Faʼaurida Enaʼö Tefaudu ba Duma-duma Wangandrö Nibeʼe Yesu—Faosatö 2
’Noa sa iʼila amami andrö, hadia zoguna khömi.’—MATAIʼO 6:8.
1-3. Hana wa faduhu dödö dalifusöda ira alawe wa iʼila Yehowa zoguna khönia?
LANA, samösa perintis biasa, lö olifu ia hadia zi no irai alua khönia me möi ia ba Jerman me döfi 2012. Iʼila wa no itema Yehowa dombua wangandrönia. Itörö kereta api numalö ba naha göfa sihombo, ilau mangandrö enaʼö falukha ia niha somasi fahuhuo ba Daromali. Me no irugi naha göfa sihombo, awena iʼila wa lö alua mofanö ia ba zi maʼökhö daʼö. Iʼandrö wanolo khö Yehowa börö me arakhagö ahori gefenia lö nahania wemörö.
2 Awai sibai mangandrö ia, so samösa ndra matua sohede khönia, ”Yahowu Lana, hana wa so ndraʼugö ba daʼa?” Si ndruhunia ira matua andre awönia sekola mböröta. Mofanö ia ba Afrika Selatan ba lafasao ia ira satuania. Ba ginötö ifatunö hadia zalua khönia, satua ndra matua no mege laʼandrö khö Lana enaʼö toröi ia ba nomora. Oya wanofu-nofura sanandrösa ba halöwö hegöi ba zi faduhu dödö Lana.
3 Moluo mahemolu me no aefa manga, itema wanofura Lana moroi ba Zura Niʼamoniʼö. Iʼandrö numero telefo khöra enaʼö tola möi ndra talifusöda ba wamahaʼö yaʼira. Mangawuli ia si fao faʼomuso dödö, ba lö ibato merintis. Faduhu dödönia wa no ifondro-ndrongo wangandrönia Yehowa, iʼila hadia zoguna khönia, ba ibeʼe wanolo.—Zinunö 65:3
4. Hadia manö wangandrö nifatunöda?
4 Ba ginötö so gabula dödöda, talau mangandrö khö Yehowa enaʼö itolo ita, ba ifondro-ndrongo wangandröda. Omasi Yehowa na mangandrö ita khönia. (Zinunö 34:17; Gamaedola 15:8) Hizaʼi, moroi ba duma-duma wangandrö no ifahaʼö ita Yesu hadia zinangea taʼandrö. Ba duho daʼa, so öfa ngawalö zinangea tatutunö moroi ba duma-duma wangandrö Yesu si tola manolo yaʼita enaʼö lö faröi khö Yehowa.—Baso Mataiʼo 6:11-13.
’BEʼE GÖMA SIRUGI MAʼÖKHÖ ANDRE’
5, 6. Hana wa ifahaʼö ita Yesu ba wangandrö ”soguna khöma” hewaʼae no abönö zoguna khöda samösa?
5 Ifahaʼö ita Yesu ba wangandrö ”soguna khöma”, tenga ha soguna ”khögu”. Victor, samösa satua simöi ba mbanua niha keriso sakali önö waŵa ba Afrika imane, ”Asese uʼandrö saohagölö khö Yehowa börö me lö mabusi dödöma hadia zoguna khöma ba hezo toröiga. Ero maʼökhö laʼoromaʼö waʼomasira ira talifusö ba wamönökhi soguna khöma. Tobali, ulau mangandrö enaʼö tola lataögö gabula dödö ba wangalui soguna khöra.”
6 Tola manö no abönö zoguna khöda. Tobali, ato ndra talifusöda sambö soguna mazui si no göna famakao. Mangandrö ita salahira ba tabeʼe göi khöra wanolo. Tola göi tabeʼe dolo tolo si no aoha gölö fameʼe ba halöwö nifalua gangowuloa ba zi sagörö ulidönö. Dolo tolo si no tabeʼe andrö tola tobali fanolo ndra talifusöda si no ambö-ambö.—I Yohane 3:17.
