Hadia Zindruhunia Zameʼe Khöda Faʼohahau Dödö ba zi So Miföna?

Simane si no tatutunö ba artikel si no aefa, ato niha si faduhu tödö wa no itatugöi waʼauri zi samö-samösa niha Lowalangi, sekola salawa, kefe, hegöi na lafalua zi sökhi enaʼö ohahau dödöra ba zi so miföna. Hizaʼi dali zindruhunia, hadia nifaluara andrö hulö no laʼogunaʼö peta si fasala irege lö lakhamö gohitö dödöra. Na simanö, hadia sindruhu-ndruhu so zameʼe faʼohahau dödö khöda ba zi so miföna? So!

UMBU DURIA SI SÖKHI

Na moguna khöda wanuturu lala, si toʼölönia manofu ita ba niha sagatua-tua hegöi salawa döfi moroi khöda. So samösa zatua-tua ba salawa döfi si tola mameʼe khöda mene-mene si sökhi. Mene-mene daʼö tesöndra ba zi sambua mbuku nisura mato 3.500 fakhe silalö. Buku daʼö yaʼia Zura Niʼamoniʼö.

Hana wa tola mufaduhusi tödö Zura Niʼamoniʼö? Börö me daʼö si otarai khö wondrege zalawa döfi ba satua-tua ba zi sagörö banua si yawa awö danö. Lafotöi ia ”Zi No Alawa Döfi”, yaʼia ”Lowalangi götö-götö waʼara”. (Danieli 7:9; Sinunö 90:2) Baero daʼö, yaʼia andrö ”Somböi banua si yawa, Lowalangi sindruhu, Samazökhi ulidanö.” (Yesaya 45:18) Ba no göi ifatunö döinia khöda yaʼia daʼö Yehowa.—Sinunö 83:18.

Börö me Sura Niʼamoniʼö si otarai Lowalangi Samazökhi fefu niha, ösinia lö ihöni-hönisi zi sambua soi mazui si toʼölö lafalua. Mene-menenia tefaudu khöda mane maʼökhö ba moguna ba niha fefu. Ha Sura Niʼamoniʼö zabölö oya mufoʼeluaha ba no tefazawili ba zi sagörö ulidanö.a Börö daʼö, fefu niha tola labaso mbuku daʼa ba lasöndra mbuania. Fefu zalua andre tefaudu ia ba wehede Zura:

”Lö ifaigi mbawa niha Lowalangi, dozi samalua sindruhu ba sangataʼufi yaʼia moroi ba ngawalö soi, daʼö zomasi ia.”—HALÖWÖ ZINENGE 10:34, 35.

Hulö simane satua sangomasiʼö ba sanolo iraononia, simane daʼö göi Yehowa iʼomasiʼö ba itolo ita iʼogunaʼö Zura Niʼamoniʼö yaʼia daʼö Taromalinia. (2 Timoteo 3:16) Yaʼia zomböi yaʼita. Iʼila hadia zabölö sökhi khöda. Börö daʼö, tola tafaduhusi tödö hadia nifaʼemania khöda ba Zura Niʼamoniʼö.

TURIA SI TOLA MUFADUHUSI TÖDÖ

Ba Zura Niʼamoniʼö tasöndra duria si tola tafaduhusi tödö sanandrösa ba zi so miföna. Hadia dandrania khöda? Arakhagö 2.000 fakhe silalö, no tesura ba Zura Niʼamoniʼö ngawalö zalua hegöi amuata niha niʼilada iadaʼa.

SALUA

”Maoso dania zi sambua soi isuwö soi böʼö, ba simanö göi zalua ero sambu-sambua famatörö. Alua ndruru danö sabölö-bölö, lofo sabölö-bölö hegöi ngawalö wökhö.”—LUKA 21:10, 11.

AMUATA NIHA

”Böi zi lö aboto ba dödöu, so dania mbaŵa si lö sökhi sabua fanaögö ba ngaluo safuria andre. Amuata niha ba daʼö ha tana khöra laʼalui, sangomasiʼö anaʼa, sanuno yaʼira, sangosebua, sangoʼaya, si lö mamondrongo li zatua, si lö mangila mangandrö saohagölö, si faröi, si lö mangomasiʼö awöra, si lö fahasara dödö, samöbögö si lö duhu, si lö fanaha tödö, safaito, si lö mangomasiʼö si sökhi, si manga mböli, sabeʼe högö, si fayawa, sangomasiʼö isö-isö dödöra moroi ba waʼomasira Lowalangi.”—2 TIMOTEO 3:1-4.

