Tola Möna Ndraʼugö Wolawa Isö-Isö Dödö si Fasala

1. Hadia zinangea talawa yaʼita fefu niha gulidanö?

HADIA no irai tedönisi dödömö ba wamalua sala? Na noa, böi ide-ide dödömö. Imane Sura Niʼamoniʼö, ”Fanandraigö salua khömi sindruhunia ha fanandraigö si toʼölö alua ba niha.” (1 Ko. 10:13) Eluahania, gofu hadia gisö-isö dödö nilawamö iadaʼa, so niha böʼö göi solawa daʼö. Börö daʼö, tenga ha yaʼu-yaʼugö. Börö wanolo moroi khö Yehowa, tola möna ndraʼugö wolawa gisö-isö dödö andrö.

2. Hadia manö wondrönisi dödö sinangea lalawa ira niha Keriso hegöi niha nifahaʼö ba Zura Niʼamoniʼö? (Faigi göi gambara.)

² Imane göi Sura Niʼamoniʼö, ”Dozi niha tetandraigö na tedönisi ba teböbö ia ba gisö-isö dödönia samösa.” (Yak. 1:14) Tola manö faböʼö-böʼö wondrönisi dödö salua khöda zamösana. Duma-dumania, so ösa niha Keriso hegöi niha nifahaʼö ba Zura Niʼamoniʼö, te laforege wolawa gisö-isö dödö ba wamalua fohorö khö lawan jenis. So göi zamorege ba wolawa gisö-isö dödö ba wamalua fohorö khö sesama jenis (ira matua faoma ira matua mazui ira alawe faoma ira alawe). Baero daʼö, so ösa zi no momböhöli wamaigi pornografi, tola manö ifuli tumbu ba dödöra wamaigi daʼö. Ato göi niha si no momböhöli ba wangogunaʼö narkoba mazui ba wamadu-madu tuo, te moguna göi laforege enaʼö lö ifuli lafalua daʼö. Sindruhu wa fefu ita no irai tarasoi hadia niwaʼö Waulo andre, ”Na omasi ndraʼo wamalua satulö, ba no ahatö khögu zi lö sökhi.”—Rom. 7:21.

3. Hadia lua-luania na lö aetu tumbu ba dödöu gisö-isö dödö si fasala?

³ Na lö aetu tumbu ba dödöu gisö-isö dödö si fasala, tola manö örasoi wa lö sagu khöu wolawa daʼö. Te göi aetu dötönafömö börö me öwaʼö tödöu wa no afatö dödö Yehowa öbeʼe. Hizaʼi sindruhunia, lö moguna so ba dödöu zimane daʼö. Enaʼö faduhu dödöu, ba artikel daʼa dania tatutunö wanema li moroi ba wanofu si dombua andre: (1) Haniha sindruhunia zomasi enaʼö örasoi wa lö sagu khöu wolawa daʼö ba aetu dötönaföu? (2) Hewisa enaʼö mofozu ndraʼugö wolawa isö-isö dödö si fasala?

OMASI ZATANA NA SO BA WANGERA-NGERADA ZI LÖ SÖKHI

4. (a) Hadia zomasi Zatana enaʼö tarasoi ba ginötö so wondrönisi dödö? (b) Hana wa faduhu dödöda wa tola möna ita wolawa fondrönisi dödö?

⁴ Omasi Zatana na so ba wangera-ngerada wa lö sagu khöda wolawa isö-isö dödö. Iʼila Yesu gohitö dödö Zatana andre. Börö daʼö, iwaʼö khö ndra nifahaʼönia enaʼö lamane wangandrö, ”Böi ohe ndraʼaga ba wanandraigö, efaʼöga moroi ba zi lö sökhi.” (Mat. 6:13) Moloʼö Satana, lö laʼoʼö niwaʼö Yehowa niha gulidanö na so wondrönisi dödö. (Yob. 2:​4, 5) Hana wa so ba wangera-ngerania zimane daʼö? Börö me yaʼia samösa no tedönisi dödönia ba gisö-isö dödönia si fasala, ba aoha sibai khönia wangai angetula ba wondröi Yehowa. Andrö wa so ba wangera-ngerania wa tafalua göi zimane daʼö. Baero daʼö, no irai so ba wangera-ngerania wa tola tödönisi dödö Nono Lowalangi soʼahonoa ba wamalua sala! (Mat. 4:​8, 9) Hizaʼi, tandraigö angeragö daʼa: Hadia sindruhu wa lö sagu khöda wolawa isö-isö dödö si fasala? Hasambalö wa tola! Hadia mbörö? Imane Faulo, ”Tola utaögö fefu hadia ia börö waʼabölö nitemagu moroi khö Lowalangi.”—Fil. 4:13.

