”Döna-Döna khö Yehowa ba Lau zi Sökhi”

1. Me ifazökhi niha Yehowa, hadia waʼabölö si tohude nibeʼenia?

IFAZÖKHI niha Yehowa si fao faʼabölö si tohude. Ibeʼe khöda lala wangera-ngera si tola manolo yaʼita ba wangasiwai gabula dödö hegöi ba woʼangeraigö si so miföna. (Gamaedola 2:11) Ibeʼe khöda waʼabölö, irege tola tafalua hadia ia niʼera-erada ba tola mofozu gohitö dödöda. (Filifi 2:13) Ibeʼe göi khöda dödö side-ide, sotatugöi si sökhi hegöi si lö sökhi. Tödöda side-ide zanolo yaʼita ba wotimbagö horö hegöi ba wamareso zalada.​—Roma 2:15.

2. Hadia nitötöna Yehowa khöda sanandrösa ba wangogunaʼö faʼabölöda?

² Itötöna Yehowa enaʼö taʼogunaʼö waʼabölöda andrö ba lala si sökhi. Hadia mbörö? Börö me iʼomasiʼö ita ba iʼila wa tola owua-wua dödöda ba ginötö taʼogunaʼö buala si no ibeʼe khöda. Duma-dumania, imane ba Mbuku Niʼamoniʼö Heberaiʼo, ”Lua-lua nikhoi dödö zowölö-ölö, ba no hare,” ba ”fefu hadia ia niʼilamö ölau tangau, ba waʼabölömö andrö, ba ölau”. (Gamaedola 21:5; Zangombakha 9:10) Imane ba Mbuku Niʼamoniʼö Yunani, ”Ba talau saʼae zi sökhi, me no baŵania khöda, ba niha fefu,” ba ”faoma mitolo nawömi, balazi hadia nitema zamösana, buala andrö”. (Galatia 6:10; I Fetero 4:10) Ba daʼa taʼila wa omasi Yehowa na tafalua hadia ia zoguna khöda samösa hegöi ba niha böʼö.

3. Hadia zi tebai ifalua niha?

³ Omasi Yehowa na taʼogunaʼö waʼabölöda. Hizaʼi, iʼila wa so zi tebai tafalua. Duma-dumania, tebai taheta walömoʼahonoada, horö hegöi faʼamate. (I Razo 8:46) Tebai tafatörö nawöda niha börö me fefu ita tola tahalö gangetula samösa. Gofu hewisa waʼatua-tua niʼokhögöda hegöi si no irai tatörö, tebai nasa takhamö lala wangera-ngera Yehowa.​—Yesaya 55:9.

4. Hadia nitutunöda ba wamahaʼö andre?

⁴ Moguna böi aetu tatehegö khö Yehowa ba wameʼe khöda fanuturu lala, faduhu dödöda wa hasambalö itolo ita ba ifalua hadia ia zi tebai tafalua ba waʼaurida. Hizaʼi, omasi göi Yehowa na taʼangeraigö hadia manö zi tola tafalua ba wangasiwai gabula dödö hegöi ba wanolo niha böʼö. (Baso Zinunö 37:3.) Moguna ’tadöna-döna khö Yehowa ba talau zi sökhi’. Moguna göi ’tafalua waʼadölö dödö’. Hewisa enaʼö tola tafalua daʼa? Datatutunö duma-duma niha sangodaligö Yehowa simane Noakhi, Dawido, hegöi niha tanö böʼö si lö faröi ba wamosumange Lowalangi. Ba daʼö tola taʼila wa so zi tebai lafalua, hizaʼi lafili ba wangosambuaʼö tödöra ba zi tola lafalua.

BA GINÖTÖ IFASUI ITA FAʼALÖSÖKHI

5. Tutunö zalua khö Noakhi.

⁵ Auri Noakhi ba ginötö ”anönö danö horö” ba safönu faʼalösökhi. (I Moze 6:4, 9-13) Hewaʼae iʼila Noakhi wa hasambalö ihori Yehowa waʼalösökhi salua ba gulidanö, hizaʼi sindruhu-ndruhu fatuwu ia ba nifalua niha. Ba zalua andre, aboto ba dödö Noakhi wa so zi tebai ifalua, hizaʼi iʼila göi hadia zi tola ifalua.

6, 7. (a) Hadia zi tebai ifalua Noakhi? (b) Hewisa wa tola fagölö zalua khöda simane salua khö Noakhi?

