Lö Iʼosiwawöi Yehowa Na Tawaʼö ”Yaduhu”

LÖ IʼOSIWAWÖI Yehowa wamosumangeda. ”Inehegö Lowalangi ba irongo” nono mbanuania, ba inehegö fefu nifaluada ba wanuno yaʼia hewaʼae no ide-ide nifaluada. (Mal. 3:16) Duma-dumania, fehede sasese tawaʼö yaʼia daʼö ”yaduhu”. Hadia lö iʼosiwawöi Yehowa göi ngawua wehede daʼa? Tatu löʼö! Enaʼö taʼila hadia mbörö wa lö iʼosiwawöi daʼö Lowalangi, datatutunö hadia geluaha ngawua wehede andrö ba hewisa wangogunaʼö yaʼia ba Zura Niʼamoniʼö.

”BA LAMANE SATO FEFU, ’YADUHU!’”

Ngawua wehede ”yaduhu” eluahania ”yaʼalua simane daʼö” mazui ”hasambalö”. Tehalö daʼö moroi ba li Heberaiʼo, eluahania ”yalöfaröi” mazui ”tola mufaduhusi tödö”. Itaria laʼogunaʼö ngawua wehede daʼa ba huku. Na no möi ba hölu zi samösa niha moguna iwaʼö ”yaduhu” ba wamaduhuʼö wa hadia niwaʼönia sindruhu ba itema gofu hadia ia lua-lua moroi ba wehedenia. (4 Moz. 5:22) Börö me no iwaʼö ”yaduhu” föna niha sato, hasambalö ifalua hadia zi no ifabuʼu.—Neh. 5:13.

Duma-duma sahöli-höli dödö ba wangogunaʼö ngawua wehede ”yaduhu” yaʼia daʼö si no tesura ba 5 Moze faza 27. Me no larugi Danö Amabuʼula iraono Gizaraʼeli, moguna owulo ira ba gotalua Hili Gebala hegöi Hili Garisi ba wamondrondrongo oroisa Yehowa nifabasoʼö. Hizaʼi, tenga ha ba wamondrongo manö, moguna göi lawaʼö wa omasi ira ba wamalua oroisa andrö. Andrö moguna khöra wangumaʼö ”Yaduhu!” ero larongo hadia zalua na lö khöra foloʼö. (5 Moz. 27:15-26) Khalaigö hewisa wa ebua li niha si ngahönö faʼato, ira matua, ira alawe, hegöi iraono sameʼe fanema li! (Yos. 8:30-35) Tatu lö olifu ira wehedera ba ngaluo daʼö. Ba lafalua mbuʼusa lira iraono Gizaraʼeli. Iwaʼö Sura Niʼamoniʼö wa ”lafosumange Yehowa iraono Gizaraʼeli, götö waʼara Yosua andrö, ba he ba götö zatua andrö, sanau noso moroi khö Yosua, si no mangila folau Yehowa andrö, nilaunia ba ndraono Gizaraʼeli”.—Yos. 24:31.

Iʼogunaʼö Yesu göi ngawua wehede ”yaduhu” ba wamaduhuʼö wa atulö niwaʼönia. Hizaʼi faböʼö lalania ba wangogunaʼö yaʼia. Lö iwaʼö ngawua wehede daʼa na aefa mohede zi samösa niha. Iwaʼö Yesu ”yaduhu” fatua lö ifaʼema niwaʼönia (na mufoʼeluaha ia ba li khöda eluahania ”yafaduhu dödömi”). Itaria dua kali itötöi ngawua wehede daʼö, irege tobali ”yaduhu yaduhu” (”sindruhu-ndruhu”). (Mat. 5:18; Yoh. 1:51) Ifaduhuʼö ba dödö niha samondrongo yaʼia wa fehedenia andrö sindruhu. Tola faduhu dödö Yesu ba niwaʼönia börö me no ibeʼe ba dangania ba wamalua ohitö dödö Lowalangi.—2 Kor. 1:20; Fam. 3:14.

”LAMANE SATO FEFU, ’YADUHU!’ BA LASUNO YEHOWA”

Latötöi göi ”yaduhu” iraono Gizaraʼeli ba ginötö lasuno Yehowa hegöi mangandrö ira. (Neh. 8:6; Zin. 41:14) Na no aefa mufaʼema wangandrö, moguna lawaʼö ”yaduhu” ira niha samondrongo ba wangoromaʼö wa fao dödöra ba nösi wangandrö andrö ba tefarahu göi ira ba wamosumange Yehowa. Daʼö zalua ba ginötö lafalua gowasa me aefa iʼohe Razo Dawido Dawöla Yehowa ba Yeruzalema. Ba gowasa daʼö, manunö Dawido ba wamaʼema fangandrönia soroi ba dödö simane si no tesura ba 1 Ngaʼötö 16:8-36. Tofakha ba dödö zamondrongo me luo daʼö wehedenia irege ”lamane sato fefu, ’Yaduhu!’ ba lasuno Yehowa”. Omuso dödöra börö me tola fao ba wamosumange Yehowa.

Me abad siföföna, laʼogunaʼö göi ira niha Keriso ngawua wehede ”yaduhu” ba ginötö lasuno Yehowa. Asese laʼogunaʼö sanura Zura Niʼamoniʼö ngawua wehede daʼa ba zurara. (Rom. 1:25; 16:27; 1 Fet. 4:11) Ba mbuku Wamaʼeleʼö itutunö sanandrösa khö ndra malaʼika si so ba zorugo samolakhömi Yehowa ba lamane, ”Yaduhu! Haleluya!” (Fam. 19:1, 4) Niha Keriso me föna, si toʼölönia latötöi ”yaduhu” na no aefa mangandrö ba gangowuloa. (1 Kor. 14:16) Hizaʼi, lö latötöi manö daʼö.

