Usöndra Waʼohahau Dödö Börö Me Mamuala

BA GINÖTÖ 12 fakhe ndröfigu, aboto ba dödögu wa so zi tohude sinangea ubeʼe. Ba kebaktian, isofu khögu samösa talifusö ira matua hadia omasido möi manuriaigö. Hewaʼae lö irai ufalua, hizaʼi umane lau. Möiga ba mbanua nituriaigöma, ba ibeʼe khögu mbuku-buku sanandrösa ba Mbanua Lowalangi. Aefa daʼö imane khögu, ”Ba si tambai lala lau manuriaigö, ba yaʼodo tanö ba daʼa.” Sindruhunia ataʼudo, hizaʼi ubörötaigö manuriaigö. Tokea sibai ndraʼo börö me alio ahori mbuku niʼohegu. Sindruhu-ndruhu ato niha zomasi ba nibeʼegu andrö.

Tumbu ndraʼo me döfi 1923 ba mbanua Chatham, Kent, Inggris. Me no aefa Wasuwöta Gulidanö I, ato niha zodöna-döna wa itugu sökhi gulidanö. Hizaʼi, lö alua daʼö irege ato niha zafatö tödö, simane ira satuagu. Afatö göi dödöra khö ndra fandrita ba gereja Baptis börö me ha dadaoma manö niʼaluira. Me siwa fakhe ndröfigu, möi ninagu ba gödo International Bible Students Association. Ba daʼö lafalua ”kelas-kelas” mazui gangowuloa ira Samaduhuʼö Yehowa. Samösa dalifusöda ira alawe ibeʼe wamahaʼö ba ndraono, moroi ba Zura Niʼamoniʼö hegöi ba mbuku The Harp of God. Omasido sibai nifahaʼönia.

UFOMAHADO MOROI BA NIHA SALAWA NDRÖFI

Me si bohou ebua ndraʼodo, omasido sibai wanutunö ba niha wanötöna moroi ba Daromali Lowalangi. Asese möido manuriaigö ha samösa ba nomo-omo misa. Hizaʼi, ba ginötö fao ndraʼodo manuriaigö ba niha böʼö, oya wamahaʼö si tola uhalö. Duma-dumania, samuza maʼökhö, fao ndraʼo manuriaigö khö samösa dalifusöda si no alawa ndröfi. Ba lala, falukhaga khö samösa fandrita. Umane, ”Iza itörö nambi.” Ibatogö guretania talifusöda andrö, ba fahuhuo ia khögu. Imane, ”Haniha zameʼe khöu halöwö ba wanguhuku haniha zi tobali nambi? Taʼowua-wuaʼö dödöda ba halöwö fanuriaigö turia somuso dödö andre, ba tehegö Yehowa zanguhuku.” Ba ginötö daʼö, uhalö wamahaʼö wa owua-wua dödögu na mamuala.​—Mataiʼo 25:31-33; Halöwö Zinenge 20:35.

Talifusöda salawa ndröfi tanö böʼö, ifahaʼö ndraʼo enaʼö tola owua-wua dödögu ba wamuala, itaria moguna wanaha tödö. Foʼomo dalifusöda andre lö omasi ia ndra Samaduhuʼö Yehowa. No irai iʼohe ndraʼodo ba nomora. Mofönu sibai woʼomonia börö me iʼila wa no möi manuriaigö woʼomonia ba itebu ndraʼaga naha tesi. Lö mofönu dalifusöda andrö, ifuli naha tesi andrö ba nahiania. Börö me so khönia wanaha tödö, hauga fakhe aefa daʼö tebayagö idanö woʼomonia tobali samösa Samaduhuʼö Yehowa.

