Lö Uböhöli Wamahaʼö Yaʼo

Tumbu ndraʼo me döfi 1927 ba zi sambua banua side-ide sahatö ba Chicago, Illinois, AS. So dalima ndraʼaga zi fatalifusö—Jetha, Don, yaʼo, Karl, hegöi Joy. Fefu ndraʼaga mahalö gangetula ba wolulu faʼaurima ba wamalua halöwö khö Yehowa. Fao gaʼagu ono alawe sotöi Jetha ba Sekolah Gilead kelas dua me döfi 1943. Mangai halöwö Don ba Mbetieli Brooklyn, New York me 1944, Karl me 1947, ba Joy me 1951. Tefarou sibai dödögu ba wamosumange Yehowa me uʼila duma-duma si sökhi nifalua ndra talifusögu hegöi ira satuagu.

MAFAHAʼÖ NDRAʼAGA BA ZINDRUHU

Asese labaso Zura Niʼamoniʼö ira satuagu ba laʼomasiʼö Lowalangi. Lafahaʼö göi ndraonora ba wangomasiʼö Lowalangi. Hizaʼi, lö saʼae faduhu dödö bapagu ba gereja me no aefa tobali ia saradadu ba Eropa sagötö Wasuwöta Gulidanö I. Me tohare bapagu, omuso sibai dödö mamagu ba imane khö bapagu, ”He Karl, aine möi ita ba gereja.” Imane bapagu, ”Möido ufasao ndraʼugö, hizaʼi lö möido bakha dania.” Imane mamagu, ”Hadia mbörö?” Imane bapagu, ”Sagötö wasuwöta, faoma lafahowuʼö ndra saradadu si möi fasuwö ira sondröniaʼö ba agama, ba sindruhunia fagölö agamara. Börö daʼö, haʼökhö fao Lowalangi?”

Samuza maʼökhö me no möi mamagu ba gereja, tohare darua Zamaduhuʼö Yehowa ba nomoma. Labeʼe khö bapagu zi dombua mbuku Light, sanutunö sanandrösa ba mbuku Wamaʼeleʼö. Adöni dödö bapagu ba itema mbuku daʼö. Me iʼila mamagu mbuku daʼö, ibörögö ibaso. Samuza maʼökhö, ibaso sambua berita ba koran sogaoni niha sadöni tödö ba Zura Niʼamoniʼö enaʼö lafahaʼö ira laʼogunaʼö mbuku Light. Ihalö gangetula wa möi ia ba daʼö. Me irugi, ira alawe satua zamokai khönia mbawandruhö. No igogohe mbuku daʼö mamagu ba manofu ia, ”Hadia ba daʼa mifahaʼö ami ba mbuku daʼa?” Imane ira alawe daʼö, ”Yaʼia nogu, ae yomo.” Ba migu aefa daʼö, iʼohe ndraʼaga fefu mamagu. Iʼotarai daʼö, lö maböhöli weʼamöi.

Samuza maʼökhö me mufalua gangowuloa, iʼandrö khögu sondröniaʼö ba wombaso Sinunö 144:​15, sanutunö wa hasambalö omuso dödö niha samosumange Yehowa. Adöni dödögu ba ayati daʼö, simanö göi nisura ba 1 Timoteo 1:​11, samaduhuʼö wa Yehowa andrö ”Lowalangi somuso tödö”, hegöi Efeso 5:1 samarou yaʼita enaʼö tobali ’soloʼö khö Lowalangi’. Aboto ba dödögu wa moguna uʼomusoiʼö dödögu ba wamosumange Somböi yaʼo, ba uʼandrö saohagölö khönia me no itehegö khögu ginötö ba wamalua daʼö. Omasido ufalua zi dombua ngawalö andre ba zi sandrohu faʼaurigu.

Banua niha Keriso sahatö ba nahiama, faʼaröunia 32 kilometer ba Chicago. Hewaʼae simanö, lö mabato weʼamöi, ba itugu aboto ba dödögu Zura Niʼamoniʼö. Lö olifudo me iʼandrö sondröniaʼö khö gaʼagu ka Jetha ba wameʼe bua gera-erania. Me urongo mbua gera-erania, umane tödögu, ’Uʼila daʼö. Tola göi ubeʼe yawa dangagu ba wameʼe bua gera-eragu.’ Ibörögö ufaʼanö mbua gera-eragu samösa. Sabölö tohude, simane ira talifusögu tanö böʼö, itugu aro göi wamatigu. Börö daʼö, labayagö ndraʼo idanö me 1941.

