ba wamati.”—I FETERO 5:9.
1. (a) Hana wa si lö tola löʼö talawa Gafökha iadaʼa? (b) Hana wa faduhu dödöda möna ita ba wolawa Satana?
LÖ IBATO Satana wolohi niha nibayoini si toröi ba gulidanö nasa awö ”mbiri-biri böʼö”. (Yohane 10:16) Börö me lö aratö ginötö nitehegö khönia, andrö iforege wamaelungu niha samati khö Yehowa. (Baso Famaʼeleʼö 12:9, 12.) Hewaʼae simanö, tola talawa Zatana. Imane Sura Niʼamoniʼö, ”Mitimba Gafökha ba moloi ia iröi ami.”—Yakobo 4:7.
2, 3. (a) Hana wa omasi Zatana na lö faduhu dödö niha wa so ia? (b) Hana wa faduhu dödöu wa so Zatana?
2 Ato niha si lö faduhu tödö wa so Zatana. Moloʼö yaʼira Satana andrö ha nidunö-dunö ba mbuku mazui ba film horor, ba video games. Lamane wangumaʼö ha niha si lö tödö zi faduhu tödö wa so mbekhu. Hewisa dödö Zatana ba gera-era simanö? Omuso dödönia börö me mohare ia na lö faduhu dödö niha wa so ia. (II Korindro 4:4) Andrö ibe ba gera-era niha fefu zimane daʼö enaʼö ato nilimonia.
3 Yaʼita ono mbanua Yehowa lö telimo. Aboto ba dödöda wa si ndruhu-ndruhu so Gafökha. Hana wa faduhu dödöda? Iʼombakhaʼö khöda Sura Niʼamoniʼö me fahuhuo Zatana khö Khawa iʼodela gulö. (I Moze 3:1-5) Molawa Zatana khö Yehowa sanandrösa khö Yobi. (Yobi 1:9-12) Itandraigö Yesu Satana (Mataiʼo 4:1-10) Me no tobali Razo Yesu me döfi 1914, ibörögö ”isuwö” zi no tebayoini si toröi ba gulidanö Satana. (Famaʼeleʼö 12:17) Lö manö si tebato wasuwötania andrö irugi maʼökhö börö me iforege Satana ba wamaelungu niha nibayoini awö mbiri-biri böʼö. Enaʼö tola möna ita moguna tarorogö wamatida enaʼö böi awuwu. Ba duho nifatunöda andre taʼila hadia zinangea tafalua.
ARÖUʼÖ WAYAWASA
4. Hana wa lafotöi Zatana sebua fayawasa?
4 Ebua wayawasa Gafökha. Malaʼika si lö sökhi andre lö ataʼu ia ba wolawa famatörö Lowalangi, idönisi dödö danö böʼö ba wamosumange yaʼia, tenga Yehowa. Andrö tefaudu na lafoʼamaedola ia sebua fayawasa. Sambua lala enaʼö möna ita ba wolawa Satana yaʼia daʼö, na lö khöda fayawasa ba tafalua wangide-ngideʼö.—Baso I Fetero 5:5.
5, 6. (a) Tutunö hadia mbörö wa lö fasala na so khöda waʼomuso dödö. (b) Hana wa tobali famaʼala na so wayawasa? Beʼe duma-duma moroi ba Zura Niʼamoniʼö.
5 Faböö ira wayawasa waʼomuso dödö ba zi no ifalua. Moloʼö sambua buku, niha si no manöndra faʼomuso dödö abeʼe dödönia ba nifaluania. Faʼomuso dödö andrö tola göi lafotöi ia ”faʼahono dödö börö me no tafalua zi sökhi mazui niha böʼö zamalua”. Lö fasala na so khöda waʼomuso dödö simane daʼö. Imane Faulo khö ndra talifusö ba Desalonika, ”Tobali masuno ndraʼaga ba mbanua Lowalangi misa, ba khömi andrö, ba wolohi andrö fefu, khömi, ba bawamakao andrö, nitahami.” (II Tesalonika 1:4) Na omuso dödöda na so halöwö nifalua niha böʼö, mazui omuso dödöda ba halöwö nifaluada, lö fasala daʼö, so gunania khöda. Böi aila ita hadia zi no irai alua ba nösi nomoda, mazui ba mbanua si tumbu yaʼita.—Halöwö Zinenge 21:39.
