Na Falulu Fohalöwö Ita khö Lowalangi Tasöndra Waʼohahau Dödö

1. Hewaʼae Yehowa andrö no Fondrege Zebua, hadia niʼandrönia ba niwöwöi dangania?

YEHOWA no Fondrege Zebua. So khönia waʼatua-tua ba faʼabölö, ba tola ifazökhi gofu hadia ia. Me aboto ba dödö Yobi daʼö, imane wangumaʼö, ”Uʼila, wa lö hadia ia, si tebai ndraʼugö, awö wa lö tödöu, si tebai öfalua.” (Yob. 42:2) Tola ifalua Yehowa gofu hadia zomasi ia, hewaʼae lö sanolo yaʼia. Hizaʼi, börö waʼomasinia ba niwöwöi dangania, iʼandrö khöra enaʼö falulu fohalöwö ira khönia ba wamalua ohitö dödönia.

2. Hadia halöwö si sökhi nibeʼe Yehowa khö Yesu?

² Si oföna nifazökhi Lowalangi moroi ba danö böʼö, yaʼia daʼö Ononia, Yesu. Aefa daʼö, iʼandrö Yehowa khö Nononia enaʼö fao ia ba wamazökhi fefu hadia ia. (Yoh. 1:1-3, 18) Imane Faulo sanandrösa khö Yesu, ”Ba khönia sa mbörö wamazökhi hadia ia, fefu, he si so ba zorugo, ba he si so ba gulidanö, soroma ba si lö oroma, he si dadao, ba he soʼaya, ba he samatörö, ba he salawa andrö. Fefu, hadia ia, ba oi yaʼia zamazökhi, ba oi ba khönia, wa tefazökhi, ba yaʼia, ba no föna danö böʼö fefu, ba ba khönia aro fefu, hadia ia.” (Kol. 1:15-17) Tenga ha asala ibeʼe Yehowa halöwö si sökhi khö Nononia, ifatunö göi ba danö böʼö sanandrösa ba halöwö andrö. Sindruhu wa no töi sebua daʼö!

3. Hadia niʼandrö Yehowa khö Gadamo, ba hadia mbörö?

³ Iʼandrö göi Yehowa ba niha gulidanö enaʼö falulu fohalöwö ira khönia. Duma-dumania, itehegö khö Gadamo ba wameʼe töi gurifö. (I Moz. 2:19, 20) Khalaigö atö hawaʼomuso dödö Gadamo ba halöwö andrö! Ihaogö inehesi zikhala hegöi gamuata gurifö andrö, ba awena ibeʼe döira zamösana. Sindruhunia, tola manö ibeʼe Yehowa döi gurifö andrö, börö me yaʼia zamazökhi. Hizaʼi, börö me iʼomasiʼö Gadamo, andrö wa itehegö khönia wameʼe töi gurifö. Ibeʼe nasa Lowalangi halöwö khö Gadamo ba wombaliʼö ulidanö andre tobali faradaiso. (I Moz. 1:27, 28) Hizaʼi, ibato Gadamo falulu fohalöwö khö Lowalangi, ba lua-luania iʼasogö gabula dödö khönia samösa hegöi ba ngaʼötönia.​—I Moz. 3:17-19, 23.

4. So niha si falulu fohalöwö khö Lowalangi ba wangoʼozui ohitö dödönia. Hadia manö nifaluara?

⁴ Baero daʼö, iʼandrö Lowalangi ba niha tanö böʼö enaʼö falulu fohalöwö ira khönia. Iʼandrö khö Noakhi ba wamazökhi owo enaʼö terorogö ia hegöi nösi nomonia ba ginötö Anönö Danö Idanö. Moze zangefaʼö ndraono Gizaraʼeli moroi ba danö Miserai. Yosua zondröniaʼö ndraono Gizaraʼeli ba Danö Gamabuʼula. Zelomo zamazökhi osali ba Yeruzalema. Maria zi tobali ina Yesu. Falulu fohalöwö fefu niha si lö faröi andrö hegöi niha tanö böʼö khö Yehowa ba wangoʼozui ohitö dödönia.

