Oʼö Duma-Duma Ndra Samaʼeleʼö Meföna—Habakuki
1. Hadia zalua ba ginötö Habakuki si fagölö ba zalua ba ginötöda andre?
1 Börö me no tefasui ita faʼalösökhi ba ginötö andre, te manofu dödöda simane fanofu Habakuki khö Yehowa, ”Hana wa öfaʼilaʼö khögu zi lö sökhi, ba öfaigi-faigi manö göi wamakao niha awöra?” (Hab. 1:3; II Tim. 3:1, 13) Na tafatou-tou tödöda wehede Habakuki hegöi duma-duma wa lö faröinia, daʼö zanolo yaʼita ba wanaögö famakao gasa-gasa wombaloida fanguhuku Yehowa.—II Fet. 3:7.
2. Hadia dandra wa lö faröi ita ba ginötö andre?
2 Lö Faröi Sagötö Faʼauri: Moroi na ihakhösi tödö manö waʼaurinia Habakuki, lö faröi ia ba wamalua ohitö dödö Yehowa. (Hab. 2:1) Ifaduhuʼö khönia Yehowa wa hasambalö alua hadia zi no ifabuʼu ba ginötönia, ba ”satulö tödö, ba ba wamatinia auri ia”. (Hab. 2:2-4) Hadia geluaha wehede daʼö ba niha Keriso sauri ba ngaluo safuria andre? Hewaʼae sökhi na taʼila hawaʼara tohare wanguhuku Yehowa andrö, tobali abölö moguna na faduhu dödöda wa si ndruhu-ndruhu tohare ia dania. Famati zi tola mamarou tödöda enaʼö so khöda wangelama ba taʼofönaiʼö wamalua halöwö fanuriaigö.—Heb. 10:38, 39.
3. Hana wa moguna so khöda waʼomuso dödö khö Yehowa?
3 Owua-wua Dödö Börö Yehowa: Ba ginötö tohare Gogi moroi ba danö Magogi ba wamakao ono mbanua Yehowa, ba daʼö tetandraigö wamatida. (Hez. 38:2, 10-12) Fefu niha göna famakao andrö, he ba niha si möna dania. So waʼambö balazo, tola manö taya gokhötada, ba faʼambö-ambö fefu ngawalö zoguna ba waʼauri. Hadia nifaluada na göna khöda wamakao simane daʼö? Iʼila Habakuki wa göna khönia wamakao dania, andrö lö tebulö iʼomusoiʼö dödönia ba wamosumange Yehowa. (Hab. 3:16-19) ’Faʼomuso dödöda ba khö Yehowa’ zanolo yaʼita ba wanaögö famakao salua ba zi so föna.—Neh. 8:10; Heb. 12:2.
4. Hadia zi tobali faʼomuso dödöda iadaʼa hegöi ba ginötö si so mifönada?
4 Niha nilumöʼö Yehowa ba ginötö wanguhukunia dania, lö aetu-aetu lafahaʼö ira ba wanörö lala waʼauri. (Hab. 2:14) Tefahaʼö göi dania niha nisusugi ba daʼö sanandrösa khö Yehowa. Börö daʼö, ba ginötö andre böi tabato wanuriaigö töi Yehowa hegöi ba wangombakha halöwö sahöli-höli dödö nifaluania!—Zin. 34:2; 71:17.