Fanofu Zombaso
Hadia geluahania me iwaʼö sanura Amaedola 30:18, 19 wa lö aboto ba dödönia ”lala nono matua na fao ia ba nono alawe”?
Ato zi lö mangila eluaha wehede daʼö, farahu ba daʼö ndra niha sagatua-tua ba Zura Niʼamoniʼö. Imane ba Zura Niʼamoniʼö Famoʼeluaha Gulidanö si bohou, ”So tölu ngawalö zi lö aboto ba dödögu [mazui, ”zahöli-höli dödö ba wamaigigu”], ba öfa ngawalö zi lö ikhamö fangera-ngeragu: Lala wohombo moyo ba dalu mbanua, lala wofanö gulö ba hili sokara, lala göfa ba dalu nasi sebolo, ba lala nono matua na fao ia ba nono alawe.”—Amd. 30:18, 19, simanö göi nisura ba gahe zura.
Ba zilalö, tawaʼö tödöda wa ngawua wehede ”lala nono matua na fao ia ba nono alawe” moʼamakhaita daʼö ba zi lö sökhi. Hadia mbörö? Börö me ba ayati moroi yawa itötöi sanandrösa ba ngawalö zi lö sökhi si lö irai mangumaʼö, ”Obönö!” (Amd. 30:15, 16) Baero daʼö, ba ayati 20 itötöi sanandrösa khö ”ndra alawe somasi mohorö-horö” si lö irai maniasa. Daʼö mbörö wa tawaʼö mböröta fehede ”lala nono matua na fao ia ba nono alawe” eluahania saekhu ba zi lö sökhi, yaʼia daʼö ira matua solimo si samösa ono alawe ba wamalua faʼorudu. Te no ihaogö waminiʼö nifaluania andrö irege samösa lö sangila, simane lala wohombo moyo ba dalu mbanua, lala wofanö gulö ba hili sokara, mazui lala göfa ba dalu nasi sebolo.
Hizaʼi na tafaigi, sökhi geluaha wehede nisura ba ayati daʼa. Sanura amaedola andre hulö ha itutunö hadia manö ngawalö zahöli dödönia.
Ba sindruhu, daʼö geluahania ba li Heberaiʼo. Moloʼö sambua kamus sanandrösa ba ayati si so ba Mbuku Niʼamoniʼö Heberaiʼo (Theological Lexicon of the Old Testament), ngawua wehede li Heberaiʼo nifoʼeluaha tobali ”lö aboto ba dödögu” ba Gamaedola 30:18, daʼö ”zangoromaʼö salua sahöli-höli dödö zi samösa niha mazui si lö iʼila ikhalaigö hadia mbörö wa tola alua”.
Baero daʼö, ihalö rahu-rahu Professor Crawford H. Toy moroi ba Universitas Harvard ba Amerika Serikat wa tenga saekhu ba zi lö sökhi geluaha wehede ba ayati daʼö. Imane, ”Sanura ayati daʼö omasi ia ifaduhuʼö hewisa waʼahöli-höli dödönia ba ngawalö nitötöi andrö.”
Börö daʼö, tola tahalö rahu-rahu wa fehede nisura ba Gamaedola 30:18, 19 iʼamaedolagö ngawalö zahöli-höli dödö si tebai takhalaigö. Simane sanura amaedola andrö, tatu manö ahöli-höli dödöda hewisa lala wohombo moyo ba dalu mbanua, lala wofanö gulö ba hili sokara hewaʼae lö hadöi ahenia, lala göfa sebua ba wangötö talu nasi sebolo, ba lala zi samösa ono matua na fao ia ba nono alawe irege faoma omasi ira nawöra ba larasoi waʼomuso dödö.