6 Faʼomuso dödö si tenga yaʼia, fagölö ira no so khöda wayawasa. fayawasa eluahania, so ba dödönia wa abölö onekhe ia moroi ba niha böʼö, hewaʼae na lö hadöi si no ifalua. Tola ifakiko wahuwusada ba niha hegöi khö Yehowa na so khöda wayawasa. Abao dödöda na labeʼe khöda degu-degu, mazui lö omasi ita tafondro-ndrongo. (Zinunö 141:5) Fatuwu Yehowa wayawasa. (Hezekieli 33:28; Gamosi 6:8) Omuso dödö Zatana na fayawa niha börö me simanö gamuatania. Khalaigö hewisa waʼomuso dödö Gafökha me fayawa Nimerodi, Faraʼo, ba Abisalomi! (I Moze 10:8, 9; II Moze 5:1, 2; II Zamueli 15:4-6) Fayawasa zamakiko fahuwusa Gaʼino khö Lowalangi. Iʼamenesi Gaʼino Yehowa, ba börö me so khönia wayawasa lö ifondro-ndrongo. Abeʼe högönia iʼosiwawöi wamangelama Yehowa, lua-luania ifalua horö.—I Moze 4:6-8.
7, 8. (a) Hadia geluahania fanuno banua si toröi yaʼita, ba hadia gamakhaitania ba wayawasa? (b) Tutunö hewisa wayawasa wa tola ifabali dödö mbanua niha keriso.
7 Oya zi lö sökhi salua ba ginötö andre börö wayawasa. Duma-dumania, na so wayawasa lua-luania asese tasuno-suno mbanua sitoröi yaʼita. Moloʼö sambua buku, fanuno banua si toröi yaʼita eluahania fatuwu ita mbanua niha böʼö ba so khöda wangenahö dödö. Baero daʼö, fanuno banua si toröi yaʼita eluahania ”so khöda dödö faböʼö waʼonekhe ba faʼatua-tuada moroi ba niha böʼö, mazui abölö sökhi mbanua si sambua moroi ba danö böʼö”. Na tasuno-suno mbanua si toröi yaʼita lua-luania faʼudusa, fasuwöta, ba alua wabunusa.
8 Tatu manö, amuata simane daʼö tebai so ba mbanua niha keriso. Hewaʼae simanö, tola so wayawasa ba gotalua zi fatalifusö na lö khöra fanaha tödö. Daʼö zalua ba mbanua niha keriso meföna. Börö daʼö, manofu khöra Yakobo ”He moroi wa lö atulö ba khömi, ba he moroi wagua-guasa andrö?” (Yakobo 4:1) Na fatuwu ita ba niha böʼö, na so khöda wayawasa, ba tola manö tawaʼö wehede safökhö ba dödöra. (Gamaedola 12:18) Si ndruhu-nduhu, wa fayawasa möi famabali dödö mbanua niha keriso.
9. Hewisa Zura Niʼamoniʼö wanolonia yaʼita enaʼö talawa gamuata fayawasa? (Faigi gambara ba ngaʼörö 14.)
9 Na abölö sökhi ita tawaʼö moroi ba niha böʼö, böi olifu ita wa fatuwu Yehowa ’dozi sebua fayawasa’. (Gamaedola 16:5) Moguna göi tafareso dödöda ba tasofu khöda samösa ”Hadia abölö sökhi ndraʼo moroi ba niha böʼö, mazui banuagu?” Na simanö, no olifu ita wa ”fefu soi niha ba gulidanö maʼasagörö si ha sambua böröta”. (Halöwö Zinenge 17:26) Si ndruhunia fefu ita ha sambua soi börö me ha samösa wurugöda Adamo. Lö faduhu dödöda na tamane faböʼö-böʼö wamazökhi Lowalangi banua niha. Na so ba dödöda zimane daʼö tola iʼogunaʼö Afökha ba wamabali fahasara dödö mbanua niha keriso. (Yohane 13:35) Enaʼö möna ita ba wolawa Satana, taʼaröuʼö gamuata fayawasa.—Gamaedola 16:18.
ARÖUʼÖGÖ BA WAʼOMASI GANAʼA BA FANGOMASIʼÖ ÖSI GULIDANÖ
10, 11. (a) Hana wa alio adöni dödöda ba wangomasiʼö ösi gulidanö? (b) Börö me iʼomasiʼö nösi gulidanö andre Dema, hadia lua-luania?
10 Satana ba no ”salawa gulidanö andre” yaʼia zamatörö. (Yohane 12:32; 1 Yohane 5:19) Oya nifalua ba gulidanö andre si lö tefaudu ba Zura Niʼamoniʼö. Lö fefu zi so ba gulidanö andre lö sökhi. Faduhu dödöda wa iʼodela Satana gisö-isö dödöda ba gulidanö andre ba wamaelungu yaʼita enaʼö tafalua horö. Idönisi dödöda satana ba wangomasiʼö ösi gulidanö andre irege areu ita ba wamosumange Yehowa.—Baso I Yohane 2:15, 16.
