Enaʼö Onekhe Ita ba Wanuriaigö—Tolo Niha Nifahaʼöu Enaʼö Idouʼö Wamahaʼö Yaʼia ba Daromali

Hana wa Moguna: Enaʼö tedou ba wamati niha nifahaʼöda, tenga ha ba dane-dane wamahaʼö Zura Niʼamoniʼö lafahaʼö ira. (Heb. 5:⁠12–6:1) Moguna laʼodödögö wamahaʼö yaʼira enaʼö aboto ba dödöra hadia zi no labaso ba lafalua ba waʼaurira. (Gamd. 2:⁠1-6) Na laʼila laʼogunaʼö ngawalö mbuku si no tehenaigö, tola lasöndra wanema li moroi ba Zura Niʼamoniʼö. Na so khöra wangodödögö ba wamalua hadia zi no lafahaʼö ira, daʼa zi tobali fanolo khöra na göna ira fanandraigö.—Luk. 6:47, 48.

Lala Wamalua:

Abakhaiʼö wangumaʼö khöra wa moguna sibai muʼandrö wanolo khö Yehowa ba wangandrö fatua lö lafahaʼö ira ba Zura Niʼamoniʼö.—Yoh. 14:26; I Kor. 2:10.
Iʼotarai ba wamobörö, farou dödöra enaʼö lafaʼanö ira fatua lö lafahaʼö ba Zura Niʼamoniʼö. Foromaʼö mbukumö khönia si no ötandrai, ba fahaʼö ia hewisa lala ba wotandrai fanema li moroi ba mbukunia.
Farou dödö niha nifahaʼöu enaʼö ibeʼe mbua wangera-ngerania samösö. Moguna wangodödögö wamahaʼö yaʼira irege ba ginötö öbeʼe wanofu tenga ha ibaso manö wanema li moroi ba mbuku.
Farou dödönia ba wombaso Sura Niʼamoniʼö ero maʼökhö. Foromaʼö khönia wombaso Sura Niʼamoniʼö si so ba jw.org⁠/id, enaʼö aoha wamalua yaʼia. Ba wombaso Sura Niʼamoniʼö ero maʼökhö, moguna so wangodödögö enaʼö so gunania ba waʼaurida.—Zin. 1:2, 3.
Tolo niha nifahaʼöu ba wangogunaʼö Watchtower Library mazui PERPUSTAKAAN ONLINE Menara Pengawal ba wanöndra fanema li ba Zura Niʼamoniʼö sanandrösa ba wanofu-nofu. Tolo ia enaʼö iʼila kode mbuku si toʼölö laʼogunaʼö ba gangowuloa.

Tandraigö Öfalua Daʼa ba zi Sara Waŵa Andre:

Na no awai mifatunö zi sambua tuho mazui faza, andrö ba niha nifahaʼöu enaʼö itutunö hadia wamahaʼö si tola ihalö moroi ba duho si no tafahaʼö. Na lö hadöi niha nifahaʼöu, tola öhalö wamahaʼö khöu hadia zi no öbaso ba Zura Niʼamoniʼö mazui ba mbuku Manuriaigö Famatörö Yehowa enaʼö tedou waʼatua-tuamö.