Hawaʼasökhi Na Fahuwu Ita khö Ndra Talifusöda!

1-2. Hadia zi tohude ba wamaigi Yehowa, ba hadia niʼandrönia khöda enaʼö tafalua?

TOHUDE sibai ba wamaigi Yehowa hadia nifaluada ba niha böʼö. Ifahaʼö ita Yesu enaʼö taʼomasiʼö niha böʼö simane fangomasiʼöda yaʼita samösa. (Mat. 22:​37-39) Farahu ba daʼö wangoromaʼö faʼasökhi dödö ba niha si lö mamosumange Yehowa. Na tafalua daʼö, no taʼoʼö Lowalangi Yehowa, ’sameʼe haga luo ba niha si sökhi hegöi ba niha si lö sökhi, ba sameʼe teu ba niha satulö hegöi ba niha si lö atulö’.—Mat. 5:45.

² Hewaʼae iʼomasiʼö fefu niha Yehowa, hizaʼi abölö iʼomasiʼö niha samalua satulö. (Yoh. 14:21) Omasi ia na taʼoʼö nifaluania. Andrö wa iʼamenesi ita enaʼö taʼomasiʼö ndra talifusöda soroi ba dödö. Omasi ia na taʼomasiʼö ndra talifusöda simane fangomasiʼöda ösi nomoda mazui si fahuwu khöda.—Rom. 12:10; 1 Fe. 4:8.

3. Hana wa mufaomagö waʼomasi andrö simane sinanö?

³ Faʼomasi andrö hulö simane sinanö sinangea murorogö enaʼö alio tedou. Iʼamenesi ndra niha Keriso Faulo, imane, ”Böi miböhöli wangoromaʼö faʼomasi khö ndra talifusö.” (Heb. 13:1) Omasi Yehowa na tarorogö waʼomasida khö ndra talifusöda. Tatutunö dania ba artikel daʼa hadia mbörö wa moguna itugu aro wahuwusada khö ndra talifusöda ba hewisa enaʼö lö tebulö tafalua daʼö.

HANA WA MOGUNA ITUGU ARO WAHUWUSADA KHÖ NDRA TALIFUSÖDA?

4. Hewisa enaʼö lö tebulö taʼameʼegö tödö wahasara dödö ba gotaluada yaʼita si fatalifusö? (Sinunö 133:1; faigi göi gambara.)

⁴ Baso Zinunö 133:1. Tatu fao dödöda khö zanura sinunö sangumaʼö wa ”hawaʼasökhi” ba ”ha lö omasiö” na fahuwu ita ba niha sangomasiʼö Yehowa. Hizaʼi, simane niha si lö saʼae moʼameʼegö tödö hawaʼasökhi geu salawa niʼilania ero maʼökhö, tola manö göi lö saʼae taʼameʼegö tödö hawaʼasökhi wahasara dödö ba gotaluada yaʼita si fatalifusö. Na asese falukha ita khö ndra talifusöda, te hauga kali ba zi samigu, hewisa wangoromaʼöda wa lö tebulö taʼameʼegö tödö ira? Itugu taʼomasiʼö ndra talifusöda na lö tebulö taʼangerönusi hawaʼebua mbölira ba wamaigida hegöi ba mbanua niha Keriso.

5. Na faoma taʼomasiʼö nawöda, hadia lua-luania daʼö ba niha böʼö?

⁵ So ösa niha sawena möi ba gangowuloa, toröi-röi ba dödöra me laʼila wa faoma taʼomasiʼö nawöda. Moroi ba daʼö manö te no ibörögö faduhu dödöra wa no lasöndra zindruhu. Imane Yesu, ”Ba daʼö aboto ba dödö niha fefu wa no nifahaʼögu ami na faoma miʼomasiʼö nawömi.” (Yoh. 13:35) Nehegö zalua khö Chaithra, samösa ira alawe si bohou ebua samahaʼö yaʼia khö Zamaduhuʼö Yehowa. Samuza inötö, möi ia ba gangowuloa sebua ba zi sambua regional. Me tanö owi ba ngaluo siföföna, ifatunö khö zamahaʼö yaʼia ba Zura Niʼamoniʼö, imane, ”Lö irai latalagui ndraʼo ira satuagu. Hizaʼi maʼökhö daʼa, 52 kali latalagui ndraʼo. Urasoi wa iʼomasiʼö sibai ndraʼo Yehowa, iʼogunaʼö nösi nomonia ba wamati. Omasido tobali ösi nomo Yehowa.” Lö iböhöli wamahaʼö yaʼia Chaithra, ba tebayagö ia idanö me döfi 2024. Ba daʼa taʼila wa lanehe-nehegö gamuatada si sökhi ira niha sadöni tödö ba zindruhu, ba sasesenia daʼa zamarou yaʼira enaʼö lafosumange Yehowa.—Mat. 5:16.

