Oʼö Lala Wangera-ngera Yehowa hegöi Yesu

1-2. (a) Hadia manö zoʼamakhaita ba wangomasiʼö Yehowa? (b) Hewisa wangoromaʼö Yesu wa iʼomasiʼö Yehowa moroi siʼaikö ba gera-erania maʼafefu?

”OMASIʼÖ Yehowa Lowalangiu moroi siʼaikö ba dödöu, nosou maʼasambua, faʼabölöu ba era-erau maʼafefu.” (Luk. 10:27) Ifahaʼö ita Yesu wa daʼö goroisa sabölö ebua si so ba Goroisa Moze. Nehegö atö wa moʼamakhaita waʼomasida khö Yehowa ba dödöda, farahu ba daʼö zomasi-masi ita hegöi nirasoida. Moʼamakhaita göi waʼomasida khö Yehowa ba waʼabölöda hegöi famosumangeda yaʼia soroi ba dödö. Baero daʼö, moʼamakhaita göi ia ba lala wangera-ngerada. Sambua lala ba wangoromaʼöda wa taʼomasiʼö Yehowa ba lala wangera-ngerada, yaʼia na taʼokhögö lala wangera-ngera si fagölö simane Yehowa. Sindruhu sa wa lö aboto ba dödöda fefu gera-era Yehowa. Hizaʼi, tola itugu aboto ba dödöda lala wangera-ngera Lowalangi na tafahaʼö ita ba lala ”wangera-ngera Keriso”, börö me moʼahonoa woloʼönia lala wangera-ngera Namania.—1 Ko. 2:16.

² Moroi siʼaikö ba gera-era Yesu wangomasiʼönia Yehowa. Iʼila hadia gohitö dödö Lowalangi khönia, ba no ihalö gangetula ba wamalua daʼö hewaʼae göna ia famakao. Börö me iʼosambuaʼö dödönia ba gohitö dödö Namania, lö itehegö na so zi möi famangoloi dödönia.

3. Hadia wamahaʼö nihalö Wetero moroi khö Yesu, ba hadia mene-mene nibeʼe Wetero khö ndra niha Keriso? (1 Fetero 4:1)

³ Fetero hegöi ira sinenge tanö böʼö, tebeʼe khöra ginötö si tohude börö me tola fariawö ira khö Yesu ba lafahaʼö ira ba lala wangera-ngerania. Me isura zurania siföföna Fetero niʼehehaini Lowalangi, ibeʼe mene-mene khö ndra niha Keriso enaʼö laʼokhögö lala wangera-ngera Keriso. (Baso 1 Fetero 4:1.) Ba li sindruhunia, ngawua wehede ”mifaʼanö ami” niʼogunaʼö Wetero, hulö zaradadu si no mamaʼanö yaʼia ba solohe fangöna weʼamöi fasuwö. Börö daʼö, na laʼoʼö ira niha Keriso lala wangera-ngera Yesu, hulö no lafaʼanö ira faoma fangöna sebua ba wolawa isö-isö dödö si fasala hegöi ulidanö nifatörö Zatana.—2 Ko. 10:​3-5; Ef. 6:12.

4. Hadia nitutunöda ba artikel daʼa?

⁴ Tatutunö dania sanandrösa ba lala wangera-ngera Yesu ba hadia zi tola tafalua ba woloʼö lala wangera-ngerania. Tatutunö göi hewisa enaʼö tola (1) taʼoʼö lala wangera-ngera Yehowa sanolo yaʼia enaʼö hasara dödöda, (2) taʼokhögö wangide-ngideʼö, ba (3) taʼokhögö lala wangera-ngera si sökhi, yaʼia na taʼodaligö Yehowa ba wangandrö.

OʼÖ LALA WANGERA-NGERA YEHOWA

5. Hadia zalua sangoromaʼö wa no irai lö mofozu Wetero ba woloʼö lala wangera-ngera Yehowa?

⁵ No irai lö mofozu Wetero ba woloʼö lala wangera-ngera Yehowa. Duma-dumania, ifatunö khö ndra sinengenia Yesu wa hasambalö möi ia ba Yeruzalema, labeʼe ia ba danga ndra sondröniaʼö agama, lafakao ba labunu ia ba daʼö. (Mat. 16:21) Lö itemaʼö Fetero wa itehegö alua daʼö Yehowa ba waʼauri Yesu, börö me Yesu andrö Mesia nifabuʼu, sangefaʼö soi Gizaraʼeli. (Mat. 16:16) Andrö wa iʼohe Yesu ba zingania ba imane Fetero, ”He Soʼaya, hakhösi tödö ndraʼugö. Böi alua khöu zimane daʼö.” (Mat. 16:22) Me luo daʼö, lö fao dödö Wetero khö Yesu börö me lö fagölö lala wangera-ngerania ba lala wangera-ngera Yehowa.

