Böi Mangoloi Dödöda Wamosumange Yehowa

1, 2. Hana wa iʼomasiʼö Marata Yesu, tobali hadia gamuata zangoromaʼö wa yaʼia andre niha si lö moʼahonoa?

NA ÖRONGO döi Marata talifusö Lazaro, hewisa wo khalaigömö yaʼia? Idunö-dunö khöda Sura Niʼamoniʼö wa Marata si fahuwu khö Yesu, ba iʼomasiʼö ia Yesu. Tatu manö tenga ha yaʼia niʼomasiʼö Yesu, iʼomasiʼö göi ndra alawe tanö böʼö simane Maria inania ba Maria talifusö Marata. (Yohane 11:5; 19:25-27) Hana wa tetötöi döi Marata ba zura Mataiʼo, Mareko, Luka ba Yohane?

² Yesu iʼomasiʼö Marata börö me sökhi lagunia, oböwö, ba owölö-ölö wohalöwö, töra-töra me so khönia wamati saro. Faduhu dödönia wamahaʼö Yesu, ba lö aombö dödönia wa Yesu andrö Mesia si no ifabuʼu Lowalangi. (Yohane 11:21-27) Hewaʼae simane daʼö, Marata niha si lö moʼahonoa. Hulö simane yaʼita asese ifalua zala. Duma-dumania, samuza inötö möi Yesu khöra, lö omasi Marata lagu dalifusönia Maria, imane khö Yesu moguna öbeʼe mene-mene khö Maria andrö. Imane Marata, ”He Tua, hadia, lö ba dödöu, wa ibeʼe manö sangai halöwö ndraʼo gaʼagu, ha yaʼo? waʼö ae khönia, enaʼö ibabaya göi, itolodo.” (Baso Luka 10:38-42.) Hana wa iwaʼö wehede daʼö Marata, ba hadia zi tobali famahaʼö khöda moroi ba wehede Yesu?

MANGOLOI DÖDÖ MARATA

3, 4. Hana wa isuno Maria Yesu, ba hadia wamahaʼö si tola ihalö Marata? (Faigi gambara ba ngaʼörö 22.)

³ Mangandrö saohagölö Yesu khö Marata ba Maria börö me no lakaoni ia ba nomo. Iʼogunaʼö ginötö daʼö ba wangombakha khöra si ndruhu. Mudadao Maria ba zinga Yesu ba ’ifondro-ndrongo niwaʼö Yesu.’ Omasi ifahaʼö ia. Tola göi ifondro-ndrongo Marata hadia niwaʼö Yesu. Tatu manö isuno ia Yesu na iröi halöwönia ba ifondro-ndrongo wamahaʼö nibeʼenia.

⁴ Hizaʼi, no mangoloi dödö Marata ba arörö ia ba wondrino gö. Me lö ilului khönia Maria ba wombabaya halöwö, mofönu ia ba mangadu ia khö Yesu. Aboto ba dödö Yesu wa arörö Marata ba wombabaya halöwö, ihaogö Yesu wangumaʼö khönia, ”He Marata! He Marata! Waʼoya wangabu dödöu, ba oya ngawalö wa lö ahonoʼö.” Iwaʼö Yesu khö Marata enaʼö böi oya ngawalö gö nirino. Yesu isuno Maria börö me omasi ifondro-ndrongo wamahaʼönia. Imane wangumaʼö, ”No ituyu khönia zi sökhi andrö Maria, lö laheta khönia daʼö.” Tola manö olifu Maria hadia gö niʼa meluo daʼö, hizaʼi lö irai olifu ia hadia wamahaʼö nibeʼe Yesu hegöi me isuno ia Yesu. Töra 60 fakhe aefa daʼö, isura Yohane wa ”omasi Yesu Marata andrö ba talifusönia.” (Yohane 11:5) Wehede daʼa zangoromaʼö wa itema Marata mene-mene nibeʼe Yesu, ba lö faröi ia wamosumange Yehowa sagötö faʼaurinia.

