Hadia Öʼila?
Hadia atulö so meföna niha samazaewe tanömö ndruʼu ba nowi niha böʼö?
Digest nifazökhi Yustinianus si no mufuli musura me döfi 1468 yaʼia daʼö sambua moroi ba mbuku soya sanura ngawalö gabula dödö ba huku meföna
MOLOʼÖ Mataiʼo 13:24-26, imane Yesu, ”No fakhili-khili ira mbanua zorugo andrö niha samazaewe tanömö si sökhi ba nowinia. Ba me no mörö niha, ba so zi fatiu tödö khönia, möi mufazaewe, danömö ndruʼu barö zinanö ba ilau mofanö. Ba me no ebua zinanö, me molai, awena göi oroma ndruʼu andrö.” So ösa sanura saombö tödö hadia sindruhu-ndruhu no irai alua nitutunö ba gamaedola andrö. Hizaʼi, moloʼö si no tesura ba mbuku Romawi meföna, tola manö alua simane daʼö.
Itutunö sambua kamus Zura Niʼamoniʼö wa ba huku Romawi, no sambua faʼalösökhi na so niha samazaewe tanömö ndruʼu ba nowi niha böʼö ba wosulöni zi lö sökhi. Sindruhunia, huku simane daʼö mangoromaʼö wa sindruhu-ndruhu no irai alua daʼa. Samösa niha satua-tua ba huku sotöi Alastair Kerr, itutunö wa me döfi 533 M, ifazökhi sambua Digest Kaisar Romawi Yustinianus. Daʼa rahu-rahu moroi ba huku Romawi. Ba daʼö so wehede niha sagatua-tua ba huku iʼotarai me döfi 100-250 M. Moloʼö Digest, samösa niha satua-tua sotöi Ulpian, itutunö zi no irai alua me abad si dua. So niha samazaewe tanömö ndruʼu ba nowi niha böʼö irege tekiko zinanö niha andrö. Itutunö ba buku Digest, hak sohalöwö ba nowi moloʼö huku, tola iʼandrö gefe si tobali fangali moroi ba nifalua khönia.
No irai alua daʼa ba Wamatörö Romawi meföna. Daʼa zangoromaʼö wa no irai alua gamaedola nitutunö Yesu andrö.