UFAHAʼÖ NDRAʼO MOROI KHÖ YEHOWA BA GANGOWULOA SEBUA

Lö irai olifudo me maʼondrasi gangowuloa sebua ba Cleveland, Ohio me döfi 1942. Toröi ndraʼaga hegöi ira talifusöda tanö böʼö ba tendra sahatö ba nahia gangowuloa. Baero daʼö, ira talifusöda ba zi töra 50 mbanua tanö böʼö si so ba Amerika Serikat, laʼogunaʼö telefo ba wamondrondrongo huhuo nifaʼema ba gangowuloa andrö. Me luo daʼö, alua nasa Wasuwöta Gulidanö II, ba itugu oya wolohi salua khö ndra Samaduhuʼö Yehowa. Ba zi bongi, uʼila sambua ngawawa ndra talifusöda samaʼoli motora föna tendra ndra talifusöda. Fao dödöma enaʼö so samösa zanaro ero sara moto ofeta moluo. Na so deʼala, lafohola wandru moto enaʼö ogömi danö ba niha si tohare, aefa daʼö lafoli göi klakson. Awena dania tohare ndra talifusöda tanö böʼö ba wameʼe fanolo. Imane tödögu, ’Sindruhu-ndruhu no tefaʼanö nono mbanua Yehowa ba ngawalö hadia ia.’ Lö hadia ia zalua irege ohahau dödögu wemörö.

Hauga fakhe me aefa gangowuloa sebua andrö, uʼila wa lö hadöi faʼataʼu mazui faʼaombö-aombö dödö khö mamagu. Sindruhu-ndruhu ifaduhusi tödö Yehowa hegöi organisasinia. Lö irai uʼolifugö duma-duma si sökhi nibeʼenia.

Lö ara fatua lö mufalua gangowuloa sebua andrö, tobali perintis biasa mamagu. Andrö wa ihaogö sibai wamondrondrongo huhuo nifaʼema khö ndra sohalöwö safönu inötö. Me mangawuliga ba nomo, imane khöma, ”Sindruhunia, lö omasido uböhöli merintis. Hizaʼi na ufalua daʼö, lö sagu khögu wamalua halöwö yomo ba nomo na ha yaʼo.” Iʼandrö khöma enaʼö matolo ia. Omasiga mafalua daʼö. Andrö wa ibeʼe halöwöma ero samösa ba wamöföʼö sambua mazui dombua mbateʼe fatua lö mangaga sihulö wongi. Na no mofanöga sekola, ifuli ifaigi hadia no sökhi wamaluama daʼö, ba awena mofanö ia manuriaigö. Oya sibai halöwö mamagu, hizaʼi lö irai iʼolifugö ndraʼaga. Na mangawuliga sekola, no so ia yomo. Itaria faoga khönia manuriaigö na no mangawuliga sekola ba ifatunö khöma hadia manö halöwö nifalua ndra perintis.

UBÖRÖGÖ WANGAI HALÖWÖ SAFÖNU INÖTÖ

Ubörögö merintis me 16 fakhe ndröfigu. Me luo daʼö, lö nasa si tobali Samaduhuʼö Yehowa bapagu, hizaʼi omasi ia iʼila hewisa waʼatedougu wamalua halöwö fanuriaigö. Samuza inötö ba zi bongi, ufatunö khö bapagu wa samösa lö niha somasi ufahaʼö ba Zura Niʼamoniʼö, hewaʼae no uforege daʼö. Ulau zi lö hede-hede sabata, ba umane khönia, ”Omasiʼö study khögu Pa?” Mangera-ngera bapagu sabata, ba ifatunö wa omasi ia ufahaʼö ba Zura Niʼamoniʼö. Niha siföföna ufahaʼö ba Zura Niʼamoniʼö yaʼia daʼö bapagu. Sindruhu-ndruhu wa sauli itörö tödö zalua andrö!

