Manaögö Abula Dödö Börö Waʼamate

Oya mene-mene sanandrösa ba duho andre. Hizaʼi, lö fefu tobali fanolo. Duma-dumania, so zangumaʼö khöu enaʼö böi meʼe ndraʼugö mazui böi öʼoromaʼö ba niha hadia nirasoimö. So göi danö böʼö sangumaʼö enaʼö meʼe ba öʼoromaʼö hadia nirasoimö. Tobali so wanuturu lala si sökhi moroi ba Zura Niʼamoniʼö ba tefaudu ba zi no lafareso ba ginötö daʼa.

So zi toʼölö ba mbanua böʼö, na meʼe ndra matua no sambua fangaila daʼö. Tobali, hadia moguna aila ita meʼe mendrua manö föna niha sato? Moloʼö ira pakar kesehatan mental, lö fasala na meʼe ita börö waʼamate. Na meʼe ita, daʼö zi tobali fanolo ba woʼalösi faʼabu dödö nirasoida. Lö baga na tataha-taha ia bakha ba dödö. Moloʼö Sura Niʼamoniʼö lö fasala na meʼe mazui tobali fangaila. Angeraigö atö zalua khö Yesu. Hewaʼae so khönia waʼabölö ba wangorifi niha si no mate, hizaʼi lö aila ia meʼe föna niha sato me mate niha si fahuwu khönia, sotöi Lazaro.​—Yohane 11:33-35.

Sinangea na itaria mofönu niha sanaögö faʼabu dödö, mendrua manö na niha niʼomasiʼö mate ba zi lö mudöna-döna. Oya mbörö wa tola mofönu niha si göna faʼabu dödö. Duma-dumania, niha nifosumangeda ifaʼema wehede si lö fakhamö iʼangeraigö. Imane samösa ira matua moroi ba Afrika Selatan sotöi Mike, ”Ha 14 fakhe ndraʼo me mate namagu. Ba ginötö lakoʼo ia, imane fandrita Gereja Anglikan wa moguna khö Lowalangi niha si sökhi amuata ba ikaoni ira ba waʼalio.a Mofönu sibai ndraʼo me urongo wehede daʼö börö me moguna khöma nasa zatuama. Iadaʼa, no 63 fakhe me no mate ia ba lö manö taya waʼafökhö dödögu ba wahede daʼö.”

Hewisa na alua waniasa? Mendrua manö na alua waʼamete si lö mudöna-döna, tola imane tödönia niha sabu tödö, ’Lö alua daʼa menaʼö na ufalua daʼa ma daʼö.’ Mazui no faʼudu ami fatua lö mate ia. Tola manö monönö waniasamö ba fatahi ndraʼugö.

Na no irai maniasa ndraʼugö ba mofönuʼö simane daʼö, böi taha ia ba dödöu. Si bagania, fatunö ba niha si fahuwu khöu somasi mamondrongo hegöi ba wameʼe faʼafaduhu dödö wa lö fasala nirasoimö andrö. Imane Sura Niʼamoniʼö, ”Sindruhu si fahuwu, ba no fadoro iʼomasiʼö nawönia; ba ba wamakao, ba tumbu ia si fatalifusö.”​—Gamaedola 17:17.

Lowalangi Yehowa, Samazökhi yaʼita, ha yaʼia zi Fahuwu sabölö baga ba niha sabu tödö. Tutunö khönia nösi dödöu ba wangandrö, börö me ’so so sa dödönia ndraʼugö’. (I Fetero 5:7) No ifabuʼu Lowalangi wa fefu zamalua daʼö ibeʼe ’waʼohahau dödö andrö, khö Lowalangi, sabölö moroi ba gera-era niha fefu’. (Filifi 4:6, 7) Tema wondrara dödö nibeʼe Lowalangi khöu moroi ba Zura Niʼamoniʼö. Sura ayati si möi fondrara dödö. (Faigi kotak.) Tola göi ötanö ba dödöu ayati daʼö. Na öfalua daʼö, ba zi ha yaʼugö hegöi na lö öʼila mörö ba zi bongi, ayati daʼö tola tobali fondrara dödöu.​—Yesaya 57:15.

Barö-barö daʼa, samösa zotöi Jack 40 fakhe ndröfinia, mate woʼomonia börö kanker. Ifatunö Jack wa itaria lö sökhi dödönia na hayaʼi-yaʼia. Hizaʼi, isöndra wanolo börö wangandrö. Imane, ”Me mangandrödo khö Yehowa, urasoi wa so nawögu. Asese tokea ndraʼo ba zi bongi ba lö uʼila mörö. Börö daʼö ulau mombaso ba uʼangerönusi ayati Zura Niʼamoniʼö ba ututunö nösi dödögu khönia ba wangandrö. Börö daʼa wa usöndra waʼohahau dödö, irege uʼila mörö zui.”

Samösa ndra alawe sotöi Vanessa no mate ninania börö wökhö. Irasoi samösa wa fangandrö tola tobali fanolo khönia. Imane wangumaʼö, ”Ba ginötö tebai utaögö, awai zi tola ufalua uʼangaröfili döi Lowalangi ba ukila weʼe. Ifondro-ndrongo wangandrögu Yehowa ba ibeʼe khögu waʼabölö.”

Ira psikolog laʼamenesi niha si göna faʼabu dödö enaʼö fao ira ba wanolo niha böʼö mazui fao ira ba kegiatan sosial. Na lafalua daʼö tola lasöndra waʼomuso dödö ba alö waʼabu dödöra. (Halöwö Zinenge 20:35) Ato niha Keriso si göna abula dödö, lasöndra wondrara dödö börö me latolo niha böʼö.​—II Korindro 1:3, 4.