11 Ato niha keriso meföna zangomasiʼö ösi gulidanö andre. Duma-dumania, Faulo zangombakha, ”Noa sa iröido Dema andrö me no omasi ia götö daʼe”, (II Timoteo 4:10) Lö nifatunö Zura Niʼamoniʼö hadia zomasi Dema ba gulidanö andre irege iröi Waulo. Tola manö abölö iʼomasiʼö wangalui anaʼa moroi ba wamosumange Yehowa. Lua-luania, Aheta khönia ginötö ba wangai halöwö si sökhi khö Yehowa. Hadia tola ibeʼe khönia zabölö sökhi ulidanö andre? Tebai. Lö si tola molawa howu-howu nibeʼe Yehowa!—Gamaedola 10:22.
12. Tutunö hewisa wangogunaʼö Gafökha ”wamaelungu andrö ba ganaʼa”.
12 Tola göi alua khöda zimane daʼö. Yaʼita niha keriso omasi ita wangalui soguna khöda hegöi soguna ba nösi nomoda. (I Timoteo 5:8) Aefa daʼö, omasi göi Yehowa na so khöda waʼomuso dödö, andrö wa ibeʼe waradaiso si sökhi khö Gadamo faoma Khawa. (I Moze 2:9) Tobali, iʼogunaʼö Afökha waʼomasi daʼö ba wamaelungu yaʼita. Ba wamalua yaʼia, iʼogunaʼö wondröni dödö ”wamaelungu andrö ba ganaʼa”. (Mataiʼo 13:22) Ato niha sangumaʼö na oya ganaʼa daʼö mbörö waʼohahau dödö niha. Na so ba wangera-ngerada zimane daʼö, tola taya wahuwusada khö Yehowa. Ifangelama ita Yesu, ”Tebai enoni zi darua niha, ma faʼudu ia ba zi samösa ba iʼomasiʼö zi samösa, ba mazui molemba ia ba zi samösa, ba iʼositengagö zi samösa. Tebai enoni Lowalangi ami ba enoni ganaʼa göi.” (Mataiʼo 6:24) Na tagohi wangalui kefe, tenga Yehowa nifosumangeda saʼe. Daʼö zabölö omasi Zatana. Böi tawaʼö dödöda me no so gefegu tola uʼöli manö hadia ia, abölö sökhi wangalui kefe moroi ba wangai halöwö Yehowa. Enaʼö tola talawa Zatana, böi fasala wangera-ngerada ba wangogunaʼö kefe.—Baso I Timoteo 6:6-10.
LAWA GAMUATA WOHORÖ
13. Hadia manö niwaʼö niha sanandrösa ba wangowalu ba fohorö?
13 Tandrawa böʼö nibeʼe Zatana yaʼia daʼö amuata wohorö. Ato niha sangumaʼö na lö faröi ita khö woʼomoda mazui fangowalu si sökhi, ha niha meföna zamalua daʼö, lö moguna khöda iadaʼa. Duma-dumania, samösa ndra alawe sanunö sangumaʼö, lö duhu wa lö manö faröi-röi ita ba zi samösa niha. Imane nasa, ”samösa lö niʼilagu niha si lö faröi mazui somasi lö faröi.” Samösa ndra matua imane, ”Lö faduhu dödögu wa tewöwöi ita enaʼö lö faröi ba zi samösa niha sagötö faʼauri.” Omuso dödö Zatana na ato niha salawa sekola zangumaʼö simane daʼö sanandrösa ba wangowalu. Lö omasi Gafökha na so zangowalu si sökhi, ba lö omasi ia na anau gölö. Enaʼö tola möna ita ba wolawa Afökha, dataʼoʼö goi-goi Yehowa sanandrösa ba wangowalu.
14, 15. Na adöni dödöu ba wamalua amuata wohorö, hadia zi tola öfalua?
