Satua, Tolo Ndraonomö ba Wangokhögö Famati

1, 2. (a) Hadia mbörö wa lö aoha khö zatua ba wamahaʼö iraono enaʼö mamati ira khö Yehowa, ba hadia sambua lala si tola lafalua satua ba wamalua daʼö? (b) Hadia manö zi öfa ngawalö nitutunöda iadaʼa?

LAMANE ira sambua ngambatö ba Prancis, ”Mamati ndraʼaga khö Yehowa, hizaʼi tenga daʼö geluahania no fao göi nonoma ba wamati. Famati andre tenga gondröita. Itugu ara itugu tumbu wamati ndraonoma.” Isura samösa dalifusöda ba Australia imane, ”No sambua fanandraigö sabua ba wameʼe fanolo khö ndraonoda enaʼö mamati ira.” Imane nasa, ”Tola manö, öwalinga no öbeʼe wanema li ba ngawalö wanofu ndraonomö. Hizaʼi, isofu nasa wanofu si fagölö mahemolunia! Fanema lida maʼökhö tola manö lö tefaudu ba dödönia daʼö mahemolu.” Na itugu ebua-bua ndraono, ato zatua moguna laʼabakhaʼö wanutunö khöra duho si fagölö. Moguna göi laʼogunaʼö ngawalö lala ba wamahaʼö iraonora enaʼö laʼomasiʼö Yehowa.

² Na satua ba nomo ndraʼugö, te no irai manofu ndraʼugö, ’Hadia sindruhu-ndruhu tola ufahaʼö ndraonogu ba wangomasiʼö hegöi ba wamosumange Yehowa na no ebua-bua ia?’ Sindruhunia, tebai tafalua samösa daʼa. (Yer. 10:23) Daʼa mbörö wa moguna taʼodaligö Yehowa ba wanolo yaita. Ibeʼe oya wanuturu lala khö ndra satua. Hadia zi tola öfalua ba wanolo iraonomö? (1) Moguna sibai aboto ba dödöu ndraonomö. (2) Fahaʼö hadia nirasoimö sanandrösa khö Yehowa. (3) Ogunaʼö duma-duma. (4) Andrö geheha niʼamoniʼö ba wangandrö hegöi bologö dödöu khö ndraonomö.

MOGUNA SIBAI ABOTO BA DÖDÖU NDRAONOMÖ

3. Hewisa zatua ba woloʼö lala nifalua Yesu me ifahaʼö ndra nifahaʼönia?

³ Asese isofu Yesu khö ndra nifahaʼönia hadia nifaduhusira tödö. (Mat. 16:13-15) Tola öʼoʼö duma-duma nifaluania. Ba ginötö fahuhuo mazui fao ami mohalöwö iraonomö, sofu hadia zi so ba dödöra ba tehegö lafatunö khömö hadia ia nirasoira. Hadia so zaombö dödönia? Samösa dalifusöda ono matua 15 fakhe ndröfinia ba Australia imane, ”Asese fahuhuo Bapa khögu sanandrösa ba wamatigu, ba itolo ndraʼo ba woʼangeraigö daʼö. Isofu khögu, ’Hadia niwaʼö Zura Niʼamoniʼö?’ ’Hadia faduhu dödömö ba daʼö?’ ’Hana wa faduhu dödömö?’ Omasi ia na ubeʼe wanema li moroi ba wehedegu samösa, tenga ha uʼoʼö simane wehedenia mazui niwaʼö Mama. Me no ebua-bua ndraʼo, moguna ubeʼe wanema li sabölö sökhi.”

4. Hana wa moguna öbologö dödömö ba öbeʼe wanema li moroi ba wanofu-nofu ndraonomö? Beʼe duma-duma.

⁴ Bologö dödöu na lö iʼanemaiʼö faduhu dödö ndraonomö ba wamahaʼö Zura Niʼamoniʼö. Tolo ira ba wanöndra fanema li moroi ba wanofu-nofura. Imane samösa ama, ”Ameʼegö tödö wanofu ndraonomö. Böi osiwawöi wanofura hewaʼae ambö moguna wanofu andrö, ba böi tutunö danö böʼö ha börö me lö omasiʼö wanofura andrö.” Sindruhunia, sökhi na manofu ndraono, börö me daʼö geluahania wa omasi iʼila abölö oya nasa. Asese göi manofu-nofu Yesu me ide-ide ia. (Baso Luka 2:46.) Imane samösa si bohou ebua ba Denmark, ”Me uwaʼö wa aombö dödögu hadia agama sindruhu agamama, lö mofönu zatuagu hewaʼae sindruhunia abu dödöra. Laʼogunaʼö Zura Niʼamoniʼö ba wameʼe fanema li moroi ba wanofu-nofugu.”

