Ogunaʼö Lelau ba zi Sökhi

1, 2. Iʼamaedolagö lela andrö ba Zura Niʼamoniʼö hulö galitö. Hadia mbörö?

ME DÖFI 1871, akhozi gatua ba Wisconsin, Amerika Serikat. Ahori akhozi dua miliar zinanö. Töra 1.200 niha si mate. Abölö ato niha si mate ba zi samuza andre moroi ba zi lalö ba Amerika Serikat. Hezo moroi galitö andrö? Me itörö gatua kereta api, so galitö si tokana ba mbulu ndruʼu ba iraʼi gatua sebua. Itörö niwaʼö Zura Niʼamoniʼö, ”Hiza waʼide-ide galitö, ba ha waʼebua gatua itunu.” (Yak. 3:5) Hadia mbörö wa iwaʼö daʼö Yakobo?

² Imane, ”Alitö lela andrö.” (Yak. 3:6) ”Lela” andrö taʼogunaʼö na fahuhuo ita. Lela no amaedola alitö si möi famaʼala ba so lua-luania ba niha böʼö. Ifatunö khöda Sura Niʼamoniʼö wa fehededa andrö tola möi fangorifi mazui faʼamate. (Gamd. 18:21) Tobali, hadia daʼö geluahania ataʼu ita fahuhuo börö ma fasala wehededa? Tenga. Tatu manö lö taböhöli wangogunaʼö alitö ha börö waʼataʼuda ma akhozi ita dania. Hizaʼi, moguna mangelama ita ba wangogunaʼö yaʼia. Duma-dumania, tola taʼogunaʼö galitö ba wondrino, ba woleu yaʼita, mazui enaʼö lö ogömi-gömi nahiada. Simanö göi, na taʼangenanöi huhuoda, tola möi famosumange Yehowa ba tola möi fanolo niha.—Zin. 19:15.

3. Hadia zi tölu ngawalö zinangea taʼila ba ginötö fahuhuo ita?

³ No ibeʼe khöda Yehowa waʼatua-tua ba wangogunaʼö mbeweda hegöi tangada na fahuhuo ita. Börö daʼö, hewisa enaʼö tola taʼogunaʼö ia ba wamarou dödö niha böʼö? (Baso Yakobo 3:9, 10.) Moguna taʼila hawaʼara ginötö fahuhuo ita, hadia zinangea tawaʼö, ba hewisa wamaʼema yaʼia.

HAWAʼARA GINÖTÖ FAHUHUO ITA?

4. Hana wa itaria moguna na lö hede-hededa?

⁴ Itaria sökhi na lö hede-hededa. Imane Sura Niʼamoniʼö so ’ginötö na lö hede-hededa’. (Zango. 3:7) Duma-dumania, böi tatuyu dalu huhuo niha si fahuhuo khöda. (Yob. 6:24) Böi tadunö-dunö ba niha hadia zi tebai larongo. (Gamd. 20:19) Na so zangandrö fönuda, abölö sökhi na tataha dödöda ba böi tadema-dema.—Zin. 4:5.

5. Hewisa wangandröda saohagölö khö Yehowa börö me taʼila fahuhuo?

⁵ So göi ginötönia moguna fahuhuo ita. (Zango. 3:7) So ginötö wanuno Yehowa, tafarou dödö niha böʼö, tawaʼö zi so ba dödöda, ba tafatunö hadia zinangea moguna khöda. (Zin. 51:17) Na tafalua daʼö, daʼa zangoromaʼö wa taʼandrö saohagölö khö Yehowa ba mbuala si no ibeʼe andrö. Na ibeʼe mbuala si fahuwu khöda, tatu manö tahaogö wangogunaʼö yaʼia.

6. Hana wa moguna tafaigi ginötö si tefaudu ba wahuhuosa?

⁶ Hana wa moguna tafaigi ginötö si tefaudu ba wahuhuosa? Imane Gamaedola 25:11, ”Simane bua gae balaki ba wiga firö, simanö daromali ba ginötö.” Sökhi sibai mbua gae balaki. Tobali, abölö sökhi na ba wiga firö so ia. Simanö göi, te so zi sökhi sinangea tawaʼö ba niha. Hizaʼi, tola tefarou dödöra na tafaudugö ginötö wahuhuosa khöra. Hewisa wamalua yaʼia?

