”Ba Danga Yehowa So Wasuwöta Andre”

Me döfi 1999, lafaso ira samatörö enaʼö tabuʼa pajak moroi ba dolo-tolo nitema gödo ndraha Prancis iʼotarai 1993 irugi 1996. No mafalala wolohe amadöniwa daʼa ba zi hauga pengadilan ba Prancis, hizaʼi lafalua khöma zi lö atulö. Me no kala ndraʼaga ba pengadilan banding, lahalö ira samatörö gefe si so ba rekening gödo ndraha faʼebuania arakhagö öfa zuta a matonga euro (arakhagö 76 miliar rupiah). Awai tö zi tola mafalua yaʼia daʼö maʼohe gamadöniwa daʼa ba ECHR. Hizaʼi fatua lö mubörögö persidangan, laʼandrö khöma ira ECHR ba lawaʼö göi khö ndra tim hukum moroi khö ndra samatörö enaʼö fao ndraʼaga khö zi samösa wakil ECHR ba wamareso salua andre. Ohitö dödöra wa mufalua daʼö enaʼö so khöma wahasara dödö fatua lö mufalua persidangan.

Mawaʼö tödöma wa ifaso dania ndraʼaga wakil ECHR ba wamuʼa pajak niʼandrö ndra samatörö ba wangasiwai salua andre. Hizaʼi, aboto ba dödöma wa no masawö goi-goi Zura Niʼamoniʼö na mabuʼa pajak niʼandröra hewaʼae no ide-ide daʼö. Labeʼe dolo-tolo ira talifusöda ba wotuhini halöwö Wamatörö Lowalangi. Daʼö mbörö wa tenga tana khö ndra samatörö dolo-tolo andrö. (Mat. 22:21) Hewaʼae simanö, möi manö ndraʼaga ba wamareso daʼö si tobali tandra wa maʼameʼegö tödö ba mafosumange goi-goi nifazökhi ECHR.

Lafalua wamareso andrö ba zi sambua nahia ba gödo ECHR. Me awena mubörögö, iʼanemaiʼö iwaʼö wakil ECHR wa lö tola löʼö labuʼa pajak daʼö ösa ira Samaduhuʼö Yehowa ba Prancis. Me iwaʼö daʼö, masofu khönia, ”He Ibu, hadia öʼila wa no lahalö gefema ira samatörö öfa zuta a matonga euro moroi ba rekening-ma?”

Me irongo daʼö, tokea sibai ia. Me lafatunö ira tim hukum moroi khö ndra samatörö wa no lahalö gefe gödo ndraha, afatö sibai dödö wakil ECHR. Tebulö wamaiginia salua andre. Mofönu sibai ia khö ndra tim hukum ndra samatörö ba iʼanemaiʼö iʼasiwai rafera. Ba ginötö daʼö, aboto ba dödögu wa sindruhu-ndruhu Yehowa zombulöʼö salua andre ba zi lö madöna-döna. Me möiga baero, omuso sibai dödöma ba lö faduhu dödöma ba zawena alua andre.

Me 30 mbaŵa si Önö 2011, ihalö gangetula ECHR ba wameʼe faʼamöna khö ndra Samaduhuʼö Yehowa. Lafatunö ba gangetulara andrö wa pajak niʼandrö ndra samatörö, lö tefaudu daʼö ba huku ba lö tola löʼö lafuli gefe si no lahalö awö nono gefe andrö! Angetula si tebai muʼolifugö andre, tobali folumöʼö ba halöwö wamati nifalua ndra Samaduhuʼö Yehowa ba Prancis irugi iadaʼa. Simane ono gara si tekoʼo ba högö Goliato, simane daʼö wanofu nifaʼemama me mufalua rafe ba wamareso salua andre. Fanofu daʼö mbörö wa möna ndraʼaga. Faʼamönama andre simane niwaʼö Dawido khö Goliato, ”Ba danga Yehowa so wasuwöta andre.”—1 Sa. 17:​45-47.

Awena sambua daʼa moroi ba gamadöniwa tanö böʼö nimönaisi ndra Samaduhuʼö Yehowa. Hewaʼae so wolohi moroi khö ndra samatörö hegöi moroi khö ndra sondröniaʼö ba agama, irugi iadaʼa no 1.225 gamadöniwa si möna ita ba pengadilan tertinggi ba zi 70 soi hegöi ngawalö pengadilan internasional. Fefu waʼamöna andre no tobali folumöʼöda, duma-dumania tefaduhuʼö ita tobali sambua agama föna huku, lö tabini-biniʼö wamalua halöwö fanuriaigö, tola tatimbagö wefao ba upacara kenegaraan, ba tola göi tatimbagö transfusi darah.