5. Hezo taʼila wa faduhu dödö Yehowa wa tola möna ita wolawa isö-isö dödö si fasala?

⁵ Tenga simane Satana, faduhu dödö Yehowa wa sagu khöda ba wolawa isö-isö dödö si fasala. Hezo taʼila daʼö? No ifaʼeleʼö Yehowa wa so dania ngawawa sato si lö faröi khönia, ba teʼorifi ira moroi ba wamakao sabölö-bölö. Tandraigö atö angeragö daʼa: Yehowa, si tebai falimo, iwaʼö wa so dania ngawawa sato si möi ba Waradaiso samake ’baru sebua safusi’. Eluahania, lö raʼiö ira ba wamaigi Yehowa. (Fam. 7:​9, 13, 14) Ba daʼa taʼila wa no iʼila Yehowa wa hasambalö sagu khöda ba wolawa isö-isö dödö si fasala.

6-7. Hadia mbörö wa omasi Zatana na aetu dötönaföda?

⁶ Omasi Zatana na afatö dödöda mazui na aetu dötönaföda. Omasi ia na so ba wangera-ngerada wa no afatö dödö Yehowa khöda börö me taʼokhögö gisö-isö dödö si fasala. Hizaʼi sindruhunia, Satana zi lö hadöi tötönafö. No ihalö gangetula Yehowa wa hasambalö ihori Zatana. (1 Mo. 3:15; Fam. 20:10) Tatu manö afökhö dödönia börö me taʼokhögö dötönafö si lö aetu si tebai iʼokhögö. Börö daʼö, iforege wangalui lala enaʼö aetu dötönaföda. Hizaʼi, lö moguna so ba dödöda zimane daʼö! Sindruhunia, no ifaduhuʼö khöda Sura Niʼamoniʼö wa omasi Yehowa itolo ita ba wanöndra faʼauri si lö aetu börö me ”lö omasi ia na tekiko fazamösa. Omasi ia enaʼö dozi lafalalini gera-erara”.—2 Fe. 3:9.

⁷ Na so ba dödöda wa lö sagu khöda wolawa isö-isö dödö si fasala mazui na aetu dötönaföda, tatu omuso sibai dödö Zatana, börö me daʼö zomasi ia. Me no aboto ba dödöda daʼö, itugu tahalö gangetula ba wolawa Satana, yaʼia na tatiboʼö lala wangera-ngera si fasala andrö.—1 Fe. 5:​8, 9.

NIRASOIDA BÖRÖ ME LÖ MOʼAHONOA ITA

8. Baero gamuata si fasala, hadia nasa geluaha horö? (Sinunö 51:5; faigi göi ”Geluaha Ngawua Wehede”.)

⁸ Tenga ha Satana zomasi na tarasoi wa lö sagu khöda ba wolawa isö-isö dödö si fasala hegöi na aetu dötönaföda. So nasa danö böʼö, yaʼia daʼö horö ondröita niröi zatuada siföföna sotöi Adamo ba Khawa.a—Yob. 14:4; baso Zinunö 51:5.

9-10. (a) Hewisa dödö Gadamo hegöi Khawa me no aekhu ira ba horö? (Faigi göi gambara.) (b) Hadia lua-luania khöda iadaʼa horö ondröita?

