Forege ba Woloʼö Nifalua Yehowa ba Niha Samalua Horö

1. Hadia nitötöna Yehowa ba niha gulidanö maʼafefu?

NO IBEʼE mbuala Yehowa ba niha gulidanö ba wangai angetula samösa. Ero maʼökhö, taʼogunaʼö mbuala andrö ba wangai angetula. Angetula fondrege zebua si tola ihalö si samösa niha yaʼia daʼö ilulu waʼaurinia ba farahu ia ba nösi nomo Yehowa. Itötöna Yehowa enaʼö fefu niha lahalö gangetula daʼö. Hadia mbörö? Börö me iʼomasiʼö ita ba omasi ia ibeʼe khöda wondrege zi sökhi. Omasi ia fahuwu ita khönia ba tasöndra waʼauri sagötö faʼara.—5 Mo. 30:​19, 20; Gal. 6:​7, 8.

2. Hewisa dödö Yehowa ba niha samalua horö sebua si lö mamalalini era-era? (1 Yohane 2:1)

² Hizaʼi, lö irai ifaso niha Yehowa ba wamosumange yaʼia. Itehegö ba niha ero zamösana ba wangai angetula samösa. Hewisa na so niha si no tebayagö idanö sanawö oroisa Lowalangi ba ifalua horö sebua? Na lö ifalalini gera-erania, hasambalö muheta ia ba mbanua niha Keriso. (1 Ko. 5:13) Hewaʼae simanö, itötöna sibai Yehowa enaʼö mangawuli khönia niha daʼö. Sindruhunia, sambua dane-dane wa ibeʼe höli Yehowa yaʼia daʼö enaʼö dozi niha samalua horö lafalalini gera-erara ba latema wangefa. (Baso 1 Yohane 2:1.) Iʼandrö khöra Lowalangida sebua faʼomasi enaʼö lafalalini gera-erara.—Zak. 1:3; Rom. 2:4; Yak. 4:8.

3. Hadia nitutunöda ba artikel daʼa?

³ Omasi Yehowa na taʼokhögö lala wangera-ngera si fagölö khönia sanandrösa ba horö hegöi niha samalua daʼö. Hewisa wa tola? Tatutunö ia ba artikel daʼa. Nehegö atö (1) hewisa lala wangasiwai horö sebua salua ba mbanua niha Keriso ba Gorindro me abad siföföna, (2) hadia wanuturu lala nibeʼe Waulo me no ifalalini gera-erania niha samalua horö andrö, ba (3) hadia wamahaʼö nihalöda moroi ba zalua andre sanandrösa ba lala wangera-ngera Yehowa ba niha Keriso si no mamalua horö sebua.

HEWISA LALA WANGASIWAI HORÖ SEBUA ME ABAD SIFÖFÖNA?

4. Hadia zalua ba mbanua niha Keriso ba Gorindro me abad siföföna? (1 Korindro 5:​1, 2)

⁴ Baso 1 Korindro 5:​1, 2. Me ifalua halöwö utusan injilnia si medölu Faulo, irongo duria si tokea ia sanandrösa ba mbanua niha Keriso sawena tefasindro ba Gorindro. Ba daʼö, so samösa dalifusöda sohoröni inania tiri! Sindruhunia, ’lö tesöndra gamuata daʼö ba gotalua soi böʼö’. Tenga ha latehegö manö gamuata daʼö ira talifusö ba mbanua niha Keriso, hizaʼi te lahöni-höni misa. Tola manö so zangumaʼö wa no laʼoʼö Yehowa, sangoromaʼö faʼahakhö dödö ba soʼameʼegö tödö niha gulidanö si lö moʼahonoa. Hizaʼi, lö omasi Yehowa na so zamalua horö ba gotalua nono mbanuania. Me ifalua gamuata si lö faʼaila andrö ira matua daʼö, no iʼobousi döi mbanua niha Keriso. Na lö muheta ia ba mbanua niha Keriso, tola manö laʼoʼö nifaluania andrö ira talifusöda tanö böʼö si fariawö khönia. Börö daʼö, hadia wanuturu lala nibeʼe Waulo ba mbanua niha Keriso andrö?

