Haniha ”Ngawawa Zato Sibai”?

1. Hewisa waʼauri Yohane me döfi 95 M?

ME DÖFI 95 M, alua gabula dödö khö zinenge sotöi Yohane. No atua sibai ia, ba laʼoloiʼö ia ba Hulo Fatemo. Aefa daʼö, hulö atö yaʼia zinenge si toröi nasa ba gulidanö. (Fam. 1:9) Aboto ba dödönia wa labeʼe wamahaʼö sofaya ira niha sondröi sindruhu ba laʼasogö enaʼö aboto wahasara dödö ba gotalua niha Keriso. Ba zi lö ara tö, hulö lö hadöi saʼe dania niha Keriso sindruhu.​—Yud. 4; Fam. 2:15, 20; 3:1, 17.

2. Moloʼö Famaʼeleʼö 7:9-14, hadia gangilata sahöli-höli dödö nitema Yohane? (Faigi gambara ba guli majalah.)

² Ba ginötö alua fefu daʼö, itema Yohane gangilata sahöli-höli dödö sanandrösa ba zi so miföna. Ba gangilata daʼö, so samösa malaʼika zangombakha khö zi daöfa malaʼika tanö böʼö, enaʼö lataha nangi famakao sabölö-bölö irugi tebeʼe wamatandro safuria ba ngawawa zawuyu khö Lowalangi. (Fam. 7:1-3) Faʼato ngawawa si fao khö Yesu wamatörö ba zorugo yaʼia daʼö 144.000. (Luk. 12:32; Fam. 7:4) Aefa daʼö, itutunö Yohane sanandrösa ba ngawawa tanö böʼö sabölö ato. Imane, ”Aefa daʼö, uʼila ngawawa zato sibai si tebai iʼerai niha moroi ba ngawalö soi, mado, banua, hegöi li. No lafake mbaru sebua safusi ba mozizio ira föna dadaoma hegöi föna Nono Mbiri-biri.” (Baso Famaʼeleʼö 7:9-14.) Khalaigö hawaʼomuso dödö Yohane me iʼila wa ba zi so miföna, ato niha samosumange Yehowa ba lala satulö!

3. (a) Hana wa teʼaroʼö wamatida ba gangilata nitema Yohane? (b) Hadia nitutunöda ba wamahaʼö daʼa?

³ Tatu teʼaroʼö wamati Yohane ba gangilata andrö. Tatu göi itugu teʼaroʼö wamatida ba gangilata daʼö, börö me no alua ia ba götöda iadaʼa! No taʼila ba zi hauga zuta niha si tobali samosumange Yehowa. Latötöna enaʼö teʼorifi ira ba ginötö wamakao sabölö-bölö, ba auri ira sagötö faʼara ba gulidanö. Ba wamahaʼö daʼa, taʼila dania töra 80 fakhe silalö, no ifatunö Yehowa ba nono mbanuania haniha nifotöi ngawawa zato sibai andrö. Tatutunö göi wa ngawawa andrö: (1) ato sibai ba (2) moroi ba zi sagörö ulidanö. Daʼa tola ibeʼe aro wamati fefu niha sanema howu-howu si fao ba ngawawa andre.

HEZOSO TORÖI NGAWAWA ZATO SIBAI?

4. Hadia zindruhu si so ba Zura Niʼamoniʼö si lö aboto ba dödö Agama-Agama Niha Keriso, hizaʼi hadia nifaduhusi tödö Ono Zekola Zura Niʼamoniʼö?

⁴ Ifatunö Zura Niʼamoniʼö wa samuza inötö dania niha soloʼö khö Lowalangi auri ira sagötö faʼara ba gulidanö. Hizaʼi, lö lafahaʼö daʼö ira Agama-Agama Niha Keriso. (2 Kor. 4:3, 4) Iadaʼa, labeʼe wamahaʼö ira Agama-Agama Niha Keriso wa niha si sökhi möi ba zorugo na no mate ira. Hewaʼae simanö tenga daʼö nifaduhusi tödö Ono Zekola Zura Niʼamoniʼö, sambua ngawawa side-ide samazökhi Watch Tower iʼotarai me döfi 1879. Aboto ba dödöra wa ifuli ibaliʼö Lowalangi gulidanö tobali Faradaiso. Aboto göi ba dödöra wa miliaran niha soloʼö khö Lowalangi auri dania ba gulidanö daʼa, tenga ba zorugo. Hizaʼi, moguna khöra ginötö irege tola sindruhu-ndruhu aboto ba dödöra haniha sauri dania ba gulidanö.​—Mat. 6:10.

