Fanofu Zombaso

Ba gangilata Hezekieli, haniha nifoʼamaedola hulö ndra matua si so naha tawa fena sekretaris hegöi si daönö ira matua si so föda fanudugö ba dangara?

Yaʼira andrö saradadu ba zorugo, samakiko Yeruzalema meföna ba samakiko ulidanö si lö sökhi nifatörö Zatana ba Hamagedo. Daʼa wamotokhi ba dödö si bohou. Hana wa moguna mubohouni ia?

Fatua lö 607 SM, ifaʼeleʼö Yehowa khö Hezekieli hadia zalua fatua lö tedudugö Yeruzalema. Oya zi lö sökhi niʼila Hezekieli ba gangilatania. Ba iʼila göi daönö ndra matua ”si so föda fanudugö ba dangara”. Aefa daʼö, iʼila samösa ndra matua samake ”nukha linen” ba so khönia ”naha tawa fena sekretaris”. (Hezekieli 8:6-12; 9:2, 3, NW) Lafaretakö ndra matua andrö ba wamasui banua ”ba fotandra gangango niha andrö sangarö-ngarö, sabu tödö ba zogoro ita andrö fefu, nilau ba mbanua andrö!” Laʼoʼou zi daönö ira matua ba wolohe föda ba wamunu fefu niha si lö tandra. (Hezekieli 9:4-7) Hadia wamahaʼö khöda moroi ba gangilata andre ba haniha ndra matua solohe naha tawa fena sekretaris?

Itema gangilata andrö Hezekieli me döfi 612 SM. Daʼa wamaʼeleʼö si oföna alua lima fakhe aefa daʼö, me itehegö Yehowa ba zaradadu Mbabilona ba wamakiko Yeruzalema. Iʼogunaʼö Mbabilona Yehowa ba wanguhuku niha si faröi khönia. (Yeremia 25:9, 15-18) Hizaʼi hewisa niha Yahudi satulö tödö samalua si sökhi ba mbanua andrö? Hasambalö iʼorifi ira Yehowa.

Ba gangilata andrö, tenga sindruhu-ndruhu ifotandra gangango niha Hezekieli mazui fao ia ba wamakiko mbanua andrö. Ira malaʼika zamakiko Yeruzalema. Tobali, ba gangilata andre tola taʼila hadia zalua ba zorugo. Iʼoʼou ndra malaʼikania Yehowa ba wamaʼanö famakiko niha si lö sökhi hegöi ba wangorifi niha satulö tödö.a

Alua ba zi so föna zi no mufaʼeleʼö andre. Me mböröta, tamane wa ira matua si so naha tawa fena sekretaris eluahania niha nibayoini si toröi nasa ba gulidanö. Tatutunö göi wa lafotandra niha niʼorifi na lafondro-ndrongo ba latema duria somuso dödö nituriaigöda. Barö-barö daʼa, taʼila wa moguna mubulöʼö wanutunö wamaʼeleʼö andre. Ba Mataiʼo 25:31-33, taʼila wa Yesu zanguhuku niha. Ifalua daʼa sagötö wamakao sabölö-bölö. Ba ginötö daʼö dania, teʼorifi niha si no amaedola mbiri-biri, ba tehuku niha si no amaedola nambi.

Hadia wamahaʼö khöda moroi ba gangilata Hezekieli? So lima wamahaʼö:

1. Fatua lö mufakiko Yeruzalema, ifangelama niha Hezekieli hegöi Yeremia ba Yesaya sanandrösa salua ba mbanua andrö. Hulö zanaro ira. Ba ginötö andre, iʼogunaʼö ngawawa si lö atoto Yehowa yaʼia daʼö niha nibayoini ba wamahaʼö ono mbanuania hegöi ba wofangelama niha böʼö fatua lö tohare wamakao sabölö-bölö. Fefu nono mbanua Lowalangi sohalöwö ba nomo Keriso, fao ira ba halöwö famangelama andrö.​—Mataiʼo 24:45-47.

2. Lö ifotandra niha sinangea teʼorifi Hezekieli. Simanö göi nono mbanua Lowalangi ba ginötö andre. Ha halöwö fanuriaigö nifaluara ba lafangelama niha sanandrösa salua ba zi so föna. Malaʼika zanolo halöwö fanuriaigö andre ba zi sagörö ulidanö.​—Famaʼeleʼö 14:6.

3. Tenga sindruhu-ndruhu no lafotandra gangango niha niʼorifi me götö Hezekieli. Simanö göi dania niha niʼorifi ba ginötö andre. Hadia nifalua niha enaʼö teʼorifi ira na alua wamakao sabölö-bölö? Na larongo wamangelama, moguna lafahaʼö ira ba woloʼö Keriso, lalulu waʼaurira khö Lowalangi, ba latuhini dalifusö Keriso ba wanuriaigö turia somuso dödö. (Mataiʼo 25:35-40) Sagötö alua wamakao sabölö-bölö, labeʼe khöra tandra, eluahania tefili ira tobali niha niʼorifi.

4. Ira matua solohe naha tawa fena laʼamaedolagö ia Yesu. Sagötö alua wamakao sabölö-bölö, ifotandra niha sato Yesu ba ginötö iföföʼö ira tobali biri-biri. Aefa daʼö, auri ira sagötö faʼara ba gulidanö.​—Mataiʼo 25:34, 46.b

5. Ba ginötö andre, ira matua si daönö sololohe födara ba wanudugö, muʼamaedolagö ia saradadu zorugo nidöniaʼö Yesu. Lö aratö lafakiko fefu soi ba lahori zi lö sökhi.​—Hezekieli 10:2, 6, 7; Famaʼeleʼö 19:11-21.

Ba gangilata andre tola tetolo ita enaʼö faduhu dödöda wa lö ihori niha satulö tödö Yehowa fao ba niha si lö sökhi. (II Fetero 2:9; 3:9) Daʼa göi zamasugi ba dödöda wa moguna sibai mufalua halöwö fanuriaigö ba ginötö andre. Moguna larongo niha wamangelama andrö fatua lö tohare waʼatua danö!​—Mataiʼo 24:14.