⁶ Si tebai ifalua Noakhi: Lö faröi Noakhi ba wanuriaigö turia wamangelama moroi khö Yehowa. Hizaʼi, tebai ifaso niha ba wanemaʼö daʼö. Lö hadöi si tola ifalua enaʼö alio Anönö Danö Idanö. Faduhu dödö Noakhi wa hasambalö ifalua zi no ifabuʼu Yehowa ba wangohori faʼalösökhi. Faduhu dödönia wa ifalua daʼö Lowalangi ba ginötö si tefaudu.​—I Moze 6:17.

⁷ No so ita göi ba gulidanö safönu faʼalösökhi, ba taʼila wa no ifabuʼu Yehowa wa hasambalö ihori fefu daʼö. (I Yohane 2:17) Fatua lö alua daʼö, tebai tafaso niha ba wanema ’turia somuso dödö sanandrösa ba Mbanua Lowalangi’. Ba lö hadöi si tola tafalua enaʼö alio tohare ”wamakao sabölö-bölö”. (Mataiʼo 24:14, 21) Simane Noakhi, moguna taʼokhögö wamati saro, faduhu dödöda wa ba zi lö aratö hasambalö ihori waʼalösökhi andre Lowalangi. (Zinunö 37:10, 11) Faduhu dödöda wa lö itehegö Yehowa na itugu ara alua waʼalösökhi ba gulidanö andre töra moroi ba ginötö si no itatugöi.​—Habakuki 2:3.

8. Hezo iʼosambuaʼö dödönia Noakhi? (Faigi gambara ba wamobörö wamahaʼö.)

⁸ Si tola ifalua Noakhi: Moroi na afatö dödönia ba zi tebai ifalua, iʼosambuaʼö dödönia ba zi tola ifalua. Lö faröi Noakhi ba wanuriaigö turia wamangelama moroi khö Yehowa. (II Fetero 2:5) Halöwö daʼa zanolo yaʼia irege aro wamatinia. Tenga ha fanuriaigö manö nifaluania, iʼoʼö göi wanuturu lala moroi khö Yehowa ba wamazökhi owo.​—Baso Heberaiʼo 11:7.

9. Hewisa wa tola taʼoʼö duma-duma Noakhi?

⁹ Simane Noakhi, oya zi tola tafalua ba ”wangai halöwö Zoʼaya”. (I Korindro 15:58) Duma-dumania, tola fao ita ba wamazökhi nahia hegöi ba wondrorogö Balai Mbanua Lowalangi, Balai Kebaktian, falulu fohalöwö ita ba wangai halöwö ba kebaktian wilayah hegöi ba kebaktian regional, mohalöwö ba gödo ndraha mazui ba RTO. Sabölö tohudenia, owölö-ölö ita ba wamalua halöwö fanuriaigö, enaʼö itugu aro dötönaföda ba zi so miföna. Itutunö samösa talifusöda ira alawe si lö faröi wa ba ginötö fahuo-huo ia ba niha böʼö sanandrösa ba howu-howu niʼasogö Mbanua Lowalangi, aboto ba dödönia wa so niha si no taya dötönafö ba lawaʼö wa lö irai taya gabula dödö nitaögöra. Simane nitutunö dalifusöda andre, taʼokhögö dötönafö, ba daʼö zangaʼaroʼö yaʼita ba ginötö fahuo-huo ita ba niha böʼö sanandrösa ba daʼö. Tötönafö daʼa zanolo yaʼita enaʼö lö aetu tagohi waʼauri si lö aetu!​—I Korindro 9:24.

BA GINÖTÖ TAFALUA HORÖ

10. Tutunö zalua khö Dawido.

¹⁰ Niha si lö faröi Razo Dawido, ba sindruhu-ndruhu iʼomasiʼö ia Yehowa. (Halöwö Zinenge 13:22) Hizaʼi, ifalua horö sebua Dawido, ihoröni Mbaseba. Sabölö lö sökhinia, ibiniʼö zala nifaluania andrö ba so ba dödönia wamunu foʼomo Mbaseba sotöi Uria ba wasuwöta. Ifaʼoheʼö zurania Dawido sameʼe fanuturu lala enaʼö mate Uria! (II Zamueli 11:1-21) Ba gafuriatania, laʼila niha horö nifalua Dawido andrö. (Mareko 4:22) Me alua daʼö, hadia nifalua Dawido?

11, 12. (a) Me no aefa ifalua horö Dawido, hadia ia zi tebai ifalua saʼae? (b) Hadia nifalua Yehowa khöda na tafalalini gera-erada?