5. Hadia nifaduhusi tödö Ono Zekola Zura Niʼamoniʼö sanandrösa ba zi-144.000?

⁵ Ba zi no lafahaʼö yaʼira Ono Zekola Zura Niʼamoniʼö moroi ba Daromali Lowalangi, aboto ba dödöra wa so ’nihöli moroi ba gulidanö’ si fao khö Yesu mamatörö ba zorugo. (Fam. 14:3) Faʼatora 144.000, yaʼira niha sowölö-ölö ba solulu waʼaurira ba wangai halöwö khö Lowalangi si fao falöfaröi sagötö auri ira ba gulidanö. Hewisa göi ngawawa zato sibai?

6. Hadia nifaduhusi tödö Ono Zekola Zura Niʼamoniʼö sanandrösa ba ngawawa zato sibai?

⁶ Ba gangilata niʼila Yohane, iʼila wa no mozizio ngawawa zato sibai ”föna dadaoma hegöi föna Nono Mbiri-biri”. (Fam. 7:9) Ba daʼö lahalö gangetula Ono Zekola Zura Niʼamoniʼö wa toröi ba zorugo ngawawa zato sibai, simane zi-144.000. Hizaʼi, hadia zamaehusi si dombua ngawawa andre na auri ira ba zorugo? Lahalö gangetula Ono Zekola Zura Niʼamoniʼö wa ngawawa zato sibai, yaʼia daʼö niha Keriso si lö afönu ba woloʼö khö Lowalangi sagötö auri ira ba gulidanö. Hewaʼae no laʼoʼö hadia niwaʼö Zura Niʼamoniʼö sanandrösa ba gamuata, tola manö so moroi ba gotaluara nasa anggota gereja Agama-Agama Niha Keriso. Moloʼö Ono Zekola Zura Niʼamoniʼö wa ngawawa zato sibai daʼa laʼomasiʼö Yehowa, hizaʼi lö afönu waʼomasira. Tobali lö sinangea ira fao khö Yesu mamatörö ba zorugo. Börö daʼö, ba ginötö auri ngawawa zato sibai ba zorugo, ha mozizio ira föna dadaoma, tenga modadao ira ba dadaoma.

7. Moloʼö Ono Zekola Zura Niʼamoniʼö, haniha zauri dania ba gulidanö sagötö Wamatörö si Saribu Fakhe, ba moloʼö yaʼira hadia zalua ba ndra matua si lö faröi me föna si no mate?

⁷ Na simanö, haniha zauri ba gulidanö? Faduhu dödö Ono Zekola Zura Niʼamoniʼö wa na no aefa muʼowuloi ba zorugo si-144.000 hegöi ngawawa zato sibai, so miliaran niha tanö böʼö latehegö khöra toröi ba gulidanö ba latema howu-howu ba Wamatörö Keriso si Saribu Fakhe. Moloʼö Ono Zekola Zura Niʼamoniʼö, wa fatua lö alua Wamatörö si Saribu Fakhe, miliaran niha daʼö lö nasa lafosumange Yehowa. Awena tefahaʼö ira ba gamakhoita Yehowa sagötö Wamatörö si Saribu Fakhe. Awena dania niha soloʼö khö Yehowa latema faʼauri si lö aetu ba gulidanö, ba niha solawa tehori ira dania. Moloʼö Ono Zekola Zura Niʼamoniʼö nasa, wa so ösa niha si tobali ”salawa” ba gulidanö sagötö si saribu fakhe, farahu ba daʼö ”niha me föna” (ira matua si lö faröi si no mate fatua lö si tohare Keriso ba gulidanö) te möi ira dania ba zorugo na no aefa gangohorita Wamatörö si Saribu Fakhe.​—Zin. 45:17.

8. Haniha zi tölu ngawawa sanema howu-howu Lowalangi ba zi so miföna?

⁸ Tobali, moloʼö Ono Zekola Zura Niʼamoniʼö so tölu ngawawa: (1) si-144.000 mamatörö ira fao khö Yesu ba zorugo; (2) ngawawa zato sibai yaʼia daʼö niha Keriso si lö afönu ba woloʼö khö Yehowa, mozizio ira föna dadaoma Yesu ba zorugo; ba (3) miliaran niha ba gulidanö tefahaʼö ira dania sanandrösa ba gamakhoita Yehowa sagötö Wamatörö Keriso si Saribu Fakhe.b Hizaʼi, ba gafuriata itolo nono mbanuania Yehowa enaʼö itugu aboto ba dödöra sanandrösa ba zi tölu ngawalö andrö.​—Gamd. 4:18.