7. Hewisa wamahaʼö Yesu ita enaʼö ”böi taʼabusi tödö zoguna khöda mahemolu”?
7 Me no aefa ifahaʼö ita Yesu duma-duma ba wangandrö, iʼombakhaʼö khöda enaʼö böi tabusi tödö sibai ba wangalui kefe. Imane wangumaʼö na Yehowa manö tola irorogö ndruʼu si tumbu ba danö, ”ba tenga mendrua manö imanö khömi, yaʼami sambö famati? Andrö böi mibusi dödömi ba böi miŵaʼö, . . . ’Hadia maʼa?’” Aefa daʼö, ”böi miʼabusi tödö zoguna mahemolu.” (Mataiʼo 6:30-34) Tahonogö dödöda ba zi no so. Duma-dumania, tola mangandrö ita enaʼö so nahiada waʼatoröi, halöwö si tola mombönökhi soguna ba nomo, enaʼö so khöda waʼatua-tua ba wangaʼi angetula ba ginötö mofökhö ita.
8. Hadia nitörö tödöda moroi ba wehede Yesu ’öma sirugi maʼökhö’? (Faigi gambara ba ngaʼörö 28.)
8 Fehede Yesu sanandrösa ’öma sirugi maʼökhö’ enaʼö itörö tödöda wehede Yesu si no irai iwaʼö, ”Tenga ha ba gönia auri niha, ba ngawalö li fefu, siʼotarai mbawa Lowalangi, auri ia.” (Mataiʼo 4:4) Böi taböhöli wangandrö khö Yehowa enaʼö ifahaʼö ita ba ibeʼe zoguna ba wahuwusada khönia.
’EFAʼÖ KHÖMA HORÖMA SIMANE FOʼÖMÖ’
9. Hana wa horö andre fagölö simane foʼömö?
9 Hana wa ifagölösi horö amaedola woʼömö? (Mataiʼo 6:12; Luka 11:4) The Watchtower döfi 1951 imane wangumaʼö ba ginötö tafalua horö, no amaedola so gömöda khö Yehowa. Si ndruhunia, moʼömö ita wangomasiʼö Yehowa ba taʼoʼö hadia niwaʼönia. Na tafalua horö föna Lowalangi, no tabeʼe khönia zi tenga sinangea itema. Na omasi Yehowa, tola manö iʼetuʼö dalu wahuwusada khönia. The Watchtower imane nasa, ”na tafalua horö, eluahania lö taʼomasiʼö Lowalangi.”—I Yohane 5:3.
10. Hana wa tola iʼefaʼö horöda Yehowa, ba hewisa dödöda?
10 Taʼandrö saohagölö khö Yehowa börö me ibeʼe nononia Yesu tobali höli ba wangefaʼö horöda! Moguna taʼandrö wangefa horö ero maʼökhö. Hewaʼae no mate Yesu 2.000 fakhe ba zi lalö, tola tarasoi höli nibeʼe andre irugi maʼökhö. Moguna taʼandrö sibai saohagölö khö Yehowa me no ibeʼe mbualania höli sebua khöda. Lö hadöi niha si tola mamuʼa höli, sangefaʼö yaʼita ba horö hegöi faʼamate. (Baso Zinunö 49:8-10; I Fetero 1:18, 19.) Ngawua wehede ”efaʼö khöma horöma” zi tola mamasugi ba dödöda wa tenga ha yaʼita samösa zangogunaʼö höli andre, tobali ira talifusöda göi ba zi sagörö ulidanö. Aboto ba dödöda, wa omasi Yehowa na taʼangeraigö ndra talifusöda hegöi fahuwusara khönia. Moroi ba ngawua wehede andrö, aboto ba dödöda wa ira talifusöda andrö göi niha si lö moʼahonoa simane yaʼita. Andrö, moguna taʼefaʼö zalara. Daʼa zangoromaʼö wa taʼomasiʼö ira ba taʼandrö saohagölö khö Lowalangi me no iʼefaʼö horöda.—Kolose 3:13.
