Andrö Wanolo khö Ndra Satua Sokubaloi

1. Hewisa wangoromaʼö Yehowa wa ebua sibai mböli nono mbanuania?

EBUA sibai mböli mbiri-biri Yehowa ba wamaiginia. No iʼöli ira faoma do Yesu ba ibeʼe noro dödö khö ndra satua sokubaloi ba wondrorogö yaʼira. (Hal. 20:28) Omasi ia na lahaogö-haogö ba nono mbiri-birinia. Baero daʼö, Yesu si no tobali högö ba mbanua niha Keriso, ibeʼe wanuturu lala khö ndra satua sokubaloi enaʼö lafarou dödö nono mbiri-biri Lowalangi ba lalumöʼö ira moroi ba deʼala wamati.—Yes. 32:​1, 2.

2. Haʼökhö abölö omasi Yehowa ba wameʼe fanolo? (Hezekieli 34:​15, 16)

² Iʼomasiʼö Yehowa fefu nono mbiri-birinia, hizaʼi abölö omasi ia ba wanolo si göna abula dödö. Tola manö, so zi göna abula dödö börö me awuwu ira ba wamati. Na alua daʼö, iʼogunaʼö ndra satua sokubaloi Yehowa ba wanolo yaʼira. (Baso Hezekieli 34:​15, 16.) Hizaʼi, omasi göi ia na taʼandrö khönia wanolo ba ginötö moguna khöda. Sindruhu sa wa tola taʼandrö wanolo khö Yehowa ba wangandrö, hizaʼi omasi göi Yehowa na taʼandrö wanolo moroi khö ndra ”kubalo hegöi samahaʼö” si so ba mbanua niha Keriso.—Ef. 4:​11, 12.

3. Hadia gunania khöda artikel daʼa?

³ Ba artikel daʼa, tatutunö dania hewisa wangogunaʼö Yehowa ndra satua sokubaloi ba wanolo ira talifusö sawuwu ba wamati. Tatutunö dania wanofu-nofu daʼa: Hawaʼara taʼandrö wanolo khö ndra satua sokubaloi? Hadia mbörö wa tafalua daʼö? Ba hewisa wanolora yaʼita? Hewaʼae lö nasa moguna khöda iadaʼa wanolo moroi khö ndra satua sokubaloi, tola tobali fanoloda artikel daʼa ba wangoromaʼö fangandrö saohagölö ba zi no ifakhoi Yehowa ba enaʼö aboto ba dödöda hadia zinangea tafalua ba ginötö moguna khöda wanolo.

HAWAʼARA TAʼANDRÖ WANOLO KHÖ NDRA SATUA SOKUBALOI?

4. Hezo taʼila wa niha sofökhö ba wamati nitutunönia ba Yakobo 5:​14-16, 19, 20? (Faigi göi gambara.)

⁴ Samösa nifahaʼö Yesu sotöi Yakobo, itutunö khöda hewisa wangogunaʼö Yehowa ndra satua sokubaloi ba wanolo yaʼita. Imane, ”Hadia so zofökhö ba gotaluami? Yaʼiʼalui ndra satua sokubaloi ba mbanua niha Keriso.” (Baso Yakobo 5:​14-16, 19, 20.) Nitutunö Yakobo ba daʼa yaʼia daʼö niha sofökhö ba wamati. Hezo taʼila? Ba ayati daʼö, iʼandrö ba niha sofökhö enaʼö iʼalui ndra satua sokubaloi, tenga doto. Tola göi dania döhö niha andrö ba ginötö teʼefaʼö horönia. Sindruhu sa, so zi fagölö nifalua ba wamadöhö fökhö wamati hegöi fökhö mboto. Na mofökhö ita, moguna taʼalui doto, tatutunö khönia hadia manö nirasoida ba taʼoʼö wanuturu lala nibeʼenia. Simanö göi na mofökhö ita ba wamati, moguna tafalukhaisi zi samösa satua sokubaloi, tatutunö hadia zalua khöda ba taʼoʼö wanuturu lala nibeʼenia moroi ba Zura Niʼamoniʼö.