5. Hadia halöwö si tola tafalua, ba hadia moguna iʼandrö khöda Yehowa ba wamalua halöwö andrö? (Faigi gambara ba wamobörö wamahaʼö.)

⁵ Ba ginötö andre, iʼandrö khöda Yehowa ba wotuhini Mbanuania. Oya lala si tola tafalua ba wamosumange Lowalangi. Hewaʼae lö fagölö-gölö nifaluada ba wamosumange yaʼia, fefu ita tola taturiaigö duria somuso dödö sanandrösa ba Mbanuania. Sindruhunia, tola ifalua fefu daʼö Yehowa. Tola manö fahuhuo ia moroi ba zorugo ba niha gulidanö. Imane Yesu wa tola manö muhede gara ibeʼe Yehowa, enaʼö laʼombakhaʼö ba niha sanandrösa khö Razo ba Mbanuania. (Luk. 19:37-40) Hizaʼi, itehegö khöda Yehowa tobali ’sanolo ba halöwö khönia’. (I Kor. 3:9) Imane Faulo, ”Ba maʼandrö khömi, yaʼaga sanolo ba halöwö andrö, böi saekhu ba danö, me no falukha ami waʼebua dödö Lowalangi andrö.” (II Kor. 6:1) No sambua töi si sökhi me no iʼandrö khöda Lowalangi enaʼö falulu fohalöwö ita khönia, irege tasöndra waʼohahau dödö. Datafaigi hadia mbörö.

NA FALULU FOHALÖWÖ ITA KHÖ LOWALANGI, TASÖNDRA WAʼOHAHAU DÖDÖ

6. Hadia niwaʼö Nono Lowalangi siaʼa me falulu fohalöwö ia khö Namania?

⁶ Tola ohahau dödö nono mbanua Yehowa na falulu fohalöwö ira khö Lowalangi. Imane Nono Lowalangi siaʼa fatua lö möi ia ba gulidanö, ”Yehowa mege zomböi yaʼodo, böröta lala andrö khönia . . . Ba yaʼodo duka khönia, faʼomuso dödö ndraʼo [khönia], ero maʼökhö, famai ndraʼo fönania, lö mamalö-malö.” (Gamd. 8:22, 30) Me falulu fohalöwö Yesu khö Namania, omuso dödönia börö me oya halöwö zi no iʼawaisi ba aboto ba dödönia wa iʼomasiʼö ia Yehowa. Hewisa göi ita?

7. Hana wa tola ohahau dödöda na möi ita manuriaigö?

⁷ Na tabeʼe mazui tatema gofu hadia ia, ohahau dödöda simane niwaʼö Yesu. (Hal. 20:35) Me tafahaʼö ita ba zindruhu, tatu manö ohahau dödöda. Hizaʼi, hana wa omuso dödöda na taturiaigö zindruhu andrö ba niha böʼö? Börö me taʼila wa omuso sibai dödöra me so khöra waʼaboto ba dödö sanandrösa ba Zura Niʼamoniʼö, ba tola göi fahuwu ira khö Lowalangi. Omuso sibai dödöda na labulöʼö wangera-ngerara hegöi lala waʼaurira. Halöwö fanuriaigö andrö no halöwö sabölö moguna ba sabölö sökhi si tola mameʼe khöda faʼohahau dödö. Na manuriaigö ita ba niha, tola fahuwu ira khö Lowalangi ba lasöndra waʼauri si lö aetu.​—II Kor. 5:20.