5. Hana waʼabua khöda ba ginötö andre wamosumange Yehowa, ba hadia wanofu nifatunöda iadaʼa?

⁵ Aboto ba dödöda wa oya zondrönisi fangera-ngerada ba ginötö andre enaʼö mangoloi dödöda wamosumange Yehowa, faböʼö sibai me götö föna. The Watchtower 15 September 1958, ifasugi ba dödöda enaʼö böi mangoloi wangera-ngerada wamosumange Yehowa ba ngawalö fakake niʼasogö niha gulidanö. Ero maʼökhö oya fakake si bohou sawena lafazökhi, simane koran, radio, filem, tivi, ba oya danö böʼönia nasa. Moloʼö The Watchtower andrö, itugu ahötö ita ba waʼatua danö, ”itugu oya ngawalö zi tola mondrönisi fangera-ngerada.” Si ndruhu-ndruhu no alua daʼa! Simane nifalua Maria, hadia zi tola tafalua enaʼö böi mangoloi dödöda wamosumange Yehowa?

BÖI OMASIʼÖ NÖSI GULIDANÖ

6. Hewisa nono mbanua Yehowa ba wangogunaʼö fakake nifazökhi niha gulidanö?

⁶ Ono mbanua Yehowa no laʼogunaʼö fakake niʼasogö niha gulidanö ba wangombakha turia somuso dödö ba niha fefu. Duma-dumania, iʼotarai me lö salua wasuwöta si föföna irugi me no alua, laforomaʼö ”Drama Foto Penciptaan.” No lahaogö wamazökhi video andre, irege teturiaigö duria somuso dödö ba niha fefu. Ba gafuriata ”Drama Foto” itutunö wa so ginötö si sökhi ba safönu faʼohahau dödö na mamatörö Yesu ba gulidanö. Aefa daʼö, laʼogunaʼö radio ba wanuriaigö Mbanua Lowalangi ba niha fefu. Ba ginötö andre, taʼogunaʼö komputer hegöi Internet ba wanuriaigö Mbanua Lowalangi ba zi sagörö ulidanö.

7. (a) Hana wa möi famaʼalada na taʼomasiʼö nösi gulidanö? (b) Hadia zinangea taʼangelamaisi? (Faigi zi no musura ba gahe zura.)

⁷ Sura Niʼamoniʼö zamasugi ba dödöda enaʼö böi taʼomasiʼö nösi gulidanö. (Baso I Korindro 7:29-31.) Lö fasala na taʼogunaʼö ia, hizaʼi tola ihori ginötöda. Duma-dumania, omasi ita faʼolaraga, mombaso buku, wamaigi tivi, möi manörö-nörö, mowöli, mazui arörö ita ba wangalui fakake sawena lafazökhi niha gulidanö. So zomasi fatelefo, facebook ba danö böʼönia. Daʼö fefu zondrörö yaʼita irege mangoloi dödöda ba wamosumange Yehowa.a (Faigi zi no musura ba gahe zura.) (Zangombakha 3:1, 6) Na oya ginötö niʼogunaʼöda ba zi lö karua, tola manö lö oya ginötöda ba wamalua somasi Lowalangi.​—Baso Efeso 5:15-17.

8. Hana wa moguna taʼoʼö mene-mene moroi ba Zura Niʼamoniʼö enaʼö böi taʼomasiʼö nösi gulidanö?

⁸ Omasi Zatana iʼasogö fefu hadia ia ba wondrönisi tödöda ba nösi gulidanö andre, irege mangoloi dödöda wamosumange Yehowa. No ifalua Satana daʼa me götö föna, ifalua göi ba ginötöda andre. (II Timoteo 4:10) Tobali, böi aetu-aetu tafareso wangera-ngerada sanandrösa ba wangogunaʼöda ösi gulidanö andre ba moguna tafalalini wangera-ngerada. Sura Niʼamoniʼö zangombakha khöda enaʼö böi taʼomasiʼö nösi gulidanö. Hizaʼi, moguna tarorogö waʼomasida khö Yehowa. Na tafalua daʼa, aoha khöda ba wamalua somasi Yehowa ba itugu ahatö ita khönia.​—I Yohane 2:15-17.

OSAMBUAʼÖ WANGERA-NGERAU BA ZABÖLÖ MOGUNA

9. Hadia mene-mene nibeʼe Yesu khö ndra nifahaʼönia, ba hewisa wameʼenia duma-duma si sökhi khöra?

⁹ Simane me ifahaʼö Marata, ifahaʼö göi ndra nifahaʼönia enaʼö böi mangoloi dödöra ba ngawalö hadia ia. Ifarou ira enaö laʼosambuaö wangera-ngerara ba wamosumange Yehowa hegöi manuriaigö famatörönia. (Baso Mataiʼo 6:22, 33.) No ibeʼe duma-duma si sökhi khöra Yesu. Lö hadöi omonia, tanö, ba harato simane niʼokhögö niha böʼö.​—Luka 9:58; 19:33-35.

