Tolo Niha Sauʼa Enaʼö Lafahaʼö Ira Waʼaboto ba Dödö Yehowa

1. Hewisa ba wangoromaʼö Yesu faʼahakhö dödö ba niha sauʼa?

¹ Lö aratö ginötö waʼamate Yesu. Me iröi mbanua Yerikho, so darua niha sauʼa siʼao, ”He tua, hakhösi tödö ndraʼaga!” Hewaʼae abu dödö Yesu ba wanandraigö si lö aratö alua khönia, tobali ibatogö ia Yesu, ikaoni niha sauʼa andrö si darua, aefa daʼö ifadöhö ira. (Mataiʼo 20:29-34) Hewisa ita ba wangoromaʼö faʼahakhö dödö simane nifalua Yesu?

2. (a) Hewisa enaʼö tola manuriaigö ita ba niha sauʼa ba nahia sato niha? (b) Hadia zi tebai olifugö ita na tatolo niha sauʼa?

² Lau Fahuwu: Na falukha ndraʼugö ba niha sauʼa, ba nahia sato niha, ombakhaʼö haniha ndraʼugö ba beʼe khöra wanolo. Börö me asese lafakao ira niha, tola manö mangenahö dödönia khöda. Tobali, na fahuwu ndraʼugö ba öʼomasiʼö ia tola so khönia waʼahono dödö. Törö tödöu wa faböʼö-böʼö waʼabalunö niha, daʼa zo tatugöi hadia wanolo sinangea tabeʼe khöra. Na no ötolo ira, tola öʼombakhaʼö wa yaʼugö samösa sanuriaigö moroi ba Zura Niʼamoniʼö. Sofu khönia hadia omasi ia ifondro-ndrongo na tabaso Zura Niʼamoniʼö simane Zinunö 146:8 mazui Yesaya 35:5, 6. Na iʼila ibaso hurufo Solete, sofu khönia, hadia omasi ia iʼokhögö mbuku si no tehenaigö ba hurufo Solete si tola manolo yaʼia ba wamahaʼö ba Zura Niʼamoniʼö. Tola ötolo ia enaʼö isöndra fail audio moroi ba jw.org. na so khönia komputer si tola mubaso ba layar hurufo solete, tola omuso dödönia ba wamondro-ndrongo tanö böʼönia nasa moroi ba jw.org si tola ihalö ba format RTF (Rich Text Format).—Faigi Kotak ”Ba Ginötö Ötolo Niha Sauʼa . . .”

3. Hewisa enaʼö tola falukha ita ba niha sauʼa ba ginötö möi ita manuriaigö?

³ Mangalui Niha Sauʼa: Lö asese falukha ita ba niha sauʼa na möi ita manuriaigö ba nomo, börö me lö omasi ira fahuo-huo ba niha si lö irai falukha khöra. Andrö moguna taʼodödögö wangalui ba ”tazofu-zofu” enaʼö tola manuriaigö ita khöra. (Mataiʼo 10:11) Hadia so nawöu wohalöwö mazui awöu ba zekola si no balunö? Odödögö wahuhuosa khönia. Na ba mbanua si toröi yaʼugö so zekola niha sauʼa, beʼe khöra mbuku si so hurufo solete, ba tola öröi ba zekola daʼö. Hadia so niʼilau niha sauʼa ba nösi nomo si möi ndaʼugö? Ba mbanua si toröi yaʼugö, hadia so nahia si no lahenaigö ba niha sauʼa mazui nahia waʼatoröira? Ombakhaʼö ba nösi nomora, ba niha samaigi-maigi yaʼira, mazui ba niha sangonorogö tödö yaʼira, wa ira Samaduhuʼö Yehowa omasi latolo niha sauʼa, ba beʼe khöra mbuku si no so ba hurufo Solete mazui rekaman audio. Fatunö khönia zi no ifabuʼu Lowalangi moroi Zura Niʼamoniʼö, wa lö aratö teboka hörö zauʼa sagötö faʼara. Tola öfatunö khönia video moroi ba jw.org tuhonia ”Tanpanya, Saya Hilang Arah”, samösa niha sauʼa sondrunö-ndrunö börö me no so khönia Zura Niʼamoniʼö ba hurufo Solete. Na tatutunö hadia dani weʼasoda, no sambua lala enaʼö tola falukha ita ba niha sauʼa.

4. Hadia zi tobali famahaʼö khöda moroi khö dalifusöda Janet?

⁴ So samösa dalifusöda sauʼa sotöi Janet möi ia ba nahia niha sauʼa. Fahuhuo khö zi samösa ono alawe. Imane khönia Janet, ”Ibokai Yesu hörö zauʼa, ba wangoromaʼö hadia nifaluania dania ba niha si lö mangi niha.” Lafatunö nösi zura Wamaʼeleʼö 21:3, 4, ifatunö khönia Janet, awena alua daʼa dania ba ginötö wamatörö Mbanua Lowalangi. Ahono nono alawe no mege, Aefa daʼö imane, ”Lö irai urongo wehede simane daʼa moroi ba niha sauʼa. Ato niha sangumaʼö wa tola auʼa zi samösa niha, börö gamuatania mazui börö gamuata ndra satuara meföna.” Ifaʼoheʼö mbuku Alkitab Ajarkan via e-mail khö nono alawe andrö, ba lafahaʼö ira ba Zura Niʼamoniʼö dua kali ba zi sa migu.

5. Hewaʼae tebai tafadöhö niha sauʼa simane nifalua Yesu, hadia howu-howu nitemada me no tafatunö khöra duria somuso dödö?

⁵ Tebai tafadöhö niha sauʼa simane Yesu, hizaʼi, tola tatolo niha si no imbaŵainö Lowalangi zi sagötö tanö andre, hegöi niha sauʼa, enaʼö tola aboto ba dödöra Daromali Lowalangi. (II Korindro 4:4) Ahatö ba Yerikho ifadöhö niha sauʼa si darua andrö Yesu börö me ”ahakhö dödönia”. (Mataiʼo 20:34) Na so khöda waʼahakhö dödö, tola omuso dödöda wanolo niha sauʼa enaʼö lafahaʼö ira waʼaboto ba dödö sanandrösa khö Yehowa, sangeheta fökhö sauʼa sagötö faʼara.