Ufahaʼö bapagu ba mbuku ”The Truth Shall Make You Free”. Me no numalö ginötö, urasoi wa itolo ndraʼo bapagu enaʼö abölö sökhi wamaresogu Sura Niʼamoniʼö ba itugu onekhe ndraʼo wamahaʼö niha. Ba zi bongi me no aefa mabaso zi sambua ngenoli, imane Bapagu, ”Aboto ba dödögu niwaʼö mbuku daʼa. Hizaʼi, hezo öʼila wa atulö niwaʼö mbuku daʼa?” Lö uʼila utema linia, andrö wa umane khönia, ”Lö uʼila ubeʼe khöu wanema li iadaʼa, Pa. Na tafahaʼö ita sakali tö, hasambalö ubeʼe khömö wanema linia.” Ba sindruhu, usöndra ayati sotuhini nitutunö ba mbuku daʼö. Iʼotarai daʼö, asese ufalua riset enaʼö itugu onekhe ndraʼo ba wamahaʼö niha ba Zura Niʼamoniʼö. Buania, yaʼo hegöi bapagu itugu aboto ba dödöma nösi Zura Niʼamoniʼö. Ifalua zi no ifahaʼö yaʼia bapagu ba tebayagö ia idanö me 1952.

UTOHUGÖ WAMAHAʼÖ YAʼO BA MBETIELI

Findra ndraʼo moroi ba nomo me 17 fakhe ndröfigu. Ba ndröfi daʼö göi, lakaoni gaʼagu ka Jethaa tobali utusan injil, ba ibörögö mangai halöwö ba Mbetieli dalifusögu sotöi Don. Laʼomasiʼö sibai halöwö nitemara. Börö duma-duma nibeʼera, tefarou dödögu ba wamasuraʼö töigu ba wohalöwö ba Mbetieli hegöi ba Sekolah Gilead. Ubaloi hezo ifataro ndraʼo Yehowa. Me döfi 1946, lakaoni ndraʼo ba Mbetieli.

Sagötö zi 75 fakhe mangai halöwö ndraʼo ba Mbetieli, oya sibai halöwö si no ufalua, andrö wa oya zi bohou niʼilagu. Duma-dumania, ufahaʼö ndraʼo ba wamazökhi buku, mengurus keuangan, ba wowöli hegöi ba wamaʼoheʼö gama-gama. Hizaʼi sabölö tohude, omuso dödögu börö me lö tebulö usöndra wamahaʼö ba Zura Niʼamoniʼö ba Mbetieli ero na mufalua ibadah pagi hegöi ba huhuo si teʼodane-dane ba Zura Niʼamoniʼö.

Ufahaʼö göi ndraʼo moroi khö nakhigu Karl, sangai halöwö ba Mbetieli iʼotarai me 1947. Owölö-ölö sibai Karl wamahaʼö yaʼia ba Zura Niʼamoniʼö, ba onekhe ia wamahaʼö niha. Samuza maʼökhö me ufaʼanö huhuo nifaʼemagu, uʼandrö mbua gera-erania. Ufatunö khönia wa oya sibai riset si no ufalua, ba lö uʼila hewisa wangogunaʼö fefu riset si no usöndra andrö. Manofu ia khögu ba wanolo yaʼo, ”Joel, hadia zindruhunia duho huhuomö?” Iʼanemaiʼö aboto ba dödögu geluaha wehedenia. Lö moguna uʼogunaʼö fefu zi no uriset andrö. Sindruhunia, soguna khögu ha sotuhini tuho huhuo nifaʼemagu. Lö irai uʼolifugö wamahaʼö si sökhi andrö.