11. Hana wa moguna taʼefaʼö zala niha si fasala khöda?
11 Börö me lö moʼahonoa ita, tola manö abua khöda wangefaʼö zala ndra talifusöda. (III Moze 19:18) Na tadunö-dunö zala ndra talifusöda, tola manö laʼoʼawögö ita hizaʼi lö fahasara dödö ba gangowuloa niha keriso. Na lö taböhöli gamuata simane daʼö, daʼa zangoromaʼö wa lö hadöi ba dödöda höli si no ibeʼe Lowalangi khöda. Lua-luania, lö gunania khöda höli nibeʼe Lowalangi. (Mataiʼo 18:35) Na lö taʼefaʼö zala niha si fasala khöda, lö göi iʼefaʼö zalada Yehowa. (Baso Mataiʼo 6:14, 15.) Baero daʼö, na omasi ita iʼefaʼö zalada Yehowa, moguna taʼaröuʼö ita moroi ba horö si fatuwu ia.—I Yohane 3:4, 6.
”BÖI OHE NDRAʼAGA BA WANANDRAIGÖ”
12, 13. (a) Hadia zalua khö Yesu me aefa tebayagö ia idanö? (b) Na aekhu ita ba wanandraigö, hana wa tebai tatahigö niha böʼö? (c) Hadia zangoromaʼö me lö faröi Yesu irugi ba waʼamate?
12 Ngawua wehede ”böi ohe ndraʼaga ba wanandraigö” zi tola mamasugi ba dödöda hadia zi no alua khö Yesu me no aefa tebayagö ia idanö. Iʼohe ia eheha Lowalangi ba danö si mate ”enaʼö itandraigö ia Afökha”. (Mataiʼo 4:1; 6:13) Hana wa itehegö Yehowa alua daʼö? Moʼamakhaita daʼa ba wanofu nibeʼe Gafökha me no aefa lalawa wamatörö Yehowa ira Adamo faoma Khawa. Duma-dumania, hadia lö tefaudu wowöwöi Lowalangi niha gulidanö? Na itandraigö ”Afökha” niha si no moʼahonoa, hadia lö faröi ira khö Lowalangi? Hadia ohahau dödö niha gulidanö na tenga Lowalangi zamatörö yaʼira? (I Moze 3:4, 5) Me lö faröi Yesu khö Lowalangi daʼö zangoromaʼö wa so faya Gafökha. Fefu wanofu daʼö tola tesöndra wanemalinia, ba zi so föna, fefu zi so ba zorugo hegöi ba gulidanö awena laʼila wa ha famatörö Lowalangi zabölö sökhi.
13 Yehowa ba no niʼamoniʼö, lö irai itandraigö niha ba zi lö sökhi. Afökha andrö ”sanandraigö” (Mataiʼo 4:3) Oya lala niʼogunaʼö Gafökha ba wanandraigö yaʼita. Hizaʼi, moguna tafili. Tola tahalö gangetula samösa hadia tatimbagö wanandraigö nibeʼe Gafökha andrö mazui löʼö. (Baso Yakobo 1:13-15.) Me itandraigö Yesu Afökha, itimbagö daʼö Yesu ba itötöi nösi Daromali Lowalangi. Lö faröi ia khö Lowalangi. Hizaʼi, lö awöli-wöli Gafökha. ”iböhöi ia ua, ifolombase ginötö” ifuli iʼalui ginötö si tefaudu ba wanandraigö Yesu. (Luka 4:13) Tobali, gofu hadia nifalua Gafökha, lö faröi Yesu khö Lowalangi. Iforomaʼö wa niha soʼahonoa tola lö faröi khö Lowalangi he ba ginötö göna ira fanandraigö. Iadaʼa oya lala niʼogunaʼö Gafökha ba wanandraigö ira nifahaʼö Yesu hegöi yaʼugö samösa.
14. Hadia zinange tafalua enaʼö tola tatimba wanandraigö?
14 Fanofu soʼamakhaita ba wamatörö Yehowa moguna taʼila wanema li. Itehegö nasa Yehowa khö Gafökha ba wanandraigö yaʼita. Lö ’iʼohe ita ba wanandraigö’ Yehowa. Faduhu dödö Yehowa wa lö faröi ita khönia, ba omasi ia itolo ita. Hizaʼi, lö irai ifaso ita Yehowa wamalua hadia zatulö. Tobali, ibeʼe khöda ginötö ba wangai angetula hadia faröi ita khönia mazui löʼö. Enaʼö böi aekhu ita ba wanandraigö, so dua ngawalö zi tola tafalua: tahatöʼö ita khö Lowalangi ba böi faröi ita ba wangandrö. Hewisa Yehowa wanema li fangandröda?