7, 8. Hewisa ndra talifusöda ba Jepang woloʼöra duma-duma nibeʼe Yesu?

⁷ Na lö tefaudu ginötö wahuhuosada, tola manö lö fatema ba dödö niha. (Baso Gamaedola 15:23.) Duma-dumania, me alua ndruru danö hegöi tsunami ba Jepang me baŵa si Tölu 2011, adudu nomo ba töra 15.000 niha si mate. Hewaʼae so zimate ba gotalua nösi nomo ndra Samaduhuʼö Yehowa mazui si fahuwu khöra, lö labato wameʼe fondrara dödö moroi ba Zura Niʼamoniʼö ba niha si göna abula dödö. Aboto göi ba dödöra wa ato agama Buddha si lö faʼaboto ba dödö Zura Niʼamoniʼö. Tenga fanusugi niha si no mate nifatunöra, tobali labeʼe wondrara dödö ba latutunö hadia mbörö wa tola alua gabula dödö simanö.

⁸ No laʼoʼö duma-duma nibeʼe Yesu ira talifusöda andrö. Iʼila Yesu hawaʼara ginötö lö hede-hedenia hegöi ginötö fahuhuo ia. (Yoh. 18:33-37; 19:8-11) Ifaigi ginötö si tefaudu ba wamahaʼö ndra nifahaʼönia. (Yoh. 16:12) Ira talifusöda si so ba Jepang labaloi ginötö si tefaudu wangombakha ba niha sanandrösa ba wanusugi niha si no mate. Dua fakhe amatonga me no aefa tsunami, labeʼe ba niha risalah Hadia Tola Ifuli Auri Niha si No Mate? Ato zangai risalah andrö ba terara dödöra me no labaso. Moguna taʼangeraigö hadia zi toʼölö ba zi sambu-sambua banua ba hadia zi faduhu dödöra, enaʼö tola tafaudugö ginötö si sökhi ba wahuhuosa khöra.

9. Hawaʼara nasa tola tafaudugö ginötö wahuhuosa ba niha?

⁹ Hawaʼara nasa tola tafaudugö ginötö wahuhuosa ba niha? Te so niha zangafökhöiʼö tödöda ba huhuora. Moroi na tafalawa-lawagö, sökhi na taʼangeraigö, ’Hadia iʼodödögö wangumaʼö daʼö? Hadia moguna ufaʼema wehedenia andrö?’ Sökhi na lö hede-hededa. Hizaʼi, na omasi fahuhuo ita khönia, tafaigi ginötö si tefaudu. (Baso Gamaedola 15:28.) Mazui tafarou dödö nösi nomoda si tenga Samaduhuʼö Yehowa enaʼö lafahaʼö ira sanandrösa khö Yehowa. Böi taböhöli wameʼe famarou tödö khöra, taʼangeraigö hadia niwaʼöda, ba tafaudugö ginötö si sökhi.

HADIA ZINANGEA TAWAʼÖ?

10. (a) Hana wa moguna taʼangeraigö hadia niwaʼöda? (b) Hadia wehede si tebai tawaʼö?

¹⁰ So lua-lua weheda ba niha. (Baso Gamaedola 12:18.) Ato niha ba gulidanö nifatörö Zatana andre, laʼogunaʼö ’wehede safökhö’ si hulö ”wana” mazui ”nikhu gari” si tola mangafökhöiʼö tödö niha samondrongo. (Zin. 64:4) Wa tola lafaʼema wehede si lö sökhi andrö börö me lafaigi-faigi TV. Lö lawaʼö wehede si lö sökhi niha Keriso sindruhu, hewaʼae na ha bude-bude. Sökhi wehede si möi börö waʼigi na tefaudu ginötönia. Hizaʼi, böi tafatörö li si möi fangafökhö dödö ha enaʼö maʼiki niha sato. Ba Zura Niʼamoniʼö itegu niha Keriso enaʼö böi laʼogunaʼö wehede falelesa. Imane, ”Böi alua ba mbewemi wehede falelesa, he ha sambua li; hadia zonahia, ba wangaʼazökhi, na moguna, enaʼö omasi zamondrongo.”—Ef. 4:29, 31.

