Fosumange Fefu Niha

1. Hana wa fefu niha omuso dödöra na lafosumange ira? (Amaedola 22:1)

HADIA omuso dödöu na so niha samosumange yaʼugö? Tatu manö. Fefu niha, omasi ira nifosumange. Daʼö mbörö wa imane Sura Niʼamoniʼö, ”Abölö sökhi nifosumange moroi ba wirö hegöi anaʼa.”—Baso Gamaedola 22:1.

2-3. Hana wa itaria abua khöda wamosumange niha böʼö, ba hadia nitutunöda ba artikel daʼa?

² Hizaʼi itaria abua khöda wamosumange niha böʼö. Sambua dane-danenia, börö me aoha sibai khöda wangila zoʼamböta ba niha si so ba zi fasuida. Baero daʼö, ato niha iadaʼa faoma lö lafosumange nawöra. Hizaʼi, tebai taʼoʼö nifaluara. Hadia mbörö? Börö me omasi Yehowa na ’tafosumange fefu niha’.—1 Fe. 2:17.

³ Ba artikel daʼa, tatutunö hadia geluahania mamosumange niha böʼö ba hewisa wangoromaʼöda wa tafosumange (1) nösi nomoda, (2) ira talifusöda si sara lala wamati, ba (3) niha böʼö si tenga si sara lala wamati khöda. Tatutunö dania hewisa lala wamosumangeda yaʼira hewaʼae itaria abua khöda wamalua daʼö.

HADIA GELUAHANIA MAMOSUMANGE NIHA BÖʼÖ?

4. Hadia geluahania mamosumange niha böʼö?

⁴ Mamosumange niha böʼö eluahania tohude ba wamaigida niha daʼö, te börö gamuatania, si no ikhamö ba waʼauri mazui dadaomania. Tola göi daʼö geluahania amuatada si sökhi mazui nifaluada khö zi samösa niha irege irasoi wa tafosumange ba taʼomasiʼö ia. Enaʼö tola sindruhu-ndruhu tafosumange zi samösa niha, moguna tafalua fefu daʼö soroi ba dödö.—Mat. 15:8.

5. Hewisa wamosumangeda niha böʼö yaʼita ono mbanua Yehowa?

⁵ Omasi Yehowa na tafosumange niha böʼö. Iʼandrö khöda enaʼö tafosumange ndra samatörö. (Rom. 13:​1, 7) Hizaʼi, te so zangumaʼö, ’Omasido ufosumange niha böʼö asala sinangea mufosumange ia.’ Hadia atulö lala wangera-ngera simane daʼö? Yaʼita ono mbanua Yehowa, tafosumange niha böʼö tenga börö nifaluara, hizaʼi börö me taʼomasiʼö Yehowa ba omasi ita taʼomusoiʼö dödönia.—Yos. 4:14; 1 Fe. 3:15.

6. Hadia tola tafosumange niha si lö mamosumange yaʼita? Tutunö. (Faigi gambara.)

⁶ Te so zangumaʼö, ’Hadia sinangea ufosumange niha si lö mamosumange yaʼodo?’ Nehegö duma-duma andre. Iʼailasi nononia Yonata Razo Saulo föna niha sato. (1 Sa. 20:​30-34) Hewaʼae simanö, lö tebulö ifosumange ia Yonata ba fao ia fasuwö khö namania irugi ba waʼamate. (2 Mo. 20:12; 2 Sa. 1:23) Iböbögö zi lö duhu khö Hana ere sebua sotöi Eli. (1 Sa. 1:​12-14) Sindruhunia, lö sökhi duria Geli börö me tebai ifatörö ndraononia ba tebai göi tobali ia ere sebua si sökhi ba Gizaraʼeli. Hewaʼae simanö, ihaogö-haogö wehede khönia Hana. (1 Sa. 1:​15-18; 2:​22-24) Laʼoʼaya-aya Waulo ira niha Atena, lawaʼö wa yaʼia ”niha soya bewe”. (Hal. 17:18) Hewaʼae simanö, lö tebulö ihaogö wehedenia Faulo na fahuhuo ia khöra. (Hal. 17:22) Duma-duma daʼa zangoromaʼö wa tola tafosumange niha böʼö hewaʼae abua wamalua daʼö na sindruhu-ndruhu taʼomasiʼö Yehowa ba taʼomusoiʼö dödönia. Iadaʼa, datatutunö haniha manö zinangea tafosumange ba hadia mbörö.