⁹ Nehegö hewisa dödö Gadamo ba Khawa me no aekhu ira ba horö. Me no lasawö goroisa Yehowa, labiniʼö ira ba laforege wombalugö botora. Hadia mbörö? Ba mbuku Pemahaman Alkitab ba duho ”Dosa”, so ngawua wehede daʼa, ”Börö horö, andrö wa itahi-tahigö manö ia tödöra, larasoi waʼaombö-aombö dödö, faʼaila ba lö lasöndra waʼahono dödö.” Eluahania, börö horö tebai saʼae laʼokhögö wahuwusa saro ira Adamo ba Khawa khö Yehowa. Gofu hadia nifaluara, lö tebulö itahi-tahigö manö ia tödöra ba larasoi waʼaombö-aombö dödö börö me lö moʼahonoa ira. Tebai aheta ira ba daʼö.

¹⁰ Hizaʼi, tenga simane sibai salua khö Gadamo ba Khawa zalua khöda. Iadaʼa, so khöda höli, si tebai laʼokhögö ira Adamo ba Khawa. Tola isasai ita höli moroi ba horö ba taʼokhögö dödö side-ide si lö sinegu. (1 Ko. 6:11) Hewaʼae simanö, lö aheta nasa ita moroi ba horö ondröita hegöi falömoʼahonoa. Börö daʼö, no si toʼölö na tarasoi wa itahi-tahigö manö ia tödöda, tarasoi waʼaombö-aombö dödö, faʼaila ba lö tasöndra waʼahono dödö. Iwaʼö Sura Niʼamoniʼö wa ebua sibai nasa lua-lua horö andrö ba niha gulidanö, ba tola alua daʼö ba ”niha si lö mamalua horö simane fanawö huku nifalua Gadamo”. (Rom. 5:14) Sindruhu wa abu sibai dödöda wamondrongo daʼa. Hizaʼi, böi tatehegö iʼasogö ba wangera-ngerada wa lö sagu khöda wolawa isö-isö dödö si fasala ba aetu dötönaföda. Tola tatimbagö lala wangera-ngera simane daʼö. Hewisa lalania?

11. Hadia zinangea tafalua na tarasoi wa tebai talawa gisö-isö dödö si fasala? (Roma 6:12)

¹¹ Börö me lö moʼahonoa ita, itaria tarasoi wa lö sagu khöda wolawa fondrönisi dödö, mendrua manö na iwaʼö tödöda wa tebai möna ita wolawa isö-isö dödö si fasala. Hizaʼi, böi fondrondrongo wehede simane daʼö. Hadia mbörö? Börö me ifahaʼö ita Sura Niʼamoniʼö enaʼö lö tatehegö ’ifatörö ita horö andrö tobali razo ba mbotoda’. (Baso Roma 6:12.) Eluahania tola tafili ba wolawa isö-isö dödö si fasala. (Gal. 5:16) Faduhu dödö Yehowa wa tola möna ita. Tatu lö iʼandrö khöda ba wamalua daʼö na iʼila wa tebai möna ita. (5 Mo. 30:​11-14; Rom. 6:6; 1 Te. 4:3) Ba daʼa taʼila wa tola talawa gisö-isö dödöda si fasala.

12. Hadia zinangea tafalua na aetu dötönaföda, ba hadia mbörö?

¹² Simane daʼö göi, itaria aetu dötönaföda, hulö na iwaʼö tödöda wa no saʼae afatö dödö Yehowa khöda börö gisö-isö dödöda si fasala. Hizaʼi, böi fondrondrongo wehede simane daʼö. Hadia mbörö? No ifahaʼö ita Sura Niʼamoniʼö wa aboto ba dödö Yehowa wa lö moʼahonoa ita. (Si. 103:​13, 14) Baero daʼö, ”iʼila ngawalö hadia ia” sanandrösa khöda, farahu ba daʼö lua-lua horö ba waʼaurida ero zamösana. (1 Yo. 3:​19, 20) Tobali, na lö taʼoʼö gisö-isö dödöda si fasala, lö raʼiö ita ba wamaigi Yehowa. Hana wa tola tafaduhusi tödö daʼö?

13-14. Hadia raʼiö ita ba wamaigi Yehowa ha börö me taʼokhögö gisö-isö dödö si fasala? Tutunö.