Ba mbaŵa si Siwa 1939, me 16 fakhe ndröfigu, iʼombakhaʼö Britanika wa fasuwö ira ba wolawa Jerman. Ba mbaŵa si Tölu 1940, tebayagö idanö ndraʼodo hegöi ninagu ba Dover. Me mbaŵa si Önö 1940, uʼila moroi ba mbawa ndruhö, ngahönö zaradadu sauri moroi ba Wasuwöta Dunkirk, laʼohe ira ba moto truk. Uʼila wa ataʼu sibai ira, ba hulö zi lö fanötöna. Sindruhu-ndruhu omasido ufatunö khöra sanandrösa ba Mbanua Lowalangi hegöi dötönafö ba zi so föna. Ba gafuriata ndröfi daʼö, ibörögö Jerman ba wobom Britanika. Ero bongi, ifasui-sui mbanuama köfa sihombo Jerman solohe bom. Ataʼuga sibai me marongo agatoru bom. Ba zihulö wongi, maʼila wa no ahori adudu fefu nomo. Moroi ba zalua daʼö, itugu aboto ba dödögu wa ha Mbanua Lowalangi si tobali dötönafögu ba zi so föna.

OHAHAU DÖDÖ BÖRÖ ME MAMUALA

Me döfi 1941, ubörögö halöwö safönu inötö, börö me daʼö lala waʼauri si tola mangowua-wuaʼö dödö. Mohalöwödo ba Royal Dockyard ba Chatham, ba wangehaogö göfa. Ato zangalui halöwö daʼa, börö me ebua gazi ba oya nihenaigö. Hizaʼi, laʼila ira samosumange Yehowa wa niha Keriso tebai fao ira ba wasuwöta. Ba me döfi 1941, aboto ba dödöda wa tebai fao ita ba wangehaogö fakake fasuwöta. (Yohane 18:36) Mahaogö göfa narö nasi ba dockyard. Andrö ubetado ba halöwö daʼö ba ubörötaigö halöwö safönu inötö. Halöwögu si oföna yaʼia daʼö ba mbanua Cirencester si baga-baga ba Cotswolds.

Me 18 fakhe ndröfigu, siwa waŵa labeʼedo ba gurunga börö me lö omasido tobali saradadu. Fawuka dödögu me laduhö mbawa ndruhö gurunga, ba ha yaʼo-yaʼo ba daʼö. Hizaʼi, lö ara aefa daʼö, lasofu khögu ira sozago gurunga hegöi niha nikuru tanö böʼö hana wa lakurudo. Si fao faʼomuso dödö, ufatunö khöra wamatigu.

Me no aefa lakuru ndraʼo, ifuli labeʼe halöwögu ba wefao khö Leonard Smith,a ba wanuriaigö ba zi fasui Kent, mbanuama. Enaʼö tola labom London, lö tola löʼö itörö mbanua Kent göfa sihombo Nazi. Iʼotarai döfi 1944, ngahönö bom doodlebug ni torugö ba mbanua Kent. Sindruhunia, bom daʼa yaʼia daʼö göfa sihombo si lö hadöi niha solohe safönu ngawalö salio mamoka. Ba ginötö marongo wa no mate mesinnia, maʼila wa lö aratö aekhu tou göfa sihombo andrö, ba mamoka. Ahori ataʼu fefu niha. Ba ginötö daʼö, mafahaʼö sambua ngambatö ba datölu ndraonora ba Zura Niʼamoniʼö. Itaria, modadao ndraʼaga barö meza siʼöli enaʼö telumöʼö ndraʼaga na adudu nomo andrö. Ba gafuriata, tebayagö idanö fefu nösi nomo andrö.

MANURIAIGÖ TURIA SOMUSO DÖDÖ BA MBANUA TANÖ BÖʼÖ

Me no aefa wasuwöta, dua fakhe merintis ndraʼo ba Irlandia tanö raya. Ba ginötö manuriaigö ndraʼaga ba nomo-omo misa, mawaʼö wa yaʼaga andre misionaris ba maʼandrö nahia wemörö. Mabeʼe göi khöra mbuku ba lala. Hizaʼi, no aröu faböʼö Irlandia moroi ba Inggris. Börö me mbanua Katolik Irlandia, tatu lö omasi latemaʼö ndraʼaga! Ba ginötö so ndra matua sametaʼu ndraʼaga, ufatunö khö folisi. Hizaʼi, imane folisi andrö, ”Hadia zomasiʼö?” Lö maʼila wa sindruhu-ndruhu lafosumange Pastor ba daʼö. Tola manö aheta ira ba halöwöra na latema mbuku nibeʼema. Ba lafofanö göi ndraʼaga ba nomo niʼiagöma.