HAGA ZINDRUHU ITUGU MOHAGA

9. (a) Hewisa wa tola mozizio ngawawa zato sibai ”föna dadaoma hegöi föna Nono Mbiri-biri” hewaʼae so ira ba gulidanö? (b) Hana wa no tefaudu sibai faʼaboto ba dödö si so ba Famaʼeleʼö 7:9?

⁹ Me döfi 1935, ibörögö aboto ba dödö ndra Samaduhuʼö Yehowa haniha zindruhunia ngawawa zato sibai si so ba gangilata Yohane. Aboto ba dödö ndra Samaduhuʼö Yehowa wa tenga sindruhu-ndruhu ba zorugo mozizio ngawawa zato sibai ”föna dadaoma hegöi föna Nono Mbiri-biri”, daʼö ha amaedola. Hewaʼae so ira ba gulidanö, tola mozizio ira ”föna dadaoma” ba ginötö lafaduhuʼö wa Yehowa zamatörö mbanua si yawa awö danö ba sindruhu-ndruhu laʼoʼö niwaʼönia. (Yes. 66:1) Ba tola mozizio ira ”föna Nono Mbiri-biri” börö me mamati ira ba höli nibeʼe Yesu. So ayati tanö böʼö si so ba Zura Niʼamoniʼö, sanolo yaʼita enaʼö aboto ba dödöda wa ha amaedola nitutunö ba Famaʼeleʼö 7:9. Ba Mataiʼo 25:31, 32, iwaʼö wa ”fefu soi”, tefarahu ba daʼö niha si lö sökhi, ’teʼowuloi ira föna’ Yesu si no modadao ba dadaomania. Tobali, niha simane daʼö tenga ba zorugo so nahiara, hizaʼi ba gulidanö. Faʼaboto ba dödö nitutunö me döfi 1935, no tefaudu sibai. Daʼö mbörö wa lö irai itutunö Zura Niʼamoniʼö wa tefazawa ba zorugo ngawawa zato sibai. Ha si-144.000 sanema mbuʼusa li sauri ba zorugo sagötö faʼara. Fao ira khö Yesu tobali ”razo ba samatörö ulidanö”.​—Fam. 5:10.

10. Hana wa moguna ba ngawawa zato sibai enaʼö lafahaʼö ira sanandrösa khö Yehowa fatua lö tebörögö Famatörö si Saribu Fakhe?

¹⁰ Iʼotarai me döfi 1935, aboto ba dödö ndra Samaduhuʼö Yehowa wa ngawawa zato sibai si so ba gangilata Yohane, manandrösa ia ba niha Keriso si lö faröi sauri ba gulidanö sagötö faʼara. Enaʼö teʼorifi ira ba wamakao sabölö-bölö, moguna ba ngawawa zato sibai enaʼö lafahaʼö ira sanandrösa khö Yehowa ba labörögö lafosumange ia fatua lö tebörögö Famatörö si Saribu Fakhe. Moguna laʼokhögö famati saro enaʼö ’tola teʼorifi ira moroi ba ngawalö zalua andrö dania’ fatua lö alua Wamatörö Keriso si Saribu Fakhe.​—Luk. 21:34-36.

11. Hana wa so ba wangera-ngera Ono Zekola Zura Niʼamoniʼö wa so ösa niha si tefazawa ba zorugo na no aefa Wamatörö si Saribu Fakhe?

¹¹ Hewisa sanandrösa ba waʼaboto ba dödö wa so ösa niha si tohude moroi ba gulidanö, tefazawa dania ba zorugo na no aefa Wamatörö si Saribu Fakhe? Tola manö faʼaboto ba dödö daʼa no mututunö ia ba The Watch Tower 15 Mbaŵa si Dua 1913. Tola tumbu waʼaboto ba dödö daʼa, börö me so ba wangera-ngerara, ’Fatua lö si möi Yesu ba gulidanö, ato nono mbanua Yehowa si lö faröi. Hana wa ha ba gulidanö toröi ira, hizaʼi niha Keriso si lö afönu waʼalöfaröi toröi ba zorugo?’ Laʼokhögö lala wangera-ngera simane daʼö, börö me fasala waʼaboto ba dödö niʼokhögöra: (1) so ba wangera-ngerara wa toröi ba zorugo ngawawa zato sibai, ba (2) so ba wangera-ngerara wa ngawawa zato sibai, yaʼia daʼö niha Keriso si lö afönu ba woloʼö khö Yehowa.

12-13. Hadia waʼaboto ba dödö niʼokhögö niha Keriso nibayoini hegöi ngawawa zato sibai sanandrösa ba wanötönara?