5. Hewisa enaʼö taʼila wa no ibörögö awuwu wamatida?

⁵ Iʼamenesi ita Yakobo faza 5 enaʼö taʼalui ndra satua sokubaloi ba ginötö tarasoi wa no awuwu ita ba wamati. Moguna tafalua daʼö fatua lö tekiko wahuwusada khö Yehowa. Börö daʼö, böi talimo ita samösa. Ifangelama ita Sura Niʼamoniʼö wa tola manö talimo ita ba tawaʼö tödöda wa sökhi-sökhi manö wahuwusada khö Yehowa. (Yak. 1:22) No irai alua daʼö khö ndra niha Keriso ba Zade me abad siföföna, ba no ifangelama ira Yesu ba daʼö. (Fam. 3:​1, 2) Hewisa wamaresoda famatida? Sambua lala si tola tafalua yaʼia daʼö na tafuli tahaogö taʼangeragö hadia lö si tebulö waʼomasida khö Yehowa simane ba wamobörö. (Fam. 2:​4, 5) Tandraigö angeragö daʼa: ’Hadia lö saʼae ubaso Zura Niʼamoniʼö ba uʼangerönusi daʼö ero maʼökhö? Hadia ibörögö areu ndraʼo weʼamöi hegöi ba wamaʼanö bua gera-eragu ba gangowuloa? Hadia ambö terou dödögu weʼamöi manuriaigö? Hadia abölö uʼera-era zomasi-masi dödögu hegöi kefe moroi ba wamalua halöwö ba wamati?’ Na so sambua manö nifaluamö ba gotalua wanofu-nofu daʼö, eluahania no ibörögö awuwu wamatimö. Moguna taʼanemaiʼö tabulöʼö daʼö fatua lö tekiko wamatida. Hizaʼi na tebai tabulöʼö samösa mazui na no tasawö goi-goi Lowalangi, moguna taʼandrö wanolo khö ndra satua sokubaloi.

6. Hadia zinangea ifalua niha si no mamalua horö sebua?

⁶ Hewisa na no tafalua horö sebua si tola möi börö wa laʼefasi ita ba mbanua niha Keriso? Sinangea na tafalukhaisi zi samösa satua sokubaloi. (1 Ko. 5:​11-13) Gofu haniha zi no mamalua horö sebua, moguna mutolo ira enaʼö ifuli aro wahuwusara khö Yehowa. Enaʼö tola iʼefaʼö horöra Yehowa, moguna ’lafalua mbua-bua si sökhi tandra wamalalini era-era’, farahu ba daʼö wamaduhuʼö khö ndra satua sokubaloi horö si no lafalua.—Hal. 26:20.

7. Haniha nasa zinangea latolo ira satua sokubaloi?

⁷ Tenga ha niha si no mamalua horö sebua nitolo ndra satua sokubaloi, hizaʼi latolo göi ndra talifusöda si no awuwu ba wamati. (Hal. 20:35) Duma-dumania, fatua lö öfahaʼö ndraʼugö ba Zura Niʼamoniʼö, te no sandru ndraʼugö wamadu narkoba, mamaigi pornografi mazui asese öfalua gamuata fohorö. Tola manö abua khöu iadaʼa wolawa amuata si lö sökhi andrö. Hizaʼi, böi alawö ndraʼugö wangandrö fanolo. Fatunö daʼö khö zi samösa satua sokubaloi nifaduhusimö tödö. Hasambalö ifondrondrongo nitutunömö, ibeʼe khöu mene-mene si tefaudu ba ifaduhuʼö wa omuso dödö Yehowa ba wamorege nifaluamö ba wolawa isö-isö dödö si fasala. (Sango. 4:12) Hizaʼi, hewisa na lö aetu örasoi waʼide-ide dödö börö me lö iʼila taya gisö-isö dödö si fasala andrö? Tola ifuli ifasugi ba dödöu satua sokubaloi andrö wa omuso dödö Yehowa ba wamorege nifaluamö ba wangandrö fanolo. Daʼö zangoromaʼö wa öʼameʼegö tödö wahuwusamö khö Yehowa ba öʼodaligö ia.—1 Ko. 10:12.