Awena aboto ba dödöma wa ba ginötö tohare ndraʼaga ba nahia si bohou, abölö sökhi na manuriaigö ndraʼaga ba nahia zi lö iʼila pastor. Andrö, oföna manuriaigö ndraʼaga ba nahia saröu moroi ba nahia niʼiagöma. Na no awai ba daʼö, awena manuriaigö ndraʼaga ba nahia sahatö. Ba mbanua Kilkenny, mafahaʼö samösa nono matua tölu kali samigu, hewaʼae lafetaʼu ndraʼaga niha mbanua andrö. Börö me omasido sibai wamahaʼö Zura Niʼamoniʼö ba niha, omasido na lafahaʼödo tobali misionaris. Andrö, ufasuraʼö döigu ba wefao ba Sekolah Alkitab Gilead Menara Pengawal.

Me no aefa lima waŵa mafahaʼöga ba New York, daʼöfa ndraʼaga si no awai Sekola Gilead, lafatengega ba hulo-hulo side-ide ba Nasi Karibia. Ba mbaŵa si Felezara 1948, mofanö ndraʼaga moroi ba New York City maʼogunaʼö göfa Sibia, faʼanaunia 18 meter. Omuso sibai dödögu börö me daʼa si oföna möido moloyo. Samösa nawöma ba Sekola Gilead sotöi Gust Maki, no toʼölö iʼohe göfa. Ifomaha ndraʼaga wolohe göfa, simane lala ba wameʼe yawa hegöi wameʼe tou loyo, wangogunaʼö kompas, ba lala ba wolawa nangi. Onekhe sibai Gust ba wolohe göfa hegöi ba wolawa mbade sabölö-bölö ba zi 30 hari irege ofeta ndraʼaga ba Hulo Bahama.

”MIʼOMBAKHAʼÖ BA HULO MISA”

Me no aefa hauga waŵa manuriaigö ndraʼaga ba hulo-hulo side-ide ba Bahama, möiga ba hulo Leeward hegöi ba hulo Windward. Hulo-hulo sigide-ide andre so ia ba gotalua Hulo Virgin ba Trinidad faʼanaunia 800 kilometer. Ba zi lima fakhe, manuriaigö ndraʼaga ba hulo-hulo sagaröu si lö hadöi Samaduhuʼö. Itaria, ba zi hauga migu tebai ma faʼoheʼö mazui matema zura. Hizaʼi, omuso sibai dödöma börö me maturiaigö sanandrösa khö Yehowa ”ba hulo misa”!​—Yeremia 31:10.

Me ofeta göfama ba mbewe nasi, owulo niha si toröi ba mbanua andrö ba wamaigi haniha zi tohare. So zi lö irai mangila göfa mazui niha safusi ösi. Sökhi sibai gamuatara ba laʼila göi nösi Zura Niʼamoniʼö. Asese labeʼe khöma giʼa sawena musöndra, poka, hegöi gasagore. Hewaʼae no ide-ide göfama, hizaʼi tola mondrino, mörö hegöi manasa nukha ndraʼaga ba daʼö.

Manuriaigö ndraʼaga maʼö-maʼökhö, ba mafatunö ba niha wa so huhuo sebua ba Zura Niʼamoniʼö. Ba zi tanö owi, mafoli bel ba göfama. Omuso sibai dödöma börö oya si tohare. Tohare ira moroi ba hili ba hulö simane dröfi sohola-hola wandru fanikha niʼohera. Itaria, so daotu niha zi tohare ba labeʼe wanofu irugi ba zi talu wongi. Omasi sibai ira manunö, andrö masura ösa zinunö Mbanua Lowalangi khöra. Daʼöfa ndraʼaga, maforege ba woʼanunöisi sinunö andrö. Aefa daʼö, fao ira göi manunö khöma ba no baga-baga sibai li ra. Owua-wua sibai dödöma ba ginötö daʼö!

Me no awai mafahaʼö ira ba Zura Niʼamoniʼö, mofanöga ba wamalukhaisi niha böʼö, hizaʼi lagoʼöga ba fao ira zui wamahaʼö ba daʼö. Me no hauga migu ndraʼaga ba daʼö, mofanöga zui ba mbanua böʼö. Hizaʼi, si toʼölönia maʼandrö ba niha sowölö-ölö wamahaʼö ba wanolo niha böʼö irugi mangawuliga. Ahöli-höli dödöma, börö me lafalua halöwö daʼö soroi ba dödö.

