TUHO SI OFÖNA | NA MATE NIHA NIʼOMASIʼÖDA
Hadia Fasala Na Abu Dödö Börö Waʼamate?
Hadia no irai göna ndraʼugö fökhö si lö abölö-bölö? Me no döhö ndraʼugö tatu olifuʼö saʼe hewisa waʼafökhö. Tenga simane daʼö na mate niha niʼomasiʼöda. Imane Dr. Alan Wolfelt ba mbukunia Healing a Spouseʼs Grieving Heart, ”Lö alio taya waʼabu dödöda na mate niha niʼomasiʼöda. Hizaʼi, na so niha zondrara tödöda ba itugu numalö göi ginötö, tola manö alö waʼabu dödöda.”
Faigi hadia zalua khö wurugöda Aberahamo me mate woʼomonia. Imane Sura Niʼamoniʼö ”Ibörögö faʼala-alai Gaberahamo ba iʼeʼesi Zara”. Ngawua wehede ”ibörögö” eluahania ara taya waʼabu dödönia.a Duma-duma tanö böʼö yaʼia daʼö Yakobo. No lalimo ia wa mate nononia Yosefo lawaʼö no ibunu ia utu ndruʼu. ’Ara’ aheta waʼabu dödönia. Hewaʼae no larara dödönia ösi nomonia, lö manö taya ba dödönia waʼamate Yosefo ba zi haʼuga fakhe.—I Moze 23:2, NW; 37:34, 35; 42:36; 45:28.
Abu sibai dödö Gaberahamo me mate woʼomonia Sara
Simanö göi ba ginötö andre na mate niha niʼomasiʼöda. Datafaigi dombua duma-dumania.
”Mate woʼomogu Robert me 9 mbaŵa si Fitu 2008. Fatua lö mate ia, si toʼölönia, ero si hulö wongi, na no awai manga ndraʼaga ba na mofanö ia wohalöwö, faoma maʼuma ba matalagui nawöma, ba mabeʼe wehede faʼomasi. Öno fakhe aefa daʼö afökhö nasa ba dödögu. Hizaʼi, lö manö si taya ba dödögu ia.”—Gail, 60 fakhe.
”Hewaʼae no 18 fakhe me no mate woʼomogu, lö aetu itörö-törö tödögu ia. Na uʼila zadöni dödögu ba zi fasui yaʼo, itörö tödögu ia. Tatu manö na lö si mate ia, omuso dödönia na iʼila hadia nifaigi-faigigu andrö.”—Etienne, 84 fakhe.
Na mate niha niʼomasiʼöda, lö fasala na ara taya waʼabu dödöda. Faböʼö-böʼö zalua na abu dödö zi samösa niha. Lö baga na tahuku ia ha börö me ikila wege-ege. Hewaʼae abu sibai dödöda, böi tatahigö ita samösa. Hewisa enaʼö tola tataögö gabula dödö andrö?
a Ara taya waʼabu dödö Gizaʼaki, ono Gaberahamo. Tölu fakhe me no mate ninania, Sara, lö nasa si tebato waʼabu dödö Gizaʼaki. Latutunö göi daʼa ba duho ”Oʼö Wamatira” ba mbuku daʼa.—I Moze 24:67.