8. Hadia niwaʼö ndra talifusöda sanandrösa waʼohahau dödö nirasoira me falulu fohalöwö ira khö Yehowa?

⁸ Ba ginötö tafahaʼö niha sanandrösa khö Lowalangi, taʼila wa no taʼomusoiʼö dödö Yehowa ba iʼandrö saohagölö börö me no taforege ba wamosumange yaʼia. Tatu omuso sibai dödöda. (Baso I Korindro 15:58.) Imane Marco si toröi ba Italia, ”Omuso sibai dödögu börö me no ubeʼe zabölö sökhi khö Yehowa, tenga ba niha salio mangolifugö hadia zi no ufalua.” Imane göi Franco sanuriaigö ba Italia, ”Moroi ba Daromali Yehowa hegöi gö ba wamati si no tehenaigö, tefasugi ba dödöda ero maʼökhö wa iʼomasiʼö sibai ita, ba moʼeluaha ba dödönia zi no tafalua, hewaʼae na lö moʼeluaha nifaluada andrö moloʼö yaʼita. Daʼö mbörö wa ohahau sibai dödögu falulu fohalöwö khö Lowalangi, ba tola mofozu waʼaurigu.”

NA FALULU FOHALÖWÖ ITA KHÖ LOWALANGI, ITUGU AHATÖ ITA KHÖNIA HEGÖI BA NIHA BÖʼÖ

9. Hewisa wahuwusara Yehowa hegöi Yesu, ba hadia mbörö?

⁹ Na falulu fohalöwö ita ba niha niʼomasiʼöda, itugu ahatö ita khönia. Itugu aboto ba dödöda nösi dödönia hegöi amuatania. Taʼila hadia gohitö dödöra ba hewisa lalara wogamö yaʼia. Te ba zi töra hauga miliar fakhe no falulu fohalöwö Yesu khö Yehowa. Aro waʼomasira khö nawöra zamösana, irege lö hadöi zi tola mamabali wahuwusara. Ba daʼö oroma hewisa wahuwusara me imane Yesu, ”Ha sambua ndraʼaga Amagu.” (Yoh. 10:30) Ba ginötö falulu fohalöwö ira, sindruhu-ndruhu wa teʼosambuaʼö wangera-ngerara ba so khöra wahasara dödö.

10. Na möi ita manuriaigö, itugu ahatö ita khö Lowalangi hegöi khö ndra talifusöda. Hadia mbörö?

¹⁰ Iʼandrö Yesu khö Yehowa enaʼö ilumöʼö ndra nifahaʼönia. Hadia mbörö? Imane, ”Enaʼö ha sambua dödöra, simane tödöda andrö.” (Yoh. 17:11) Itugu aboto ba dödöda gamuata Lowalangi na tafalua goi-goinia ba waʼaurida ba fao ita ba halöwö fanuriaigö. Taʼila hana wa moguna tafaduhusi tödö ia, ba taʼoʼö wanuturu lala nibeʼenia. Na ahatö ita khö Lowalangi, ahatö göi ia khöda. (Baso Yakobo 4:8.) Tola göi itugu ahatö ita khö ndra talifusöda börö me fagölö-gölö tataögö gabula dödö. Faoma falulu fohalöwö ita, faoma ohahau dödöda, ba fagölö göi gohitö dödöda. Imane Octavia si toröi ba Inggris, ”Itugu ahatö ndraʼo khö ndra talifusöda börö me falulu fohalöwö ndraʼo khö Yehowa.” Itutunö wa teʼodane-dane wahuwusania börö me ”fagölö gohitö dödöra”. Tatu simanö göi nirasoida. Na taʼila wa laforege sibai ba wangomusoiʼö dödö Yehowa, itugu ahatö ita khöra.

11. Hana wa itugu ahatö ita khö Yehowa hegöi khö ndra talifusöda ba gulidanö si bohou?

¹¹ Iadaʼa, taʼomasiʼö Lowalangi hegöi ndra talifusöda. Ba gulidanö si bohou dania, itugu taʼomasiʼö ira nasa. Angeraigö atö hawaʼomuso dödöda ba halöwö nifaluada dania ba zi so föna! Tatemaʼö niha nisusugi ba tafahaʼö ira sanandrösa khö Yehowa. Fao ita göi ba wamohouni ulidanö andre tobali faradaiso. Ohahau sibai dödöda na falulu fohalöwö ita. Itugu ara itugu moʼahonoa ita barö wamatörö Keriso. Itugu ahatö ita ba niha fefu hegöi khö Yehowa, ’zangabusoiʼö fefu zauri, somasi ira’.​—Zin. 145:16.

