Faʼowulo ba Weʼamöi Manuriaigö si Tobali Famarou Dödö ba Si no Lafaʼan
1. Hadia gunania khöda waʼowulo ba weʼamöi manuriaigö?
1 Iʼowuloi Yesu ndra nifahaʼönia si-70 fatua lö mofanö ira ba wanuriaigö. (Luka 10:1-11) Ifasugi ba dödöra wa tenga ha yaʼira zamalua halöwö daʼa, fao khöra Yehowa ”sokhö basitö”. Ibeʼe khöra wanuturu lala Yesu ba wamalua halöwö fanuriaigö, aefa daʼö, ifatenge ira ”daru-darua”. Simanö göi ba ginötö andre, fatua lö mofanö ita ba wanuriaigö moguna teʼowuloi ita ba wanema famarou dödö ba fanuturu lala enaʼö fagölö gohitö dödöda.
2. Hawaʼara ginötö si tola laʼogunaʼö na owulo ba weʼamöi manuriaigö?
2 Meföna, na owulo ba weʼamöi manuriaigö tola laʼogunaʼö ginötö 10 irugi 15 menit, ba wotatugöi awö, hezo mbanua, ba fangandrö. Tebörögö ba mbaŵa si Öfa andre, angowuloa fanuriaigö laʼogunaʼö ginötö 5 irugi 7 menit böi töra. Na no awai gangowuloa ba luo migu, böi oya ginötö niʼogunaʼö saʼe na lafalua waʼowulo ba weʼamöi manuriaigö, börö me no tatema wamahaʼö ba ginötö daʼö, enaʼö oya ginötöda ba wanuriaigö. Na so ndra perintis mazui talifusöda tanö böʼö si no mamörögö fanuriaigö fatua lö owulo ba weʼamöi manuriaigö, tola latohugö weʼamöi manuriaigö.
3. Hadia gunania khö ndra talifusöda banua niha keriso na oya laʼogunaʼö nahia waʼowulo ba weʼamöi manuriaigö?
3 Faʼowulo ba weʼamöi manuriaigö andre lafaʼanö ia enaʼö oya gunania khö ndra talifusöda simöi manuriaigö. Na oya nahia niʼogunaʼö ba waʼowulo weʼamöi manuriaigö, tatu manö aoha khö ndra talifusöda banua niha keriso ba wangondrasi nahia andrö ba aoha khöra weʼamöi manuriaigö. Ira talifusöda sondröniaʼö ba waʼowulo weʼamöi manuriaigö tola lafarou dödö ndra talifusöda. Fatua lö laʼasiwai faoma fangandrö, moguna laʼila ira talifusöda haniha nawöra ba hezo mbanua si no latatugöi ba wanuriaigö.
4. Hadia mbörö wa tebai ta osiwawöi gowuloa weʼamöi manuriaigö andrö?
4 Faʼowulo ba Weʼamöi Manuriaigö Lö Hadöi Amaehutania ba Gangowuloa Böʼö: Lö fefu ndra talifusöda ba mbanua niha keriso fao ira ba waʼowulo weʼamöi manuriaigö, börö me angowuloa andrö moguna ia ha khö ndra talifusöda si möi manuriaigö. Tobali, tenga daʼö geluahania faʼowulo andre lö moguna khöda mazui taʼosiwawöi. Simane angowuloa böʼö, faʼowulo ba weʼamöi manuriaigö andrö nibeʼe Yehowa khöda, enaʼö tola tafarou dödö nawöda ba wamati ba mbua-bua si sökhi. (Heberaiʼo 10:24, 25) Börö daʼö talifusöda sondröniaʼö ba waʼowulo weʼamöi manuriaigö moguna ifahaʼö ia enaʼö nifaʼemania andrö tobali famosumange Yehowa ba tola moguna khö ndra talifusöda si möi manuriaigö. Na so ndra talifusöda si möi manuriaigö ba ginötö daʼö, enaʼö laʼodödögö wangondrasi owuloa ba weʼamöi manuriaigö.
