Fangefaʼö Horö Fatua Lö Tebeʼe Höli

Tola teʼefaʼö horöda ha börö me no ibeʼe ndronia Yesu tobali höli salahida. (Ef. 1:7) Hizaʼi, imane Sura Niʼamoniʼö, ’Ebolo dödö Lowalangi ba wangefaʼö horö nifalua me föna,’ yaʼia daʼö fatua lö hadöi höli. (Rom. 3:25) Hewisa wangefaʼö Yehowa zala niha fatua lö hadöi höli, ba lö tebulö tobali ia Lowalangi satulö ba ginötö si fagölö?

Ifabuʼu Yehowa wa so samösa ”maʼuwu” zangorifi niha samati khönia hegöi ba mbuʼusa linia. Me ifazökhi mbuʼusa li daʼö, ba wamaiginia hulö no mubuʼa saʼae mböli höli andrö. (1 Mo. 3:15; 22:18) Aro sibai waʼafaduhu dödö Lowalangi wa hasambalö itehegö waʼaurinia Ono niʼomasiʼönia si hasambua tobali höli ba ginötö si no itatugöi. (Gal. 4:4; Heb. 10:​7-10) Me so Yesu ba gulidanö, ibeʼe khönia Yehowa kuaso ba wangefaʼö sala niha fatua lö nasa nibeʼenia waʼaurinia tobali höli. Tola iʼefaʼö Yesu horö niha samati börö me iʼila wa höli nibeʼenia dania möi fombalugö horöra.—Mat. 9:​2-6.