FAʼAURI NIHA KERISO
”Iʼandrö Saohagölö Faulo khö Lowalangi ba Tefarou Dödönia”
Me larongo banua niha Keriso si so ba Roma waʼatohare Waulo, so sambua ngawawa ndra talifusö sanörö tanö töra 60 kilometer ba wamalukhaisi yaʼia. Hewisa dödö Waulo me iʼila waʼomasira hegöi si no latehegö? ”Me iʼila ira Faulo, iʼandrö saohagölö khö Lowalangi ba tefarou dödönia.” (Hal 28:15) Anehe ira, wa Faulo andre samösa niha sasese mangabölöʼö banua niha Keriso niʼondrasinia. Hizaʼi me lakuru ia, ira talifusönia zangabölöʼö yaʼia.—2Kor 13:10.
Ira satua samasui iadaʼa, laʼondrasi mbanua niha Keriso ba wangabölöʼö ndra talifusö. Simane ono mbanua Lowalangi tanö böʼö, itaria marase ira, so khöra waʼaombö dödö hegöi faʼide-ide dödö. Ba ginötö tohare zatua samasui hegöi foʼomonia ba mbanua niha Keriso si so yaʼugö, hadia zi tola öfalua ba wanolo yaʼira enaʼö barani irege tola ”tafarou dödö nawöda zamösana”?—Rom 1:11, 12.
Ondrasi gangowuloa weʼamöi manuriaigö. Teʼabölöʼö zatua samasui na laforege ira sanuriaigö enaʼö latema mbua ba wangondrasinia yaʼira. (1Tes 1:2, 3; 2:20) Te tola ölau merintis ekstra ba mbaŵa daʼö. Hadia tola öfasuraʼö döimö enaʼö fao ndraʼugö manuriaigö khönia mazui khö woʼomonia? Tola göi öʼohe ia mazui foʼomonia ba wamahaʼö niha nifahaʼömö ba Zura Niʼamoniʼö. Omuso dödöra falulu fohalöwö khö ndra sanuriaigö si faböʼö-böʼö, simane khö ndra talifusö sawena mamalua halöwö fanuriaigö hegöi sambö onekhe ba wanuriaigö.
Temaʼö dome. Hadia tola toröi ira ba nomomö mazui öbeʼe göra? Na tafalua daʼö, tola irasoi satua samasui hegöi foʼomonia wa taʼomasiʼö ira. Törö tödömö wa lö oya zinangea laʼogunaʼö.—Luk 10:38-42.
Fondrondrongo ba oʼö mene-mene nibeʼe. Omasi zatua samasui ba wanolo yaʼita enaʼö tedou ba wangai halöwö khö Yehowa. Tola manö, itaria ibeʼe mene-mene sabeʼe. (1Kor 5:1-5) Omuso dödönia na moloʼö ita.—Heb 13:17.
Foromaʼö wangandrö saohagölö. Fatunö khö zatua samasui hegöi khö woʼomonia, hadia manö mbua nitemau ba wamorege si no lafalua. Tola öwaʼö khöra daʼa mazui ösura ba garate side-ide.—Kol 3:15.