Iadaʼa, ato ndra turis zangondrasi hulo andrö ba wamaigi waʼabaga-baga nasi safusi, gawunia, hegöi hogu mbanio. Hizaʼi, meföna lö atoto niha ba daʼö. Si toʼölönia, mofanöga ba hulö tanö böʼö ba zi bongi. Famai-mai lumba-lumba ba zinga göfama. Nirongoma ha li göfa sanörö dalu nasi. Haga mbaŵa, hulö simane firö sohagaini talu nasi.

Me no aefa lima fakhe manuriaigö ndraʼaga ba hulo daʼö, findra ndraʼaga ba Puerto Riko ba wogati göfama enaʼö tola mafake göfa mesin. Me no ofetaga, falukhado khö Maxine Boyd, samösa misionaris si no baga-baga, ba omasido khönia. Iʼotarai meʼide-ide ia, omasi sibai ia manuriaigö turia somuso dödö. Aefa daʼö, tobali ia misionaris ba Republik Dominika irege lafofanö ia ira samatörö Katolik me döfi 1950. Börö me solohe göfa ndraʼodo, ha sara waŵa tola toröido ba Puerto Riko. Aefa daʼö, mofanöga zui ba hulo tanö böʼö ba awena mafuliga ba zi hauga fakhe aefa daʼö. Imane tödögu, ’Ronald, na omasiʼö khö nono alawe andrö, moguna öʼaliokö.’ Tölu migu aefa daʼö, ubeʼe li khönia. Ba me no aefa önö migu, mangowaluga. Yaʼo hegöi Maxine, labeʼe halöwöma tobali misionaris ba Puerto Riko. Andrö, lö irai uʼogunaʼö göfa si bohou andrö.

Me döfi 1956, tobali ndraʼaga satua samasui ba omasiga sibai mafalukhaisi ndra talifusöda. Ato zi numana. Duma-dumania, ba mbanua Potala Pastillo, so dombua ngambatö Samaduhuʼö soya ono. Si toʼölönia umaikö surune khöra. Usofu khö samösa nono alawe side-ide sotöi Hilda, hadia omasi fao ia khöma ba weʼamöi manuriaigö. Imane, ”Omasido. Hizaʼi tebai ufalua. Lö hadöi sifatugu.” Maʼöli khönia sifatu, ba fao ia khöma manuriaigö. Me döfi 1972, möiga ba Brooklyn, ifalukhaisi ndraʼaga samösa ira alawe sawena aefa Sekola Gilead. Labeʼe halöwönia ba Ekuador ba lö aratö mofanö ia. Imane khöma, ”Tatu olifu ami khögu lö? Yaʼodo ono alawe si lö hadöi sifatu moroi ba mbanua Pastillo.” Ga Hilda daʼa! Faoma meʼe ndraʼaga börö waʼomuso dödö.

Me döfi 1960, mohalöwöga ba kantor cabang Puerto Riko, si so ba nomo side-ide ba mbanua Santurce, San Juan. Mböröta, ha yaʼodo ba Lennart Johnson zamalua halöwö daʼa fefu. Yaʼia hegöi foʼomonia, Samaduhuʼö si oföna ba Republik Dominika, ba ba dröfi 1957, findra ira ba Puerto Riko. Ba gafuriata, mohalöwö Maxine ba wamaʼoheʼö majalah ba niha. Ifaʼoheʼö töra saribu majalah ero migu. Omuso dödönia ba halöwö daʼö, börö me iʼomasiʼö fefu niha samahaʼö yaʼira sanandrösa khö Yehowa.