Moloʼö yaʼugö, hewisa wa tola tefaudu zi no ifaʼeleʼö Sura Niʼamoniʼö ba ngawalö zalua iadaʼa? Tatu fao dödöu ba wehede Leung, si otarai Hong Kong. Imane, ”Fefu wamaʼeleʼö si so ba Zura Niʼamoniʼö no ara tesura daʼö. Ba alua ia ba ginötö si tefaudu. Tatu lö hadöi niha si tola mamaʼeleʼö simane daʼö, börö me Sura Niʼamoniʼö andrö si otarai khö wondrege zatua-tua moroi khöda.”

Ngaotu wamaʼeleʼö si so ba Zura Niʼamoniʼö si no alua.b Daʼa zangoromaʼö wa fehede si so ba Zura Niʼamoniʼö sindruhu-ndruhu moroi khö Lowalangi. Imane Yehowa, ”Yaʼo Lowalangi, ba lö hadöi Simane yaʼo. No iʼotarai ba wamobörö ufatunö lua-luania.” (Yesaya 46:9, 10) Börö daʼö, tola öfaduhusi tödö niwaʼö Zura Niʼamoniʼö sanandrösa ba zi so miföna.

TURIA SOGUNA IADAʼA IRUGI ZI LÖ AETU

Oya mene-mene si sökhi ba Zura Niʼamoniʼö. Na omasiʼö öfalua, tola örasoi mbuania. Nehegö atö mene-mene daʼa:

FANGERA-NGERA SI TEFAUDU SANANDRÖSA BA GEFE HEGÖI BA HALÖWÖ

”Sökhi zi sagokhö faʼahono dödö moroi na dua gokhö waʼerege dödö ba famorege ba wolohi angi.”—SANGOMBAKHA 4:6.

FAʼAURI BA ZI SAMBUA OMO

”Lö tola löʼö miʼomasiʼö woʼomomi ira alawe simane fangomasiʼömi yaʼami, ba foʼomo ira alawe göi enaʼö sindruhu-ndruhu miʼoʼö li ndra matuami.”—EFESO 5:33.

AMAKHAITA SI SÖKHI BA NIHA BÖʼÖ

”Böhöli wofönu ba röi waʼaukhu dödö; böi abao dödöu irege öfalua zi lö sökhi.”—SINUNÖ 37:8.

Mene-mene Zura Niʼamoniʼö tola ibeʼe khöda waʼohahau dödö iadaʼa hegöi ba zi so miföna. So mbuʼusa li Lowalangi sahöli-höli dödö ba Zura Niʼamoniʼö sanandrösa ba zi so miföna, duma-dumania:

FAʼATULÖ BA FAʼAHONO DÖDÖ

”Owua-wua dödöra börö me fahöna waʼatulö.”—SINUNÖ 37:11.

OMO SI SÖKHI BA FAHÖNA MBALAZO

”Lalau nomo ba toröi ira ba daʼö; lafazökhi kabu nagu, ba laʼa mbuania.”—YESAYA 65:21.

LÖ HADÖI FÖKHÖ MAZUI FAʼAMATE

”Iʼosi dawa hörö fefu ba höröra. Lö hadöi saʼae faʼamate, faʼabu dödö, fege-ege, mazui fökhö.”—FAMAʼELEʼÖ 21:4.

Hewisa enaʼö tola öʼokhögö waʼauri simane daʼö ba zi so miföna? Fanema linia so ba artikel aefa daʼa.

a Enaʼö öʼila nasa sanandrösa ba wamoʼeluaha hegöi ba wamazawili Sura Niʼamoniʼö, bokai www.pr2711.com/id, ba fili faosatö AJARAN ALKITAB > SEJARAH DAN ALKITAB.

b Enaʼö öʼila nasa, faigi mbuku Alkitab—Firman dari Allah atau dari Manusia? faza 9. Buku daʼa nifazökhi ndra Samaduhuʼö Yehowa ba no tehenaigö ia secara online. Ba wombaso buku daʼa, bokai www.pr2711.com/id, ba fili faosatö PERPUSTAKAAN > BUKU & BROSUR.