TELUMÖʼÖ ITA NA FALULU FOHALÖWÖ KHÖ LOWALANGI

12. Hewisa wa tola telumöʼö ita börö halöwö fanuriaigö?

¹² Moguna tarorogö wahuwusada khö Yehowa. Hadia mbörö? Alio aolo dödöda ba woloʼö lagu wangera-ngera hegöi amuata niha gulidanö börö me so ita ba gulidanö nifatörö Zatana, ba börö me lö moʼahonoa ita. Hulö na molangi ita ba nidanö. Iʼohe ita ndrulu nidanö andrö ba nahia si lö omasi ita. Börö daʼö, taforege ba wolawa ndrulu nidanö andrö enaʼö lö ihanigö ita. Simanö göi me so ita ba gulidanö nifatörö Zatana. Böi tatehe idönisi dödöda. Hewisa wa tola telumöʼö ita börö halöwö fanuriaigö? Na tatutunö sanandrösa khö Yehowa hegöi Zura Niʼamoniʼö, tola teʼosambuaʼö wangera-ngerada ba zi sökhi hegöi ba zabölö moguna, tenga ba ngawalö zi tola mameʼe awuwu wamatida. (Fil. 4:8) Tola aro wamatida börö halöwö fanuriaigö. Daʼö zamasugi ba dödöda fefu zi no ifabuʼu Lowalangi hegöi goi-goinia safönu faʼomasi. Itolo ita göi enaʼö so khöda gamuata si sökhi si tola molumöʼö yaʼita moroi khö Zatana hegöi ulidanö tana khönia.​—Baso Efeso 6:14-17.

13. Hadia niwaʼö samösa Zamaduhuʼö Yehowa ba Australia sanandrösa ba halöwö fanuriaigö?

¹³ Na owölö-ölö ita manuriaigö, ba wamahaʼö niha, hegöi ba wanolo ndra talifusöda ba gangowuloa, tola telumöʼö ita börö me lö inötöda ba woʼangeraigö abula dödö. Imane Joel si toröi ba Australia, ”Uʼila gabula dödö nitaögö niha ba urasoi samösa hadia gunania börö me uʼoʼö goi-goi Zura Niʼamoniʼö ba waʼaurigu. Halöwö fanuriaigö zanolo yaʼo enaʼö so khögu fangide-ngideʼö, tefahaʼö ndraʼo ba wangandrö saohagölö, hegöi ba wangodaligö Yehowa ba ndra talifusöda.”

14. Na lö tabato manuriaigö, daʼö dandra wa fao-fao khöda geheha Lowalangi. Hadia mbörö?

¹⁴ Na fao ita ba wanuriaigö, faduhu dödöda wa fao-fao khöda geheha Lowalangi. Duma-dumania, khalaigö atö na mohalöwöʼö ba wameʼe roti misa ba niha. Lö sogazi ndraʼugö ba halöwö andrö ba öbeʼe gefeu ba wamalua yaʼia. Ato zi lö mangaʼi roti nibeʼemö andrö, ba fatuwu ira khöu börö me möiʼö ba nomora wolohe roti. Hadia ötohugö manö halöwö andrö? Ba zi lö arara, awuwu waʼabölömö, ba öbato wamalua halöwö daʼö. Hizaʼi, ato moroi ba gotaluada zi lö awöli-wöli wamalua halöwö fanuriaigö ba zi hauga fakhe, hewaʼae so zangoʼaya mazui sofönu khöda. Tatehegö tabeʼe ginötö hegöi kefeda ba wamalua halöwö daʼa. Daʼö dandra wa itolo ita eheha Lowalangi.