5. (a) Hadia halöwö ndra satua sondröniaʼö ba waʼowulo ba weʼamöi manuriaigö? (b) Hewisa dalifusöda ira alawe na yaʼia zangolohesi angowuloa andrö?
5 Nifalua Dalifusöda Sondröniaʼö: Fatua lö ihalö halöwö si no labeʼe khönia ba gangowuloa, moguna lafatunö khönia hadia zinangea ifalua. Simanö göi ba waʼowulo ba weʼamöi manuriaigö, na lafalua ia ba nahia si no latatugöi, satua sokubaloi mazui talifusöda tanö böʼö si no latatugöi zangolohesi. Hizaʼi na laʼosambuaʼö gowuloa ba weʼamöi manuriaigö, satua sokubaloi tola itatugöi haniha dalifusöda si tola mangolohesi ba ginötö daʼö. Satua sokubaloi tola ibeʼe garate waö-waö halöwö khö ndra talifusöda, ba tola göi ibeʼe ba nahia gangombakhata. Satua sokubaloi moguna ifaigi haniha dalifusöda sinangea mangolohesi faʼowulo ba weʼamöi manuriaigö andrö. Na lö hadöi satua sokubaloi, enoni, mazui talifusöda ira matua tanö böʼö si no tebayagö idanö sondröniaʼö ba waʼowulo weʼamöi manuriaigö, tola iʼandrö khö dalifusöda ira alawe si no tebayagö idanö ba wondröniaʼö angowuloa andrö.—Duho: Na Talifusöda Ira Alawe Zangolohesi, ba ngaʼörö si 6.
6. Hana wa moguna wamaʼanö si sökhi khö ndra talifusöda sondröniaʼö owuloa weʼamöi manuriaigö?
6 Na no labeʼe khöda halöwö ba Zekola Famomaha ba Wanuriaigö mazui ba Gangowuloa Fanuriaigö, enaʼö taʼonorogö tödö sibai ba tafahaʼö ita fatua lö taʼolohesi ba ginötönia. So ösa ndra talifusöda awena lafaʼanö ira na no ahatö tebörögö gangowuloa. Simanö göi zondröniaʼö ba gowuloa ba weʼamöi manuriaigö lö iʼosiwawöi halöwö si no labeʼe khönia. Börö me lö ara ginötö niʼogunaʼö ba gowuloa andrö, moguna wamaʼanö si sökhi enaʼö tefaudu ginötö, fao wa lahenaigö latatugöi hezo mbanua möi manuriaigö.
7. Hadia manö zi tola ifatunö talifusöda sondröniaʼö ba gowuloa weʼamöi manuriaigö?
7 Tehalö Moroi ba: Börö mefaböʼö-böʼö zalua ero sambua banua, sawuyu si lö faröi lö latatugöi hadia zinangea lafaʼema ba gowuloa weʼamöi manuriaigö. Kotak ba ngaʼörö 6, ”Ba Ginötö Owulo ba Weʼamöi Manuriaigö, Tola Öfatunö”, hadia zi tola alua. Na so waʼowulo ba weʼamöi manuriaigö andre so huhuo si fao fanofu. Tola göi mubeʼe wamadumaisi si no lafaʼanö mazui video famahaʼö si tefaudu moroi ba jw.org. Sondröniaʼö ba gowuloa andre moguna iʼangeraigö hadia duho si tola mondrouʼö faʼatua-tua ndra talifusöda si möi manuriaigö.
