Sindruhu Sanandrösa ba Wamatörö Lowalangi
Ifahaʼö ndra nifahaʼönia Yesu sanandrösa ba wangandrö, ”He Ama khöma si so ba zorugo, yateʼamoniʼö döimö. Yatohare Wamatörömö. Yaʼitörö zomasi ndraʼugö, hulö simane ba zorugo, yasimanö göi ba gulidanö.” (Mataiʼo 6:9, 10) Hadia Wamatörö Lowalangi andrö? Hadia nifalua Wamatörö andrö? Ba hana wa moguna taʼohe daʼö ba wangandrö?
Yesu zi tobali Razo ba Wamatörö Lowalangi.
Luka 1:31-33: ”Öbeʼe töinia Yesu. Tobali ia dania sebua ba lafotöi ia Ono moroi khö Wondrege Zalawa. Ibeʼe khönia Lowalangi Yehowa dadaoma duania Dawido, ba tobali ia Razo ba ngaʼötö Yakobo sagötö faʼara, ba lö tebulö Wamatörönia.”
Famatörö Lowalangi si tobali tuho siföföna nifaʼema Yesu ba wanuriaigö.
Mataiʼo 9:35: ”Itöröi fefu mbanua sebua awö mbanua side-ide Yesu, ifahaʼö niha ba nahia waʼowulo, ituriaigö duria somuso dödö sanandrösa ba Wamatörö Lowalangi, ba ifadöhö fefu ngawalö wökhö hegöi faʼatebai mboto.”
Ifatunö khö ndra nifahaʼönia Yesu hadia zi tobali tandra waʼatohare Famatörö Lowalangi enaʼö aboto ba dödöra.
Mataiʼo 24:7: ”Maoso dania zi sambua soi isuwö soi böʼö, simanö göi zalua ero sambu-sambua famatörö. Alua lofo sabölö-bölö misa hegöi duru danö.”
Ira nifahaʼö Yesu iadaʼa laturiaigö Wamatörö Lowalangi ba zi sagörö ulidanö.
Mataiʼo 24:14: ”Ba teturiaigö dania Wamatörö Lowalangi andrö, turia somuso dödö ba zi sagörö ulidanö misa, tobali famaduhuʼö ba ngawalö soi ba awena dania amozua götö danö andre.”