5. Hewaʼae hulö no mamati iraono khö Yehowa, hadia zinangea lafalua zatua?

⁵ Moguna aboto ba dödöu ndraonomö. Böi öwalinga wa no mamati ira khö Yehowa ha börö me no fao ira ba wanuriaigö ba möi ira ba gangowuloa. Hewisa dödöra khö Yehowa, ba hewisa moloʼö yaʼira Zura Niʼamoniʼö? Moguna öforege enaʼö öʼila hadia so zameʼe awuwu wamatira khö Yehowa. Tutunö sanandrösa khö Yehowa ero maʼökhö khö ndraonomö ba ginötö fao ami ba wamalua hadia ia. Ohe ira ba wangandrö, he ba ginötö mangandrö ami yomo ba nomo mazui ba ginötö mangandröʼö samösa.

FAHAʼÖ IRA HADIA NIRASOIMÖ SANANDRÖSA KHÖ YEHOWA

6. Na lö iböhöli satua ba wamahaʼö yaʼia sanandrösa khö Yehowa hegöi Sura Niʼamoniʼö, hewisa daʼö tola möi fanolo khöra ba wamahaʼö ndraonora?

⁶ Omasi niha mamondro-ndrongo hadia niwaʼö Yesu börö me iʼomasiʼö Yehowa ba aboto ba dödönia Daromali. Larasoi samösa göi wa iʼomasiʼö ira Yesu. Andrö lahaogö lafondro-ndrongo nifaʼemania. (Luk. 24:32; Yoh. 7:46) Simanö göi, na iʼila iraonomö wa öʼomasiʼö Yehowa, daʼö zanolo yaʼira ba wangomasiʼö yaʼia göi. (Baso V Moze 6:5-8; Luka 6:45.) Andrö böi böhöli ba wamahaʼö yaʼugö ba Zura Niʼamoniʼö ba aseseʼö baso publikasida. Fahaʼö nasa ndraʼugö ba niwöwöi Yehowa. (Mat. 6:26, 28) Na itugu aboto ba dödömö sanandrösa khö Yehowa, itugu oya zi tola öfahaʼö khö ndraonomö sanandrösa khönia.​—Luk. 6:40.

7, 8. Ba ginötö so wamahaʼö si no ösöndra sanandrösa khö Yehowa, hadia nifaluamö? Hewisa wamalua zatua daʼa?

⁷ Tutunö khö ndraonomö hadia si no öfahaʼö ndraʼugö sanandrösa khö Yehowa. Falua daʼa ero inötö khöra, tenga ha ba ginötö mamaʼanö möi ba gangowuloa mazui ba wamahaʼö yomo ba nomo. Daʼa nifalua sambua fongambatö ba Amerika Serikat. Latutunö ba ndraonora sanandrösa khö Yehowa ba ginötö laʼila so zi baga-baga ba gulidanö mazui na laʼa gö sami. Lamane, ”Mafasugi ba dödöra wa iʼomasiʼö ita Yehowa, ba fefu si no ihenaigö no ihaogö wamaʼanö khöda daʼö.” Sambua fongambatö ba Afrika Tanö ba Gaekhula, asese latutunö sanandrösa ba niwöwöi ba ginötö moi ira ba kabu khö zi darua nonora ono alawe. Duma-dumania, lawaʼö wa no ahöli-höli dödöda wamaigi sambua hunö tola tobali sambua geu. Lamane, ”Maforege enaʼö laʼameʼegö tödö iraonoma waʼauri hegöi niwöwö sahöli-höli dödö.”