¹³ Moloʼö Sura Niʼamoniʼö, amuata si fasala (si tola tafatörö) faböʼö ia moroi ba gisö-isö dödö si fasala (salua ba zi lö tadöna-döna). Duma-dumania, so ösa niha Keriso me abad siföföna ba Gorindro samalua homoseks. Imane Faulo, ”So ba gotaluami me föna zamalua simane daʼö.” Hizaʼi, me no lafalalini gera-erara, hadia lö irai saʼae tumbu ba dödöra wamalua homoseks? Sasesenia, no saʼae mowaʼa gisö-isö dödö simane daʼö ba abua sibai waniboʼö yaʼia. Tobali, lö tokea ita na ifuli tumbu ba dödöra gisö-isö dödö andrö. Hewaʼae simanö, lö raʼiö ira ba wamaigi Yehowa börö me laforege wanaha tödöra ba lö lafalua gisö-isö dödöra si fasala andrö. (1 Ko. 6:​9-11) Tola göi öʼoʼö duma-duma nifaluara.

¹⁴ Gofu hadia gisö-isö dödö si fasala niʼokhögömö iadaʼa, tola möna ndraʼugö wolawa yaʼia. Hewaʼae na tebai sindruhu-ndruhu taya gisö-isö dödö andrö, tola ötaha dödömö ba lö öfalua ”zomasi nösi hegöi fangera-ngerada si fasala”. (Ef. 2:3) Hewisa wamaluamö daʼö ba tola möna ndraʼugö ba wolawa isö-isö dödö si fasala?

LALA ENAʼÖ MÖNA ITA

15. Hadia zi tebai tafalua na omasi ita möna ba wolawa gisö-isö dödö si fasala, ba hadia mbörö?

¹⁵ Tola möna ndraʼugö wolawa isö-isö dödö si fasala na öʼila hezo alio tedönisi dödömö. Böi limo ndraʼugö samösa ba ’wangera-ngera si fasala’. (Yak. 1:22) Duma-dumania, te so zangumaʼö tödönia, ’Abölö oya nibadu niha böʼö moroi khögu.’ So göi zanahigö niha böʼö ba lamane, ’Na abölö iʼameʼegö tödö ndraʼo foʼomogu ira alawe, ba lö adöni dödögu wamaigi pornografi.’ Niha sangokhögö lala wangera-ngera simane daʼö, no laʼaohasi ba dödö gaoloma dödöra. Na ibörögö so ba wangera-ngeramö zimane daʼö, hasambalö alio tedönisi dödömö. Börö daʼö, böi alu-alui lala ba wamalua gisö-isö dödöu si fasala. Böi olifu ndraʼugö wa yaʼugö samösa dania zoluʼi lua-lua nifaluamö.—Gal. 6:7.

16. Hewisa enaʼö aro gangetulamö ba wolawa fondrönisi dödö?

¹⁶ Me no aboto ba dödöu hezo abölö alio tedönisi dödömö, moguna göi öʼaroʼö gangetulamö ba wolawa fondrönisi dödö. (1 Ko. 9:​26, 27; 1 Te. 4:4; 1 Fe. 1:​15, 16) Hewisa lalania? Angeragö hadia wondrönisi dödö sabua khömö wanimbagö ba hawaʼara zasesenia alua daʼö. Duma-dumania, hadia abölö abua khömö wanimbagö fondrönisi dödö andrö ba zi bongi mazui na no marase ndraʼugö? Faʼanö ndraʼugö, ba halö gangetula hadia zinangea öfalua na alua daʼö. Abölö sökhi na no öfaʼanö ndraʼugö fatua lö alua wondrönisi dödö andrö.—Amd. 22:3.

17. Hadia wamahaʼö nihalöda moroi khö Yosefo? (1 Moze 39:​7-9; faigi göi gambara.)

¹⁷ Nehegö hadia nifalua Yosefo me irayu ia foʼomo Wotifa. Iʼanemaiʼö itimbagö daʼö Yosefo. (Baso 1 Moze 39:​7-9.) Iʼila wa fasala na ihalö woʼomo niha böʼö. Baero daʼö, no iʼosambuaʼö dödönia ba wamalua satulö fatua lö irayu ia foʼomo Wotifa. Hadia wamahaʼönia khöda? Moguna taʼaroʼö gangetula nihalöda ba wamalua satulö fatua lö alua wondrönisi dödö andrö. Na tafalua daʼö, abölö aoha khöda ba wanimbagö fondrönisi dödö, börö me no taʼila hadia zinangea tafalua.

