Na Öʼosambuaʼö Dödöu ba Geheha, Ösöndra Waʼauri ba Faʼohahau Dödö

1, 2. Hadia mbörö wa adöni dödö niha Keriso si no tebayoini ba Roma faza 8?

TE NO öbaso Roma 8:15-17 ba mbaŵa Wanörö Tödö faʼamate Yesu. Ba ayati daʼö, itutunö hewisa wa laʼila ira niha Keriso nibayoini wa laʼokhögö dötönafö auri sagötö faʼara ba zorugo. Ba Roma 8:1, lafotöi niha nibayoini andrö ”zi so ba khö Keriso”. Hizaʼi, hadia ha ba niha nibayoini moguna Roma faza 8? Mazui, hadia moguna göi ia ba niha sanötöna sauri ba gulidanö sagötö faʼara?

² Ba niha nibayoini si oföna manandrösa Roma faza 8. Latema ”geheha” ba labaloi ginötö irege tobali ira iraononia ba laröi boto tanö. (Roma 8:23) Ba zi so föna, tobali ira ono Lowalangi ba zorugo. Ba börö höli wa tola iʼefaʼö horöra Yehowa. No ifaduhuʼö wa yaʼira andrö niha satulö tödö irege tola tobali ira ononia.​—Roma 3:23-26; 4:25; 8:30.

3. Hadia mbörö wa moguna lafahaʼö göi ira ba Roma faza 8 dozi sanötöna sauri ba gulidanö sagötö faʼara?

³ Tobali, ba mböröta buku Roma, isura Faulo sanandrösa khö zi samösa ira matua si lö mubayoini, hizaʼi niha satulö ia ba wamaigi Yehowa. Yaʼia andrö Aberahamo. Yaʼia niha si lö faröi, ba no ara auri ia fatua lö ibeʼe waʼaurinia Yesu tobali höli. (Baso Roma 4:20-22.) Iadaʼa, niha Keriso si lö faröi sanötöna sauri sagötö faʼara ba gulidanö, tola göi ifotöi ira Yehowa niha satulö tödö. Tola göi latema mbua moroi ba mene-mene nibeʼe ba Roma faza 8.

4. Ba ginötö tabaso Roma 8:21, hadia zinangea tasofu khöda samösa?

⁴ Ba Roma 8:21, taʼila ba daʼö wa no ifaduhuʼö khöda Yehowa wa hasambalö tohare gulidanö si bohou ba teʼefaʼö niha moroi ba wangosawuyu horö hegöi faʼamate. Iwaʼö ba ayati daʼö wa owua-wua dödöra me no teʼefaʼö ira ba no tobali ira ’ono Lowalangi andrö, si so lakhömi’. Hadia faduhu dödömö wa auri dania ndraʼugö ba gulidanö si bohou? Datatutunö hadia zinangea tafalua enaʼö auri ita ba daʼö.

”ERA-ERA NÖSI NIHA”

5. Hadia nitutunö Waulo ba Roma 8:4-13?

⁵ Baso Roma 8:4-13. Ba Roma faza walu, itutunö Waulo darua niha si faböʼö. So zanörö ”lala nösi niha” ba so zanörö ”lala geheha”. So zangumaʼö wa eluaha wehede Waulo andrö yaʼia daʼö ba wamaböʼöni niha Keriso ba zi tenga niha Keriso. Sindruhuniasa, manandrösa daʼö ba niha Keriso ”nikaoni andrö, niʼamoniʼö”. (Roma 1:7) Börö daʼö, he sanörö ”lala nösi niha” hegöi sanörö ”lala geheha”, yaʼira andre niha Keriso. Hadia gamaehutara?

6, 7. (a) Hadia manö geluaha wehede ’ösi niha’ ba Zura Niʼamoniʼö? (b) Hadia geluaha wehede ’ösi niha’ si so ba Roma 8:4-13?

