Hana Wa Tumbu ba Dödö Niha Watiusa?

Hana wa fatiusa ba gulidanö andre hulö rate si tebai muʼetuʼö? Enaʼö taʼila mbörönia, moguna aboto ba dödöda hadia nifotöi fatiusa andrö, hadia mbörö wa fatiu dödö niha, ba hadia mbörö wa itugu monönö watiusa.

Hadia Watiusa Andrö?

Fatiusa yaʼia daʼö faʼafatuwu sabölö-bölö mazui fönu sabölö-bölö khö zi samösa niha mazui ba zi sambua ngawawa. Fatiusa andrö tenga ha ba zi sabata so ia ba dödö niha.

HADIA MBÖRÖ WA FATIU DÖDÖ NIHA?

Oya sibai mbörö wa tumbu ba dödö niha watiusa. Si toʼölönia, tumbu ba dödö zi samösa niha watiusa tenga börö me no lafalua khönia zi lö sökhi, hizaʼi börö ngawawa si farahu yaʼira. Iwaʼö tödönia wa niha si lö sökhi fefu zi farahu ba ngawawa andrö, laʼera-era zi lö sökhi, mazui tebai labulöʼö gamuatara. Ba wamaiginia yaʼira andrö niha si lö karua, samaʼala niha, mazui sangaʼasogö abula dödö. Niha si fatiu tödö ba niha böʼö andrö tola manö no irai lafalua khönia zi lö sökhi, falöʼatulö, mazui tanö böʼönia irege mowaʼa ba dödönia watiusa.

HADIA MBÖRÖ WA ITUGU MONÖNÖ WATIUSA?

Tola manö tumbu ba dödö zi samösa niha watiusa ba niha böʼö hewaʼae na lö irai falukha ira. Duma-dumania, börö me fatuwu nösi nomonia mazui si fahuwu khönia ba niha böʼö, daʼö mbörö wa fatiu göi dödönia. Lua-luania, alio sibai monönö waʼato zi fatiu tödö ba zi sambua ngawawa.

Me no aboto ba dödöda wa alio sibai tedou watiusa, lö saʼae ahöli-höli dödöda na ato niha ba gulidanö andre zi fatiu tödö khö nawönia. Hizaʼi, enaʼö tola talawa watiusa ba gulidanö andre, moguna aboto ba dödöda hezo iʼotarai mböröta watiusa andrö. Ifatunö khöda daʼö Sura Niʼamoniʼö.

BÖRÖTA WATIUSA

Gambara sangoromaʼö hadia mbörö wa tedou misa watiusa. 1. Turia si fasala, tefarahu ba daʼö duria moroi ba ngawawa niha sato, media sosial, hegöi berita. 2. Faʼafaböʼö zi toʼölö mufalua, mado, hegöi agama. 3. Faʼataʼu ba waʼatebulö, faʼataya gokhöta, mazui salua si lö mudöna-döna. 4. Fatiusa zangaʼasogö fanahö-nahö tödö, falöʼatulö, ba faʼalösökhi.

SATANA. Ba wamobörö lö hadöi fatiusa ba dödö niha. Hizaʼi, tebörögö daʼö me so samösa malaʼika ba zorugo samadaö khö Lowalangi. Ba gafuriata, mufotöi ia Afökha Satana. Iʼotarai me mamadaö ia, ”no tobali ia samunu niha”. Börö me ”sofaya ia ba ama zofaya”, iforege wamarou tödö niha enaʼö fatiu dödöra ba lafalua zi lö sökhi khö nawöra. (Yohane 8:44; 1 Yohane 3:11, 12) Moroi ba nitutunö Zura Niʼamoniʼö tola oroma wa yaʼia andrö fondrege zi lö sökhi, sofönu-fönu, ba samakao.—Yobi 2:7; Famaʼeleʼö 12:9, 12, 17.

FALÖMOʼAHONOA. Niha siföföna sotöi Adamo, idönisi ia Satana irege aekhu ba horö. Lua-luania, fefu niha ba gulidanö göna ira horö ondröita ba falömoʼahonoa. (Roma 5:12) Duma-dumania, ono siaʼa khö Gadamo sotöi Kaʼino, fatiu dödönia khö Habeli irege ibunu dalifusönia andrö. (1 Yohane 3: 12) Sindruhu sa, ato niha sangoromaʼö faʼomasi ba faʼahakhö dödö. Hizaʼi, börö me no göna ita horö ondröita, aolo dödöda wamalua fakhögusa, faʼafökhö dödö, ba faʼasiliyawa irege tumbu ba dödöda watiusa.—2 Timoteo 3:1-5.

FALÖMOʼAMEʼEGÖ TÖDÖ NIHA BÖʼÖ. Itugu tedou watiusa börö me ifarou niha sato ulidanö andre enaʼö lö laforomaʼö waʼahakhö dödö ba lafaʼala nawöra niha. Börö me Afökha Satana ”zamatörö ulidanö andre maʼasagörö”, itugu ato niha sanahö-nahö tödö, sangoʼaya, samakao, ba samalua si lö sökhi.—1 Yohane 5:19.

No ifatunö khöda Sura Niʼamoniʼö hezo iʼotarai mböröta watiusa. Hizaʼi tenga ha daʼö, ifatunö göi khöda hewisa lala ba wolawa fatiusa.