6. Hewisa wangoromaʼö Yesu wa no iʼoʼö lala wangera-ngera Yehowa?

⁶ Aboto ba dödö Yesu lala wangera-ngera Namania, ba moʼahonoa woloʼönia daʼö. Imane Yesu khö Wetero, ”Ae furigu Satana! Fangalagu ndraʼugö börö me lö öfatou-tou tödöu gera-era Lowalangi, ha fangera-ngera niha.” (Mat. 16:23) Iʼila Yesu wa lö tola löʼö tefakao ba mate ia enaʼö tola ifalua gohitö dödö Yehowa. Andrö wa lö itemaʼö mene-mene nibeʼe Wetero hewaʼae iʼila wa te sökhi gohitö dödö Wetero ba wangumaʼö fehede daʼö. Moroi ba zalua andre ifahaʼö ia Fetero wa moguna iʼoʼö lala wangera-ngera Lowalangi. Moguna göi tafalua zimane daʼö.

7. Hadia wamorege nifalua Wetero ba woloʼö lala wangera-ngera Yehowa? (Faigi gambara.)

⁷ Ba gafuriata, iforege Fetero ba woloʼö lala wangera-ngera Yehowa. Me luo daʼö, ibörögö itehegö Yehowa ba niha si tenga Yahudi si lö nisuna enaʼö tobali ira ono mbanuania. Itema halöwö Fetero ba wanuriaigö khö Gonelio, niha siföföna moroi ba soi böʼö si tobali niha Keriso. Sindruhunia, lö fariawö niha Yahudi ba soi böʼö. Börö daʼö, moguna ibulöʼö wangera-ngerania Fetero enaʼö tola ifalua halöwö nitemania. Me no ifahaʼö ia Fetero hewisa wamaigi Lowalangi niha moroi ba soi böʼö, ibulöʼö lala wangera-ngerania. Buania, ’lö fatimba khönia’ weʼamöi ba nomo Gonelio. (Hal. 10:​28, 29) Manuriaigö ia khö Gonelio hegöi ösi nomonia maʼafefu, ba tebayagö ira idanö.—Hal. 10:​21-23, 34, 35, 44-48.

8. Hewisa wangoromaʼöda wa taʼoʼö lala wangera-ngera Yehowa? (1 Fetero 3:8)

⁸ Hauga fakhe aefa daʼö, ibeʼe mene-menenia Fetero khö ndra niha Keriso enaʼö ’hasara dödöra’. (Baso 1 Fetero 3:8.) Yaʼita ono mbanua Yehowa, tola taʼosaraʼö dödöda khö ndra talifusöda si sara lala wamati na taʼoʼö lala wangera-ngera Yehowa si so ba Zura Niʼamoniʼö. Duma-dumania, iʼamenesi ndra nifahaʼönia Yesu enaʼö laʼofönaiʼö Wamatörö Lowalangi ba waʼaurira. (Mat. 6:33) Börö mene-mene andrö, tola manö so samösa zanuriaigö ba mbanua niha Keriso si farahu yaʼugö sangai angetula ba wangai halöwö safönu inötö. Tatu lö tafarou dödönia enaʼö ifili lala waʼauri sabölö aoha. Hizaʼi, tafarou ia ba wogamö ohitö dödönia andrö ba tabeʼe khönia wanolo.

OKHÖGÖ WANGIDE-NGIDEʼÖ

9-10. Hadia zangoromaʼö wa iʼokhögö wangide-ngideʼö Yesu?

⁹ Ba mbongi fatua lö labunu Yesu, ifahaʼö Wetero hegöi ira sinengenia tanö böʼö wa moguna sibai laʼokhögö wangide-ngideʼö. Fatua lö daʼö, ifatenge Wetero hegöi Yohane ba wangehenaigö ö niʼogunaʼö Yesu hegöi ira nifahaʼönia fatua lö mate ia. Te göi lahenaigö andru awö karawa ba wanasai ahe niha si tohare fatua lö manga ira. Hizaʼi, haniha zangokhögö fangide-ngideʼö ba wamalua halöwö daʼö?