⁶ Ngawua wehede ’ösi niha’ ba Zura Niʼamoniʼö, oya geluahania. Tola lafoʼeluaha ia tobali nagole si so ba mbotoda. (Roma 2:28; I Korindro 15:39, 50) Tola göi lafoʼeluaha ia tobali amakhaitada ba zoroi yomoda. Duma-dumania, iwaʼö Sura Niʼamoniʼö wa Yesu andrö ”maʼuwu Dawido ba ngaʼötö niha”, ba imane göi Faulo ba niha Yahudi wa yaʼira ’talifusönia, si oi yaʼira, si ha sambua tua’.​—Roma 1:3; 9:3.

⁷ Na simanö, hadia geluaha wehede Waulo ba Roma 8:4-13 me iwaʼö sanörö ”lala nösi niha”? Enaʼö taʼila wanema linia, datafaigi atö ba Roma 7:5. Imane Faulo, ”No ba nösi so ita, ba no abölö wangisö horö andrö, nifasugi goroisa andrö, ba ndroto-ndrotoda.” Itutunö Faulo wa dozi sanörö ”lala nösi niha”, laʼosambuaʼö dödöra ba laʼoʼö gisö-isö dödöra ba wamalua horö, lafalua hadia zomasi ira lafalua.

8. Hana wa ifangelama niha Keriso nibayoini Faulo faböi latörö ”lala nösi niha” andrö?

⁸ Hana wa ifangelama niha Keriso nibayoini Faulo faböi latörö ”lala nösi niha” andrö? Ba hana wa moguna göi ba niha Keriso iadaʼa wamangelama daʼö? Börö me dozi samosumange Yehowa si lö faröi, tola manö ibörötaigö wangofönaiʼö gisö-isö dödönia. Duma-dumania, isura Faʼulo wa so ösa ndra talifusöda ba Roma si tobali sawuyu ”dalura ira”. Tola manö, eluaha niwaʼö Waulo andrö yaʼia daʼö laʼofönaiʼö wangalui gö, wamalua amuata fohorö, mazui isö-isö dödö tanö böʼö ba waʼaurira. (Roma 16:17, 18; Filipi 3:18, 19; Yuda 4, 8, 12) Ba zi hauga kali, so samösa ndra matua ba mbanua niha Keriso ba Korindro samalua horö khö ”ndronga namania”. (I Korindro 5:1) Ba daʼö oroma wa moguna ifangelama niha Keriso me götö si föföna Faulo enaʼö tenga sanörö ”lala nösi niha” ira.​—Roma 8:5, 6.

9. Hadia manö zi lö farahu ba wamangelama nibeʼe ba Roma 8:6?

⁹ Moguna göi khöda iadaʼa wamangelama daʼö. Niha si no ara mamosumange Yehowa manö, tola ibörögö latörö ”lala nösi niha”. Hizaʼi, hadia daʼö geluaha niwaʼö Waulo wa tebai saʼae taʼangeraigö simane öda, halöwöda, fanörö-nörö, mazui soʼamakhaita ba wakawasa? Tenga daʼö geluahania. Na daʼö, no si toʼölö ba waʼauri. Yesu manö manga ia, ba ibeʼe göi gö ba niha böʼö. Aboto göi ba dödönia wa moguna molombase ia. Ba isura göi Faulo wa moguna sibai ba zi sambua fongambatö faʼorudu andrö.

10. Hadia geluaha ngawua wehede mangosambuaʼö ’gera-era’?

¹⁰ Hadia geluaha ngawua wehede Waulo me iwaʼö mangosambuaʼö ’gera-era’? Ngawua wehede Yunani niʼogunaʼö Waulo eluahania mangosambuaʼö gera-era ba wamalua hadia ia zi no itatugöi. Itutunö samösa sarjana wa moʼamakhaita geluaha ngawua wehede daʼa ba ”niha soʼameʼegö tödö hadia zomasi ia samösa, lö aetu idunö-dunö daʼö” ba iʼosambuaʼö dödönia ba gisö-isö dödönia andrö. Latehegö ifatörö waʼaurira gisö-isö dödöra andrö.

