Hadia Lö Aetu Ibulöʼö Waʼauriu Sura Niʼamoniʼö?

1-3. (a) Me no aefa tebayagö ita idanö, hadia manö gamuata sabua si tebai taröi? (b) Na abua khöda wombulöʼö faʼaurida, hadia zinangea tasofu khöda? (Faigi gambara ba wamobörö wamahaʼö.)

NO HAUGA fakhe famai Kevin, moroko, mabu ba iʼogunaʼö narkoba.^[1] (Faigi gonönöta.) Aefa daʼö, ifahaʼö ia sanandrösa khö Yehowa ba tobali ia si fahuwu khönia. Hizaʼi, ba wamalua yaʼia oya zinangea ibulöʼö ba waʼaurinia. Tola ifalua daʼö börö wanolo moroi khö Yehowa hegöi faʼabölö moroi ba Daromalinia, Sura Niʼamoniʼö.​—Heberaiʼo 4:12.

² Me no tebayagö idanö Kevin, so nasa zinangea ibulöʼö ba waʼaurinia enaʼö tobali ia niha Keriso si sökhi. (Efeso 4:31, 32) Duma-dumania, alio sibai mofönu ia. Tokea ia me iʼila wa abua wangokhögö fanaha tödö. Iʼila Kevin wa abölö abua wangokhögö fanaha tödö moroi ba womböhöli amuata si lö sökhi si no ifalua fatua lö tebayagö ia idanö! Hizaʼi, börö me iʼandrö wanolo moroi khö Yehowa ba owölö-ölö ia ba wamahaʼö yaʼia ba Zura Niʼamoniʼö, tola tebulö lagu waʼaurinia.

³ Fatua lö tebayagö ita idanö, oya zinangea tabulöʼö ba waʼaurida enaʼö tefaudu ba niwaʼö Zura Niʼamoniʼö. Hizaʼi, irugi iadaʼa so manö nasa gamuata sinangea tafaböʼöni enaʼö tobali simane Lowalangi ba Keriso. (Efeso 5:1, 2; I Fetero 2:21) Duma-dumania, te asese mukökö-kökö ita mazui tafatou-tou ba tawaʼö zi lö baga sanandrösa ba niha böʼö. Mazui, lö tafalua zatulö börö me talafo ataʼu ita ba wehede hegöi niʼera-era niha dania. Tola manö no hauga fakhe taforege wombulöʼö amuatada. Hizaʼi, ifuli zui tafalua gamuata si lö sökhi si no irai tafalua. Tobali, te manofu ita, ’Hana wa abua khögu wofaböʼöni gamuatagu andre? Hadia zinangea ufalua enaʼö ufaudugö ba waʼaurigu niwaʼö Zura Niʼamoniʼö irege tola ubohouni gamuatagu?’

TOLA ÖʼOMUSOIʼÖ DÖDÖ YEHOWA

4. Hana wa lö taʼila taʼomusoiʼö dödö Yehowa ba ngawalö nifaluada?

⁴ Börö me taʼomasiʼö Yehowa, andrö tafalua zomasi ia soroi ba dödö. Hizaʼi, lö taʼila taʼomusoiʼö dödönia sagötö faʼara börö me lö soʼahonoa ita. Asese tawaʼö simane niwaʼö Waulo, ”So sa khögu waʼedöna, ba famalua si sökhi andrö, ba löʼö.”​—Roma 7:18; Yakobo 3:2.

5. Hadia zi no taböhöli fatua lö tebayagö ita idanö, ba hadia manö walömoʼahonoa zi tobali abula dödöda?

⁵ Fatua lö tobali ita ono mbanua Yehowa, tabato wamalua hadia ia zi fatuwu khönia. (I Korindro 6:9, 10) Hizaʼi, lö nasa soʼahonoa ita. (Kolose 3:9, 10) Hewaʼae no tebayagö ita idanö ba zi hauga fakhe faʼara, lö manö aefa tafalua zala. Ero inötö, so manö gisö-isö dödö hegöi fangera-ngerada si fasala, mazui abua khöda woʼangenanöi amuatada. Sindruhunia, moguna talawa walömoʼahonoada ba zi hauga fakhe.