¹² Simane zi no mututunö mege, iʼotarai me döfi 1935 aboto ba dödö ndra Samaduhuʼö Yehowa wa ngawawa zato sibai niʼila Yohane ba gangilatania yaʼia daʼö niha si teʼorifi ba Hamagedo. Yaʼira dania zi ”teʼorifi moroi ba wamakao sabölö-bölö” ba lö tebulö auri ira dania ba gulidanö. Ba ”lö laböhöli weʼao lamane, ’No matema wangorifi moroi khö Lowalangima, si dadao ba dadaoma andrö, ba moroi ba Nono Mbiri-biriʼ”. (Fam. 7:10, 14) Aefa daʼö, ifatunö Zura Niʼamoniʼö wa ’abölö sökhi’ wanötöna nitema niha sauri ba zorugo moroi ba wanötöna nitema nono mbanua Lowalangi me föna, si no mate fatua lö si möi Yesu ba gulidanö. (Heb. 11:40) Iʼotarai me so waʼaboto ba dödö si no muhaogö mututunö me döfi 1935, itugu terou dödö ndra talifusöda ba wokaoni niha enaʼö lafosumange Yehowa ba latema wanötöna faʼauri ba gulidanö irugi zi lö aetu.

¹³ Omuso dödö ngawawa zato sibai ba wanötöna nitemara. Aboto ba dödöra wa Yehowa zotatugöi hezoso toröi nono mbanuania si lö faröi ba wangai halöwö khönia, hadia ba zorugo mazui ba gulidanö. Aboto ba dödö niha Keriso nibayoini hegöi ngawawa zato sibai wa tola lasöndra wanötöna andrö, tenga börö wa no sinangea manema ira. Hizaʼi, börö waʼasökhi dödö Yehowa sahöli-höli dödö, iʼogunaʼö höli nibeʼe Yesu Keriso ba wameʼe khöda wanötöna.​—Rom. 3:24.

ATO SIBAI NGAWAWA ANDRÖ

14. Me no aefa döfi 1935, hana wa ato zanofu-nofu hewisa wa tola alua wamaʼeleʼö sanandrösa ba ngawawa zato sibai?

¹⁴ Me no aboto ba dödö nono mbanua Yehowa sanandrösa ba ngawawa zato sibai me döfi 1935, ato zanofu-nofu hewisa wa tola ato sibai ngawawa andrö. Duma-dumania, 12 fakhe ndröfi dalifusöda Ronald Parkin me lahaogö latutunö waʼaboto ba dödö sanandrösa ba ngawawa zato sibai. Imane ba wanutunö, ”Me luo daʼö, ba zi sagörö ulidanö so mato 56.000 sanuriaigö. Tola manö moroi ba gotaluara abölö ato niha Keriso nibayoini. Tobali, me luo daʼö lö ato sibai ngawawa zato.”

15. Hewisa wa lö aetu muʼowuloi ngawawa zato sibai?

¹⁵ Hizaʼi, ngafulu fakhe aefa daʼö, lafatenge ira utusan injil ba ngawalö soi, ba itugu monönö waʼato ndra Samaduhuʼö Yehowa. Me döfi 1968, mubörögö sambua program wamahaʼö ba Zura Niʼamoniʼö muʼogunaʼö mbuku Kebenaran Yang Membimbing Kepada Hidup Yang Kekal. Börö me no öna-öna mbuku andrö ba wanutunö zindruhu ba Zura Niʼamoniʼö, ato sibai niha somasi ahatö khö Yehowa moroi ba zilalö. Ba zi öfa fakhe, töra matonga zuta niha si tebayagö idanö. Aefa daʼö nasa, ibörögö alö waʼabölö Gereja Katolik ba Amerika Latin hegöi ba soi tanö böʼö, ba ifuli latehegö tefalua halöwöda ba Eropa Timur hegöi ba zi hauga nahia ba Afrika. Buania, zuta waʼato niha si tebayagö idanö. (Yes. 60:22) Ba zi hauga fakhe gafuriata daʼa, oya fakake niʼasogö organisasi Yehowa ba wanolo niha enaʼö aboto ba dödöra hadia nifahaʼö Zura Niʼamoniʼö. Ba daʼa taʼila, wa iʼowuloi Yehowa ngawawa zato sibai ba faʼatora iadaʼa töra walu zuta.

