Hana Wa Tefakao Ba Mate Yesu?

Hadia wanemau li na so zanofu khöu, ”Hadia omasi ndraʼugö auri sagötö faʼara?” Ato zangumaʼö wa omasi ira, hizaʼi lamane tödöra lö tola alua daʼö. Moloʼö yaʼira faʼamate andrö no si toʼölö alua ba waʼauri niha.

Hewisa na labaliʼö wanofunia khöu, ”Hadia omasi ndraʼugö mate?” Si toʼölönia, lö omasi niha mate. Tobali, omasi ita auri hewaʼae göna khöda gabula dödö. Ifatunö khöda Sura Niʼamoniʼö me iwöwöi niha Lowalangi, no ibeʼe ba dödö niha enaʼö omasi ira auri sagötö faʼara. Imane wa ”he si lö aetu andrö, ba noa göi ibeʼe ba dödöra”.​—Zangombakha 3:11.

Satulönia, tebai auri niha gulidanö sagötö faʼara. Hana wa tola simanö? Hadia so zi no ifalua Lowalangi ba wangaʼazökhi si no alua ba ginötö andre? So wanema li moroi ba Zura Niʼamoniʼö si tola mameʼe khöda faʼahono dödö. Fanema linia moʼamakhaita ia hadia mbörö wa tefakao ba mate Yesu.

HANA WA TOLA SIMANÖ

Tölu faza moroi ba I Moze itutunö khöda huku nibeʼe Lowalangi ba niha si föföna sotöi Adama ba Khawa. Ibeʼe khöra waʼauri si lö aetu hegöi fanuturu lala hadia zinangea lafalua enaʼö tola laʼokhögö waʼauri. Hizaʼi ba gafuriatania lö laʼoʼö huku Lowalangi irege taya khöra waʼauri si lö aetu. Börö me adogo-dogo waö-waö waʼaurira, andrö wa lawaʼö niha ha manö-manö ia. Hizaʼi sindruhu-ndruhu no alua waö-waö ba mbuku I Moze andrö, simane ba mbuku Injil.a

Hadia lua-lua me lö foloʼö khö Gadamo? Ibeʼe wanema li Sura Niʼamoniʼö, ”Simane böröta horö andrö ba gulidanö, wa no ha samösa niha [Adamo] zamobörö, awö lua-lua horö andrö, faʼamate, awö wa no ikhamö niha fefu faʼamate andrö, börö wa no dozi samazökhi horö ira.” (Roma 5:12) Aekhu ba horö Gadamo börö me lö iʼoʼö li Lowalangi. Taya khönia waʼauri si lö aetu, lua-luania faʼamate. Tatema göi horö ondröita me no ngaʼötönia ita. Lua-luania mofökhö ita, atua, ba mate. Fanema li andre tefaudu moloʼö nisöndra niha sagatua-tua sanandrösa ba genetika. Hizaʼi, hadia so zi no ifalua Lowalangi ba wangaʼazökhi si no alua ba ginötö andre?

SI NO IFALUA LOWALANGI

Iʼalui lala Lowalangi ba wosanu mazui ba wogati si no itayaigö Adamo ba ngaʼötönia, yaʼia daʼö faʼauri si lö aetu. Hewisa wamalua Lowalangi daʼa?

Imane Sura Niʼamoniʼö ba Roma 6:23, ”Luo horö sa, ba faʼamate.” Eluahania, faʼamate andrö luo horö. No ifalua horö Adamo, andrö wa mate ia. Simanö göi, no si so horö ita ba tatörö waʼamate. No taʼokhögö horö iʼotarai me tumbu ita. Börö waʼomasi Lowalangi, ifatenge Nononia Yesu ba wanaögö ”luo horö” andrö khöda. Hewisa wamalua yaʼia?