6, 7. (a) Hewaʼae lö moʼahonoa ita, hana wa tola tobali ita si fahuwu khö Yehowa? (b) Hadia mbörö wa böi aombö dödöda wangandrö khö Yehowa enaʼö iʼefaʼö zalada?

⁶ Hewaʼae lö moʼahonoa ita, tola tobali ita si fahuwu khö Yehowa ba tafosumange ia. Törö tödöu hewisa me awena tobali ndraʼugö si fahuwu khö Yehowa. Ha yaʼia Samösa zangila si sökhi zi no öfalua ba omasi ia na so khöu waʼaboto ba dödö sanandrösa khönia. (Yohane 6:44) Iʼila wa so zala hegöi soʼamböta ndraʼugö ba lö manö nasa aefa öfalua golalöwa. Hizaʼi, omasi Yehowa na tobali ndraʼugö si fahuwu khönia.

⁷ Börö me iʼomasiʼö sibai ita Yehowa, ibeʼe khöda mbuala sebua böli. Ifatenge Nononia Yesu ba gulidanö enaʼö tobali höli börö horöda. (Yohane 3:16) Na tafalua zala, tola taʼandrö wangefa moroi khö Yehowa. Faduhu dödöda wa iʼefaʼö golalöwada ba tobali si fahuwu khönia ita börö höli si no ibeʼe. (Roma 7:24, 25; I Yohane 2:1, 2) Törö tödöu, andrö wa mate Yesu börö niha sebua horö si no mombulöʼö faʼaurira. Hewaʼae taʼila wa lö sökhi gamuatada, böi aetu-aetu taʼandrö khö Yehowa enaʼö iʼefaʼö zalada. Na lö taʼandrö khönia ba wangefaʼö salada, fagölö geluahania na lö omasi tasasai dangada si no taʼunö. Taʼandrö sibai saohagölö me no itehegö khöda Yehowa tobali si fahuwu khönia hewaʼae lö moʼahonoa ita!​—Baso I Timoteo 1:15.

8. Hadia mbörö wa tebai taʼaohasi ba dödö zala nifaluada?

⁸ Tatu manö, böi taʼaohasi ba dödö zala nifaluada mazui taʼalu-alui dani ba wamalua yaʼia. No ifatunö khöda Yehowa haniha niha zi tola tobali si fahuwu khönia. (Zinunö 15:1-5) Na omasi ita ahatö khönia, moguna taʼoʼö ia hegöi Ononia. Taʼangenanöi gisö-isö dödöda si fasala ba tatimbagö ia. Hewaʼae no ara tebayagö ita idanö, böi aetu tabulöʼö gamuatada.​—II Korindro 13:11.

9. Hezo taʼila wa tola tabohouni gamuatada?

⁹ Imane Faulo ba niha Keriso, ”Wa niheta niha si tohöna andrö khömi, ba lala föna andrö, samakiko yaʼia, ba wangisö andrö, ba waʼelungu. Ba nibohouni ami, ba gera-era dödömi andrö. Ba miʼonukha niha si bohou andrö, nibeʼe famaedo Lowalangi, wamazökhi yaʼia, ba waʼatulö dödö ba ba waʼohahau, ba zi duhu.” (Efeso 4:22-24) Eluahania, moguna taforege wombulöʼö faʼaurida ba ’taʼonukha niha si bohou andrö’. Hewaʼae no ara ita tobali samosumange Yehowa, tola tafahaʼö ita ba gamuatania. Itolo ita göi Sura Niʼamoniʼö ba wamohouni amuatada enaʼö tobali ita simane yaʼia.

HADIA MBÖRÖ WA ABUA?