10. Hadia duma-duma nibeʼe Yesu khöda?

¹⁰ Lö omasi Yesu mangoloi dödönia ba halöwö fanuriaigö. Duma-dumania, me no aefa mamahaʼö Yesu ba Gafanauma, laʼandrö khönia enaʼö toröi ia ba mbanua andrö. Imane Yesu, ”lö tola lö uturiaigö ba mbanua böʼö göi duria somuso dödö andrö, turia mbanua Lowalangi andrö; ba daʼö sa tefatenge ndraʼo”. (Luka 4:42-44) Oya mbanua nitörö Yesu ba wanuriaigö hegöi ba wamahaʼö niha sanandrösa ba duria somuso dödö. Hewaʼae yaʼia niha soʼahonoa, hizaʼi erege dödö ba molombase ia börö me iforege wanuriaigö.​—Luka 8:23; Yohane 4:6.

11. Hadia nifalua Yesu me so ndra matua sangandrö tolo khönia? Hadia wamahaʼö nibeʼe Yesu khö ndra nifahaʼönia?

¹¹ Me ifahaʼö Yesu ndra nifahaʼönia, samösa ndra matua si möi khönia imane wangumaʼö, ”He samahaö, waʼö khö gaʼagu, enaʼö mafaosa gondröita zatua.” Lö ibusi tödö Yesu hadia zalua khö ndra matua andrö, enaʼö böi mangoloi dödönia ba wamahaʼö ndra nifahaʼönia. Iʼogunaʼö ginötö daʼö Yesu ba wamahaʼö yaʼira, enaʼö böi laʼomasiʼö ngawalö nösi gulidanö andre irege lö mangoloi dödöra ba wamosumange Lowalangi.​—Luka 12:13-15.

12, 13. (a) Hadia nifalua Yesu irege ahöli-höli dödö niha Ndrawa Heleni? (b) Hadia nifalua Yesu me iʼandrö khönia Wilifo enaʼö ifalukhaisi niha Ndrawa Heleni?

¹² Abu sibai dödö Yesu fatua lö mate ia. (Mataiʼo 26:38; Yohane 12:27) Aboto ba dödönia wa hasambalö itörö wamakao ba faʼamate. Iʼila göi wa oya halöwö sinangea ifalua fatua lö mate ia. Duma-dumania, me luo migu, 9 Nisa, iʼogunaʼö Yesu galide weʼamöi ba Yeruzalema. Ato niha sotema yaʼia tobali Razo. (Luka 19:38) Moluo mahemolu, lö ataʼu Yesu wamofanö niha samawa ba gosali.​—Luka 19:45, 46.

¹³ So niha Ndrawa Heleni si möi ba Yeruzalema ba wamalua fasa, ahöli-höli dödöra me laʼila hadia nifalua Yesu. Laʼandrö khö Wilifo enaʼö tola falukha ira khö Yesu. Lö omasi falukha Yesu khöra börö me so halöwönia sabölö moguna. Lö omasi iʼandrö wanolo enaʼö teʼefaʼö ia moroi ba nudunia. Iʼila hadia gohitö dödö Lowalangi khönia. Itutunö khö ndra nifahaʼönia wa lö aratö mate ia, ba fefu niha soloʼö khönia latehegö waʼaurira. Imane wangumaʼö, ”khö zomasi nosonia aetu ia, ba si faʼudu ba nosonia ba gulidanö andre, ba irorogö ba waʼauri si lö aetu.” Ifabuʼu göi Yesu wa niha si lö faröi ba woloʼö khönia ”ifosumange namagu” ba lasöndra waʼauri si lö aetu. Tatu manö itutunö Wilifo wehede Yesu andre ba niha Ndrawa Heleni.​—Yohane 12:20-26.

14. Hewaʼae halöwö fanuriaigö niʼofönaiʼö Yesu, hadia danö böʼö nifaluania?

¹⁴ Me so Yesu ba gulidanö, iʼofönaiʼö wamalua halöwö fanuriaigö. Hewaʼae simane daʼö, ifalua göi halöwö tanö böʼö. Duma-dumania, möi ia ba walöwa ba ibaliʼö nidanö tobali agu si sökhi. (Yohane 2:2, 6-10) Fao ia göi wemanga ba nomo zi fahuwu khönia hegöi ba niha somasi fahuhuo ba Daromali. (Luka 5:29; Yohane 12:2) Hewaʼae simane daʼö, so khönia ginötö wolombase, fangandrö, ba foʼangerönusi.​—Mataiʼo 14:23; Mareko 1:35; 6:31, 32.