HANA WA MOGUNA SIBAI ÖFAʼEMA ”YADUHU”

Me no taʼila wa ono mbanua Lowalangi me föna laʼogunaʼö ngawua wehede ”yaduhu”, tatu aboto ba dödöda hadia mbörö wa moguna taʼogunaʼö ia ba wangandröda. Na tatötöi ia na no aefa mangandrö ita, no taforomaʼö wa soroi ba dödö wangandrö nifaʼemada. Na terou dödöda ba wangumaʼö ”yaduhu” mazui tawaʼö ia ba dödöda me no aefa mangandrö niha böʼö, daʼö zangoromaʼö wa fao dödöda ba wangandrö nifaʼemania. Datafaigi hadia mbörö nasa wa moguna tawaʼö ”yaduhu”.

Lö mangoloi dödöda ba ginötö mangandrö börö me daʼö no sambua moroi ba wamosumangeda Lowalangi. Tafosumange Yehowa tenga ha no fao dödöda ba niwaʼö ba wangandrö andrö. Hizaʼi, moguna taforomaʼö ia moroi ba gamuatada sagötö mangandrö ita. Börö me soroi ba dödöda wangumaʼö ”yaduhu”, moguna tazago gamuatada ba tanehegö hadia nösi wangandrö andrö.

Teʼosambuaʼö ita. Ba ginötö so zamaʼema fangandrö ba gangowuloa, fefu niha si so ba gangowuloa teʼosambuaʼö ira börö me faoma larongo wangandrö andrö. (Hal. 1:14; 12:5) Na fendronga lida khö ndra talifusö ba wangumaʼö ”yaduhu”, no itugu teʼosambuaʼö ita. Hewaʼae na kalua lida wangumaʼö ”yaduhu” mazui ba dödöda tawaʼö ia, tola itugu terou dödö Yehowa ba wameʼe fanema li moroi ba wangandröda.

Samösa dalifusöda ira alawe ifaköu högönia ba ginötö ifondrondrongo wangandrö moroi ba telefo nifaʼema ba gangowuloa — Na tawaʼö ”yaduhu” no tasuno Yehowa

Tasuno Yehowa. Ihaogö inehegö Yehowa wamosumangeda yaʼia, hewaʼae na ide-ide nifaluada. (Luk. 21:2, 3) Iʼila hadia mbörö wa tafosumange ia hegöi hadia nösi dödöda. Hewaʼae tebai taʼondrasi nahia gangowuloa, ha moroi ba telefo tafondrondrongo, faduhu dödöda wa lö iʼosiwawöi Yehowa ba ginötö tawaʼö ”yaduhu”. Ba ginötö tawaʼö ”yaduhu”, no fao ita khö ndra talifusö si so ba gangowuloa ba wanuno Yehowa.

Ngawua wehede ”yaduhu” nifaʼemada tola manö no öna-öna ia ba wamondrongoda, hizaʼi sindruhunia moguna sibai daʼö. Imane Ensiklopedia Pemahaman Alkitab wa ”börö wangogunaʼö ngawua wehede daʼa”, tola lafaʼema ono mbanua Lowalangi si fao ”faʼafaduhu dödö, fao dödöra, hegöi fanötönara soroi ba dödö”. Yamöi fangomusoiʼö dödö Yehowa ero na tawaʼö ”yaduhu”.—Zin. 19:15.

HADIA MOGUNA ÖWAʼÖ ”YADUHU”?

Tebai taʼaohasi ba dödö ngawua wehede ”yaduhu”. Hewisa na mangandrö zi samösa niha, hizaʼi so zi fasala ia wanötöi? Hadia daʼö geluahania tebai tawaʼö ”yaduhu”? Tenga. Aboto ba dödö Yehowa wa itaria fasala ita na mohede, ba lö iʼosambuaʼö dödönia ba zalada. Andrö böi taʼosambuaʼö dödöda ba ngawua wehede si fasala. Abölö baga na taʼosambuaʼö wangera-ngerada ba geluaha niwaʼönia. Na tafalua daʼö, tola manö terou dödöda ba wangumaʼö ”yaduhu”.

Hizaʼi, lö tawaʼö ”yaduhu” bakha ba dödöda mazui kalua lida wangumaʼö yaʼia, na mangandrö zi tenga si sara lala ba wamati khöda. Duma-dumania, hewisa na taʼondrasi zi sambua angowuloa, hizaʼi ba zi lö tadöna-döna so zamaʼema fangandrö? Mazui, hewisa na högö yomo ba nomo si tenga si sara lala ba wamati khöda, sangolohesi fangandrö ba nösi nomoda? Hadia nifaluada?

Na alua zimane daʼö, moguna tahonogö ita ba tafosumange ia. Hizaʼi, böi fao ita ba wangumaʼö ”yaduhu”. Ba lö fao ita ba wogogohe tangara sagötö mufaʼema wangandrö, börö me daʼö zangoromaʼö wa fao ita wangandrö khöra. Te omasi ita mangandrö bakha ba dödöda hizaʼi böi kalua lida ba ginötö tawaʼö ”yaduhu”, enaʼö böi oroma wa lö fao ita khöra wangandrö. Na mosindro ira, tola tatatugöi samösa hadia fao ita khöra mosindro mazui löʼö. Na mosindro mazui tafaköu högöda, lö moʼamakhaita daʼö ba wamosumange. Ero samösa niha Keriso, moguna itatugöi samösa na alua zimane daʼö, ba tebai lategu ia niha ba gangetula nihalönia.

Duma-duma moroi yawa zangoromaʼö wa ba ginötö tawaʼö ”yaduhu”, moguna sibai daʼö khö Yehowa.