8. Hadia moguna taʼandrö wanolo khö ndra satua sokubaloi ero-ero tafalua zala? Tutunö.

⁸ Hadia moguna taʼandrö wanolo khö ndra satua sokubaloi ero-ero tafalua zala? Löʼö. Duma-dumania, tola manö tadoro ndraʼugö wamaʼema fehede si möi fangafökhö dödö ndra talifusöda mazui mofönuʼö khöra. Moroi na iʼanemaiʼö öfalukhaisi ndra satua sokubaloi, abölö sökhi na öʼoʼö mene-mene Yesu ba wolohi faʼatulö khö ndra talifusöda si sara lala wamati. (Mat. 5:​23, 24) Tola öfalua riset ba wangalui hewisa lala enaʼö tedou ndraʼugö wangoromaʼö faʼasökhi dödö, faʼebolo dödö ba fanaha tödö. Hizaʼi, hewisa na tebai öʼasiwai samösa zalua andrö? Ba zura nifaʼoheʼö Waulo khö ndra niha Keriso ba Wilifi, iʼandrö khö zi samösa talifusöda ira matua ba wanolo Ewodia hegöi Sitikhe ba wangasiwai fatötöisa ba gotaluara. Simane daʼö göi iadaʼa, te tola latolo ndraʼugö ira satua sokubaloi ba wangasiwai abula dödömö. Börö daʼö, andrö khöra wanolo.—Fil. 4:​2, 3.

HANA WA MOGUNA TAʼANDRÖ WANOLO KHÖ NDRA SATUA SOKUBALOI?

9. Hadia mbörö wa tebai alawö ita wangandrö fanolo khö ndra satua sokubaloi? (Amaedola 28:13)

⁹ Moguna taʼandrö wanolo na no tafalua horö sebua mazui tebai saʼae talawa gisö-isö dödöda. Börö daʼö, moguna khöda wamati hegöi faʼabarani. Böi ha börö-börö waʼaila, alawö ita wangandrö fanolo khö ndra satua sokubaloi. No ibeʼe khöda ndra satua sokubaloi Yehowa ba wanolo yaʼita enaʼö lö awuwu ba wamati. Na taʼandrö khöra wanolo, no taforomaʼö wa tafaduhusi tödö Yehowa ba taʼoʼö niwaʼönia. No göi taforomaʼö wa moguna khöda wanolo moroi khönia na mangiwa gaheda. (Si. 94:18) Na no tafalua horö, faduhu dödöda wa iʼefaʼö horöda Yehowa na tafaduhuʼö zala nifaluada ba tafalalini gera-erada.—Baso Gamaedola 28:13.

10. Hadia zalua na taforege waminiʼö horö nifaluada?

¹⁰ Itugu lö sökhi zalua na taforege waminiʼö horö si no tafalua ba lö taʼandrö wanolo khö ndra satua sokubaloi. Daʼö zalua khö Razo Dawido. Me iforege waminiʼö horö si no ifalua, itugu awuwu wamatinia, iʼofökhöi ba marase ia wangarö-ngarö ero maʼökhö. (Si. 32:​3-5) Simane niha sofökhö, itugu lö sökhi zalua ba niha si no awuwu ba wamati na lö iʼandrö wanolo. Aboto ba dödö Yehowa daʼa. Daʼö mbörö wa iʼogunaʼö ndra satua sokubaloi ba wanolo yaʼita enaʼö ifuli aro ba wamati.—Yes. 1:​5, 6, 18.

11. Hadia nasa zi tola alua na tabiniʼö horö sebua si no tafalua?

¹¹ So göi lua-luania ba niha tanö böʼö na tabiniʼö horö sebua si no tafalua. Tola manö lö mohalöwö geheha niʼamoniʼö ba mbanua niha Keriso ba lö fahasara dödö ba gotalua ndra talifusö. (Ef. 4:30) Börö daʼö, hewisa na taʼila so dalifusöda si no mamalua horö sebua? Tafarou ia enaʼö iʼandrö wanolo khö zatua sokubaloi. Na lö ifalua daʼö hewaʼae no tabeʼe khönia ginötö, yaʼita samösa zamatunö khö ndra satua sokubaloi. Hadia mbörö? Na lö tafatunö, eluahania no fao ita khönia wamalua horö andrö. (3 Mo. 5:1) Börö me taʼomasiʼö Yehowa ba lö faröi ita khönia, omasi ita tatörö zindruhu. Na tafalua daʼö, no fao ita ba wondrorogö enaʼö lö taʼunö mbanua niha Keriso ba no tatolo niha samalua horö andrö enaʼö ifuli sökhi wahuwusania khö Yehowa.