10. Börö wanolo moroi ba Zura Niʼamoniʼö, hadia zinangea tafalua enaʼö tola tabulöʼö gamuatada, ba hadia zinangea tasofu khöda?

¹⁰ Tatu manö omasi ita taʼoʼö hadia niwaʼö Zura Niʼamoniʼö. Tobali, moguna taforege na omasi ita tabulöʼö gamuatada. Hadia mbörö? Hana wa lö iheta manö Yehowa gamuatada si lö sökhi?

11-13. Hana wa lö iheta manö Yehowa gamuatada si lö sökhi?

¹¹ Ba ginötö takhalaigö mbanua si yawa awö danö hegöi ngawalö nösinia, lö aombö dödöda wa so waʼabölö khö Yehowa ba wamalua hadia ia. Duma-dumania, no ifazökhi luo saukhu sibai. Ero inötö, luo andre iʼasogö haga hegöi waʼaukhu sabölö-bölö. Ha maʼifu moroi ba waʼabölönia niʼogunaʼöda ba waʼauri andre ba gulidanö. (Zinunö 74:16; Yesaya 40:26) Ibeʼe göi Yehowa waʼabölö ba nono mbanuania si so ba gulidanö ba ginötö moguna. (Yesaya 40:29) Na omasi Yehowa, tola manö iheta walömoʼahonoada hegöi gisö-isö dödö si fasala irege lö moguna taforege wolawa yaʼia. Tobali, hana wa lö ifalua daʼö?

¹² No itehegö khöda Yehowa ba wamalua hadia ia zomasi ita tafalua. Itehegö khöda ba wofili hadia taʼoʼö niwaʼönia mazui löʼö. Na taʼoʼö ba taforege wamalua somasi ia, daʼö dandra wa taʼomasiʼö ba taʼomusoiʼö dödönia. Imane Satana wa tenga sinangea mamatörö Yehowa. Hizaʼi, na taʼoʼö niwaʼö Yehowa no taforomaʼö wa omasi ita na tobali ia Samatörö yaʼita. Tola faduhu dödöda wa iʼosinangegö Amada sebua faʼomasi fefu nifaluada ba woloʼö yaʼia. (Yobi 2:3-5; Gamaedola 27:11) Na taforege wolawa falömoʼahonoada hewaʼae abua wamalua yaʼia, daʼö dandra wa lö faröi ita khö Yehowa ba omasi ita na tobali ia Samatörö yaʼita.

¹³ Imane khöda Yehowa wa moguna taʼodödögö woloʼö amuatania. (Kolose 3:12; baso II Fetero 1:5-7.) Itötöna khöda enaʼö taʼangenanöi hadia niʼera-erada hegöi gisö-isö dödöda. (Roma 8:5; 12:9) Na taforege wombulöʼö faʼaurida irege mofozu, tasöndra waʼohahau dödö.

YA TAROMALI LOWALANGI ZAMOHOUNI YAʼUGÖ

14, 15. Hadia zinangea tafalua enaʼö taʼokhögö gamuata somasi Yehowa? (Faigi kotak ”Sura Niʼamoniʼö Hegöi Fangandrö Zombulöʼö Faʼaurira”.)

¹⁴ Hadia zinangea tafalua ba wangokhögö amuata somasi Yehowa? Moroi na yaʼita zotatugöi hadia zinangea tabulöʼö, datatehegö khö Lowalangi wameʼe khöda fanuturu lala. Imane Roma 12:2, ”Böi mifaomagö ami ba niha zi sagötö tanö andre, mibaliʼö ami, wamohouni era-era dödömi, enaʼö miʼila mitimba tödömi hadia nilau dödö Lowalangi, hadia zi sökhi, hadia waʼomasinia ba hadia zoʼahonoa.” Enaʼö taʼila hadia zomasi Yehowa, moguna taʼodaligö wanolo si no ihenaigö. Moguna tabaso Zura Niʼamoniʼö ero maʼökhö, taʼangerönusi zi no tabaso ba taʼandrö geheha moroi khö Yehowa. (Luka 11:13; Galatia 5:22, 23) Tola itolo ita Yehowa enaʼö taʼila hadia zomasi ia ba tola tafahaʼö ita enaʼö tafaudugö lala wangera-ngerada khönia. Na tafalua daʼö, tola omuso dödö Yehowa ba niʼera-erada, fehededa hegöi nifaluada ba tola taʼila hewisa woʼangenanöi amuatada. Börö daʼö, böi aetu-aetu taforege ba wotimbagö yaʼia.​—Gamaedola 4:23.