¹¹ Si tebai ifalua Dawido: Tebai ibulöʼö zi no ifalua. Ba tefakao ia börö horö nifaluania andrö gasa-gasa waʼaurinia. (II Zamueli 12:10-12, 14) Andrö wa moguna mamati ia. Faduhu dödönia wa na sindruhu-ndruhu ifalalini gera-erania, iʼefaʼö horönia Yehowa ba itolo ia ba wanaögö lua-lua horö nifaluania andrö.

¹² Börö me lö moʼahonoa ita, tola tafalua horö. Hizaʼi, so zala sabölö ebua moroi ba danö böʼö, ba tola manö tebai tabulöʼö zala nifaluada andrö irege tefakao ita. (Galatia 6:7) Hizaʼi, faduhu dödöda ba nifabuʼu Lowalangi, na tafalalini gera-erada itolo ita ba wanaögö famakao andrö hewaʼae na börö zalada samösa wa tola alua ia.​—Baso Yesaya 1:18, 19; Halöwö Zinenge 3:19.

13. Hadia nifalua Dawido ba wangaʼazökhi mangawuli fahuwusania khö Yehowa?

¹³ Si tola ifalua Dawido: Omasi ia ifuli iʼazökhi wahuwusania khö Yehowa. Hewisa wamaluania daʼö? Itemaʼö wanolo moroi khö Yehowa. Duma-dumania, itema mene-mene moroi khö Natano, samaʼeleʼö khö Yehowa. (II Zamueli 12:13) Mangandrö göi Dawido khö Yehowa ba iʼombakhaʼö horö nifaluania, daʼa zangoromaʼö wa sindruhu-ndruhu ifuli omasi ia falulu fohalöwö khö Yehowa. (Zinunö 51:3-19) Moroi na isala-salaikö manö ia tödönia, ihalö wamahaʼö ba zala nifaluania andrö. Lö irai tumbu ba dödönia saʼae ba wamalua horö si no irai ifalua. Hauga fakhe aefa daʼö, mate ia. Hizaʼi, itörö tödö Yehowa ia börö me lö faröi ia.​—Heberaiʼo 11:32-34.

14. Hadia wamahaʼö nihalöda moroi ba duma-duma Dawido?

¹⁴ Hadia wamahaʼö nihalöda moroi ba duma-duma Dawido? Na no tafalua horö sebua, moguna tafalalini gera-erada soroi ba dödö, tatutunö horö nifaluada andrö khö Yehowa, ba taʼandrö enaʼö ibeʼe aefa ia khöda. (I Yohane 1:9) Moguna göi tafatunö khö ndra satua sokubaloi, börö me tola latolo ita ba wangaʼazökhi mangawuli fahuwusada khö Yehowa. (Baso Yakobo 5:14-16.) Ba ginötö tatema wanolo moroi khö Yehowa, no taforomaʼö wa faduhu dödöda ba zi no ifabuʼu wa iʼefaʼö zalada. Moguna göi tafahaʼö ita ba zala nifaluada, ba lö aetu tafosumange Yehowa si fao faʼafaduhu dödö.​—Heberaiʼo 12:12, 13.

SALUA TANÖ BÖʼÖ

15. Hadia wamahaʼö nihalöda moroi ba duma-duma Khana?

¹⁵ Tola göi öʼangeraigö niha si lö faröi tanö böʼö nisura ba Zura Niʼamoniʼö si faduhu tödö khö Yehowa, ba samalua hadia zi tola lafalua ba ginötö göna ira abula dödö. Duma-dumania, Khana. Tebai moʼono ia ba tebai ibulöʼö zalua andrö. Hizaʼi, faduhu dödönia wa hasambalö irara dödönia Yehowa. Andrö, lö iböhöli ba wangai halöwö ba tabernakel ba itutunö khö Yehowa hadia ia nirasoinia andrö ba wangandrö. (I Zamueli 1:9-11) No duma-duma si sökhi daʼa! Ba ginötö mofökhö ita mazui tataögö gabula dödö tanö böʼö si tebai tabulöʼö, tola tatouʼö khö Yehowa noro dödöda andrö ba faduhu dödöda wa hasambalö iʼameʼegö tödö ita. (I Fetero 5:6, 7) Tafalua hadia zi tola tafalua enaʼö tasöndra mbua moroi ba gangowuloa niha Keriso hegöi ba waö-waö halöwö tanö böʼö si no ihenaigö organisasi Yehowa.​—Heberaiʼo 10:24, 25.