11. Hadia mbörö wa moguna taʼogunaʼö wehede si sökhi?

¹¹ Imane Yesu wa ”hadia sa zi no fahöna ba dödö, daʼö zalua ba mbewe”. (Mat. 12:34) Eluahania, fehededa zangoromaʼö hadia zi so ba dödöda. Börö me taʼomasiʼö ba taʼosinangegö niha, tatu manö taʼogunaʼö wehede si sökhi na fahuhuo ita khöra. Daʼö zi tobali famarou dödöra.

12. Hadia nasa zanolo yaʼita enaʼö taʼila hadia zinangea tawaʼö?

¹² Moguna taʼodödögö wangalui fehede si tefaudu ba ginötö fahuhuo ita. Hewaʼae fahöna waʼatua-tua Razo Zelomo, ”itimba-timba tödönia ba iʼalu-alui” wehede si sökhi enaʼö adöni dödö niha ba wombaso nisurania. (Zango. 12:9, 10) Hewisa enaʼö taʼila hadia zinangea tawaʼö? Na so ngawua wehede si lö aboto ba dödöda geluahania, tola taʼalui ba Zura Niʼamoniʼö hegöi ba mbuku-buku si no lafazökhi. Tafahaʼö ita ba duma-duma nibeʼe Yesu enaʼö fehededa möi famarou dödö niha böʼö. Iʼila sibai Yesu hadia zinangea iwaʼö börö me no ifahaʼö ia Yehowa ’wangokafui dödö zerege tödö huhuonia andrö’. (Yes. 50:4) Moguna taʼangeraigö hadia lua-lua wehededa ba niha böʼö. (Yak. 1:19) Moguna tasofu khöda samösa, ’Na uwaʼö wehede daʼa, hadia aboto ba dödö zamondrongo? Hewisa dödönia?’

13. Hadia mbörö wa moguna alio laʼila niha geluaha huhuoda?

¹³ So geluaha li dorofe ba ndraono Gizaraʼeli meföna. So li dorofe si tobali tandra wa moguna owulo ira. So göi li zi tobali tandra wa ibörögö fasuwö ndra saradadu. Khalaigö atö hadia zalua na lö aboto ba dödö ndra saradadu li dorofe andrö! Ba Zura Niʼamoniʼö, fehede salio muʼila eluaha laʼamaedolagö ia hulö simane li dorofe. Na lö tahaogö wanutunö geluaha huhuoda, tola manö lö aboto ba dödöra hadia niwaʼöda mazui faduhu dödöra wa faya niwaʼöda andrö. Hewaʼae omasi ita aboto ba dödöra hadia niwaʼöda, moguna taʼangenanöi enaʼö böi afökhö dödöra.—Baso I Korindro 14:8, 9.

14. Hadia duma-duma zangoromaʼö wa iʼogunaʼö Yesu wehede salio muʼila eluaha?

¹⁴ Oya duma-duma wehede Yesu salio muʼila eluaha si no tesura ba Mataiʼo faza 5 irugi 7. Lö iʼogunaʼö Yesu wehede sagalawa si lö muʼila eluaha enaʼö lasuno ia niha. Lö göi iwaʼö wehede si möi fangafökhöiʼö dödö niha. Hewaʼae abakha wamahaʼö nibeʼe Yesu, hizaʼi alio fagöna ba dödö niha. Duma-dumania, ifaduhuʼö khö ndra nifahaʼönia wa lö moguna aombö dödöra sanandrösa ba zoguna ero maʼökhö. Itutunö khöra wa fofo manö si so ba dalu mbanua, ibönökhi Yehowa zoguna khöra. Aefa daʼö, manofu Yesu khöra, ”Tenga no aröu faehu ami wofo?” (Mat. 6:26) Börö me iʼogunaʼö Yesu wehede salio muʼila eluaha, oya wamahaʼö si tola lahalö ba tefarou dödöra.