6. Na fahuwu ita khö ndra talifusöda, hana wa möi folumöʼöda daʼö?

⁶ Na fahuwu ita khö ndra talifusöda, möi folumöʼö waʼaurida daʼö. Iʼamenesi ndra niha Keriso Faulo, ”Faoma mifarou dödö nawömi ero maʼökhö . . . enaʼö lö ba gotaluami zangabeʼeʼö tödönia börö walimosa horö andrö.” (Heb. 3:13) Na ibörögö fandröndröu ita moroi ba lala satulö börö me tarasoi waʼide-ide dödö, tola iʼogunaʼö zi samösa talifusöda ba wamati Yehowa ba wanolo yaʼita. (Si. 73:​2, 17, 23) Moguna sibai khöda wanolo simane daʼö.

7. Hadia gamakhaita waʼomasi ba fahasara dödö? (Kolose 3:​13, 14)

⁷ No farahu ita ba ngawawa niha samorege ba wangoromaʼö wa faoma laʼomasiʼö nawöra. Börö daʼö, oya howu-howu nitemada. (1 Yo. 4:11) Duma-dumania, faʼomasi zamarou yaʼita enaʼö ’lö tebulö khöda waʼebolo dödö zamösana’, ba daʼö zanolo yaʼita ba wondrorogö fahasara dödö ba gotaluada yaʼita si fatalifusö. (Baso Kolose 3:​13, 14; Ef. 4:​2-6) Börö daʼö, tola tarasoi waʼohahau dödö ba gangowuloa, si lö tesöndra ba gulidanö andre.

DATAFOROMAʼÖ WA FAOMA TAFOSUMANGE NAWÖDA

8. Hewisa wanolo Yehowa yaʼita enaʼö teʼosambuaʼö ita khö ndra talifusöda?

⁸ Ha Yehowa zi tola mangosambuaʼö yaʼita khö ndra talifusöda ba zi sagörö ulidanö, hewaʼae lö moʼahonoa ita. (1 Ko. 12:​24, 25) Iwaʼö Sura Niʼamoniʼö wa ’ifahaʼö ita Lowalangi ba wangomasiʼö’. (1 Te. 4:9) Eluahania, no ihaogö wamatunö khöda Yehowa hadia zinangea tafalua enaʼö fahuwu ita khö ndra talifusöda. Hewisa lala Lowalangi ba wamahaʼö yaʼita? Yaʼia na tahaogö tafahaʼö ita ba wamahaʼö nibeʼenia si so ba Zura Niʼamoniʼö ba tafalua daʼö. (Heb. 4:12; Yak. 1:25) Daʼö zi lö tebulö laforege ira Samaduhuʼö Yehowa.

9. Moroi ba Roma 12:​9-13, hadia wamahaʼö nihalöda sanandrösa ba wangoromaʼö famosumange?

⁹ Ifahaʼö ita Sura Niʼamoniʼö hewisa lala enaʼö fahuwu ita khö ndra talifusöda. Angeragö hadia niwaʼö Waulo ba Roma 12:​9-13. (Baso.) Nehegö atö ngawua wehede daʼa: ”Yafahulö ami ba wamosumange awömi.” Hadia geluahania? Moguna taʼofönaiʼö ita ba wangomasiʼö ira talifusöda, duma-dumania taforomaʼö khöra waʼoböwö ba taʼefaʼö zalara. (Ef. 4:32) Böi tabalo-baloi balazi laʼondrasi ita. Moguna taʼofönaiʼö ita wamalua daʼö. Buania, simane niwaʼö Yesu, ”ohahau dödö ba wameʼe moroi ba wanema”.—Hal. 20:35.