FOSUMANGE NÖSI NOMOU

7. Hadia manö mbörö wa abua khöda wamosumange ösi nomoda?

⁷ Si tobali taha-taha. Börö me asese falukha ita ba nösi nomoda, ahori taʼila fefu gamuatara si sökhi hegöi si lö sökhi. Te so zanaögö fökhö si lö iʼila döhö irege abua khöda wondrorogö yaʼira. So göi zi talafo aombö-aombö tödö. So göi zangumaʼö mazui samalua si möi fangafökhö dödöda. Tola manö daʼö mbörö wa itaria abua khöda wamosumange yaʼira. Sindruhunia, na faoma lö lafosumange nawöra ba zi sambua omo, lö hadöi faʼatulö ba faʼahono dödö ba nomo andrö. Simane boto si tebai mohalöwö börö me so ndroto-ndrotoda safökhö, tebai falulu fohalöwö zi sambua omo na faoma lö lafosumange nawöra. Hizaʼi, simane fökhö si tola mufadöhö, tola tafahaʼö ita lala ba wamosumange ösi nomoda.

8. Hana wa moguna tafosumange nösi nomoda? (1 Timoteo 5:​4, 8)

⁸ Hana wa sinangea tafalua daʼö? (Baso 1 Timoteo 5:​4, 8.) Ba zurania siföföna khö Dimoteo, itutunö Faulo wa fefu nösi nomo moguna faoma latolo ba lafosumange nawöra zamösana. Hadia mbörö? Tenga börö me no tobali noro dödöda wamalua daʼö, hizaʼi börö me omasi ita taforomaʼö ’wamosumange Lowalangi’. Ba daʼa taʼila wa famosumange ösi nomo no faosatö moroi ba wamosumangeda Lowalangi. Yehowa zamazökhi amakhoita ba nösi nomo. (Ef. 3:​14, 15) Börö daʼö, na tafosumange nösi nomoda, sindruhunia no tafosumange Yehowa, Samasindro ösi nomo. Daʼa zi tobali dane-dane saro wa tafosumange nösi nomoda!

9. Hewisa woʼomo ira matua hegöi ira alawe ba wangoromaʼö wa faoma lafosumange nawöra? (Faigi göi gambara.)

⁹ Hewisa lalania? Foʼomo ira matua samosumange foʼomonia, ifalua daʼö tenga ha ba zanehe niha, hizaʼi ba zi darua ira göi. (Amd. 31:28; 1 Fe. 3:7) Lö ibözi, iʼailasi mazui iʼosiwawöi. Imane Ariela si toröi ba Argentina, ”Itaria iwaʼö khögu wehede safökhö foʼomogu börö wökhönia. Na ifalua daʼö, ufasugi ba dödögu wa sindruhunia tenga iʼodödögö wamalua daʼö. Itörö göi tödögu mene-mene nisura ba 1 Korindro 13:5. Daʼö zanolo yaʼo irege uhaogö-haogö manö wehede khö woʼomogu.” (Amd. 19:11) Simane daʼö göi woʼomo ira alawe samosumange ngambatönia, tatu lö iʼoʼaya-aya mazui iʼobousi döi woʼomonia. (Ef. 5:33) Lö ifalala-lala wokaoni töi, lö iʼailasi ba lö ikata-kataʼö. Iʼila wa tola tobali simane howu daʼö samakiko fongambatöra. (Amd. 14:1) Imane si samösa talifusöda ira alawe si toröi ba Italia si no göna fökhö faʼaombö-aombö dödö woʼomonia, ”Itaria uwaʼö tödögu wa töragö saʼae waʼaombö-aombö dödö woʼomogu andre. Me mböröta, lö sökhi wehede hegöi sikhalagu khönia, tandra wa lö ufosumange ia. Hizaʼi, me no asese fariawö ndraʼo ba niha samadunö-dunö ngawalö zi sökhi nifalua niha böʼö, daʼö zamarou tödögu irege abölö ufosumange woʼomogu iadaʼa.”

10. Hewisa wangoromaʼöda wa tafosumange zatuada?

¹⁰ Yaʼami si bohou ebua, miʼoʼö gamakhoita nibeʼe ndra satuami. (Ef. 6:​1-3) Mihaogö-haogö na fahuhuo ami khöra. (2 Mo. 21:17) Na no itugu atua ira, te abölö oya wanolo soguna khöra. Börö daʼö, miforege wanolo yaʼira. Nehegö zalua khö Maria, sondrorogö bapania si tenga Samaduhuʼö Yehowa. Me göna fökhö bapania andrö, lö sökhi lagunia khö Maria irege abua khönia wondrorogö bapania. Imane Maria, ”Ulau mangandrö enaʼö tola ufosumange bapagu ba tola uforomaʼö daʼö. Na iʼandrö khögu Yehowa enaʼö ufosumange zatuagu, faduhu dödögu wa hasambalö itolo ndraʼo wamalua daʼö. Me no numalö ginötö, aboto ba dödögu wa moguna lö uböhöli wamosumange bapagu hewaʼae lö tebulö gamuatania.” Na tafosumange nösi nomoda hewaʼae abua wamalua daʼö, no taforomaʼö wa tafosumange gamakhoita nibeʼe Yehowa.