HEWISA NDRA SATUA SOKUBALOI WANOLORA YAʼITA?

12. Hewisa ndra satua sokubaloi wanolora niha si no awuwu ba wamati?

¹² Iʼandrö Yehowa khö ndra satua sokubaloi enaʼö latolo niha si no awuwu ba wamati. (1 Te. 5:14) Na no öfalua zala, te manofu-nofu ira khöu ba wamaigi hewisa zindruhunia nösi dödöu. (Amd. 20:5) No falulu fohalöwö ndraʼugö khöra na ötutunö fefu zi no öfalua hewaʼae sindruhunia abua khöu wamalua daʼö börö waʼataʼu mazui aila ndraʼugö. Baero daʼö, böi aombö dödöu na itaria ’lö tatu wehedemö’. (Yob. 6:3) Lö iʼanemaiʼö lahalö gangetula ira satua sokubaloi. Lahaogö wamondrondrongo nitutunömö khöra ba laʼalui hadia sindruhunia zalua fatua lö labeʼe khöu mene-mene. (Amd. 18:13) Aboto ba dödöra wa moguna ginötö na labeʼe mene-mene khö zi samösa niha. Laʼila göi wa tebai laʼasiwai gabula dödö salua andrö na ha sakali falukha.

13. Hadia mbuania wangandrö hegöi mene-mene nifaʼema ndra satua sokubaloi si teʼodane-dane ba Zura Niʼamoniʼö? (Faigi göi gambara.)

¹³ Ba ginötö öʼandrö wanolo khö ndra satua sokubaloi, laforege wangalui lala enaʼö lö itugu itahi-tahigö manö ia tödömö. Baero daʼö, mangandrö ira salahimö. ”Mofaʼabölö” wangandrö nifaʼemara. Tola terara dödömö ba teʼabölöʼö ndraʼugö töra moroi ba nikhalaigömö. Tenga ha daʼö, ’labayoini göi ndraʼugö faoma fanikha ba döi Yehowa’. (Yak. 5:​14-16) Eluaha wanikha ba ayati daʼa yaʼia daʼö sindruhu moroi ba Daromali Lowalangi. Lahaogö wangogunaʼö Sura Niʼamoniʼö enaʼö terara dödöu ba latolo ndraʼugö enaʼö ifuli sökhi wahuwusamö khö Yehowa. (Yes. 57:18) Mene-mene nibeʼera khöu si teʼodane-dane ba Zura Niʼamoniʼö, tobali famarou dödömö ba wangai angetula irege anau gölömö wamalua satulö. Na öfondrondrongo niwaʼöra, amaedola no öfondrondrongo li Yehowa me imane, ”Daʼa lala. Mitörö lala andrö.”—Yes. 30:21.

14. Moloʼö Galatia 6:​1, hewisa ndra satua sokubaloi wanolo niha ’sanörö lala si sala’? (Faigi göi gambara.)

¹⁴ Baso Galatia 6:1. Niha ’sanörö lala si sala’ eluahania niha si lö mamalua somasi Yehowa. Te ihalö gangetula si lö tefaudu mazui ifalua horö sebua. Börö me laʼomasiʼö mbiri-biri Yehowa ira satua sokubaloi, ’lafuli lahaogö wolohe yaʼia ba lala satulö’. Ngawua wehede li Yunani nifoʼeluaha ’lafuli laʼohe ba lala satulö’, tola göi muʼamaedolagö ia simane nifalua zi samösa doto ba ginötö ifadou döla si no afatö. Ba ginötö ifalua daʼö, ihaogö idaʼi-daʼi enaʼö lö itugu monönö waʼafökhö nirasoi niha safatö töla andrö. Simanö göi, na latolo niha si no manörö lala si sala, laforege ira satua sokubaloi enaʼö lö itugu ide-ide dödönia. Laʼandrö göi khö ndra satua sokubaloi enaʼö mangelama ira. Moguna latörö tödöra wa yaʼira niha si lö moʼahonoa ba itaria lafalua zala. Börö daʼö, lö lawaʼö tödöra wa abölö tohude ira moroi ba niha nitolora. Laforege wangoromaʼö fangide-ngideʼö ba faʼahakhö dödö.—1 Fe. 3:8.