”DATATOUʼÖ TOU NORO DÖDÖ ANDRÖ”

15. Hadia mene-mene nibeʼe Waulo ba niha keriso, hewisa wameʼenia duma-duma si sökhi khöda?

¹⁵ Iʼamaedolagö Waulo wa niha keriso hulö zi fagohi. Enaʼö tola larugi gamozua moguna laʼosambuaʼö wangera-ngerara. (Baso Heberaiʼo 12:1.) No ibeʼe duma-duma si sökhi Faulo. Tola manö tobali ia sondröniaʼö ba agama Yehuda so okhöta ba si tehöngö, hizaʼi iʼosambuaʼö wangera-ngerania ba zabölö moguna. No oya mbanua nitörönia ba wamalua halöwö fanuriaigö simane ba Ndrawa Garamo, Azia, Makedonia, ba Yudaia. Idöna-döna Waulo waʼauri si lö aetu ba zorugo. Imane Faulo, ”sambalö sa, olifu ndraʼodo zi no numalö, ba ugohi zi so fönagu, fagohi ndraʼo, usawa dandra andrö, luo zi möna andrö.” (Filifi 1:10; 3:8, 13, 14) Börö me lö sangowalu Waulo, daʼa zanolo yaʼia irege ’lö mangoloi dödönia’ ba wangai halöwö khö Lowalangi—I Korindro 7:32-35.

16, 17. (a) He no mangowalu ndraʼugö hegöi na löʼö, hadia duma-duma si sökhi si tola öhalö khö Waulo? (b) Hadia nifalua Mark ba Claire enaʼö oya ginötöra ba wangai halöwö khö Lowalangi?

¹⁶ Simane Faulo, so ndra talifusöda ba ginötö andre lö omasi mangowalu ira enaʼö oya ginötö niʼogunaʼöra ba wangai halöwö khö Yehowa. (Mataiʼo 19:11, 12) Niha si no mangowalu abölö oya noro dödönia moroi ba niha si lö mangowalu. He niha si no mangowalu hegöi si löʼö, yaʼita fefu ”datatouʼö tou noro dödö andrö” enaʼö böi mangoloi dödöda ba wamosumange Yehowa. Moguna taʼalösi ginötöda ba wangogunaʼö gisö-isö dödö ba gulidanö andre, enaʼö oya ginötöda ba wangai halöwö khö Yehowa.

¹⁷ Duma-dumania, Mark ba Claire, si toroi ba mbanua Wales, lalau merintis me no tama ira sekola. Me no mangowalu ira, lö laböhöli weʼamöi merintis. Tobali, omasi ira ladouʼö ginötöra ba wangai halöwö khö Lowalangi. Itutunö Mark, ”Maheta ndraʼaga ba halöwö ba mafamawa nomoma, irege fao ndraʼaga ba wamazökhi Nahia Gorahua ba zi sagörö ulidanö.” No 20 fakhe ira ba Afrika wanolo ndra talifusöda wamazökhi Nahia Gorahua Mbanua Lowalangi. Itaria ambö gefera, tobali lö faröi Yehowa ba wanolo yaʼira. Imane Claire, ”Omuso sibai dödöma me oya ginötö niʼogunaʼöma ba wamosumange Yehowa ero maʼökhö. Ato sibai zi fahuwu khöma, ba lö irai ambö zoguna khöma. Fefu zi no matehegö lö suʼa-suʼania ba waʼomuso dödö si no matema ba wangai halöwö khö Lowalangi.” Ato ndra talifusöda safönu inötö larasoi göi zimane daʼö.b—Faigi zi no musura ba gahe zura.

18. Hadia zinangea tasofu khöda samösa?

¹⁸ Hadia no owölö-ölö ndraʼugö weʼamöi manuriaigö? Hadia so halöwö sanaisi yaʼugö irege mangoloi dödöu ba wangai halöwö khö Lowalangi? Na so, hadia zinangea öfalua? Douʼö ginötöu ba wamahaʼö yaʼugö ba Zura Niʼamoniʼö. Ba duho aefa daʼa, ifatunö khöda hadia zinangea tafalua.