HEWISA WAHUHUOSADA BA NIHA?

15. Hana wa moguna taʼangenanöi lagu wehededa ba niha?

¹⁵ Moguna taʼangenanöi lagu wehededa hegöi niwaʼöda ba niha. Omasi niha wamondro-ndrongo huhuo Yesu börö me ”somasi niha huhuonia andrö”. (Luk. 4:22) Na tahaogö wahuhuosada, omasi niha wamondro-ndrongo ba fatema ba dödöra. (Gamd. 25:15) Na taʼosinangegö ira, tola tahaogö lagu wahuhuosada. Daʼö zi no ifalua Yesu. Duma-dumania, omuso sibai dödö Yesu me iʼila ato niha somasi mamondrongo huhuonia, ba ifahaʼö ira. (Mrk. 6:34) Hewaʼae laʼoʼaya ia niha, lö isulöni wehedera.—I Fet. 2:23.

16, 17. (a) Hewisa woloʼöda Yesu na fahuhuo ita ba nösi nomoda hegöi khö ndra awö-awöda? (Faigi gambara ba wamobörö wamahaʼö.) (b) Hadia mbuania khö dalifusöda si so iraono me ihaogö wahuhuosania?

¹⁶ Hewaʼae taʼomasiʼö nösi nomoda hegöi ndra awö-awöda, itaria lö taʼangeraigö hadia wehededa khöra. Börö me no ahatö ita khöra, lö taʼangenanöi saʼae wehededa. Hizaʼi, ihaogö Yesu fahuhuo khö zi fahuwu khönia. Me lafadöni haniha zebua ba gotaluara, itegu ira Yesu si fao faʼomasi ba ibeʼe duma-duma ndraono side-ide enaʼö labulöʼö wangera-ngerara. (Mrk. 9:33-37) Tola laʼoʼö ira satua sokubaloi duma-duma nibeʼe Yesu ba ginötö labeʼe degu-degu khö ndra talifusöda.—Gal. 6:1.

¹⁷ Moguna sökhi lagu wehededa ba niha hewaʼae so wehedera si tola mangandrö fönu. (Gamd. 15:1) Duma-dumania, so samösa nono dalifusöda si bohou ebua, hulö zoloʼö khö Yehowa ia, sindruhunia sa lö sökhi gamuatania. Samösa dalifusöda ira alawe si so ba gangowuloa, ahakhö dödönia ba imane khö ninania, ”Alimagö sibai khöu nono andrö, lö öʼodödögö wolohe yaʼia ba zi sökhi.” Mangera dalifusöda si so iraono andrö imane wangumaʼö, ”Sindruhu wö sa, no uʼodödögö wamahaʼö yaʼia irugi iadaʼa. He bale, ma atö tefalalini gera-erania fatua lö Hamagedo.” Börö me lö mofönu ba ihaogö wehedenia talifusöda andrö, lö aetu wahuwusara. Irongo-rongo ononia andrö me fahuhuo ninania, faduhu dödö ninania wa tola ibulöʼö gamuatania. Börö daʼö, ibato wariawösa khö ndra awönia, tebayagö ia idanö, ba mohalöwö ia ba Mbetieli. Na fahuhuo ita khö ndra talifusöda, ba nösi nomoda, hegöi ba niha böʼö, enaʼö fehededa ”nilau asio”.—Kol. 4:6.

18. Hewisa woloʼöda duma-duma nibeʼe Yesu ba ginötö fahuhuo ita?

¹⁸ No sambua buala moroi khö Yehowa me taʼila tafaʼema nösi dödöda hegöi niʼera-erada ba niha. Na taʼoʼö Yesu, tatu manö tafaudugö ginötö wahuhuosada, taʼangenanöi hadia niwaʼöda, ba tahaogö-haogö wangumaʼö yaʼia. Börö daʼö, datafarou dödö niha böʼö na fahuhuo ita ba taʼomusoiʼö dödö Yehowa.