Öfa zi Fakudo ba Yaʼugö

Tohare ira si fao fendröndrö-ndröndrö! Öfa kudo sabölö hegöi si fakudo yawania hulö sindruhu-ndruhu auri ira mane zanaoka moroi ba ngaʼörö Zura Niʼamoniʼö! Kudo siföföna afusi ba si fakudo yawa khönia molakhömi, sawena mubaliʼö razo. Moroi furinia tohare kudo si hulö hola-hola galitö, si fakudo yawa yaʼia zangaʼi faʼatulö moroi ba gulidanö. Fanetenia yaʼia daʼö kudo si tölu, saitö simane talu mbongi. Si fakudo yawania, igogohe waliʼera soʼamaedolagö duria sabu tödö yaʼia daʼö gangombakhata sanandrösa ba waʼambö soguna ba niʼa. Kudo si öfa yaʼia daʼö saʼuzö-uzö so fökhö, tandra wökhö ba fangabu dödö tanö böʼö solohe ba waʼamate, si fakudo yawa yaʼia daʼö Faʼamate. Ba furinia so Lewatö, si toʼölönia lewatö niha, si no oya morabu noso niha!​—Famaʼeleʼö 6:1-8.

”Ataʼudo sibai me awena ubaso sanandrösa ba zi öfa si fakudo. Urasoi hulö no ahatö sibai waʼatohare Luo Wanguhuku andrö ba börö me lö si tehenaigö ndraʼo, hasambalö lö teʼorifi ndraʼo.”​—Crystal.

”Ahöli-höli dödögu zi öfa si fakudo yawa mendrua manö laʼa-laʼa kudonia no faböʼö-böʼö. Me no aboto ba dödögu geluaha gangilata andrö, tefaudu sibai daʼö fefu.”​—Ed.

Hadia aboto ba dödöu hewisa nirasoi Crystal andrö sanandrösa ba zi öfa si fakudo ba Wamaʼeleʼö? Mazui fagölö nirasoimö simane Ed? Moroi ba zi darua andre, muʼila wa daʼöfa si fakudo no sa-mbua waö-waö si tehöngö ba mbuku Famaʼeleʼö, buku safuria ba Zura Niʼamoniʼö. Hadia aboto ba dödöu wa so gunania ba khöu samösa na aboto ba dödöu gangilata andre? Hana wa tola? No ifabuʼu Lowalangi wa so khöu waʼomuso dödö na öbaso, öfahaʼögö, ba öʼaurifagö zi no tesura ba mbuku wamaʼeleʼö andrö.​—Famaʼeleʼö 1:1-3.

So ösa göi zataʼu ba gangilata zi daʼöfa si fakudo andrö, mufaʼanö ia tenga enaʼö tobali fametaʼumö. Sindruhunia, zuta niha teʼaroʼö wamatira me no aboto ba dödöra wamaʼeleʼö andrö hegöi fameʼe tötönafö si sökhi ba zi so föna. Tola göi örasoi simane daʼö! Baso ia enaʼö aboto ba dödöu.