Faʼafawuka Wangera-ngera Salua ba zi Sagörö Ulidanö
”Asese urasoi waʼaombö dödö, hewaʼae na lö börö-börö.”
”Na omuso dödögu, iʼanemaiʼö urasoi waʼaombö dödö. Uʼila wa hewaʼae na omuso dödögu iadaʼa, hasambalö abu dödögu ba gafuriata.”
”Uforege wangosambuaʼö tödögu ha ba zalua ba zi maʼökhö daʼö. Hizaʼi itaria, iʼanemaiʼö uʼaombösi tödö göi zalua tanö böʼönia.”
Daʼa nirasoi niha si göna faʼafawuka wangera-ngera. Hadia no irai örasoi zimane daʼö? Mazui hadia daʼö nirasoi niha niʼomasiʼöu?
Yafaduhu dödöu wa tenga ha yaʼugö zorasoi daʼö. Ato niha ba götöda andre zanaögö lua-lua waʼafawuka wangera ngera, he salua khöra samösa mazui salua ba niha niʼomasiʼöra.
Faduhu dödöda wa no so ita iadaʼa ba ”mbaŵa si lö sökhi sabua fanaögö” irege oya gabula dödö salua. (2 Timoteo 3:1) Moloʼö sambua penelitian moroi ba Organisasi Kesehatan Dunia (WHO), ba zi sagörö ulidanö, so samösa moroi ba zi dawalu niha zorasoi faʼafawuka wangera-ngera. Börö pandemi COVID-19, ba ndröfi 2020, tedou 78 zuta niha sanaögö faʼaombö-aombö dödö hegöi faʼafawuka wangera-ngera sabölö-bölö.
Sindruhu sa, moguna taʼila hawaʼato niha sorasoi faʼaombö-aombö dödö hegöi faʼafawuka wangera-ngera ba götöda andre. Hizaʼi sabölö tohude, moguna taʼila hewisa enaʼö ohahau dödöda hegöi niha niʼomasiʼöda.
Hadia geluahania lö faʼafawuka wangera-ngera?
Na lö fawuka wangera-ngerada, so khöda waʼohahau dödö ba tola tafalua ngawalö hadia ia. Tola tataögö gabula dödö sero maʼökhö, mofozu ita ba halöwöda, ba tarasoi waʼahono dödö.
Faʼafawuka wangera-ngera andrö . . .
Alua ia TENGA börö me so zoʼamböta ita.
ELUAHANIA abula dödö soʼamakhaita ba kesehatan irege abu dödö zi samösa niha ba fawuka fefu niʼera-erania, nirasoinia, hegöi nifaluania.
Tola möi fanaisi zi samösa niha ba wahuwusa ba niha böʼö hegöi ba wangasiwai ngawalö gabula dödö sero maʼökhö.
Tola göna ba niha gofu hauga ndröfira, hadia zi toʼölö lafalua, madora, soira, agamara, sekolara, mazui hawaʼebua gefera.
Tema wanolo na göna ndraʼugö faʼafawuka wangera-ngera
Na so waʼatebulö ba gamuatamö mazui ba niha niʼomasiʼömö, lö öʼila mörö ba lö tatu ginötö wemangamö, mazui lö tebulö örasoi waʼafawuka wangera-ngera, faʼaombö dödö, hegöi faʼabu dödö, tola manö moguna khöu wanolo enaʼö öʼila hadia wökhö si göna yaʼugö ba hewisa lala wamadöhö yaʼia. Hizaʼi, haʼökhö tola öʼandrö wanolo?
Imane ira matua fondrege zatua-tua si no irai auri ba gulidanö yaʼia daʼö Yesu Keriso, ”Tenga ba niha sabölö moguna doto, hizaʼi ba niha sofökhö.” (Mataiʼo 9:12) Na so niha sofökhö sanema terapi mazui dalu-dalu si tefaudu, tola alö waʼafökhö nirasoira irege lö taha-tahara wamalua halöwö sero maʼökhö ba lasöndra waʼomuso dödö. No angetula si tefaudu na lö taradö-radö wamadöhö fökhö sabölö-bölö mazui si no ara tataögö.a
Hewaʼae na tenga buku soʼamakhaita ba kesehatan Zura Niʼamoniʼö, hizaʼi tola möi fanoloda nösinia ba wanaögö faʼafawuka wangera-ngera. Mafarou ndraʼugö ba wombaso fefu artikel aefa daʼa, sanutunö hewisa wa möi fanoloda Zura Niʼamoniʼö ba wolawa faʼafawuka wangera-ngera.
a Lö ifarou ita majalah Manuriaigö andre ba wamili si sambua lala wamadöhö fökhö. Fefu niha ero zamösana, moguna lahaogö laʼangeragö hadia lala wamadöhö fökhö nifilira.