NGAWAWA ZATO SI NO FABÖʼÖ-BÖʼÖ

16. Hezoso moroi ngawawa zato sibai?

¹⁶ Ifatunö ba gangilatania Yohane wa ngawawa zato sibai moroi ba ”ngawalö soi, mado, banua, hegöi li”. No irai göi ifaʼeleʼö simane daʼö Zakharia. Imane ba wanurania, ”Na luo daʼö dania, dafulu ndra matua moroi ba ngawalö soi hegöi li hasambalö lahaogö ba wogogohe mbaru niha Yahudi. Lamane dania, ’Omasiga ba wefao khömi, börö me no marongo wa fao khömi Lowalangi.’”​—Zakh. 8:23, Terjemahan Dunia Baru.

17. Hadia nifalua ba wanolo niha moroi ba ngawalö soi hegöi li?

¹⁷ Aboto ba dödö ndra Samaduhuʼö Yehowa enaʼö tola muʼowuloi niha moroi ba ngawalö li, moguna muturiaigö turia somuso dödö ba ngawalö li. Töra ba zi 130 fakhe, oya publikasi si no tafoʼeluaha enaʼö tola tafahaʼö niha ba Zura Niʼamoniʼö. Hizaʼi iadaʼa, publikasi daʼö no mufoʼeluaha ia ba zi töra 900 ngawalö li. Lö irai ba zilalö simane daʼa waʼoyania. Oroma wa ifalua Yehowa iadaʼa tandra sahöli-höli dödö ba wangowuloi niha moroi ba ngawalö soi. Börö me no tefaʼanö gö ba wamati ba ngawalö li, tola so wahasara dödö ba ngawawa zato sibai ba wamosumange Yehowa, hewaʼae moroi ba zi sagörö ulidanö ira. Ba laʼila niha wa owölö-ölö ono mbanua Yehowa ba wanuriaigö ba faoma laʼomasiʼö nawöra. Tatu daʼa möi fangaro wamatida!​—Mat. 24:14; Yoh. 13:35.

HADIA GELUAHA GANGILATA ANDRÖ KHÖDA?

18. (a) Moloʼö Yesaya 46:10, 11, hana wa lö tokea dödöda ba ginötö ibeʼe Yehowa alua wamaʼeleʼö sanandrösa ba ngawawa zato sibai? (b) Hana wa lö hadöi ba dödö niha sanötöna ba gulidanö wa no lafaehusi ira?

¹⁸ Tatu omuso sibai dödöda me no taʼila geluaha sanandrösa ba ngawawa zato sibai! Lö tokea dödöda ba ginötö ifalua Yehowa sahöli-höli dödö enaʼö alua wamaʼeleʼö andrö. (Baso Yesaya 46:10, 11.) Omuso dödö ngawawa zato sibai börö wanötöna nibeʼe Yehowa khöra. Hewaʼae lö tebayoini ira faoma eheha Lowalangi wefao khö Yesu ba wangai halöwö ba zorugo, lö lamane tödöra wa no lafaehusi ira. Ba Zura Niʼamoniʼö tabaso sanandrösa ba ndra matua hegöi ira alawe samati nituturu geheha niʼamoniʼö, hizaʼi lö tefarahu ira ba zi-144.000. Samösa moroi ba gotaluara yaʼia daʼö Yohane Samayagö Idanö. (Mat. 11:11) Duma-duma tanö böʼönia Dawido. (Hal. 2:34) Yaʼira hegöi miliaran niha tanö böʼö tesusugi ira dania, ba auri ira sagötö faʼara ba gulidanö. Fefu ira hegöi ngawawa zato sibai, tebeʼe khöra ginötö ba wangoromaʼö faʼalöfaröira khö Yehowa ba wotuhini famatörönia.

19. Hadia nifaluada na aboto ba dödöda geluaha gangilata Yohane sanandrösa ba ngawawa zato sibai?

¹⁹ Sagötö waö-waö waʼauri niha ba gulidanö, awena sakali daʼa ifalua Yehowa ba wangowuloi niha si zuta faʼato moroi ba ngawalö soi, si fao fahasara dödö ba wamosumange yaʼia. Gofu hezoso wanötönada he ba zorugo mazui ba gulidanö, moguna tatolo niha enaʼö itugu ato zi fao ba ngawawa zato ”mbiri-biri tanö böʼö”. (Yoh. 10:16) Ba zi lö ara tö ibeʼe Yehowa alua wamakao sabölö-bölö si no mufaʼeleʼö. Ba luo daʼö dania, fefu wamatörö niha gulidanö hegöi agama sofaya si no mameʼe tefakao niha hasambalö tehori. Fefu zi fao ba ngawawa zato sibai, tebeʼe khöra ginötö sahöli-höli dödö, yaʼia daʼö ba wamosumange Yehowa sagötö faʼara!​—Fam. 7:14.