FAʼAURI NIHA KERISO
Lala Enaʼö Tobali Nifahaʼö ba Zura Niʼamoniʼö Sowölö-ölö
Hadia omasiʼö lö faröi simane Danieli hewaʼae so wanandraigö? Owölö-ölö Danieli ba wamahaʼö yaʼia ba Daromali Lowalangi, simane ba ngawalö gangilata. (Dan 9:2) Möi fanolomö enaʼö lö faröi na owölö-ölö öfahaʼö ndraʼugö ba Zura Niʼamoniʼö. Hewisa wa tola? Daʼa zameʼe tedou wamatimö wa hasambalö alua nifabuʼu Yehowa. (Yos 23:14) Möi fanolomö göi enaʼö itugu öʼomasiʼö Lowalangi, samarou yaʼugö ba wamalua satulö. (Zin 97:10) Hizaʼi, hezoso öbörötaigö? Angeraigö wanuturu lala andre.
Hadia zinangea ufahaʼödo? Famahaʼö si sökhi yaʼia daʼö na asese tafaʼanö ita ba wangondrasi gangowuloa mbanua niha Keriso. Itugu moʼeluaha wombasomö Sura Niʼamoniʼö ero migu na öʼogunaʼö ginötömö ba wamalua riset ba duho si lö aboto ba dödömö. So göi zamili ba wamahaʼö yaʼira sanandrösa ba wamaʼeleʼö Zura Niʼamoniʼö, ngawalö mbua geheha Lowalangi, waö-waö wofanö Waulo tobali utusan injil mazui ba niwöwöi Yehowa. Na so wanofumö sanandrösa ba Zura Niʼamoniʼö ba ngaluo daʼö, sura ba baliʼö ia tuho wamahaʼömö aefa daʼö.
Hezoso tola usöndra gangombakhata? Faigi video Fakake Riset ba Wangalui Girö-Girö ba Wamati. Enaʼö öʼila hewisa waʼatua-tuamö, falua riset sanandrösa ba waö-waö kuaso gulidanö si no muʼamaedolagö gurifö samuʼi ba Danieli faza 7.
Hawaʼoya ginötö uʼogunaʼö ba wamahaʼö yaʼo? No sambua lala ba wangokhögö famati saro na asese tafahaʼö ita. Ogunaʼö ginötö sadogo-dogo ba wamörötaigö famahaʼö, ba na no ara douʼö ginötö niʼogunaʼömö. Famahaʼö ba Daromali Lowalangi hulö simane fangalui girö-girö si tobini, na itugu oya girö-girö nisöndramö itugu omasiʼö wangalui yaʼia! (Gamd 2:3-6) Itugu tedou waʼomasimö ba Daromali Lowalangi, ba famahaʼö sasese ba Zura Niʼamoniʼö tobali si toʼölö öfalua ba waʼaurimö.—IFet 2:2.
HADIA NIʼAMAEDOLAGÖ GURIFÖ SAMUʼI BA DANIELI FAZA 7?
ONÖNÖTA WANOFU:
Hewisa waʼalua Danieli 7:8, 24?
HALÖWÖ AEFA DAʼÖ:
Hadia niʼamaedolagö gurifö samuʼi ba Famaʼeleʼö faza 13?