Enaʼö Sökhi Wangogunaʼöu Buala Nibeʼe Khöu Yaʼia Daʼö Fangai Angetula Samösa

1, 2. (a) Hadia niwaʼö niha sanandrösa ba wangai angetula samösa? (b) Hadia nifahaʼö Zura Niʼamoniʼö khöda sanandrösa ba wangai angetula samösa, ba hadia wanofu-nofu nitutunöda?

SANANDRÖSA ba wangai angetula, imane samösa ira alawe khö nawönia, ”Yaʼugö manö zoʼetuʼö khöda. Afökhö högögu woʼangeraigö.” Lö omasi ia iʼogunaʼö buala si sökhi moroi khö Zomböi, yaʼia daʼö ba wangai angetula samösa. Hewisa göi ndraʼugö? Hezoso zabölö omasiʼö, hadia yaʼugö samösa zangai angetula mazui omasiʼö na niha böʼö zangai angetula khömö? Hewisa dödöu sanandrösa ba wangai angetula samösa?

² No faböʼö-böʼö niwaʼö niha sanandrösa ba wangai angetula samösa. So zangumaʼö wa tebai tahalö gangetula samösa, börö me no itatugöi Lowalangi hadia nifaluada. So göi zangumaʼö wa tebai tahalö gangetula samösa börö me no mutatugöi hezo ndrege zi tola tafalua. Hizaʼi, ifahaʼö ita Sura Niʼamoniʼö wa tewöwöi ita si fao faʼabölö ba tetehegö khöda ba wangai angetula si sökhi. (Baso Yosua 24:15.) Ba Zura Niʼamoniʼö, tola göi tasöndra wanema li moroi ba wanofu-nofu andre: Hadia so nola-ola ba wangai angetula samösa? Hewisa zinangeania wangogunaʼöda zi no tetehegö khöda ba wangai angetula? Hewisa wangoromaʼöda wa sindruhu-ndruhu taʼomasiʼö Yehowa ba gangetula nihalöda? Hewisa wangoromaʼöda wa taʼameʼegö tödö gangetula niha böʼö?

HADIA WAMAHAʼÖ SI TOLA TAHALÖ MOROI KHÖ YEHOWA HEGÖI YESU?

3. Tola ifalua gofu hadia ia Yehowa. Hewisa wangogunaʼönia daʼö?

³ Tola ifalua gofu hadia ia Yehowa, ba tola tafahaʼö ita moroi ba lala wamaluania daʼö. Duma-dumania, ifili ndraono Gizaraʼeli Yehowa tobali ono mbanuania, ”soi tana khönia”. (V Moze 7:6-8) So dani wa ihalö gangetula simane daʼö Yehowa. Omasi Ia ifalua zi no ifabuʼu khö Gaberahamo, niha si fahuwu khönia. (I Moze 22:15-18) Aefa daʼö, ifalua gofu hadia ia Yehowa si fao faʼomasi hegöi faʼatulö. Tola taʼila daʼö ba ginötö ihuku ndraono Gizaraʼeli me lö laʼoʼö niwaʼönia. Ba ginötö laʼandrö wangefa khö Yehowa soroi ba dödö ba zala si no lafalua, iforomaʼö khöra waʼomasi hegöi faʼahakhö dödö Yehowa. Imane, ”Ufuli dania ufadöhö lua-lua wangerogöra yaʼo andrö, ba aoha gölögu wangomasiʼö yaʼira.” (Hosea 14:5) Ibeʼe khöda duma-duma si sökhi Yehowa ba ginötö iʼogunaʼö kuasonia ba wanolo niha böʼö!

4, 5. (a) Haniha zi oföna sibai manema buala ba wangai angetula samösa, ba hewisa wangogunaʼönia daʼö? (b) Hadia wanofu sinangea tasofu khöda zamösana?