Omasido mohalöwö ba Mbetieli börö me daʼa zanolo yaʼo ba wangogunaʼö faʼabölögu ba wamosumange Yehowa. Hizaʼi’ lö aoha daʼa. Duma-dumania, me so kebaktian internasional si oföna ba Puerto Riko ba ndröfi 1967, oya sibai halöwögu, irege ambö gölögu wamalua daʼö fefu. Nathan Knorr, samösa sondröniaʼö ba gotalua ndra Samaduhuʼö Yehowa, tohare ia ba Puerto Riko. Iwalinga lö mutatugöigu hadia lala ndra misionaris sangondrasi nahia andre, sindruhunia no uhaogö ufaʼanö daʼö. Ba gafuriata, ibeʼe khögu mene-mene enaʼö abölö teföfö halöwögu, ba iwaʼö wa afatö dödönia khögu. Lö utema linia, hizaʼi imane tödögu wa no iböbögö khögu zi lö duhu, ba ba ginötö daʼö abao dödögu khönia. Hizaʼi me ifuli falukha ndraʼaga khö dalifusöda Knorr, ikaoni ndraʼaga möi ba mbateʼenia ba ibeʼe göma.

No hauga kali möiga ba Inggris ba wamalukhaisi nösi nomogu. Me labayagö idanö ndraʼo hegöi mamagu, lö mutemaʼö Bapagu zindruhu. Hizaʼi, ba ginötö möi ba mbanuama ira dalifusö soroi ba Mbetieli, asese ikaoni ira Mamagu enaʼö mörö ira ba nomo. Iʼila Bapagu gamuata ndra satua sokubaloi andre si fao fangide-gideʼö. Faehu sibai moroi khö ndra fandrita sangandrö horönia me döfi silalö. Ba gafuriata, labayagö idanö Bapagu me döfi 1962.

Maxine, woʼomo niʼomasiʼögu, mate ia me döfi 2011. Omasido sibai falukha khönia na lasusugi ia dania. Terara dödögu ba dötönafö andre! No 58 fakhe fao ndraʼaga, maʼila waʼamonönö ndra Samaduhuʼö Yehowa ba Puerto Riko, iʼotarai 650 tobali 26.000! Me döfi 2013, laʼosambuaʼö cabang Puerto Riko ba Amerika Serikat ba laʼandrö enaʼö mohalöwödo ba Wallkill, New York. Me no aefa 60 fakhe toröido ba Puerto Riko, hulö no sindruhu-druhu niha Puerto Riko ndraʼo, fagölö sindruhunia simane coquí, yaʼia daʼö dalaho side-ide moroi ba Puerto Riko somasi manunö ko-kee, ko-kee ba zi tanö owi. Omasido toröi ba Puerto Riko, hizaʼi iadaʼa moguna ubörötaigö waʼauri si bohou.

”SI NO AOHA GÖLÖ FAMEʼE, DAʼÖ SA ZOMASI LOWALANGI”

Omuso sibai dödögu ba wamosumange Lowalangi ba Mbetieli. Iadaʼa no töra 90 fakhe ndröfigu. Halöwögu yaʼia daʼö mangaʼaroʼö famati nösi nomo Mbetieli. Iʼotarai me ofetado ba Wallkill, no töra 600 dalifusöda ira matua hegöi ira alawe nifalukhaisigu. So zangondrasi ndraʼo ba wotutunö gabula dödönia samösa mazui nösi nomonia. Tanö böʼönia so zangandrö mene-mene enaʼö mofozu wohalöwö ba Mbetieli. So göi zangandrö mene-mene börö me awena mongambatö ira mazui börö me latema halöwö si bohou tobali perintis. Ufondro-ndrongo fefu nifatunöra khögu, ba na tefaudu, asese uwaʼö khöra, ”’Si no aoha gölö fameʼe, daʼö sa zomasi Lowalangi.’ Andrö, miʼomusoiʼö dödömi ba halöwömi. Fefu daʼö khö Yehowa.”​—II Korindro 9:7.

Na omasiʼö omuso dödömö ba Mbetieli mazui hezoso manö, sinangea öʼosambuaʼö dödömö hadia mbörö wa moguna halöwö nifaluamö. Fefu halöwö nifaluada ba Mbetieli no halöwö famosumange daʼö. Tatolo ”zawuyu andrö, si lö faröi, satua-tua” zameʼe gö ba wamati khö ndra dalifusö ba zi sagörö ulidanö. (Mataiʼo 24:45) Gofu hezoso mohalöwö ita khö Yehowa, tola tafosumange ia. Datafalua niʼandrönia si fao faʼomuso dödö, börö me no ”Si no aoha gölö fameʼe, daʼö sa zomasi Lowalangi.”