¹⁰ Lö aila Yesu ba wamalua halöwö daʼö. Tatu tokea ndra sinenge me omasi Yesu ba wamalua halöwö zawuyu. Iheta mbarunia tanö baero, ihalö andru ifaliʼö ba löwi-löwinia, ifoʼösi karawa faoma idanö, ba ibörögö isasai gahera. (Yoh. 13:​4, 5) Tatu manö, ara maʼifu ginötö niʼogunaʼönia ba wanasai ahe ndra sinengenia si 12 niha andrö, farahu ba daʼö Yuda si manga mbölinia dania. Hewaʼae simanö, ifalua halöwö daʼö Yesu si fao fangide-ngideʼö. Aefa daʼö, si fao faʼebolo dödö imane, ”Hadia aboto ba dödömi hana wa ufalua daʼa khömi? Mikaoni ndraʼo ’Samahaʼö’ ba ’Soʼaya’, atulö niwaʼömi andrö. Na yaʼo manö usasai gahemi hewaʼae mikaoni khögu Soʼaya ba Samahaʼö, lö tola löʼö göi faoma misasai gahe nawömi.”—Yoh. 13:​12-14.

11. Hadia zangoromaʼö wa no ifahaʼö ia Fetero ba wangokhögö fangide-ngideʼö? (1 Fetero 5:5) (Faigi göi gambara.)

¹¹ Ifahaʼö ia Fetero moroi ba wangide-ngideʼö niforomaʼö Yesu. Me no mangawuli Yesu ba zorugo, ifalua dandra sahöli-höli dödö Fetero ba wamadöhö ira matua sombuyu-mbuyu töla iʼotarai me tumbu. (Hal. 1:​8, 9; 3:​2, 6-8) Tatu manö, adöni dödö niha sato ba zalua andrö ba lafasui Wetero. (Hal. 3:11) Sindruhunia, teʼebuaʼö Wetero ba mbanua sabölö mangofönaiʼö sumange hegöi dadaoma salawa. Tobali, hadia omuso dödönia me lafasui ia niha sato? Löʼö. Si fao fangide-ngideʼö iwaʼö ba niha sato enaʼö lasuno Yehowa hegöi Yesu. Imane, ”Börö döi Yesu ba börö me mamati ndraʼaga ba döinia, andrö wa döhö niha niʼilami andre.” (Hal. 3:​12-16) Hauga fakhe aefa daʼö, iʼamenesi ndra niha Keriso Fetero enaʼö laʼokhögö ”wangide-ngideʼö”. Ba li sindruhunia, ngawua wehede fangide-ngideʼö ba ayati daʼö eluahania hulö simane böbö löwi nifaliʼö ba löwi-löwi. Te daʼa zamasugi ba dödöda me ifaliʼö andru ba löwi-löwinia Yesu ba wanasai ahe ndra sinengenia.—Baso 1 Fetero 5:5.

12. Simane Fetero, hewisa enaʼö lö tebulö taforege ba wangokhögö fangide-ngideʼö?

¹² Tola taʼoʼö duma-duma Wetero na lö tebulö taforege ba wangokhögö fangide-ngideʼö. Muforomaʼö wangide-ngideʼö tenga ha ba wehede. Ngawua wehede ”fangide-ngideʼö” niʼogunaʼö Wetero, farahu göi ia ba lala wangera-ngerada sanandrösa khöda samösa hegöi ba niha böʼö. Börö daʼö, tafosumange Yehowa ba tatolo niha böʼö tenga börö me omasi ita nisuno, hizaʼi börö me taʼomasiʼö Yehowa hegöi awöda niha. Te itaria lö laʼila niha wamorege nifaluada. Hizaʼi, na tafalua ia soroi ba dödö, daʼö zangoromaʼö wa so khöda wangide-ngideʼö.—Mat. 6:​1-4.

