Fanofu Zombaso
Hadia geluaha wehede Waulo me imane, ”Si mate ndraʼo ba goroisa”?—Gal. 2:19.
Isura Faulo, ”Si mate ndraʼo ba goroisa. Hizaʼi, börö goroisa wa sauri ndraʼo khö Lowalangi.”—Gal. 2:19.
Moʼamakhaita wehede Waulo andrö ba wamahaʼö nifaʼemania ba mbanua niha Keriso si so ba Galatia. So ösa ndra niha Keriso si no tedönisi ba wamahaʼö sofaya. So ösa zamahaʼö sofaya sangumaʼö wa enaʼö tola teʼorifi zi samösa niha, moguna iʼoʼö Goroisa Moze, mendrua manö goroisa sanandrösa ba wosuna. Hizaʼi, aboto ba dödö Waulo wa lö saʼae iʼandrö Lowalangi ba nono mbanuania enaʼö lasuna ira. Ihaogö wanutunö ba niha enaʼö faduhu dödöra wa fasala wamahaʼö andrö. Iʼaroʼö göi wamati ndra talifusönia sanandrösa ba höli nibeʼe Yesu Keriso.—Gal. 2:4; 5:2.
No göi itutunö Sura Niʼamoniʼö wa lö aboto ba dödö niha si no mate hadia zalua ba zi fasuinia ba lö saʼae molua-lua khönia ngawalö zalua andrö. (Sango. 9:5) Me iwaʼö Faulo wa ’si mate ia ba goroisa’, eluahania lö saʼae molua-lua ba waʼaurinia Goroisa Moze. Hizaʼi, faduhu dödö Waulo wa ’sauri ia khö Lowalangi’, börö me mamati ia ba höli.
”Börö goroisa” wa tola teʼefaʼö Waulo moroi ba Goroisa Moze. Hana wa simanö? No itutunö wa ”atulö zi samösa niha na mamati ia khö Yesu Keriso, tenga börö woloʼönia oroisa”. (Gal. 2:16) Sindruhu sa wa moguna Goroisa Moze. Itutunö Faulo ba niha Keriso si so ba Galatia, ”Munönö Goroisa andrö enaʼö oroma golalöwa, ba moguna irugi tohare maʼuwu sanema ondröita andrö.” (Gal. 3:19) Me no so Goroisa Moze, tola aboto ba dödö niha wa moguna khöra zumange soʼahonoa börö me lö moʼahonoa wamaluara Oroisa andrö. Börö daʼö, itolo niha gulidanö Oroisa Moze enaʼö aboto ba dödöra wa Yesu ”maʼuwu” si no mufabuʼu andrö. Na mamati ira khö Yesu Keriso, tola tobali ira niha satulö föna Lowalangi. (Gal. 3:24) Tola mufaduhuʼö wa atulö Waulo moloʼö Oroisa börö me mamati ia khö Yesu. Daʼö mbörö wa ’si mate ia ba goroisa’ ba ’sauri ia khö Lowalangi’. Lö saʼae ifatörö ia Oroisa Moze, hizaʼi Lowalangi zamatörö yaʼia.
No göi irai itutunö daʼa Faulo ba niha Keriso si so ba Roma. Imane khöra, ”Simanö göi ami, yaʼami ira talifusö. No mate ami ba Goroisa Moze börö mboto Keriso . . . No teʼefaʼö ita moroi ba Goroisa Moze börö me no mate ita ba goroisa samöbö yaʼita.” (Rom. 7:4, 6) Fehede Waulo ba ayati daʼa hegöi ba Galatia 2:19, tenga manandrösa ba waʼamate niha sanawö Oroisa Moze. Hizaʼi, me iwaʼö Faulo wa ’mate ira ba Goroisa’, eluahania teʼefaʼö ira moroi ba Goroisa andrö. Tenga saʼae barö Goroisa Moze so ia hegöi ira niha Keriso tanö böʼö. No teʼefaʼö ira börö wamatira ba höli nibeʼe Keriso.