Enaʼö lö tebulö tarasoi waʼomuso dödö ba Mbetieli, moguna tafalua wondrege zi sökhi ba halöwö fanuriaigö. Na tafalua daʼö, oya zalua si tobali famarou dödöda. Samuza inötö me tanö owi, itörö tödögu me manuriaigö ndraʼo ba mbanua Bronx ba New York City. Yaʼo hegöi awögu, manuriaigö ndraʼaga khö ndra alawe si no irai manema majalah Manuriaigö hegöi Faoso! Mafatunö haniha ndraʼaga ba mamane khönia, ”Ba zi tanö owi andre, omasiga mafaʼema duria somuso dödö moroi ba Zura Niʼamoniʼö si tobali fondrara dödö.” Imane khöma, ”Omasido na Sura Niʼamoniʼö nifatunömi andrö. Miʼaine yomo.” Mabaso ba matutunö khönia mato hauga ngawua ayati sanandrösa ba Wamatörö Lowalangi hegöi ulidanö si bohou. Adöni sibai dödönia. Ba migu aefa daʼö, ikaoni ösa ndra awönia enaʼö lafondrondrongo. Ba gafuriata, yaʼia hegöi foʼomonia, tobali ira samosumange Yehowa si lö faröi.

UFAHAʼÖ NDRAʼO MOROI KHÖ WOʼOMOGU

Fatua lö mangowaluga foʼomogu, no mato 10 fakhe uʼalu-alui dambaligu. Hadia zanolo yaʼo ba wanöndra foʼomo si sökhi? Mangandrö ndraʼo khö Yehowa, ba uhaogö uʼangeragö hadia dania nifaluagu na no mangowaluga foʼomogu.

Me no aefa gangowuloa sebua ba Yankee Stadium me döfi 1953, falukha ndraʼo khö zi samösa talifusöda ira alawe sotöi Mary Aniol. Yaʼia andrö awö gaʼagu ka Jetha ba Sekolah Gilead kelas dua, ba fao ira tobali utusan injil. Si fao faʼomuso dödö itutunö khögu Mary me mangai halöwö ia ba Kepulauan Karibia hegöi sanandrösa ba niha nifahaʼönia ba Zura Niʼamoniʼö. Me faoma no aboto ba dödöma nawöma zamösana, maʼila wa fagölö gohitö dödöma ba wamati. Faoma omasiga khö nawöma, ba mangowalu ndraʼaga me baŵa si Öfa 1955. Sindruhu-ndruhu no buala moroi khö Yehowa woʼomogu Mary, ba no tobali ia duma-duma si sökhi khögu. Omuso sibai dödönia wamalua fefu halöwö nibeʼe khönia. Owölö-ölö ia, iʼameʼegö tödö niha böʼö ba lö tebulö iʼofönaiʼö wangalui Famatörö Lowalangi. (Mat. 6:33) Tölu fakhe mangai halöwö ndraʼaga tobali satua samasui, ba me döfi 1958, lakaoni ndraʼaga mangai halöwö ba Mbetieli.

Oya göi ufahaʼö ndraʼo moroi khö Mary. Duma-dumania me awena mangowaluga, mabörögö wombaso Sura Niʼamoniʼö. Ero maʼökhö, mabaso mato 15 ayati. Na so ba gotaluama zi no mombaso mato hauga ayati, si toʼölönia mabeʼe mbua gera-erama ba ayati daʼö ba matutunö hadia wamahaʼönia khöma. Asese sibai itutunö Mary hadia wamahaʼö si no isöndra moroi ba Sekolah Gilead mazui si no irai itörö sagötö tobali ia utusan injil. Daʼö zanolo yaʼo irege itugu sökhi ero na ufaʼema huhuo. Itugu aboto göi ba dödögu hewisa lala wamarou tödö ndra talifusöda ira alawe.—Amd. 25:11.

Mate woʼomo niʼomasiʼögu me döfi 2013. Udöna-döna sibai wa ifuli falukha ndraʼaga ba gulidanö si bohou. Gasa-gasa wombaloi daʼö, uhalö gangetula wa lö uböhöli wamahaʼö yaʼo ba ufaduhusi tödö Yehowa soroi ba dödö. (Amd. 3:​5, 6) Terara dödögu ba omuso sibai dödögu na ukhalaigö nifalua nono mbanua Yehowa dania ba gulidanö si bohou. Duma-dumania, oya ngawalö zi bohou si tola tafahaʼö ita sanandrösa khö Yehowa, Samahaʼö Fondrege zi Sökhi! Uʼandrö sibai saohagölö khö Yehowa börö me no ifahaʼö ndraʼo ba zi sandrohu faʼaurigu ba lö tebulö iforomaʼö khögu waʼasökhi dödönia sebua ba ngawalö hadia ia.