Hana wa tola fao ndraʼo ba wangasiwai amadöniwa huku salua ba eropa, hewaʼae sindruhunia mangai halöwö ndraʼo ba gödo sebua ndra Samaduhuʼö Yehowa ba New York, Amerika Serikat?

LAʼEBUAʼÖ NDRAʼO IRA UTUSAN INJIL SOWÖLÖ-ÖLÖ

Ira satuagu, George hegöi Lucille, yaʼira andre lulusan moroi ba Sekolah Gilead kelas 12. Me döfi 1956, mangai halöwö ira ba Etiopia, ba daʼö tumbudo. Labeʼe töigu Philip, fagölö ba döi Wilifo, samösa sanuriaigö me abad si föföna. (Hal. 21:8) Gaʼagu ono alawe töinia Judy ba akhigu ono matua töinia Leslie. Ba Etiopia göi tumbu ira. Me döfi 1957, lö latehegö ira samatörö halöwö nifaluada. Hewaʼae na ide-ide nasa ndraʼo me luo daʼö, hizaʼi lö olifudo wa mabini-biniʼö ndraʼaga me luo daʼö ba wamosumange Yehowa. Börö me ide-ide nasa ndraʼo, uwaʼö tödögu wa baga sibai wamalua daʼö. Hizaʼi lafofanö ndraʼaga me döfi 1960 moroi ba Etiopia.

Findra nösi nomoma ba Wichita, Kansas, Amerika Serikat. Hewaʼae na tenga utusan injil saʼae zatuagu, hizaʼi owölö-ölö sibai ira nasa weʼamöi manuriaigö. Laʼomasiʼö sibai Yehowa ba laforege wananögö sindruhu ba dödö ndraonora. Tebayagö ndraʼo idanö me 13 fakhe ndröfigu. Tölu fakhe aefa daʼö, findra zui nösi nomoma ba nahia si lö ato sanuriaigö ba Arequipa, Peru.

Me döfi 1974, gödo ndraha Peru ifataro ndraʼo tobali perintis istimewa hewaʼae na awena 18 fakhe ndröfigu me luo daʼö, ba so nasa daöfa tö ndra talifusöda baero ndraʼo. Möiga manuriaigö ba mbanua si lö irai mamondrongo turia somuso dödö ba Pegunungan Andes Tengah. Maturiaigö duria somuso dödö ba niha si toröi ba mbanua daʼö sangogunaʼö li Quechua hegöi Aymara. Na mofanö ndraʼaga, maʼohe moto si hulö nomo ba mafotöi ia ”Owo” börö me öfa sagi. Mafatunö ba niha mbanua daʼö nifabuʼu Yehowa moroi ba Zura Niʼamoniʼö wa lö ara tö iheta waʼatosasa, fökhö ba faʼamate. (Fam. 21:​3, 4) Ba gafuriata, ato zangai angetula ba wamosumange Yehowa. Sindruhu-ndruhu wa si tebai maʼolifugö daʼö.

MOHALÖWÖ BA GÖDO SEBUA

Me döfi 1977 möi dalifusöda Albert Schroeder ba Peru, samösa ia moroi ba gotalua Mboto Solohe ndra Samaduhuʼö Yehowa. Ibeʼe khögu wamarou dödö enaʼö ufasuraʼö döigu ba wangai halöwö ba Mbetieli ba gödo sebua. Lö ara me ufalua daʼö, lakaoni ndraʼo ba Mbetieli Brooklyn me döfi 17 mbaŵa si Önö 1977. Sagötö zi öfa fakhe me awena ubörögö wohalöwö ba daʼö, mohalöwödo ba Departemen Pembersihan hegöi ba Departemen Pemeliharaan.

Me baŵa si Önö 1978, falukha ndraʼo khö dalifusöda Elizabeth Avallone ba pertemuan internasional ba New Orleans, Louisiana. Fakhili-khili waö-waö waʼaurima. Lafosumange göi Yehowa ira satuania soroi ba dödö. No öfa fakhe mangai halöwö Elizabeth tobali perintis biasa ba omasi ia mangai halöwö safönu inötö sandrohu faʼaurinia. Itugu aboto ba dödöma nawöma ba lö ara aefa daʼö tumbu ba dödöma waʼomasi. Mangowalu ndraʼaga me 20 mbaŵa si Fulu 1979, ba faoma mohalöwö ndraʼaga ba Mbetieli.