OKHÖGÖ ”WANGERA-NGERA SI SÖKHI”

13. Hewisa niha sangokhögö ’fangera-ngera si sökhi’?

¹³ Hewisa niha sangokhögö ’fangera-ngera si sökhi’? (1 Fe. 4:7) Iforege ba wangai angetula si tefaudu ba lala wangera-ngera Yehowa. Ba wamaiginia, abölö tohude gamakhaitania khö Yehowa. Lö iʼosipade börö me aboto ba dödönia wa oya nasa zi lö iʼila. Iʼodaligö göi Lowalangi, yaʼia me asese mangandrö ia khö Yehowa ba wameʼe khönia fanuturu lala.a

14. Hewisa wangoromaʼö Wetero wa lö iʼodaligö Yehowa?

¹⁴ Ba mbongi fatua lö mate Yesu, ifangelama ndra nifahaʼönia, ”Yaʼami fefu miröi ndraʼo bongi daʼa.” Si fao faʼafaduhu dödö imane Fetero, ”Hewaʼae laröi ndraʼugö fefu niha, hizaʼi lö uröiʼö!” Ba mbongi daʼö göi, iʼamenesi ösa ndra nifahaʼönia imane, ”Böi miförö ba böi miböhöli wangandrö.” (Mat. 26:​31, 33, 41) Na iʼoʼö menaʼö mene-mene daʼö Fetero, te barani ia wamaduhuʼö wa nifahaʼö Yesu ia. Hizaʼi, iʼosilöʼögö Zamahaʼö yaʼia, ba sindruhu-ndruhu maniasa ia ba gafuriata.—Mat. 26:​69-75.

15. Hana wa tola iʼokhögö wangera-ngera si sökhi Yesu ba mbongi fatua lö mate ia?

¹⁵ Sindruhu-ndruhu iʼodaligö Namania Yesu. Hewaʼae moʼahonoa ia, hizaʼi lö iböhöli wangandrö. Daʼö zameʼe khönia faʼabarani ba wamaudugö angetula nihalönia ba gohitö dödö Yehowa. (Mat. 26:​39, 42, 44; Yoh. 18:​4, 5) Toröi-röi ba dödö Wetero nifalua Yesu, ba lö irai iʼolifugö daʼö.

16. Hewisa wangoromaʼö Wetero wa so khönia wangera-ngera si sökhi? (1 Fetero 4:7)

¹⁶ Ba gafuriata, abölö iʼodaligö Lowalangi Yehowa Fetero ba wangandrö. Hezo taʼila? Yesu si no tesusugi, ifatunö khö Wetero hegöi sinenge tanö böʼö wa latema dania geheha niʼamoniʼö enaʼö lö laböhöli wanuriaigö. Hizaʼi, fatua lö alua daʼö, iʼandrö khöra Yesu enaʼö labaloi ba Yeruzalema. (Luk. 24:49; Hal. 1:​4, 5) Hadia nifalua Wetero gasa-gasa wombaloinia daʼö? Fetero hegöi ira niha Keriso tanö böʼö, ”lö laböhöli wangandrö”. (Hal. 1:​13, 14) Hauga fakhe aefa daʼö, ba zurania siföföna, iʼamenesi ndra niha Keriso Fetero enaʼö laʼokhögö wangera-ngera si sökhi ba laʼodaligö Yehowa ba wangandrö. (Baso 1 Fetero 4:7.) Ifahaʼö ia Fetero ba wangodaligö Yehowa ba tobali ia toga mbanua niha Keriso.—Gal. 2:9.

17. Gofu hadia waʼatua-tua niʼokhögöda, hadia zi lö tebulö tafalua? (Faigi göi gambara.)

¹⁷ Enaʼö tola taʼokhögö wangera-ngera si sökhi, moguna asese mangandrö ita. Gofu hadia waʼatua-tua niʼokhögöda, böi tebulö taʼodaligö Yehowa, mendrua manö na tahalö gangetula sebua. Taʼandrö khö Yehowa enaʼö ibeʼe khöda wanuturu lala börö me faduhu dödöda wa iʼila hadia wondrege zi sökhi khöda.

18. Hewisa enaʼö itugu fakhili lala wangera-ngerada ba lala wangera-ngera Yehowa?

¹⁸ Tatu taʼandrö sibai saohagölö börö me iwöwöi ita Yehowa ba ibeʼe khöda waʼabölö ba woloʼö amuatania. (1 Mo. 1:26) Tatu manö, tebai moʼahonoa woloʼöda yaʼia. (Yes. 55:9) Hizaʼi, simane Fetero, tola taforege enaʼö fakhili lala wangera-ngerada ba lala wangera-ngera Yehowa. Tola tafalua daʼö na lö tabato woloʼö lala wangera-ngera Lowalangi, taʼokhögö wangide-ngideʼö hegöi fangera-ngera si sökhi.