10. Hewisa enaʼö tobali ita niha sowölö-ölö ba wangoromaʼö wa ’tafosumange nawöda’? (Faigi göi gambara.)

¹⁰ So nasa zadöni dödöda moroi ba wehede Waulo. Me no aefa ifatunö khöda enaʼö fahulö ita ba wangoromaʼö famosumange, ifarou nasa ita imane, ”Yaʼowölö-ölö ami, ba böi areu.” Niha sowölö-ölö iforege wohalöwö ba so khönia waʼaterou dödö. Na labeʼe halöwönia, ifalua daʼö soroi ba dödö. Imane Sura Niʼamoniʼö, ”Böi abua gölöu wanolo niha sinangea mutolo na tola öfalua.” (Amd. 3:​27, 28, nisura ba gahe zura.) Börö daʼö, na taʼila so ndra talifusöda sinangea mutolo, tatolo ia ndrege zi sagu khöda. Lö tataha-taha ita mazui tawaʼö tödöda wa so dania niha böʼö zanolo yaʼia.—1 Yo. 3:​17, 18.

11. Hadia nasa zanolo yaʼita enaʼö aro wahuwusada khö ndra talifusöda?

¹¹ Lala tanö böʼö si tola tafalua ba wangoromaʼö wa tafosumange ndra talifusöda yaʼia daʼö na taʼefaʼö zalara. Imane ba Efeso 4:​26, ”Böi miʼekhugö luo ba wönumi.” Hadia mbörö? Itutunö khöda ba ayati 27, na lö alö wönuda, no ’tafonaha Gafökha’. Ba Zura Niʼamoniʼö, asese ifarou ita Yehowa enaʼö taʼefaʼö zala nawöda. Duma-dumania, iʼamenesi ita ba Kolose 3:13 enaʼö ’faoma taʼefaʼö zala nawöda soroi ba dödö’. Fangefaʼö sala no lala fondrege zi sökhi enaʼö aro wahuwusada khö ndra talifusöda. Na tafalua daʼö, no fao ita ba wondrorogö ’enaʼö lö tebulö khöda wahasara dödö ba geheha niʼamoniʼö, ba wamaböbö faʼatulö andrö’. (Ef. 4:3) Rahu-rahunia, moguna sibai wangefaʼö sala enaʼö terorogö wahasara dödö ba faʼatulö ba nono mbanua Yehowa.

12. Hadia nifalua Yehowa ba wanolo yaʼita ba wangefaʼö sala niha böʼö?

¹² Sindruhu sa wa tola manö abua khöda ba wangefaʼö sala niha si no mangafökhöiʼö tödöda. Hizaʼi, tola tafalua daʼö börö wanolo moroi ba geheha niʼamoniʼö. Me no aefa iʼamenesi ita Faulo enaʼö faoma taʼomasiʼö nawöda ba enaʼö owölö-ölö ita, imane nasa, ”Yaʼifarou ami eheha niʼamoniʼö.” (Rom. 12:11) Eluahania, tola itolo ita eheha niʼamoniʼö enaʼö so khöda waʼedöna hegöi faʼaterou dödö ba wamalua somasi Lowalangi. Tobali, tola itolo ita eheha niʼamoniʼö ba wangomasiʼö ira talifusöda ba taʼefaʼö zalara soroi ba dödö. Börö daʼö, moguna taforege wangandrö khö Yehowa enaʼö ibeʼe khöda gehehania niʼamoniʼö.—Luk. 11:13.

ʼLÖ FABALI GERA-ERA’

13. Hadia zi tola mamabali era-erada?

¹³ No faböʼö-böʼö fefu niha si so ba mbanua niha Keriso. (1 Ti. 2:​3, 4) Börö daʼö, tola manö göi faböʼö-böʼö gangetula nihalöda sanandrösa ba lagu wonukha, hiburan nifilida mazui dalu-dalu niʼogunaʼöda. Na lö mangelama ita, tola manö tobali famoto wahasara dödöda daʼö. (Rom. 14:4; 1 Ko. 1:10) Hizaʼi, börö me no ’ifahaʼö ita Lowalangi ba wangomasiʼö’, lö tawaʼö tödöda wa abölö sökhi gangetula nihalöda moroi ba gangetula nihalö niha böʼö, ba lö tafaso ira ba woloʼö angetulada.—Fil. 2:3.