15. Hadia zi tola tafalua na göna ita abula dödö?

¹⁵ Tola tafaduhusi tödö ndra satua sokubaloi. Sindruhu sa wa no faböʼö-böʼö gamuata mazui si no irai latörö. Hizaʼi, no lafahaʼö ira fefu ba wozago rahasia, ba wangaohasi noroda, hegöi ba wameʼe khöda mene-mene si teʼodane-dane ba Zura Niʼamoniʼö, tenga moloʼö bua gera-erara samösa. (Amd. 11:13; Gal. 6:2) Börö daʼö, tola taʼondrasi gofu haniha manö ndra satua sokubaloi ba wangandrö fanolo. Hizaʼi, böi tadozigö wangandrö mene-mene khö ndra satua sokubaloi ha enaʼö tasöndra mene-mene somasi ita famondrongo. Na tafalua daʼö, no tobali ita niha somasi ’manuno-nuno yaʼira enaʼö maoso dalingara’ tenga niha soloʼö ’famahaʼö sindruhu’ ba Zura Niʼamoniʼö. (2 Ti. 4:3) Baero daʼö, ba ginötö taʼandrö wanolo khö zatua sokubaloi, te isofu khöda hadia no fahuhuo ita khö ndra satua sokubaloi tanö böʼö ba hadia mene-mene nibeʼera. Börö me iʼokhögö wangide-ngideʼö, te iʼandrö nasa mbua gera-era ndra satua sokubaloi tanö böʼö.—Amd. 13:10.

NORO DÖDÖDA ZAMÖSANA

16. Hadia noro dödöda zamösana?

¹⁶ Sindruhu sa wa labeʼe khöda mene-mene ira satua sokubaloi ba latolo ita na göna ita abula dödö. Hizaʼi, tenga yaʼira zangai angetula khöda. Yaʼita samösa zangonorogö tödö ba wozago fehede hegöi nifaluada enaʼö tefaudu ba zomasi Yehowa. (Rom. 14:12) Börö wanolo moroi khö Yehowa, tola tahalö gangetula si sökhi ba lö faröi ita khönia. Börö daʼö, lö latatugöi ira satua sokubaloi hadia zinangea tafalua. Hizaʼi, laʼogunaʼö Zura Niʼamoniʼö ba wanolo yaʼita enaʼö aboto ba dödöda lala wangera-ngera Lowalangi. Na taʼoʼö mene-mene nibeʼera si teʼodane-dane ba Zura Niʼamoniʼö, no tafomaha ’lala wangera-ngerada’. Daʼö zanolo yaʼita ba wangai angetula si tefaudu.—Heb. 5:14.

17. Hadia niʼandrö Yehowa enaʼö tafalua na awuwu mazui mofökhö wamatida?

¹⁷ Tatu taʼandrö sibai saohagölö börö me no farahu ita ba ngawawa mbiri-biri Yehowa. No ibeʼe khöda Yehowa ”gubalo si sökhi” yaʼia daʼö Yesu, si tobali höli irege tola taʼokhögö waʼauri si lö aetu. (Yoh. 10:11) Ibeʼe göi khöda ndra satua sokubaloi ba wamalua nifabuʼunia andre, ”Ubeʼe khömi gubalo samalua hadia zi tefaudu ba gohitö dödögu. Labeʼe khömi waʼatua-tua ba faʼaboto ba dödö.” (Yer. 3:15) Börö daʼö, na awuwu ita mazui mofökhö wamatida, böi tataha-taha wangandrö fanolo khö ndra satua sokubaloi. Na tafalua daʼö, hasambalö tatema mbua ba gamakhoita nibeʼe Yehowa andre.