⁴ Yehowa zamazökhi malaʼika hegöi niha gulidanö. Ifazökhi ira si fao faʼabölö ba wangai angetula samösa. Si oföna nifazökhi Yehowa yaʼia daʼö Yesu. Tefazökhi ia simane famaedo Lowalangi ba tetehegö khönia ba wangai angetula samösa. (Kolose 1:15) Hewisa wangogunaʼö Yesu zi no tetehegö khönia? Fatua lö möi Yesu ba gulidanö, lö faröi ia khö Lowalangi ba lö fao ia khö Zatana ba wamadaö. Me so Yesu ba gulidanö, itimbagö wanandraigö moroi khö Zatana. (Mataiʼo 4:10) Ba mbongi fatua lö mate ia, si fao faʼafaduhu dödö omasi ia ifalua hadia zomasi Namania. Imane, ”He Ama, enaʼö na öfataluʼiʼö khögu mako andrö, ba böi yaʼitörö zomasi ndraʼo, ha somasi ndraʼugö.” (Luka 22:42) Hadia sindruhu-ndruhu taʼoʼö Yesu ba taʼogunaʼö hadia zi no tetehegö khöda ba wamosumange Yehowa hegöi ba wamalua somasi ia?

⁵ Tola taʼoʼö Yesu börö me tewöwöi ita simane famaedo Lowalangi. (I Moze 1:26) Hizaʼi, tebai tafalua gofu hadia manö simane Yehowa. Itutunö Taromali Lowalangi wa no ibeʼe nola-ola Yehowa ba zi no tetehegö khöda andrö, ba itötöna enaʼö tatemaʼö daʼö. Duma-dumania, ba zi sambua omo, foʼomo ira alawe ifosumange woʼomonia. Ba laʼoʼö göi li zatuara iraono. (Efeso 5:22; 6:1) Hewisa nola-ola daʼö molua-lua ia ba lala wangogunaʼöda hadia zi no tetehegö khöda? Fanema li ba wanofu daʼa zotatugöi faʼauri si lö aetu nitemada ba zi so miföna.

SI TOLA HEGÖI SI TEBAI TAFALUA BA WANGAI ANGETULA

6. Beʼe duma-duma sangoromaʼö hana wa moguna so nola-ola ba zi no tetehegö khöda.

⁶ Hadia tola möi faʼohahau dödö sindruhu na taʼoʼö nola-ola si no mutatugöi khöda? Tola! Hadia mbörö? Börö me möi folumöʼöda daʼö. Duma-dumania, khalaigö atö hewisa na taʼohe hondra ba mbanua saröu sibai, hizaʼi lö nibeʼe ndra samatörö goi-goi sanandrösa ba wolohe hondra ba daʼö. Faʼabölö-bölö hegöi lala nitörö, oi ba zomasi dödöra samösa. Hadia ohahau dödömö wanörö lala simane daʼö? Tatu manö löʼö. Moguna so goi-goi mazui nola-ola enaʼö fefu niha tola lasöndra waʼohahau dödö. Datatutunö duma-duma moroi ba Zura Niʼamoniʼö sangoromaʼö wa so mbua moroi ba nola-ola nibeʼe Yehowa.

7. (a) Hadia gamaehuta Gadamo moroi ba gurifö? (b) Tutunö sambua lala wangogunaʼö Gadamo mbuala si no tebeʼe khönia.

⁷ Ba ginötö ifazökhi niha siföföna Yehowa sotöi Adamo, ibeʼe khönia mbuala ba wangai angetula samösa simane nibeʼenia khö ndra malaʼika. Hizaʼi lö ibeʼe daʼö ba gurifö. Hewisa wangogunaʼö Gadamo mbuala andrö ba lala si sökhi? Si fao faʼomuso dödö ibeʼe döi gurifö. Hadia nifalua Lowalangi sanandrösa ba gurifö? ”Iʼohe ba niha, enaʼö ifaigi, hadia döi ibeʼe.” Me no aefa ifaigi fefu gurifö andrö Adamo, ibeʼe döira zamösana. Lö ifalalini Yehowa hadia döi nibeʼe Gadamo. Andrö, ”hadia siʼai nibeʼe niha töi zonoso andrö, daʼö döira dania”.​—I Moze 2:19.