8. Hadia duho sinangea lafatunö ba luo Satu ba Migu?
8 Duma-dumania na luo satu, ato ndra talifusöda sameʼe Menara Pengawal ba Sadarlah! Ato ndra talifusöda sangogunaʼö inötö ba wanuriaigö na luo satu, tatu manö no olifu ira hadia zi no irai lafahaʼö yaʼira ba Mbongi Wamahaʼö ba Nomo. Börö daʼö, tola öfuli öfaigi mangawuli ngaʼörö tanö furi ba Halöwöda Khö Lowalangi. Sondröniaʼö tola ifatunö hadia duria sawena alua, mazui luo sebua si toʼölö ba niha sato, tola taʼogunaö duho daʼö si tobali lala khöda enaʼö tola fahuo-huo ita khöra ba tabeʼe khöra mbuku soʼamakhaita ba nifatunö andrö, enaʼö tola tafuli ita khöra ba ginötö tanö böʼö. Talifusöda sondröniaʼö tola iʼandrö mbua gera-era ndra talifusöda si no irai mameʼe buku ba mbaŵa daʼö, enaʼö tobali famarou dödö ndra talifusöda tanö böʼö. Ba luo migu, sondröniaʼö tola ifatunö hadia mbuku si tola labeʼe ba mbaŵa daʼö. Buku famahaʼö simane Turia Somuso Dödö Moroi khö Lowalangi ba Fondro-ndrongo Li Lowalangi ba buku Alkitab Ajarkan tola labeʼe ba niha gofu hezo ginötö, talifusöda sondröniaʼö tola ifatunö hewisa lala ba wameʼe buku andre.
9. Hadia nifatunö ba gowuloa weʼamöi manuriaigö ba luo satu na inötö so mbuku si lö tola löʼö mu bagi?
9 Na so ndra talifusöda si fao wanuriaigö ba ngaluo satu, talifusöda sondröniaʼö tola iʼombakhaʼö hewisa lala ba wameʼe buku si bohou, undranga mazui buku side-ide. Mazui iʼombakhaʼö talifusöda sondröniaʼö andrö hadia zinangea tafalua na so niha somasi fahuhuo ba Daromali. Talifusöda sondröniaʼö iʼandrö khö ndra talifusöda enaʼö latutunö hadia zi no irai lafalua me möi ira manuriaigö ba wameʼe buku ba niha.
10, 11. Enaʼö aʼozu gowuloa weʼamöi manuriaigö hadia nifalua ndra talifusöda?
10 Nifalua ndra Talifusöda Sanuriaigö: Wa tola aʼozu gowuloa ba weʼamöi manuriaigö, börö na so ndra talifusöda si möi ba ginötö daʼö. Na so ndra talifusöda si no mamahaʼö yaʼira ba mbongi wamahaʼö ba nomo, tola la tutunö zi tobali famarou dödö ba ginötö so gowuloa weʼamöi manuriaigö mazui khö nawöra si fao ba wanuriaigö. Famaʼanö si sökhi eluahania no tahenaigö hadia mbuku si tola taʼohe fatua lö möi ita ba gowuloa weʼamöi manuriaigö enaʼö alio mofanö ita ba mbanua si no latatugöi dania.
11 Tahenaigö ita fatua lö mubörögö gowuloa ba weʼamöi manuriaigö. Fefu ita tafaudugö ginötö weʼamöi ba gangowuloa. Na ahou ita weʼaso ba gowuloa weʼamöi manuriaigö, tola mangoloi dödö ndra talifusöda sato. Hadia mbörö? Oya zinangea iʼangeraigö talifusöda sondröniaʼö ba wotatugöi haniha nawö. Na lö hadöi ato ndra talifusöda si möi, tola ifatenge ira ba mbanua si no irai laʼohalöwögöigö. Na möi ita manuriaigö ba mbanua saröu, ira talifusöda si lö hadöi hondra tola la faogö ira khö ndra talifusöda si so hondra. Na ba mbanua daʼö ato niha si lö sökhi, talifusöda ira matua zi möi ba mbanua daʼö. Ira talifusöda si tebai boto tola lafatenge ira weʼamöi wanuriaigö ba mbanua sahatö. Ira talifusöda sawena fao manuriaigö, tola lafaogö ira khö ndra talifusöda si no toʼölö. Tola lafuli la fawuʼa hadia zi no la tatugöi mege na so ndra talifusöda sawena tohare. Tola manö so mbörö wa tola ahou ita weʼamöi ba gowuloa weʼamöi manuriaigö. Hizaʼi, na asese ahou ita weʼamöi ba wanuriaigö, tola tasofu khöda samösa hadia börö me uʼosiwawöi gowuloa daʼa, na börö me tebai ubagi ginötögu.