15, 16. (a) Hadia manö wanandraigö sinangea tatimbagö? (b) Haniha nitahigöda na aekhu ita ba wanandraigö?
15 Ibeʼe gehehania Khöda Yehowa enaʼö so khöda waʼabölö ba wolawa fanandraigö nibeʼe Gafökha. Aefa daʼö ibeʼe wamangelama khöda Yehowa ba Zura Niʼamoniʼö hegöi gangowuloa niha keriso enaʼö böi teʼala waʼaurida. Duma-dumania, no ifangelama ita enaʼö böi tahorigö ginötöda, kefe, ba faʼabölöda ba zi lö moguna. Espen hegöi Janne toröi ira ba Eropa. No hauga fakhe, merintis biasa ira ba mbanua si lö ato sanuriaigö. Me tumbu khöra ndraono, labato merintis, iadaʼa so darua khöra ndraono. Imane Espen, ”asese mangandrö ndraʼaga khö Yehowa enaʼö böi aekhu ndraʼaga ba wanandraigö, börö me lö oya ginötö niʼogunaʼöma iadaʼa ba wanuriaigö. Maʼandrö wanolo khö Yehowa enaʼö aro ndraʼaga ba wamati ba so khöma wa owölö-ölö ba wanuriaigö.”
16 Fanandraigö tanö böʼö sinangea tatimbagö yaʼia daʼö wamaigi gambara si lö baga. Na aekhu ita ba wanandraigö daʼa, böi ta tahigö Gafökha. Hana? Börö me ulidanö si so Afökha iadaʼa lö ifaso ita ba wamalua si sala. So niha samaigi gambara si lö baga börö me lö itimbagö wangera-ngera si lö sökhi. Tobali, ato ndra talifusöda zo timbagö fangera-ngera si lö sökhi andre, ba tola göi tafalua zimane daʼö.—I Korindro 10:12, 13.
”EFAʼÖGA BA GAFÖKHA”
17. (a) Hewisa wangoromaʼöda wa omasi enaʼö iʼefaʼö ita Yehowa ’moroi ba danga Gafökha?’ (b) Hadia waʼomuso dödö si lö aratö alua?
17 Hewisa wangoromaʼöda wa omasi enaʼö iʼefaʼö ita Yehowa ’moroi ba danga Gafökha?’ Böi fao ita ”awö niha gulidanö” mazui ”böi taʼomasiʼö nösi gulidanö, ba ma hadia ia, zi so ba gulidanö”. (Yohane 15:19; I Yohane 2:15-17) Omuso sibai dödöda ba ginötö ihori Yehowa dania Gafökha hegöi gulidanö si lö sökhi andre! Fatua lö alua daʼa, moguna tatörö tödöda wa ebua wönu Gafökha ba niha gulidanö ”me no iʼila, lö ara nitehe khönia”. Oya wanandraigö nibeʼe Gafökha enaʼö taböhöli wamosumange Yehowa. Moguna mangandrö ita khö Yehowa enaʼö irorogö ita moroi ba danga Gafökha.—Famaʼeleʼö 12:12, 17.
18. Hadia zinangea öfalua enaʼö tola teʼorifi ndraʼugö ba ginötö tehori dania gulidanö si so Afökha?
18 Hadia omasi ndraʼugö auri ba gulidanö si lö Afökha? Böi bato wangandrö enaʼö tohare Mbanua Lowalangi, teʼamoniʼö döi Lowalangi, ba alua gohitö dödönia ba gulidanö. Böi aetu öʼandrö wanolo khö Yehowa enaʼö irorogö ndraʼugö ba ibeʼe hadia ia zi tola manolo yaʼugö enaʼö lö faröi khönia. Odödögö enaʼö faʼaurimö tefaudu ba duma-duma wangandrö nibeʼe Yesu.