⁸ Samösa ama ba Australia, iʼohe ononia si-10 fakhe ba museum. Iʼogunaʼö ginötö daʼö ba wanolo ononia enaʼö itugu aro wamatinia ba aboto ba dödönia wa Yehowa Zomböwöi daʼö fefu. Imane, ”Maʼila gurifö nasi si so meföna töinia ammonit hegöi trilobit. Ahöli-höli dödöma ba ndroto-ndrotonia me aʼoi so fefu hulö simane gurifö si so ba götöda iadaʼa. Baga-baga sibai gurifö daʼa hewaʼae no lö hadöi saʼae iadaʼa. Na sindruhu tebulö zi sambua gurifö sambö ndroto-ndroto tobali gurifö danö böʼö zi so fefu ndroto-ndrotonia, hana wa gurifö meföna andre oi so fefu ndroto-ndrotonia? Sindruhu-ndruhu no sambua wamahaʼö si sökhi daʼa khögu ba ututunö khö nonogu.”

OGUNAʼÖ DUMA-DUMA

9. Hana wa sökhi na laʼogunaʼö duma-duma? Duma-duma hadia niʼogunaʼö zi samösa ina?

⁹ Asese iʼogunaʼö Yesu gamaedola. Iʼogunaʼö waö-waö mazui duma-duma ba wameʼe famahaʼö soguna. (Mat. 13:34, 35) Na öʼogunaʼö duma-duma ba wamahaʼö, tola ikhalaigö onomö daʼö. Daʼa zanolo yaʼira ba woʼangeraigö wamahaʼö si no öʼbeʼe khöra, enaʼö itugu aboto ba dödöra hegöi lö laʼolifugö ba omuso dödöra ba wamahaʼö andrö. Duma-dumania, samösa ina ba Jepang, omasi ia na aboto ba dödö zi darua ndraononia matua wa iʼameʼegö tödö ita Yehowa, oroma daʼö moroi ba lala wamazökhinia atmosfir gulidanö. Faʼalawa ndröfi ndraononia matua walu ba fulu fakhe. Andrö, iʼogunaʼö duma-duma si tefaudu ba ndröfira enaʼö tola aboto ba dödöra. Ibeʼe khöra susu, gulo hegöi kofi. Aefa daʼö, iʼandrö khöra enaʼö lafazökhi önia kofi. Imane ina andrö, ”Tenga ha asala noa wamazökhira kofi, me usofu khöra hana wa lahaogö ba wamazökhi daʼö, lawaʼö wa omasi ira na tefaudu kofi andrö ba zomasi dödögu. Ututunö khöra wa simanö göi Lowalangi. Ihaogö wamaruka ngawalö gas ba atmosfir enaʼö tefaudu ba niha.” Omasi ira na simane daʼö wamahaʼö yaʼira, ba lö laʼolifugö wamahaʼö daʼö!

10, 11. (a) Hadia duma-duma zi tola öʼogunaʼö ba wangoromaʼö wa sindruhu so Zomböi? (Faigi gambara ba wamobörö wamahaʼö.) (b) Hadia duma-duma si no irai öʼogunaʼö?

¹⁰ Hadia duma-duma si tola öʼogunaʼö ba wangoromaʼö khö ndraonomö wa sindruhu-ndruhu so Zomböi? Duma-dumania, tola fao ami ndraonomö ba wamazökhi kue ba miʼogunaʼö sambua resep. Tutunö hana wa moguna laʼoʼö fefu resepnia. Aefa daʼö, beʼe khönia apel mazui mbua tanö böʼö. Sofu khönia, ”Hadia öʼila wa so resep apel andre?” Taba dalu apel, ba beʼe khönia hunö. Tutunö wa hunö andrö hulö simane resep. So ba daʼö lala wamazökhi apel, hizaʼi abölö abua resep andrö moroi ba resep kue. Tola ösofu, ”So niha sanura resep kue. Na simane daʼö, haniha sanura resep apel?” Na no ebua-bua ndraonomö, tutunö wa resep ba wamazökhi sambua hogu apel si tola mowua so bakha ba DNA hunö andrö. Tola göi öforomaʼö gambara mazui duma-duma si so ba brosur Asal Mula Kehidupan—Lima Pertanyaan yang Patut Direnungkan ba ngaʼörö si 10 irugi 20.