5. Hadia nifatunö Waulo ba mbanua niha Keriso andrö, ba hadia mbörö? (1 Korindro 5:13) (Faigi göi gambara.)

⁵ Baso 1 Korindro 5:13. Ibeʼe gehehania Yehowa khö Waulo ba wanura sura hegöi ba wamatunö wa moguna muheta niha si lö mamalalini era-era andrö moroi ba mbanua niha Keriso. Hewisa zinangeania lagu ndra talifusöda tanö böʼö ba niha daʼö? Ifatunö khöra Faulo enaʼö ”lö fariawö” ira khönia. Iwaö nasa wa ”böi naʼi orudu manga” ira. (1 Ko. 5:11) Hadia mbörö? Si toʼölönia, na falulu manga ita ba niha böʼö, tola manö tahorigö ginötöda ba wahuhuosa khönia. Hadia mbuania na lö fariawö ndra talifusöda ba niha daʼö? Telumöʼö ira moroi ba wondrönisi dödö si lö sökhi. (1 Ko. 5:​5-7) Tola manö göi daʼö zamasugi ba dödö niha daʼö wa no fandröndröu ia moroi ba lala Yehowa, irege maniasa ia ba tefarou dödönia ba wamalalini era-erania.

6. Me no latema zura nifaʼoheʼö Waulo, hadia nifalua mbanua niha Keriso ba Gorindro, ba hadia lua-luania daʼö ba niha samalua horö?

⁶ Me no aefa ifaʼoheʼö zurania Faulo ba niha Keriso ba Gorindro, omasi ia iʼila hewisa dödöra. Lö ara aefa daʼö, irongo duria si möi fangomuso dödö moroi khö Dito. Sökhi sibai wanemaʼöra surania andrö. (2 Ko. 7:​6, 7) No laʼoʼö wanuturu lala nibeʼenia. Baero daʼö, ba zi hauga waŵa me no ifaʼoheʼö zurania Faulo, no ifalalini gera-erania ira matua andrö! No ibulöʼö gamuata hegöi fangera-ngerania, ba ibörögö iʼoʼö goi-goi Yehowa satulö. (2 Ko. 7:​8-11) Hadia nasa wanuturu lala nibeʼe Waulo ba mbanua niha Keriso andrö?

HADIA NIFALUA MBANUA NIHA KERISO BA GORINDRO BA NIHA SAMALALINI ERA-ERA ANDRÖ?

7. Hadia mbuania me no muheta ndra matua daʼö ba mbanua niha Keriso? (2 Korindro 2:​5-8)

⁷ Baso 2 Korindro 2:​5-8. Iwaʼö Faulo wa ”no tobönö degu-tegu sabeʼe [nibeʼera] me no ato zangotuʼö niha daʼö”. Eluahania, no mofozu degu-tegu nibeʼera, yaʼia daʼö ba wanolo niha samalua horö andrö enaʼö ifalalini gera-erania.—Heb. 12:11.

8. Hadia nasa wanuturu lala nibeʼe Waulo?

⁸ Aefa daʼö, ibeʼe wanuturu lala daʼa Faulo ba mbanua niha Keriso ba Gorindro, ”Mibologö dödömi khönia ba mirara dödönia . . . uʼandrö khömi enaʼö faduhu dödönia wa miʼomasiʼö ia.” Omasi Waulo na lafuli latemaʼö niha daʼö tobali ösi nomo Yehowa. Hizaʼi, tenga daʼö manö. Iʼandrö göi khöra Faulo enaʼö lafaduhuʼö khö niha daʼö ba wehede, amuata hegöi nifaluara wa sindruhu-ndruhu no laʼefaʼö zalania ba laʼomasiʼö ia. Na lafalua daʼö, no laforomaʼö wa omuso dödöra me no mangawuli niha daʼö ba mbanua niha Keriso.