Si oföna sibai, lafataro ndraʼaga ba mbanua niha Keriso ba Brooklyn sangogunaʼö li Spanyol. Latemaʼö ndraʼaga ba daʼö ira talifusöda soroi ba dödö. Aefa daʼö, so tölu mbanua niha Keriso nifataro yaʼaga ba latemaʼö göi ndraʼaga ira talifusöda ba daʼö ba latuhini halöwöma ba Mbetieli. Me no atua ndra satuama si darua, so zi fahuwu hegöi ösi nomoma zondrorogö yaʼira. Maʼandrö sibai saohagölö wanolo nifaluara.

FAO BA WASUWÖTA SOʼAMAKHAITA BA HUKU

Ba zi lö udöna-döna, me baŵa si Sara 1982, lafataro ndraʼo wohalöwö ba Departemen Hukum ba Mbetieli. Tölu fakhe aefa daʼö, laʼandrö khögu wefao ba sekolah hukum enaʼö tola tobali pengacara berlisensi. Sagötö kuliah, ahöli-höli dödögu me uʼila wa oya sibai gamadöniwa huku nimönaisi ndra Samaduhuʼö Yehowa si tobali dane-dane ba wamalua halöwö ba wamati niʼaohasi ba dödö niha Amerika Serikat hegöi soi tanö böʼönia. Mahaogö wanutunö amadöniwa daʼa bakha ba kelas.

Me döfi 1986, awena 30 fakhe ndröfigu. Hewaʼae simanö, lafataro ndraʼo tobali Pengawas Departemen Hukum ba Mbetieli. Omuso dödögu börö me lafaduhusi tödö ndraʼo ba halöwö daʼa hewaʼae awuyu-wuyu nasa ndraʼo. Hizaʼi, itaria ambö gölögu wamalua halöwö andre börö me oya nasa zi lö uʼila. Aboto ba dödögu wa tenga halöwö saoha daʼa.

Ba gafuriatania me döfi 1988, tobali ndraʼo pengacara. Hizaʼi lö urasoi wa so lua-luania sekola nitörögu ba wahuwusagu khö Yehowa. Tola asiliyawa niha ibeʼe sekola salawa ba lawaʼö tödöra wa abölö pade ira moroi ba niha böʼö si lö sekola. Uʼandrö sibai saohagölö me itolo ndraʼo Elizabeth enaʼö ifuli ufalua halöwö ba wamati simane nifaluagu fatua lö möi ndraʼo kuliah. Hewaʼae ara ginötö, hizaʼi arara manö ifuli zui aro wahuwusagu khö Yehowa. Moroi ba zalua khögu andre, ufahaʼö ndraʼo wa tenga faʼatua-tua zabölö tohude ba waʼaurida. Hizaʼi, sameʼe khöda faʼomuso dödö yaʼia daʼö na aro wahuwusada khö Yehowa, taʼomasiʼö ia hegöi ono mbanuania.

MANGOGUNAʼÖ HUKU BA WAMADUHUʼÖ TURIA SOMUSO DÖDÖ

Me no awai kuliah ndraʼo, tola uʼosambuaʼö dödögu ba wamöfögö halöwö ba Departemen Hukum. Tola göi uʼoʼawögö organisasi föna pengadilan, farahu ba daʼö halöwö fanuriaigö nifaluada. Omuso sibai dödögu ba halöwö daʼa, hizaʼi oya zi tobali taha-taha börö waʼatebulö salua ba organisasi. Duma-dumania me döfi 1990, laʼandrö khö ndra Departemen Hukum ba wameʼe fanuturu lala enaʼö taböhöli wangandrö sumbangan ba ginötö tabeʼe publikasi. Me no tafalua wanuturu lala andrö, gofu haniha zomasi tola lahalö khöra publikasi ba lö labeʼe gefe. Börö wombulöʼö andre, buania tola muʼöna-önaiʼö halöwö ba Mbetieli hegöi halöwö nifalua ba wanuriaigö ba lö taʼabusi tödö wamuʼa pajak. So zangumaʼö wa ambö saʼae dania kefe organisasi irege tobali taha-taha daʼö ba wamalua halöwö fanuriaigö. Hizaʼi tenga daʼö zalua. Iʼotarai me döfi 1990, itugu monönö waʼato ndra Samaduhuʼö Yehowa. Iadaʼa, na so zomasi mangai gö ba wamati, tola ihalö ba lö ibeʼe mböli za se. No uʼila samösa waʼatebulö sebua salua ba organisasi Yehowa. Wa tola mofozu daʼö börö wanolo moroi khö Yehowa hegöi fanuturu lala moroi khö ndra sawuyu si lö faröi ba satua-tua.—2 Mo. 15:2; Mat. 24:45.