FOSUMANGE NDRA TALIFUSÖ SI SARA LALA WAMATI

11. Hana wa itaria abua khöda wamosumange ira talifusöda si sara lala wamati?

¹¹ Si tobali taha-taha. Yaʼita ono mbanua Yehowa, taforege woloʼö mene-mene Zura Niʼamoniʼö. Hizaʼi, itaria so ndra talifusöda samalua khöda si lö sökhi, fasala lala wangera-ngerara sanandrösa khöda, ba laʼafökhöiʼö dödöda irege tumbu khöda ’waʼabao dödö’. Lua-luania, abua khöda wamosumange yaʼira. (Kol. 3:13) Na simanö, hadia zi tola tafalua?

12. Hana wa moguna tafosumange ndra talifusöda si sara lala wamati? (2 Fetero 2:​9-12)

¹² Hana wa sinangea tafalua daʼö? (Baso 2 Fetero 2:​9-12.) Ba zura Wetero si mendrua, ifarou ia eheha niʼamoniʼö ba wanura sanandrösa khö ndra niha Keriso sangoʼaya ”niha solakhömi”, yaʼia daʼö ira satua sokubaloi ba mbanua niha Keriso. Hadia nifalua ndra malaʼika me laʼila daʼö? ”Börö me lafosumange Yehowa”, lö laʼoʼaya-aya ndra niha daʼö. Khalaigö atö, ira malaʼika soʼahonoa manö lö omasi ira ladunö-dunö zi lö sökhi nifalua ndra niha sasiliyawa andrö. Latouʼö ba danga Yehowa fefu zalua enaʼö yaʼia zanguhuku yaʼira. (Rom. 14:​10-12; faigi göi Yuda 9.) Hadia wamahaʼönia khöda moroi khö ndra malaʼika andrö? Na niha sangoʼaya yaʼita manö tebai taʼailasi, mendrua saʼae ndra talifusöda si sara lala wamati. Iʼandrö khöda Sura Niʼamoniʼö enaʼö ’fahulö’ ita ba wamosumange yaʼira. (Rom. 12:10) Na tafalua daʼö, no tafosumange Yehowa.

13-14. Hewisa wamosumangeda ira talifusöda ba mbanua niha Keriso? Beʼe duma-duma. (Faigi göi gambara.)

¹³ Hewisa lalania? Yaʼami ira satua sokubaloi, miforege wamahaʼö ira talifusö ba mbanua niha Keriso si fao faʼomasi. (File. 8, 9) Na so zinangea muʼamenesi, mifalua daʼö si fao faʼasökhi dödö, ba böi mifalua ia ba ginötö abao dödömi. Yaʼami ira talifusöma ira alawe, miforege enaʼö tobali ami duma-duma ba wangoromaʼö famosumange yaʼia na lö midunö-dunö mazui miʼobousi niha böʼö. (Tit. 2:​3-5) Baero daʼö, fefu ita no tafosumange ndra satua sokubaloi na taʼoʼö wanuturu lala nibeʼera ba taʼandrö saohagölö ba waʼerege dödöra ba wondröniaʼö angowuloa, halöwö fanuriaigö, hegöi ba wanolo niha ’sanörö lala si sala’.—Gal. 6:1; 1 Ti. 5:17.

¹⁴ No irai abua khö dalifusöda ira alawe sotöi Rocío ba wangoromaʼö famosumange khö zi samösa satua sokubaloi sameʼe khönia mene-mene. Imane Rocío, ”Ambö baga lala wameʼenia khögu mene-mene. Me urugi nomo, udunö-dunö ia ba nösi nomogu. Hewaʼae lö uforomaʼö, hizaʼi aombö dödögu hadia sindruhu-ndruhu omasi ia wanolo yaʼo. Lö omasido uʼoʼö mene-mene nibeʼenia.” Hadia zanolo Rocío enaʼö tebulö wangera-ngerania? Imane, ”Me ubaso Zura Niʼamoniʼö, ubaso 1 Tesalonika 5:​12, 13. Aboto ba dödögu wa lö nifosumangegu talifusöda andrö. Ibörögö itegu-tegu ia tödögu. Ulau mangandrö ba ufalua riset ba wangalui hadia zi tola manolo yaʼo ba wombulöʼö fangera-ngeragu. Ba gafuriata, aboto ba dödögu wa yaʼo zi fasala, tenga talifusöda andrö. Itugu aboto göi ba dödögu wa moguna so khögu wangide-ngideʼö enaʼö tola ufosumange niha böʼö. Irugi iadaʼa, uforege nasa enaʼö tola ufosumange niha böʼö. Hizaʼi, aboto ba dödögu wa iʼameʼegö tödö Yehowa wamorege nifaluagu.”