14. Hadia zinangea taforege wamalua, ba hadia mbörö?

¹⁴ Tola nasa tarorogö wahasara dödö ba mbanua niha Keriso yaʼia na taforege ba wamarou tödö niha böʼö. (1 Te. 5:11) Barö-barö daʼa, ato niha si no mamöhöli halöwö ba wamati mazui si no irai muheta ba gangowuloa, no lafuli ira ba mbanua niha Keriso. Tatu tatemaʼö ira si fao faʼomuso dödö! (2 Ko. 2:8) Nehegö zalua khö dalifusöda ira alawe si no ifuli möi ba gangowuloa me no iböhöli halöwö ba wamati sagötö zi fulu fakhe. Imane, ”Latemaʼö ndraʼo si fao faʼiki ba laraʼu dangagu.” (Hal. 3:19) Toröi-röi ba dödönia waʼasökhi dödö si no öna-öna andrö. Imane, ”Hulö no igogohe ndraʼo tanga Yehowa ba ituturu lalagu enaʼö ifuli urasoi waʼohahau dödö.” Na taforege ba wamarou tödö niha böʼö, tola iʼogunaʼö ita Keriso ba wanolo niha ”serege tödö awö zonoro sabua”.—Mat. 11:​28, 29.

15. Hadia nasa zi tola tafalua ba wondrorogö fahasara dödö? (Faigi göi gambara.)

¹⁵ Lala tanö böʼö si tola tafalua ba wondrorogö fahasara dödö yaʼia daʼö na tazago wehededa. Imane ba Yobi 12:​11, ”Hadia tenga talinga zotandra fehede simane lela na itandra waʼami gö?” Niha sonekhe mondrino, hasambalö itandra ua sakali gö nirinonia fatua lö ibeʼe yawa ba meza. Simane daʼö göi, moguna tahaogö taʼangeragö hadia niwaʼöda fatua lö mohede ita. (Si. 141:3) Moguna tatatugöi wa möi famarou dödö wehededa, tobali fangokafu dödö ba ”ohahau dödö zamondrongo”.—Ef. 4:29.

16. Haniha zinangeania zabölö mangofönaiʼö ba wangogunaʼö fehedera ba wamarou tödö niha böʼö?

¹⁶ Foʼomo ira matua hegöi ira satua, moguna laforege enaʼö möi famarou dödö wehedera. (Kol. 3:​19, 21; Tit. 2:4) Moguna göi lafarou dödö nono mbiri-biri Yehowa ira satua sokubaloi ba labeʼe khöra wondrara dödö. (Yes. 32:​1, 2; Gal. 6:1) Ifasugi ba dödöda Sura Niʼamoniʼö, ”Hawaʼasökhi zi sambua fehede ba ginötö si tefaudu!”—Amd. 15:23.

MANGOROMAʼÖ FAʼOMASI ”MOROI BA GAMUATA SOROI BA DÖDÖ”

17. Hewisa enaʼö tola taʼomasiʼö ndra talifusöda soroi ba dödö?

¹⁷ Iʼamenesi ita sinenge sotöi Yohane enaʼö ”taʼomasiʼö nawöda tenga ha ba wehede mazui ba mbewe manö, hizaʼi moroi ba gamuata soroi ba dödö”. (1 Yo. 3:18) Omasi ita taʼomasiʼö ndra talifusöda soroi ba dödö. Hewisa lalania? Alui ginötö enaʼö tola fariawö ami, duma-dumania na möi ami ba gangowuloa hegöi manuriaigö. Tola göi möi ita ba nomora. Na asese fariawö ita khöra, itugu aro wahuwusada ba itugu taʼomasiʼö ira. Na taʼoʼö fefu wanuturu lala andre, no taforomaʼö wa ’no ifahaʼö ita Lowalangi ba wangomasiʼö’. (1 Te. 4:9) Tola göi tarasoi samösa ”hawaʼasökhi ba ha lö omasiö na owulo zi fatalifusö si fao fahasara dödö!”—Si. 133:1.