¹¹ Ato satua zobaso duho ”Apakah Ini Dirancang?” si so ba Sadarlah! khö ndraonora. Na ide-ide nasa nono daʼö, tola öʼadogoiʼö ba wanutunö duho andrö. Duma-dumania, sambua fongambatö ba Denmark, lafagölösi göfa sihombo simane wofo. Lamane, ”Göfa sihombo hulö simane wofo. Hizaʼi hadia tola moʼadulo ba mamoto ia tobali göfa sihombo side-ide? Hadia moguna bandara khö wofo? Hezoso zomasiʼö, li göfa sihombo mazui na manunö wofo? Andrö, haniha zabölö onekhe, hadia samazökhi göfa sihombo mazui Samazökhi wofo?” Na ötutunö ba öbeʼe wanofu simane daʼö, tola ifahaʼö ia ba wangogunaʼö lala ”wangenanö”, ba itugu aro wamatinia khö Yehowa.​—Gamd. 2:10-12.

12. Hewisa tola öʼogunaʼö duma-duma ba wamahaʼö iraonomö wa sindruhu fefu nösi Zura Niʼamoniʼö?

¹² Tola öʼogunaʼö duma-duma ba wamahaʼö iraonomö wa sindruhu fefu nösi Zura Niʼamoniʼö. Duma-dumania, tola öbaso Yobi 26:7. (Baso.) Böi ha öwaʼö manö khöra wa moroi khö Yehowa fefu nösi ayati andre. Hizaʼi, tolo ira ba wokhalaigö. Tola ötutunö khönia wa me ba götö Yobi, so niha zi lö faduhu dödö wa no manawa-nawa gulidanö andre. Moloʼö yaʼira fefu hadia ia, simane bola mazui gara, so dane-danenia. Ba ginötö daʼö, lö hadöi teleskop mazui göfa sihombo si möi ba mbanua siaŵa. Andrö wa lö hadöi niha si tola mamaduhuʼö wa no manawa-nawa gulidanö andre. Famahaʼönia khöda, hewaʼae ba götö meföna lasura Zura Niʼamoniʼö, fefu nösinia atulö börö me moroi khö Yehowa daʼö.​—Neh. 9:6.

FAHAʼÖ IRA HADIA GUNA WANUTURU LALA MOROI BA ZURA NIʼAMONIʼÖ

13, 14. Hewisa zatua ba wamahaʼö iraonora ba woloʼö mene-mene Zura Niʼamoniʼö?

¹³ Moguna öfahaʼö ndraonomö wa tola sindruhu-ndruhu owua-wua dödöra na laʼoʼö mene-mene si so ba Zura Niʼamoniʼö. (Baso Zinunö 1:1-3.) Duma-dumania, tola öʼandrö khönia ba wokhalaigö hewisa na findra ia ba zi sambua hulo. Tola ifili haniha nawönia zi toröi ba daʼö. Aefa daʼö sofu khönia, ”Enaʼö tola owua-wua dödömö ba waʼauri, haniha manö niha somasi öʼohe ba daʼö?” Ba gafuriata, baso Galatia 5:19-23 enaʼö aboto ba dödönia haniha manö niha somasi iʼohe Yehowa ba gulidanö si bohou.

¹⁴ Na öfalua simane daʼö, so dombua wamahaʼö nifahaʼömö khöra. Siʼoföna, ifahaʼö ita Yehowa hewisa lalania enaʼö owua-wua dödöda ba waʼauri iadaʼa ba hewisa enaʼö lö faʼudusa ba niha böʼö. Si dua, ifahaʼö ita hewisa waʼauri ba gulidanö si bohou. (Yes. 54:13; Yoh. 17:3) Tola öforomaʼö khö ndraonomö hewisa Zura Niʼamoniʼö ba wanolo ndra talifusöda ba wamati. Duma-dumania, alui waö-waö waʼauri si so ba publikasi, tola manö moroi ba duho ”Sura Niʼamoniʼö Zombulöʼö Faʼauri” ba Manuriaigö. Mazui, andrö samösa dalifusöda ba gangowuloa ba wodunö-dunö hewisa wanolo Zura Niʼamoniʼö ia ba wobulöʼö lala waʼaurinia irege tola iʼomusoiʼö dödö Yehowa.​—Heb. 4:12.