11. Hadia manö zi tola taʼofönaiʼö ba waʼaurida?

¹¹ Niha Keriso ba Roma, moguna lafareso waʼaurira samösa ba laʼalui hadia zi lö aetu laʼangeraigö. Hadia ha ”lala nösi niha” manö niʼangeraigöra? Iadaʼa, moguna göi taʼangeraigö hadia zabölö moguna ba waʼaurida. Hadia manö zasese tadunö-dunö ba niha? Hadia manö zabölö omasi ita tafalua? So zawena aboto ba dödö wa daʼö manö niʼangera-ngeraigöra ha ngawalö gö, fowöli gama-gama ba nomo, fowöli nukha si bohou, fangalui kefe soya mazui feʼamöi manörö-nörö. Lö fasala daʼa, ba no si toʼölö ba waʼaurida fefu daʼö. Duma-dumania, iʼasogö agu Yesu me so ia ba walöwa, ba ifarou göi dödö Dimoteo Faulo enaʼö ibadu ”nagu maʼifu” faböi mofökhö ia. (I Timoteo 5:23; Yohane 2:3-11) Hizaʼi, tenga agu zabölö moguna ba waʼaurira. Hewisa göi ita? Hadia zabölö taʼofönaiʼö ba waʼaurida?

12, 13. Moguna mangelama ita ba ngawalö hadia ia zi lö aetu taʼangeraigö. Hadia mbörö?

¹² Imane Faulo, ”Era-era nösi niha sa, ba no faʼamate.” (Roma 8:6) Hadia geluahania? Na sanörö ”lala nösi niha” ita, tola tekiko wahuwusada khö Yehowa iadaʼa ba taya saʼae dötönaföda yaʼia daʼö faʼauri ba zi so miföna. Hizaʼi, tola lö alua daʼa börö me tola tebulö zi samösa niha. Hadia itörö tödöu ndra matua samalua amuata fohorö ba Korindro si no muʼefasi ba gangowuloa? No ibulöʼö waʼaurinia ba ibato woloʼö gisö-isö dödönia si fasala. Ifuli ifosumange Yehowa ba lala si tefaudu.​—II Korindro 2:6-8.

¹³ Duma-duma si lö sökhi ndra matua andrö sanandrösa ba wanörö ”lala nösi niha”, hizaʼi tola ibulöʼö waʼaurinia. Simanö göi, na so niha Keriso iadaʼa soloʼö gisö-isö dödönia si fasala ba wamalua horö ba isawö goi-goi Yehowa, tola nasa ibulöʼö waʼaurinia. Famangelama nibeʼe Waulo andre zangoʼou yaʼita ba wombulöʼö hadia ia zinangea tabulöʼö ba waʼaurida.

”ERA-ERA GEHEHA”

14, 15. (a) Moloʼö Waulo, hezo taʼosambuaʼö gera-erada? (b) So zi tenga eluaha wangosambuaʼö ’gera-era ba geheha’. Hadia daʼö?

¹⁴ Me no aefa itutunö Faulo hadia lua-luania na taʼosambuaʼö ’gera-erada ba nösi niha’, itutunö göi, ”Era-era geheha, ba no faʼauri ba faʼohahau dödö.” Hawaʼasökhi howu-howu si tola tatema!

¹⁵ Hizaʼi, ”era-era geheha” tenga daʼö geluahania wa lö tebulö laʼangera-ngeraigö manö ba fahuo-huo manö ira sanandrösa khö Yehowa mazui Sura Niʼamoniʼö. Duma-dumania, ono mbanua Lowalangi ba götö siföföna, lafalua göi halöwö si toʼölö lafalua niha böʼö. Manga ba mamadu idanö ira, mangowalu, laʼebuaʼö ndraonora, ba lalau mohalöwö.​—Mareko 6:3; I Tesalonika 2:9.