Faʼamöna ba huku nitemada, tenga ha teʼodaligö ba waʼatua-tua ndra pengacara. Sasesenia, tola terou dödö ndra samatörö hegöi ira sanguhuku ba wanolo ono mbanua Yehowa börö gamuatada si sökhi. Duma-dumania me döfi 1998, so datölu ndra talifusöda Boto Solohe ba fao göi woʼomora me lafalua gangowuloa bersejarah ba Kuba. Amuatara si sökhi hegöi foʼameʼegö tödö niforomaʼöra khö ndra samatörö, daʼö mbörö wa latehegö khö ndra Samaduhuʼö Yehowa lö faʼawö dambai ba politik. Ebua sibai lua-luania daʼö moroi ba wehede nifaʼemama na falukha ndraʼaga khö ndra samatörö.

Hizaʼi, na lö iʼila teʼasiwai gamadöniwa, tola ”taʼogunaʼö huku ba wamaduhuʼö turia somuso dödö.” (Fil. 1:7) Duma-dumania, no hauga wulu fakhe lö lafaduhuʼö hak niʼokhögöda ira samatörö ba Eropa hegöi Korea Selatan wa lö fao ita ba dinas militer. Lua-luania, mato 18.000 ndra talifusöda ba Eropa ba töra 19.000 ba Korea Selatan nibeʼe ba gurunga börö dödöra side-ide me lö fao ira ba dinas militer.

Ba gafuriata me 7 mbaŵa si Fitu 2011, ihalö gangetula bersejarah ECHR ba gamadöniwa Bayatyan vs Armenia. Ba gangetula daʼö, fefu soi si so ba eropa enaʼö lahenaigö dinas sipil fogati halöwö ba niha si lö omasi fao ba dinas militer börö nifaduhusira tödö. Me 28 mbaŵa si Önö 2018, ifalua zimane daʼö göi Mahkamah Konstitusi Korea Selatan. Tebai tasöndra waʼamöna si dombua andre na so fazamösa ndra talifusö si faröi.

Ira talifusö sohalöwö ba Departemen Hukum ba gödo sebua, laforege wohalöwö enaʼö lö sanaisi yaʼita ba wamosumange Yehowa hegöi ba wanuriaigö Famatörönia. Sambua töi sebua khöma me tola masalahini ndra talifusö ba wangoʼawögö yaʼira na so wanaisi moroi khö ndra samatörö. Hewaʼae na möna ita ba pengadilan mazui löʼö, famorege nifaluada ba wangoʼawögö organisasi Yehowa no tobali famaduhuʼö daʼö khö ndra gubernur, razo hegöi ba ngawalö soi. (Mat. 10:18) Ira sanguhuku, sosalahini ira samatörö, media massa hegöi niha sato, he na omasi ira he na löʼö hasambalö lafareso ayati Zura Niʼamoniʼö nibeʼema ba zura-sura si no mafaʼanö hegöi me maʼoʼawögö zindruhu föna ndra sangetuʼö huku. Buania, aboto ba dödö niha satulö tödö haniha ndra Samaduhuʼö Yehowa hegöi dane-dane nifaduhusira tödö yaʼia daʼö Sura Niʼamoniʼö. So ösa ba gotaluara zi no mangai angetula ba wamosumange Yehowa.

SAOHAGÖLÖ YEHOWA!

Sagötö zi 40 fakhe, no sambua töi si sökhi khögu me tola falulu fohalöwö ndraʼo ba gödo ndraha ba wangasiwai amadöniwa huku. Sambua töi si sökhi göi khögu me tola usalahini organisasi Yehowa föna ndra samatörö hegöi ba pengadilan tinggi. Uʼomasiʼö sibai ndra talifusö si falulu fohalöwö khögu ba Departemen Hukum ba gödo sebua hegöi ba gödo ndraha ba zi sagörö ulidanö. Oya howu-howu nitemagu ba urasoi waʼahono dödö.

Lö faröi Elizabeth ba wotuhini yaʼo sagötö zi 45 fakhe, he ba ginötö waʼomuso dödö mendrua manö ba mbaŵa waʼatosasa. Ahöli dödögu wa tola ifalua daʼö, börö me sindruhunia so göi wökhö si göna ba mbotonia.

No anehe ndraʼaga wa tebai tasöndra waʼamöna na taʼodaligö waʼabölöda samösa. Simane niwaʼö Dawido, ”Yehowa zangabölöʼö ono mbanuania.” (Si. 28:8) Sindruhu wa ”ba danga Yehowa so wasuwöta andre.”