FOROMAʼÖ WA ÖFOSUMANGE NIHA SI TENGA SI SARA LALA WAMATI

15. Hana wa abua khöda ba wamosumange niha si tenga sara lala wamati?

¹⁵ Si tobali taha-taha. Na möi ita manuriaigö, asese falukha ita ba niha si lö moʼameʼegö tödö Lowalangi hegöi Sura Niʼamoniʼö. (Ef. 4:18) So ösa zi lö omasi mamondrondrongo turia nifaʼemada börö wamahaʼö si no latema iʼotarai me ide-ide ira. Te göi lö fahuwu khöda nawöda sekola mazui awöda wohalöwö. Baero daʼö, te so zinangea tafaʼema khö ndra guru mazui khö gafaloda wohalöwö si lö moʼameʼegö tödö halöwö nifaluada. Börö me no asese lafalua zimane daʼö, tola manö lö tafosumange ira ba lö sökhi gamuatada khöra.

16. Hadia mbörö wa tafosumange niha si lö mamosumange Yehowa? (1 Fetero 2:12; 3:15)

¹⁶ Hana wa sinangea tafalua daʼö? Inehegö Yehowa hadia nifaluada ba niha si tenga si sara lala wamati. Ifasugi ba dödö ndra niha Keriso Fetero wa amuatara si sökhi tola tobali famarou dödö ba niha böʼö enaʼö ”lasuno Lowalangi”. Börö daʼö, iʼamenesi ira enaʼö ’lahaogö wameʼe fanema li si fao sumange’ ba ginötö lafaduhuʼö wamatira. (Baso 1 Fetero 2:12; 3:15.) Gofu hezo so lafaduhuʼö wamatira, he föna ndra sangetuʼö huku mazui ba ginötö fahuo-huo ira ba niha böʼö, moguna lö tebulö laforomaʼö wa lafosumange fefu niha. Böi olifu ita wa inehe-nehegö Yehowa ba ifondrongo-ndrongo hadia wehededa hegöi lala wamaʼemada yaʼia. Daʼö mbörö wa moguna tafosumange niha si tenga si sara lala wamati khöda!

17. Hewisa wamosumangeda niha si tenga si sara lala wamati khöda?

¹⁷ Hewisa lalania? Ba ginötö manuriaigö ita, lö taʼailasi niha nifalukhaisida börö me oya zi lö laʼila mazui lö aboto ba dödöra sanandrösa ba Zura Niʼamoniʼö. Omasi ita tawaʼö tödöda wa abölö alawa ira moroi khöda. Aboto ba dödöda wa ebua mbölira ba wamaigi Lowalangi. (Hag. 2:7; Fil. 2:3) Börö daʼö, na so zangoʼaya nifaduhusimö tödö, böi sulöni ba böi fatörö khöra li. (1 Fe. 2:23) Na no tadoro wehedemö khöra, andrö khöra waʼebolo dödö. Iadaʼa, hewisa göi wamosumangeda niha si so ba nahia wohalöwöda? Yatobali ndraʼugö niha sowölö-ölö wohalöwö, ba forege enaʼö sökhi gamuatamö khö nawöu hegöi khö gafalomö wohalöwö. (Tit. 2:​9, 10) Hewaʼae itaria lö laʼameʼegö tödö waʼowölö-ölöda hegöi famorege nifaluada ba wanörö sindruhu ba nahia wohalöwö, hizaʼi faduhu dödöda wa iʼameʼegö tödö nifaluada andrö Yehowa.—Kol. 3:​22, 23.

18. Hadia mbörö wa moguna taforege wamosumange niha böʼö?

¹⁸ Oya mbörö wa tafosumange niha böʼö. No tafahaʼö ita wa no tafosumange Yehowa na tafosumange nösi nomoda, börö me yaʼia zamasindro ösi nomo. Na tafosumange ndra talifusöda si sara lala wamati, no göi tafosumange Namada si so ba zorugo. Baero daʼö, na tafosumange niha si tenga si sara lala wamati, no tafarou dödöra ba wamolakhömi mazui ba wamosumange Lowalangida fondrege zabölö. Hewaʼae lö lafosumange ita niha böʼö, hizaʼi moguna taforege ba wamosumange yaʼira. Hadia mbörö? Börö me hasambalö ifahowuʼö ita Yehowa. No ifabuʼu, ”Niha samosumange yaʼo ba ufosumange göi.”—1 Sa. 2:30.