16. Hadia zabölö iʼofönaiʼö ba waʼaurinia Faulo?

¹⁶ Lö iʼofönaiʼö Waulo hegöi niha Keriso ba götö si föföna ngawalö hadia ia zi toʼölö andrö. Duma-dumania, aboto ba dödöda wa Faulo andrö samazökhi ose. Hizaʼi, tenga daʼö niʼofönaiʼönia ba waʼauri. Sabölö iʼofönaiʼö Waulo ba waʼaurinia yaiʼa daʼö wamosumange Lowalangi. Iʼosambuaʼö dödönia ba halöwö fanuriaigö hegöi ba wamahaʼö niha böʼö. (Baso Halöwö Zinenge 18:2-4; 20:20, 21, 34, 35.) Ira talifusöda ba Roma moguna laʼoʼö duma-duma Waulo, simanö göi ita.​—Roma 15:15, 16.

17. Hadia mbuania na taʼosambuaʼö dödöda ba ”geheha”?

¹⁷ Hewisa waʼaurida na taʼosambuaʼö dödöda ba wamosumange Yehowa? Imane Roma 8:6, ”Era-era geheha, ba no faʼauri ba faʼohahau dödö.” Na taʼosambuaʼö dödöda ba geheha, tatehegö ibeʼe khöda wanuturu lala geheha Yehowa ba tafahaʼö ita hewisa lala wangera-ngerania. No ifabuʼu Yehowa faʼauri safönu faʼowua-wua dödö hegoi faʼohahau dödö iadaʼa, ba töra-töra nasa faʼauri si lö aetu ba zi so miföna.

18. Hewisa wa tola ohahau dödöda na taʼosambuaʼö dödöda ba ”geheha”?

¹⁸ Hadia geluahania me imane Faulo wa tasöndra waʼohahau dödö na taʼosambuaʼö dödöda ba ”geheha”? Fefu niha omasi ira ohahau dödöra, mendrua manö na ohau-hau wangera-ngerara, hizaʼi lö ato zanöndra daʼö. Taʼandrö sibai saohagölö khö Yehowa börö me tola taʼokhögö wangera-ngera sohau-hau si lö irai tebulö. Tola göi taʼokhögö waʼohahau dödö ba zi sambua omo hegöi ba mbanua niha Keriso. Börö me lö moʼahonoa ita, itaria fatiti ita khö ndra talifusöda. Ba ginötö alua daʼa, tola taʼoʼö mene-mene nibeʼe Yesu, ”Atulöʼö ndraʼugö khö dalifusöu.” (Mataiʼo 5:24) Törö tödöu wa ira talifusöda lafosumange göi Yehowa, ”Lowalangi waʼohahau dödö andrö”.​—Roma 15:33; 16:20.

19. Hadia zabölö tohude nitemada me so khöda waʼohahau dödö?

¹⁹ Na taʼosambuaʼö dödöda ba ”geheha”, tola teʼatulöʼö ita khö Lowalangi. Isura samaʼeleʼö sotöi Yesaya, ”No aro dödö, lö öbulö-bulöʼö wangorifi; khöu saʼae ladöna-döna.”​—Yesaya 26:3; baso Roma 5:1.

20. Hana wa taʼandrö sibai saohagölö ba mene-mene nisura ba Roma faza 8?

²⁰ Fefu ita, he si so fanötöna sauri ba zorugo mazui ba gulidanö, tola tasöndra mbua moroi ba mene-mene si sökhi si so ba Roma faza 8. Taʼandrö sibai saohagölö me no ifarou ita Sura Niʼamoniʼö wa moguna taʼosambuaʼö dödöda ba wamosumange Yehowa, tenga gisö-isö dödöda. Aboto ba dödöda na taʼosambuaʼö dödöda ba ”geheha”, tola tatema mbuala sahöli-höli dödö. Isura Faulo, ”Faʼauri si lö aetu ba khö Keriso Yesu, Soʼaya yaʼita.”​—Roma 6:23.