16. Hadia wamahaʼö nihalö zatua moroi khö Zamueli?

¹⁶ Hewisa göi zatua si lö faröi si so iraono si no mondröi ba wamosumange Yehowa? Samaʼeleʼö sotöi Samueli, tebai ifaso ndraononia si no ebua-bua enaʼö lö faröi ira khö Lowalangi. (I Zamueli 8:1-3) Itouʼö ba danga Yehowa fefu gabula dödönia. Hizaʼi, ifalua hadia zi tola ifalua enaʼö lö faröi ia khö Lowalangi ba iʼomusoiʼö dödö Namania si so ba zorugo. (Gamaedola 27:11) Iadaʼa, ato göi zatua si no tobali niha Keriso, alua khöra zimane daʼö. Faduhu dödöra wa simane duma-duma nibeʼe Yesu sanandrösa khö zi samösa ama sangokhögö ono matua sangohorigö anaʼania, omasi Yehowa ba wanemaʼö mangawuli niha samalua horö si no mamalalini era-era. (Luka 15:20) Hizaʼi, tola laʼosambuaʼö dödöra ira satua si no tobali niha Keriso ba wangoromaʼö faʼalöfaröi khö Yehowa, ba ladöna-döna wa duma-dumara andrö tola möi fondrönisi dödö ndraonora enaʼö lafuli ira khö Yehowa.

17. Hana wa no duma-duma si sökhi khöda lakha mbanua si numana?

¹⁷ Duma-duma si sökhi tanö böʼö yaʼia daʼö lakha mbanua si numana sauri ba götö Yesu. (Baso Luka 21:1-4.) Lö si tola ifalua sanandrösa ba niha sangai si tenga tana khöra ba bait, ba tebai ibulöʼö zindruhu sanandrösa ba waʼaurinia wa yaʼia niha si numana. (Mataiʼo 21:12, 13) Hizaʼi, faduhu dödönia ba wamarou dödö nibeʼe Yehowa enaʼö ituhini wamosumange satulö. Oböwö ia ba ibeʼe ”dombua rimi”, fefu gefe niʼokhögönia. Iforomaʼö ira alawe si lö faröi andre wa sindruhu-ndruhu iʼodaligö Yehowa. Iʼila wa na iʼofönaiʼö wamosumange Yehowa ba waʼaurinia, hasambalö iʼasogö fefu zoguna khönia Yehowa. Simanö göi ita, na taʼofönaiʼö Mbanua Lowalangi ba waʼaurida, daʼö zangoromaʼö wa faduhu dödöda khö Yehowa ba ha sambalö iʼasogö fefu zoguna khöda.​—Mataiʼo 6:33.

18. Beʼe duma-duma samösa dalifusöda sangokhögö fangera-ngera satulö.

¹⁸ Iadaʼa, ato ndra talifusöda sangoromaʼö faʼafaduhu dödö khö Yehowa, laʼosambuaʼö dödöra ba zi tola lafalua tenga ba zi tebai lafalua. Angeraigö sanandrösa khö dalifusöda sotöi Malcolm si lö faröi irugi ba waʼamatenia me döfi 2015. Ba zi hauga fakhe, oya zi sökhi hegöi si lö sökhi salua khönia hegöi khö woʼomonia. Imane, ”Itaria, abua khöda wanahö faʼauri andre, lö tatu-tatu, ba abua wanaögö yaʼia.” Hadia mene-mene nibeʼe Malcolm? ”Angandrö enaʼö itugu sökhi ba lö tebulö wamosumangemö Yehowa si tefaudu ba waʼabölömö. Osambuaʼö dödömö ba zi tola öfalua tenga ba zi tebai öfalua.”a

19. (a) Hana wa tefaudu sibai ayati nifili ba ndröfi 2017 andre? (b) Hewisa wa tola tafalua ayati 2017 andre ba waʼaurida?

¹⁹ Itugu ”tedou-dou manö walösökhi” ba gulidanö andre, daʼö mbörö wa hasambalö itugu oya gabula dödö nitaögöda. (II Timoteo 3:1, 13) Börö daʼö, böi taʼangera-ngeraigö manö gabula dödö salua khöda. Hizaʼi, moguna taʼokhögö waʼafaduhu dödö saro khö Yehowa ba taʼosambuaʼö dödöda ba zi tola tafalua. Daʼö mbörö wa sökhi sibai ayati nifili ba ndröfi 2017, ”Döna-döna khö Yehowa ba lau zi sökhi!”​—Zinunö 37:3.