Teʼasogö horö ba faʼamate börö me lö foloʼö moroi ba zi samösa niha soʼahonoa sotöi Adamo. Börö daʼö moguna so samösa niha soʼahonoa göi si tola mangefaʼö yaʼita moroi ba waʼamate. Itutunö khöda Sura Niʼamoniʼö, ”Hulö simane ba wa lö moloʼö niha andrö, si ha samösa sa, me no möi börö, wa no aʼoi sokhö horö zato, simanö göi ba woloʼö zi ha samösa andrö, noa göi möi börö wangaʼatulöʼö ba zato.” (Roma 5:19) ”Niha andrö si ha samösa”, yaʼia daʼö Yesu. Iröi zorugo, tobali ia niha soʼahonoab, ba mate börö horöda. Mbuania, tola atulö ita föna Lowalangi ba tasöndra waʼauri si lö aetu.

HANA WA TEFAKAO BA MATE YESU

Hana wa moguna mate Yesu? Hadia tebai itehegö Lowalangi Fondrege Zabölö ba wameʼe faʼauri si lö aetu ba ngaʼötö Gadamo? Tatu manö so khönia kuaso wamalua daʼö. Hizaʼi, na ifalua daʼö tola manö faya goroisa niwaʼönia wa luo horö andrö faʼamate. Oroisa andrö tebai mubulöʼö moloʼö somasi dödöda. Daʼa no dane-dane waʼatulönia.​—Zinunö 37:28.

Na lö ifalua Lowalangi waʼatulö andrö, tola manö manofu-nofu dödö niha hadia so waʼatulö khönia ba nifaluania tanö böʼö. Duma-dumania, hadia atulö ia ba wotatugöi haniha manö moroi ba ngaʼötö Gadamo sanöndra faʼauri si lö aetu? Hadia faduhu dödöda wa ifalua zi no ifabuʼu? Börö me no ifalua zi no ifabuʼu, tola faduhu dödöda wa hasambalö ifalua zatulö.

Börö me no mate Yesu, itehegö khöda Lowalangi enaʼö tasöndra waʼauri si lö aetu ba gulidanö Faradaiso. Faigi wehede Yesu ba Yohane 3:16, ”Simanö sa waʼomasi Lowalangi nösi gulidanö, no ibeʼe Nononia andrö, si ha sambua, enaʼö lö tekiko dozi samati khönia, enaʼö so khöra waʼauri si lö aetu.” Sindruhunia, faʼamate Yesu tenga ha tandra waʼatulö Lowalangi, tobali tandra waʼomasinia ba niha gulidanö.

Na simanö, hana wa si lö tola löʼö tefakao Yesu ba mate, simane si no tesura ba Injil? Börö me no itörö wamakao irege lö faröi ia, iforomaʼö Yesu wa sala niwaʼö Gafökha me imane wa hasambalö faröi niha gulidanö khö Lowalangi na itörö ira famakao. (Yobi 2:4, 5) Tola manö atulö niwaʼö Zatana börö me no aekhu ba horö niha soʼahonoa sotöi Gadamo. Hizaʼi, Yesu—fagölö wamoʼahonoara Gadamo—lö faröi ia hewaʼae tefakao. (I Korindro 15:45) Iforomaʼö wa sindruhunia göi tola lö faröi Gadamo khö Lowalangi. Börö me lö faröi Yesu, ibeʼe khöda zi tobali duma-duma. (I Fetero 2:21) Ibeʼe Lowalangi luo khö Nononia soʼahonoa ba wanöndra faʼauri ba zorugo börö me so khönia woloʼö.

HADIA GUNANIA KHÖU

Sindruhu-ndruhu wa no mate Yesu, ba tebeʼe ginötö ba niha ba wanöndra faʼauri si lö aetu. Hadia omasi ndraʼugö auri sagötö faʼara? Ifatunö khöda Yesu hadia zinangea tafalua, ”Daʼö waʼauri si lö aetu, enaʼö aboto ba dödöra ndraʼugö, Lowalangi sindruhu andrö, si ha sambua, ba enaʼö, aboto ba dödöra zinengeu andrö, Yesu Keriso.”​—Yohane 17:3.

Omasi ndra Samaduhuʼö Yehowa ba wamahaʼö yaʼugö sanandrösa khö Yehowa, Lowalangi sindruhu, hegöi sanandrösa khö Nononia Yesu Keriso. Ira Samaduhuʼö Yehowa si so ba mbanuamö, omasi ira ba wanolo yaʼugö. Tola göi öʼalui danö böʼö nasa na öbokai situs Web, www.pr2711.com/nia.