9. Hana wa so ösa niha sabua ba wanemaʼö mangawuli niha samalalini era-era andrö?

⁹ Hadia so ösa niha ba mbanua niha Keriso ba Gorindro sabua ba wanemaʼö mangawuli niha samalalini era-era andrö? Lö itutunö Sura Niʼamoniʼö, hizaʼi tola manö daʼö zalua. Börö me no iʼasogö gabula dödö ba mbanua niha Keriso, te so ösa ndra talifusöda safökhö tödö mazui saila. Baero daʼö, ira talifusöda si no mamorege ba wondrorogö enaʼö lö raʼiö ira ba gamuata, tola manö lawaʼö tödöra wa lö atulö na ifuli latemaʼö niha daʼö ba mbanua niha Keriso. (Baso göi Luka 15:​28-30.) Hewaʼae simanö, ira talifusöda ba mbanua niha Keriso lö tola löʼö laforomaʼö wa sindruhu-ndruhu laʼomasiʼö dalifusöra samalalini era-era andrö. Hadia mbörö?

10-11. Hadia zi tola manö alua na lö omasi ndra satua sokubaloi ba wangefaʼö sala niha samalalini era-era andrö?

¹⁰ Hewisa dödö niha samalalini era-era andrö na lö latehegö khönia ira satua sokubaloi ba wangawuli ba mbanua niha Keriso? Mazui, hewisa na lö laʼomasiʼö ia ira talifusö ba mbanua niha Keriso hewaʼae no ifuli mutema ia? Tola manö ”awuwu ia ba waʼabu dödö”. Tola manö aetu dötönafönia irege lö saʼae iforege ba wangaʼazökhi fahuwusania khö Lowalangi.

¹¹ Hizaʼi, tenga ha daʼö. Na lö omasi ndra talifusöda ba wangefaʼö sala niha si no mamalalini era-era andrö, tola manö teʼala wahuwusara khö Yehowa. Hadia mbörö? Börö me lö laʼoʼö Yehowa, somasi mangefaʼö sala. No laʼoʼö Zatana, samuʼi ba si lö faʼahakhö dödö. Latehegö iʼodela ira Satana ba wamakiko famati niha daʼö.—2 Ko. 2:​10, 11; Ef. 4:27.

12. Hewisa mbanua niha Keriso ba Gorindro ba woloʼö duma-duma Yehowa?

¹² Na simanö, hewisa mbanua niha Keriso ba Gorindro ba woloʼö duma-duma Yehowa, tenga Satana? Moguna laʼoʼö nifalua Yehowa ba niha samalalini era-era. Nehegö atö hadia niwaʼö ndra sanura Sura Niʼamoniʼö sanandrösa khö Yehowa. Imane Dawido, ”Si sökhi tödö ndraʼugö Yehowa ba sangefaʼö sala.” (Si. 86:5) Imane Mikha, ”Hadia so Lowalangi böʼö simane yaʼugö, sangefaʼö sala ba sangolifugö olalöwa niha?” (Mi. 7:18) Imane göi Yesaya, ”Yaʼiröi lalania andrö niha sebua horö ba yamuböhöli niʼera-era dödönia; yamangawuli ia khö Yehowa Lowalangida, börö me iforomaʼö khönia waʼahakhö dödö ba ibeʼe wangefa soroi ba dödö.”—Yes. 55:7.

13. Hadia mbörö wa no angetula si tefaudu na lö mutaha-taha ba wanema mangawuli niha samalalini era-era? (Faigi kotak ”Hamega Ifuli Mutema Niha ba Gorindro Andrö?”)

¹³ Simane Yehowa, ira talifusöda ba mbanua niha Keriso ba Gorindro, moguna latemaʼö niha samalalini era-era andrö ba lafaduhuʼö khönia wa laʼomasiʼö ia. Na lafalua daʼö no laforomaʼö wa so khöra ”woloʼö ba ngawalö hadia ia”. (2 Ko. 2:9) Sindruhu sa, awena mato hauga waŵa silalö muheta niha daʼö moroi ba mbanua niha Keriso. Hizaʼi, no mofozu wotu nibeʼe khönia irege ifalalini gera-erania. Börö daʼö, lö hadöi gunania na lataha-taha ira satua sokubaloi ba wanema yaʼia mangawuli ba mbanua niha Keriso.