¹⁵ Ba wombaso Sura Niʼamoniʼö ero maʼökhö, taʼogunaʼö wanolo moroi ba publikasida simane Manuriaigö ba Sadarlah! Oya duho-tuho ba majalah andrö zanolo yaʼita ba woloʼö amuata Yehowa hegöi ba wolawa falömoʼahonoada. Te so duho-tuho mazui ayati si tefaudu khöda. Tola taʼowuloi ia enaʼö tafuli tabaso ero inötö.

16. Hana wa lö moguna afatö dödöda na ara tebulö waʼaurida?

¹⁶ Moguna ginötö ba woloʼö amuata Yehowa. Na ömane tödöu wa so nasa zinangea öbulöʼö ba waʼauriu, moguna so khöu waʼebolo dödö. Si oföna, moguna öfaso ndraʼugö samösa ba wamalua hadia niwaʼö Zura Niʼamoniʼö. Na itugu öʼangeraigö ba öfalua hadia zomasi Yehowa, itugu aoha khöu ba woloʼö fangera-ngerania hegöi ba wamalua satulö.​—Zinunö 37:31; Gamaedola 23:12; Galatia 5:16, 17.

ANGERAIGÖ DÖTÖNAFÖ SI SÖKHI BA ZI SO FÖNA

17. Na lö faröi ita khö Yehowa, hadia nidöna-dönada ba zi so föna?

¹⁷ Tadöna-döna ginötö wa moʼahonoa ita hegöi ba wamosumange Yehowa sagötö faʼara. Ba luo daʼö, lö moguna talawa walömoʼahonoada. Aoha khöda ba woloʼö Yehowa. Hewaʼae simane daʼö, tola tafosumange Yehowa ba ginötö andre börö me no ibeʼe khöda höli. Hewaʼae lö moʼahonoa ita, tola taʼomusoiʼö dödönia na taforege wombulöʼö faʼaurida ba taʼoʼö hadia zi no ifahaʼö ba Zura Niʼamoniʼö.

18, 19. Hana wa faduhu dödöda wa mofaʼabölö Zura Niʼamoniʼö ba wombulöʼö faʼaurida?

¹⁸ Iʼangenanöi Kevin enaʼö lö alio mofönu ia. Iʼangerönusi zi no ibaso ba Zura Niʼamoniʼö ba iʼodödögö wombulöʼö faʼaurinia. Iʼoʼö mene-mene nibeʼe ndra talifusöda niha Keriso. Hewaʼae iforege wombulöʼö amuatania ba zi hauga fakhe faʼara, ba ginötönia tobali ia samösa enoni sohalöwö. Barö zi 20 fakhe andre, no tobali ia satua sokubaloi. Hewaʼae simanö, aboto ba dödönia wa moguna ilawa walömoʼahonoania irugi mane maʼökhö.

¹⁹ Simane Kevin, tola tabohouni gamuatada. Na tafalua daʼö, itugu ahatö ita khö Yehowa. (Zinunö 25:14) Na taʼodödögö wombulöʼö faʼaurida ba wangomusoiʼö tödönia, itolo ita enaʼö mofozu nifaluada. Tola faduhu dödöda wa Sura Niʼamoniʼö zi tola mombulöʼö faʼaurida.​—Zinunö 34:9.