12. Na no toʼölö ötatugöi nawömö samösa, hadia zinangea öʼangeraigö?
12 Tola latatugöi nawöra ira talifusöda fatua lö tebörögö gowuloa ba weʼamöi manuriaigö mazui tola la tatugöi ira talifusöda sondröniaʼö. Na no asese taʼalui nawöda samösa, hadia no ’öbeʼe ginötö’ khö ndra talifusöda böʼö we fao ba wanuriaigö, tenga ha khö zi fahuwu khöu? (II Korindro 6:11-13) Hadia tola ötatugöi ginötöu we fao khö ndra talifusöda sawena manuriaigö enaʼö so khöra waʼatua-tua? (I Korindro 10:24; I Timoteo 4:13, 15) Haogö öfondro-ndrongo wanuturu lala nifaʼema dalifusöda sondröniaʼö hezo mbanua si no latatugöi ba wanuriaigö. Böi bulöʼö hadia zi no latatugöi ba gowuloa weʼamöi manuriaigö ba anemai mofanö.
13. Na owölö-ölö ita ba wamalua halöwö hadia gunania khöda?
13 Me no mangawuli ndra nifahaʼö Yesu si 70 ba wanuriaigö,”omuso sibai dödöra.” (Luka 10:17) Angowuloa si no irai ifalua Yesu, daʼö zi tola manolo yaʼira ba wanuriaigö. Simanö göi ba ginötö andre. Na tafalua hadia ia zi tobali halöwöda, faʼowulo ba weʼamöi manuriaigö tola tobali famarou dödö khöda ba halöwö si no lafaʼanö enaʼö ”teturiaigö duria somuso dödö ba niha fefu.”—Mataio 24:14.
Moguna ifake mbalu-balu högö ba mudadao ia. Fangolohesi yaʼia fagölö simane na laʼolohesi ira talifusöda ira matua. Böi simane samahaʼö ia ba gotalua ndra talifusöda, ifalua daʼö simane huhuo si fao fanofu. Na iʼandrö samösa dalifusöda ira alawe si no mubayagö idanö ba wangandrö, moguna ifake mbalu-balu högö. Na so dalifusöda ira matua sawena so tefaudu ba ginötö dalu gowuloa ba weʼamöi manuriaigö, talifusöda ira matua andrö zanohugö. Satua sondröniaʼö moguna ibeʼe wanuturu lala enaʼö böi asese alua zi manö daʼö ba ginötö gangowuloa. Duma-dumania, Na awena tohare dalifusöda ira matua si bohou ebua sawena mubayagö idanö ba dalu gowuloa ba weʼamöi manuriaigö andrö, tebai itohugö wangolohesi owuloa daʼö börö me tenga nasa sinangea ia. Na alua zimane daʼö, moguna iʼombakhaʼö satua sokubaloi wa talifusöda ira alawe andrö zangolohesi owuloa ba weʼamöi manuriaigö ba talifusöda ira matua si bohou ebua andrö zangandrö na sinangea ia, mazui samösa dalifusöda ira matua sangondrasi si no göna degu-degu tebai idöniaʼö wangandrö ba gowuloa andrö, ha ira satua sokubaloi zangila hadia mbörö. Ira satua sokubaloi lö moguna lafatunö hadia zalua, hizaʼi laʼombakhaʼö khö dalifusöda ira alawe sondröniaʼö ba gowuloa andrö enaʼö itohugö halöwönia aefa daʼö yaʼia zangandrö hewaʼae so dalifusöda ira matua si no göna degu-degu ba daʼö. Satua sokubaloi zamatunö khö dalifusöda ira alawe hadia ngaluo idöniaʼö gowuloa ba weʼamöi manuriaigö.
Faʼowulo ba weʼamöi manuriaigö böi taʼaohasi ba dödö mazui tamane wangumaʼö lö moguna sibai ia moroi ba gangowuloa tanö böʼö
Na so zamaʼanö yaʼia ba wondröniaʼö owuloa ba weʼamöi manuriaigö, moguna iʼangeraigö duho sinangea ifaʼema enaʼö tobali famarou dödö ndra talifusöda si möi manuriaigö ba ginötö daʼö