Haogö Wangogunaʼö Inötö ba Wanuriaigö
Sagötö famalua halöwö fanuriaigö me döfi 2014, Laʼogunaʼö ginötö ira Samaduhuʼö Yehowa 1.945.487.604 za ba wanuriaigö—tandra wa owölö-ölö ba wamalua halöwö famosumange Yehowa! (Zinunö 110:3; I Korindro 15:58) Börö me no ”fadege ginötö”, hadia tola taʼogunaʼö ginötöda enaʼö ato niha nifalukhaisida nasa?—I Korindro 7:29.
Na tahaogö wangogunaʼö inötö ba wanuriaigö moguna tafaudugö ba ginötö somasi niha. Duma-dumania, na si toʼölö ita manuriaigö sambua za mazui töra hewaʼae na lö si fahuhuo ita ba niha, hadia tola taʼalui lala enaʼö falukha ita ba fahuhuo ba niha sato? Faböʼö-böʼö zalua ero sambua banua. Tobali, fefu wamarou dödö nifaʼema ba daʼa dania, tola itolo ita hewisa wangogunaʼöda inötö enaʼö böi hulö ’zamözi talu mbanua’.—I Korindro 9:26.
Fanuriaigö Misa ba Nomo: Ba zi haʼuga wulu fakhe, ira talifusöda labörögö manuriaigö ba nomo-omo misa. Hizaʼi, börö me ato niha sohalöwö ba zi maʼökhö, tandraigö aeʼe manuriaigö ba zi tanö owi mazui na arakhagö bongi, börö me ato niha si no mangawuli yomo wolombase. Na ba zi maʼökhö, tola ato zi falukha khöda ba wanuriaigö duma-dumania ba hari mbale.
Fanuriaigö ba Nahia Sato Niha: Meza awö nahia mbuku sibagania tabeʼe ba zasese latörö niha ba böi taluʼi mbanua si no latatugöi ero sambua angowuloa. (Faigi Pelayanan Kerajaan Kita Juli 2013, hlm. 5.) Na ambö ato niha ba mbanua andrö, ira Satua Sokubaloi tola lahalö gangetula enaʼö lafindrakö naha mbuku ba lafaigi zabölö ato niha.
Feʼamöi Mangawuli ba Wamahaʼö Niha ba Zura Niʼamoniʼö: Hadia tola öfaudugö ginötöu ba wamalukhaisi mangawuli niha si no irai falukha khöu ba ginötö somasi ira ba wameʼe khöra famahaʼö moroi ba Zura Niʼamoniʼö? Duma-dumania, na sihulö wongi hari satu baga na manuriaigö ba nomo omo misa, hadia tola öfalua wamahaʼö ba Zura Niʼamoniʼö mazui famalukhaisi yaʼira mangawuli ba zi tanö owi? Ba ginötö tafuli tafalukhaisi ira, sibagania böi ato.
Hewaʼae na tola taʼerai ginötöda haʼuga za na möi ita manuriaigö, sabölö omuso dödöda nasa na ato zotemaʼö. Na ambö tefaudu lala wanuriaigö nifaluada, tandraigö falua lala tanö böʼö. Ohe ba wangandrö ”khö zokhö basitö” enaʼö ibeʼe wanuturu lala hewisa enaʼö sökhi wangogunaʼöda inötö na möi manuriaigö!—Mataiʼo 9:38.