15. Hadia si tobali fanolo khömö ba wamahaʼö ndraonomö?

¹⁵ Enaʼö tola itugu omasi ba adöni dödö ndraonomö ba ginötö ofahaʼö ia, andrö khönia ba wokhalaisi famahaʼö andrö. Alui lala wamahaʼö si bohou enaʼö omuso dödöra ba wamahaʼö sanandrösa khö Yehowa ba enaʼö itugu aro wahuwusara khönia. Böi böhöli wamalua daʼa irege ebua-bua ira. Imane samösa ama, ”Böi aföli ndraʼugö ba wamalua lala tanö böʼö ba wamahaʼö duho si fagölö.”

ANDRÖ GEHEHA YEHOWA BA BOLOGÖ DÖDÖMÖ KHÖ NDRAONOMÖ

16. Ba ginötö öfahaʼö ndraonomö, hana wa moguna öbologö dödömö? Hewisa duma-duma nifalua zatua ba wangoromaʼö faʼebolo dödö?

¹⁶ Tola itugu aro wamati ndraonomö börö wanolo geheha Yehowa. (Gal. 5:22, 23) Hizaʼi, moguna ginötö enaʼö itugu aro wamatira. Andrö böi bato ba wamahaʼö yaʼira ba moguna öbologö dödömö. Imane samösa ama si so ba Jepang sangokhögö samösa nono matua ba ono alawe, ”Yaʼodo hegöi foʼomogu, mabeʼe abölö oya ginötöma khö ndraonoma. Iʼotarai me ide-ide ira, ubeʼe 15 menit ginötögu ero maʼökhö ba wamahaʼö yaʼira, baero na so gangowuloa niha Keriso ba ngaluo daʼö. Si felelima menit daʼö lö talafo abua khöma simanö göi khöra.” Imane samösa satua samasui, ”Me awuyu-wuyu ndraʼo, oya sibai wanofu hegöi faʼaombö-aombö dödö si so ba dödögu. Ba gafuriata, tebeʼe wanemali daʼö ba gangowuloa, ba wamahaʼö yomo ba nomo hegöi ba wamahaʼö samösa. Daʼö mbörö wa moguna khö ndra satua enaʼö lö aetu lafahaʼö ndraonora.”

17. Hadia mbörö wa moguna laʼaroʼö wamatira ira satua? Hadia nifalua zi sambua ngambatö si so ba Bermuda ba wanolo ndraonora wangokhögö famati khö Yehowa?

¹⁷ Tatu manö, oya wamahaʼö si tola lahalö iraonomö na laʼila hewisa waʼaro wamatimö khö Yehowa. Lafaigi-faigi hadia nifaluamö. Andrö, böi bato ba wangaroʼö wamatimö. Moguna laʼila iraonomö hewisa wa sindruhu-ndruhu öʼodaligö Yehowa. Duma-dumania, ba ginötö abu dödö zi sambua ngambatö si so ba Bermuda, fao ira mangandrö khö ndraonora ba wangandrö wanuturu lala moroi khö Yehowa. Lafarou göi dödö ndraonora enaʼö mangandrö samösa göi ira. ”Mafatunö khö nonoma siaʼa, ’Moguna sindruhu-ndruhu faduhu dödömö khö Yehowa, böi aetu falua halöwö ba wanuriaigö, ba böi talafo aombö dödömö.’ Ba ginötö taya gabula dödö andrö, aboto ba dödönia wa Yehowa zanolo yaʼaga. Daʼa zangaʼaroʼö wamatinia khö Lowalangi hegöi ba Zura Niʼamoniʼö.”

18. Hadia zi tebai laʼolifugö ira satua?

¹⁸ Satua, böi irai olifu ndraʼugö wa tebai öfaso ndraonomö ba wangokhögö famati. Yaʼugö zananö ba zombuwui, hizaʼi ha Yehowa zi tola mamanöi yaʼia. (I Kor. 3:6) Andrö, ameʼegö tödö ba wamahaʼö iraonomö sanandrösa khö Yehowa, ba andrö geheha niʼamoniʼö ba wanolo ndraonomö wangokhögö famati. Tola faduhu dödömö wa ifahowuʼö Yehowa fefu wamorege si no öfalua.​—Ef. 6:4.