FAʼAURI NIHA KERISO
Oʼö Goi-Goi Yehowa Sanandrösa ba Mbua-bua
No itatugöi Lowalangi Yehowa goi-goi sanandrösa ba mbua-bua ba niha gulidanö. Duma-dumania, no itatugöi wa tebai lafabali wongambatö, he ira matua hegöi ira alawe. (Mat 19:4-6, 9) Iʼelifi fefu gamuata soʼamakhaita ba wohorö. (IKor 6:9, 10) Ibeʼe goi-goi sanandrösa ba lagu wonukha hegöi fangehao mboto si tola mamaehusi ono mbanuania.—VMoz 22:5; ITim 2:9, 10.
Ba gulidanö iadaʼa, ato niha zotimbagö goi-goi Yehowa. (Rom 1:18-32) Laʼoʼö lala wangera-ngera niha sato sanandrösa ba lagu wonukha, fangehao mboto hegöi mbua-buara. Ato zomuso tödö ba gamuata si lö sökhi nifaluara ba fatuwu ira ba niha si lö mamalua simane nifaluara.—IFet 4:3, 4.
Yaʼita Samaduhuʼö Yehowa, böi ataʼu ita ba woloʼö goi-goi Lowalangi sanandrösa ba mbua-bua. (Rom 12:9) Hewisa wamaluada daʼö? Moguna tafatunö ba niha si fao faʼatua-tua hadia zomasi Lowalangi. Hizaʼi, moguna tarorogö goi-goi sanandrösa ba mbua-bua ba waʼaurida. Duma-dumania, ba ginötö tafili mode nukha hegöi fangehaogö mbotoda, tola tasofu khöda samösa, ’Hadia tefaudu nifiligu andre ba goi-goi Yehowa mazui ba goi-goi gulidanö? Hadia oroma ba lagu wonukhagu hegöi ba wangehao mbotogu wa yaʼodo andre niha Keriso samosumange Lowalangi?’ Mazui ba ginötö tafili film somasi ita tafaigi, tola tasofu khöda samösa, ’Hadia omasi Yehowa nifaigigu andre? Goi-goi haniha niforomaʼö ba daʼö? Hadia hiburan nifiligu möi fangawuwu waʼaro dödögu ba goi-goi sanandrösa ba mbua-bua? (Zin 101:3) Hadia möi fangawuwu nösi nomogu mazui niha böʼö daʼö?’—IKor 10:31-33.
Hana wa moguna sibai taʼoʼö goi-goi Yehowa sanandrösa ba mbua-bua? Lö aratö ihori fefu soi hegöi si lö sökhi Yesu Keriso. (Hez 9:4-7) Ha niha samalua somasi Lowalangi niʼorifi. (IYoh 2:15-17) Andrö, datatuhini goi-goi Yehowa sanandrösa ba mbua-bua enaʼö fefu mbua-buada si sökhi niʼila niha möi famolakhömi Lowalangi.—IFet 2:11, 12.
Hadia zoroma moroi ba lagu wonukha hegöi fangehao mbotogu sanandrösa ba goi-goi mbua-bua niʼokhögögu?
FAIGI VIDEO TOBALI SI FAHUWU KHÖ YEHOWA—SAMÖSA NDRA MATUA, SAMÖSA NDRA ALAWE, BA TUTUNÖ WANOFU-NOFU ANDRE:
Hana wa sökhi na taʼoʼö goi-goi Yehowa?
Hana wa moguna lafahaʼö ndranora ira satua ba goi-goi Yehowa sanandrösa ba mbua-bua iʼotarai ba waʼide-ide?
Hewisa niha satua hegöi sawuyu-wuyu boto, latolo niha böʼö ba wanöndra mbua moroi ba waʼebua dödö Lowalangi?