14 Fefu ita, he si no mangowalu, hegöi si lö sangowalu, moguna taʼodödögö ba wolawa amuata wohorö. Hadia aoha wamalua daʼa? Löʼö! Duma-dumania, te örongo-rongo niwaʼö ndra awöu ba zekola wa tola lafalua wohorö gofu haʼökhö manö zomasi ira. Telawaʼö-waʼö zui wa tola mohorö ira ba gambara nifaigi-faigira (sexting), faoma lafaʼoheʼö khö nawöra gambara mazui fehede wohorö. Ba zi haʼuga soi, sexting fagölö ira wameʼe gambara ndraono samalua horö. Imane Sura Niʼamoniʼö, ”Fefu ngawalö horö nifazökhi niha, ba baero mboto, ba sohorö, ba bambotonia ifazökhi horö.” (I Korindro 6:18) Fökhö tanö böʼö si tohare börö wamalua horö, oya iʼaʼasogö wamakao ba faʼamate. Baero daʼö, ato ndraono si bohou ebua si no irai mohorö fatua lö mangowalu ira lafaduhuʼö wa maniasa ira me no lafalua gamuata daʼö. Omasi Zatana na faduhu dödöda wa lö fasala na tasawö goi-goi Lowalangi. Lua-lua wangera-ngera simane daʼö, ato zelungu ”ba walimosa horö.”—Heberaiʼo 3:13.
15 Na adöni dödöu ba wamalua amuata wohorö, hadia zi tola öfalua? Törö tödöu wa so zo amböta ndraʼugö. (Roma 7:22, 23) Andrö waʼabölö moroi khö Lowalangi. (Filifi 4:6, 7, 13) Aröuʼö ndraʼugö ba zondrönisi tödöu wamalua amuata wohorö. (Gamaedola 22:3) Na so zanandraigö, anemai timbagö.—I Moze 39:12.
16. (a) Hadia niwaʼö Yesu me itandraigö ia Afökha? (b) Hadia zi tobali famahaʼö khöda moroi ba duma-duma nibeʼe Yesu?
16 Yesu zi tobali duma-duma si sökhi khöda. Lö telimo ia ba nifabuʼu Zatana. Lö omasi iʼera-era tödönia. Iʼanemai itema li Zatana, ”No so ba zura”. (Baso Mataiʼo 4:4-10.) Aboto ba dödö Yesu Daromali Lowalangi, andrö wa tola itötöi ayati zura me itandraigö ia Satana. Enaʼö tola talawa Zatana, anemai timbagö na so wondröni dödö ba wamalua amuata wohorö.—I Korindro 6:9, 10.
BÖI FARÖI ENAʼÖ SI MÖNA NDRAʼUGÖ
17, 18. (a) Hadia manö dandrawa niʼogunaʼö Gafökha? Ba hana wa lö ahöli dödöda? (b) Hadia zalua khö Zatana? Ba hadia gangetula nihalöu?
17 Fayawasa, faʼomasi ganaʼa, ba fohorö, si tölu ngawalö daʼa ha duma-duma ba dandrawa nibeʼe Zatana. Oya nasa dandrawa tanö böʼönia. Duma-dumania, so samösa niha keriso niʼoʼaya nösi nomonia mazui awönia ba zekola. So göi zi toröi ba mbanua si lö manehegö halöwö fanuriaigö. Lö ahöli dödöda na so wanandraigö simane daʼö. Ifangelama ita Yesu, ”Ba dozi ira dania faʼudu khömi, börö döigu. Ba sanau ölö irugi gamozua daʼö niʼorifi.”—Mataiʼo 10:22.
18 Hewisa enaʼö möna ita ba wolawa Satana? Imane Yesu, ”Ba wa anau gölömi dania, misöndra haremi nosomi.” (Luka 21:19) Tebai lakalaisi ita niha gulidanö sagötö faʼara. Lö si tola mangetuʼö fahuwusada khö Lowalangi, baero ita samösa. (Roma 8:38, 39) He na mate zoloʼö khö Yehowa, tenga daʼö geluahania no möna Zatana. Ifuli isusugi ira Yehowa. (Yohane 5:28, 29) Lö hadöi fanötöna khö Zatana ba zi so miföna. Na no tefakiko gulidanö si lö sökhi andre, tetiboʼö Gafökha ba mbawa gawuwukha hönö fakhe waʼara. (Famaʼeleʼö 20:1-3) Ba gafuriata Wamatörö Keriso si Hönö Fakhe, ba ”teʼefaʼö Gafökha moroi ba gurunga” iforege wamaelungu niha si no moʼahonoa fondrege zafuria. Aefa daʼö labunu Gafökha. (Famaʼeleʼö 20:7-10) Si ndruhu-ndruhu wa lö fanötöna khö Gafökha. Tobali, so khöda wanötöna ba zi so föna. Böi bato wolawa Satana, ba abölöʼö ndraʼugö ba wamati. Tola möna ndraʼugö ba wolawa Satana!