HEWISA WOLOʼÖDA FAʼATULÖ BA FAʼAHAKHÖ DÖDÖ YEHOWA?

14-15. Hadia wamahaʼö nihalöda ba lala wangasiwai abula dödö salua ba mbanua niha Keriso ba Gorindro? (2 Fetero 3:9) (Faigi göi gambara.)

¹⁴ Lala wangasiwai abula dödö salua ba mbanua niha Keriso ba Gorindro, sindruhunia tesura ia ”ba wamahaʼö yaʼita”. (Rom. 15:4) Moroi ba zalua andre, tafahaʼö ita wa lö omasi Yehowa na mutehegö so zamalua horö sebua ba gotalua nono mbanuania. Te so zangumaʼö wa lö salania na fariawö niha samalua horö si lö mamalalini era-era ba nono mbanua Yehowa si lö faröi. Tumbu ba dödöra daʼa börö me lawaʼö wa Yehowa andrö Lowalangi sahakhö tödö. Hizaʼi sindruhunia, hewaʼae sebua faʼahakhö dödö Yehowa, lö fatehe dödönia ba gamuata si lö sökhi, ba lö ibeʼe tou goi-goinia. (Yud. 4) Na itehegö so niha samalua horö si lö mamalalini era-era ba gangowuloa, daʼö dandra wa lö khönia faʼahakhö dödö, börö me tobali famaʼala wamati mbanua niha Keriso daʼö.—Amd. 13:20; 1 Ko. 15:33.

¹⁵ Moroi ba waö-waö daʼö tafahaʼö ita wa lö omasi Yehowa na so niha si tehori. Omasi ia na tola teʼorifi fefu niha. Iforomaʼö waʼahakhö dödö ba niha samalalini era-era ba somasi mangaʼazökhi fahuwusara khönia. (Hez. 33:11; baso 2 Fetero 3:9.) Börö daʼö, me ifalalini gera-erania niha si so ba mbanua niha Keriso ba Gorindro andrö ba lö saʼae ifalua horö, iʼogunaʼö Waulo Yehowa ba wameʼe fanuturu lala khö ndra talifusö ba daʼö enaʼö labologö dödöra ba lafuli latema ia.

16. Hewisa dödöu me no tatutunö lala wangasiwai abula dödö salua ba mbanua niha Keriso ba Gorindro andre?

¹⁶ Me no aefa tatutunö lala wangasiwai abula dödö salua ba mbanua niha Keriso ba Gorindro, ba daʼö tola taʼila wa Yehowa andrö no sebua faʼomasi, atulö fefu nifaluania ba lö ebua dödö zambuana ia. (Si. 33:5) Tatu manö tobali famarou dödöda daʼö ba wamosumange Lowalangida. Börö me yaʼita niha si no raʼiö ba horö, moguna khöda wangefa sala moroi khönia. Börö daʼö, taʼandrö sibai saohagölö khö Yehowa me no ihenaigö höli si tola mangefaʼö horöda. Sindruhu-ndruhu iʼomasiʼö ita Yehowa ba omasi ia ibeʼe khöda wondrege zi sökhi. Tatu manö möi fondrara dödöda daʼa ba teʼaroʼö wamatida!

17. Hadia nitutunöda ba artikel-artikel aefa daʼa?

¹⁷ Hewisa lala wangasiwai horö sebua salua ba ginötöda iadaʼa? Hewisa woloʼö ndra satua sokubaloi duma-duma Yehowa somasi manolo niha si no mamalua horö enaʼö ifalalini gera-erania? Hewisa zatulönia nifalua mbanua niha Keriso ba ginötö lahalö gangetula ira satua sokubaloi ba wangeheta mazui ba wanemaʼö mangawuli si samösa niha? Tatutunö wanema linia ba artikel-artikel aefa daʼa.