”BÖI MIBÖHÖLI WANEKHEGÖ TÖDÖMI”

18. Hadia nasa zi tola öfalua enaʼö möna ndraʼugö wolawa isö-isö dödö si fasala? (2 Korindro 13:5)

¹⁸ Enaʼö tola möna ndraʼugö ba wolawa isö-isö dödö si fasala, ’böi böhöli wanekhegö tödömö’. (Baso 2 Korindro 13:5.) Aseseʼö fareso hewisa lala wangera-ngera hegöi nifaluamö, ba falua wombulöʼö na moguna. Duma-dumania, na no mofozu ndraʼugö wolawa fondrönisi dödö, angeragö atö: ’Hadia moguna khögu ginötö ba wolawa fondrönisi dödö andrö?’ Na yaʼia, böi ide-ide dödömö. Angeragö hadia zi tola öfalua enaʼö abölö alio wanimbagömö fondrönisi dödö andrö. Duma-dumania, angerönusi wanofu-nofu daʼa: ’Na tumbu ba wangera-ngeragu zi lö sökhi, hadia tola uʼaliokö uböhöli woʼangeragö yaʼia? Hadia abua khögu wanimbagö fondrönisi dödö börö hiburan nifiligu? Na so gambara si lö baga, hadia tola iʼanemaʼiö uböhöli wamaigi yaʼia? Hadia aboto ba dödögu wa goi-goi Yehowa zabölö sökhi, hewaʼae na moguna uforege ba wamalua yaʼia?’—Si. 101:3.

19. Hewisa wa tola abua khöda ba wolawa isö-isö dödö si fasala börö gangetula side-ide si lö tefaudu nihalöda?

¹⁹ Ba ginötö tafareso dödöda, böi taʼalu-alui lala enaʼö atulö zala nifaluada. Imane Sura Niʼamoniʼö, ”No tefuyu dödö niha ba si lö sökhi moroi ba danö böʼö fefu.” (Yer. 17:9) Iwaʼö Yesu wa ”moroi ba dödö iʼotarai fangera-ngera si lö sökhi”. (Mat. 15:19) Duma-dumania, niha si no ara mamöhöli ba wamaigi-maigi pornografi, tola manö iwaʼö tödönia wa lö fasala na ifaigi-faigi gambara si tola mondrönisi tödönia ba wamalua horö, börö me tenga gambara niha si lö nukha daʼö. Mazui te imane, ’Hadia zalania na ukhalaigö wamalua si lö sökhi? Fokonia saʼatö lö ufalua.’ Niha sangokhögö lala wangera-ngera simane daʼö, hulö no itehegö ba dödönia si no tefuyu enaʼö ’iʼera-era wamalua faʼomasi nösi si fasala’. (Rom. 13:14) Hewisa enaʼö lö öfalua zimane daʼö? Angelama ba ginötö öhalö gangetula sigide-ide. Törö tödöu wa angetula sigide-ide si lö tefaudu, tola idönisi ndraʼugö ba wamalua horö sebua.b Baero daʼö, timbagö fefu ’wangera-ngera si lö sökhi’, samarou yaʼugö ba wangalu-ngalui lala ba wamalua amuata si lö sökhi.

20. Hadia dötönafö niʼokhögöda ba zi so miföna, ba hadia wanolo niʼokhögöda iadaʼa?

²⁰ Simane si no tatutunö, tola talawa wondrönisi dödö börö wanolo moroi khö Yehowa. Börö waʼahakhö dödönia, taʼokhögö dötönafö faʼauri si lö aetu ba gulidanö si bohou. Khalaigö atö ginötönia dania tola tafosumange Yehowa soroi ba dödö ba fangera-ngera si lö raʼiö, ba lö hadöi saʼae dania gisö-isö dödö si fasala. Tatu tarasoi waʼomuso dödö sebua! Hizaʼi, fatua lö tohare ginötö daʼö, böi awuwu. Yafaduhu dödöu wa tola möna ita ba wolawa gisö-isö dödö si fasala börö wanolo moroi khö Yehowa!