FALULU FOHALÖWÖ KHÖ LOWALANGI ZANGOROMAʼÖ WA TAʼOMASIʼÖ IA HEGÖI NIHA BÖʼÖ

15. Hadia gamakhaita halöwö fanuriaigö ba gohitö dödö Lowalangi ba niha gulidanö?

¹⁵ Hadia gamakhaita halöwö fanuriaigö ba gohitö dödö Yehowa ba niha gulidanö? Ohitö dödö Lowalangi yaʼia daʼö enaʼö auri niha gulidanö sagötö faʼara. Lö tebulö gohitö dödönia, hewaʼae no ifalua horö Adamo. (Yes. 55:11) No itatugöi Lowalangi hewisa lala enaʼö teʼefaʼö ita moroi ba horö hegöi faʼamate. Hewisa lalania? Möi Yesu ba gulidanö ba itehegö ia tobali höli. Hizaʼi, enaʼö so guna höli andrö ba niha gulidanö, moguna laʼoʼö li Lowalangi. Börö daʼö, ifahaʼö niha Yesu hadia niʼandrö Lowalangi khöra, ba iʼoʼou ndra nifahaʼönia enaʼö lafalua wamahaʼö simanö. Na möi ita manuriaigö ba tatolo niha enaʼö tobali si fahuwu khö Lowalangi, eluahania no fao ita falulu fohalöwö khö Lowalangi ba wangoʼozui gohitö dödönia enaʼö teʼefaʼö niha gulidanö moroi ba horö hegöi faʼamate.

16. Hadia gamakhaita halöwö fanuriaigö ba goroisa sebua nibeʼe Lowalangi?

¹⁶ Na tatolo niha ba wanöndra faʼauri si lö aetu, daʼö dandra wa taʼomasiʼö ira hegöi Yehowa. ’Omasi ia na ahori teʼorifi niha, na dozi lasöndra waʼaboto ba dödöra zi duhu.’ (I Tim. 2:4) Me so niha Farizaiʼo sanofu khö Yesu hadia goroisa sebua nibeʼe Lowalangi, imane Yesu, ”’Omasiʼö Zoʼaya yaʼugö, Lowalangiu andrö, moroi siʼaikö ba dödöu, nosou maʼasambua zangomasiʼö yaʼia. Ba öhorigö gera-erau, wangomasiʼö yaʼia.’ Daʼö zebua goroisa, daʼö zi föföna. Ba sambuatö, si fakhili-khili khönia: ’Omasiʼö zahatö khöu, simane faʼomasiu ndraʼugö.’” (Mat. 22:37-39) No taʼoʼö goroisa andrö na taturiaigö duria somuso dödö.​—Baso Halöwö Zinenge 10:42.

17. No sambua töi sebua börö me tola taturiaigö duria somuso dödö. Hewisa dödöu?

¹⁷ Ibeʼe khöda Yehowa halöwö si tola mameʼe faʼohahau dödö, si tola mangahatöʼö yaʼita khönia hegöi khö ndra talifusöda, ba si tola molumöʼö fahuwusada khönia. Na tafalua halöwö daʼö, no taforomaʼö waʼomasida khö Lowalangi hegöi ba niha böʼö. No sambua howu-howu daʼa khöda! Töra hauga zuta nono mbanua Yehowa ba zi sagörö ulidanö, ba oi faböʼö-böʼö zalua khöra zamösana. Hizaʼi, tola tafalua ndrege waʼabölöda ba wamaʼema ba niha misa hadia zi faduhu dödöda, he yaʼita si no atua mboto, sawuyu-wuyu, si kayo mazui si numana, sabölö mazui si tebai mboto. Tatu fao dödöda ba niwaʼö Chantel si toröi ba Prancis me imane, ”Iʼoʼou ndraʼo Yehowa, Lowalangi sohahau tödö, fondrege Zabölö ba mbanua si yawa awö danö, Samazökhi fefu hadia ia, ’Aeʼe! Ombakhaʼö! Ombakhaʼö soroi ba dödö sanandrösa khögu. Ubeʼe khöu waʼabölögu, Taromaligu moroi ba Zura Niʼamoniʼö, fanolo moroi ba zorugo, moroi khö ndra talifusö, hegöi famahaʼö ba fanuturu lala si tefaudu.’ Daʼa no sambua töi sebua khöda börö me tola tafalua niʼandrö Yehowa ba falulu fohalöwö ita khö Lowalangida!”