8. Hewisa wa tola fasala wangogunaʼö Gadamo mbuala nibeʼe khönia, ba hadia lua-luania?

⁸ Ibeʼe halöwö khö Gadamo Yehowa enaʼö ibaliʼö faradaiso zi sagörö ulidanö andre. Imane khönia, ”Miʼoʼono ba miʼoyaʼö ami, mifoʼösi gulidanö ba mibeʼe barö mbawami, samatörö iʼa ba nasi ami, awö wofo ba dalu mbanua, awö zaliwa-liwa ba danö fefu, sanana-nana ba gulidanö.” (I Moze 1:28) Hizaʼi, isawö Adamo goi-goi si no ihonogöi Yehowa, ifili ba wemanga mbua geu si tebai muʼa. Börö me fasala wangogunaʼö Gadamo mbuala nibeʼe khönia, andrö wa no ngahönö fakhe aekhu niha ba horö. (Roma 5:12) Datatörö tödöda lua-lua gangetula si fasala si no ihalö Adamo. Daʼö zamarou tödöda enaʼö taʼogunaʼö mbuala andrö ba lala si sökhi ba tatemaʼö nola-ola nibeʼe Yehowa khöda.

9. Hadia zi tola lafili iraono Gizaraʼeli si no ibeʼe Yehowa khöra, ba hadia zi no lafabuʼu wa lafalua?

⁹ Fefu niha latema horö ondröita hegöi faʼamate moroi khö Gadamo ba Khawa. Hizaʼi, tebeʼe nasa khöda ginötö ba wofili hadia zomasi ita. Oroma daʼa moroi ba lala nifalua Yehowa ba ndraono Gizaraʼeli. Itehegö khöra Yehowa ba wamili hadia omasi ira tobali soi tana khönia mazui löʼö. (II Moze 19:3-6) Lahalö gangetula iraono Gizaraʼeli wa tobali ira ono mbanua Lowalangi ba latemaʼö hadia zi no ihonogöi Lowalangi. Lamane, ”Fefu hadia ia niwaʼö Yehowa, ba maʼoʼö!” (II Moze 19:8) Hizaʼi, lö ara aefa daʼö lasawö hadia ia zi no lafabuʼu khö Yehowa. Tola tafahaʼö ita ba zalua andre. Böi aetu taʼameʼegö tödö mbuala si no tebeʼe khöda ba böi aetu ahatö ita khö Yehowa ba taʼoʼö goi-goinia.​—I Korindro 10:11.

10. Hadia manö duma-duma si so ba Heberaiʼo faza 11 sangoromaʼö wa niha si lö moʼahonoa tola laʼogunaʼö mbuala nibeʼe khöra ba wamosumange Lowalangi? (Faigi gambara ba wamobörö wamahaʼö.)

¹⁰ Ba Heberaiʼo faza 11, so 16 döi ndra matua ba ira alawe samili ba woloʼö nola-ola si no ihonogöi Yehowa. Buania, oya howu-howu nitemara ba laʼokhögö dötönafö sahöli-höli dödö ba zi so miföna. Duma-dumania Noakhi. Mamati ia irege ifili ba woloʼö fanuturu lala nibeʼe Lowalangi khönia ba wangehaogö nowo irege teʼorifi nösi nomonia hegöi ngaʼötönia ba zi so miföna. (Heberaiʼo 11:7) Simanö göi Gaberahamo ba Sara, laʼoʼö hadia niwaʼö Lowalangi ba möi ira ba danö si no ifabuʼu khöra. Hewaʼae tola ”mangawuli ira” ba danö Guri, hizaʼi laʼosambuaʼö dödöra ba nifabuʼu Lowalangi ba zi so miföna. Iwaʼö Sura Niʼamoniʼö wa ”si sökhi niʼaluira”. (Heberaiʼo 11:8, 13, 15, 16) Itimbagö göi harato si so ba Miserai Moze ba ifili ”itaögö wamakao, awö mbanua Lowalangi, moroi isöndra waʼomuso dödö ba horö, si lö arara”. (Heberaiʼo 11:24-26) Dataʼohiaʼö wamatira, taʼameʼegö tödö mbuala si sökhi nibeʼe khöda, ba taʼogunaʼö ia ba wamalua somasi Lowalangi.

11. (a) Hadia howu-howu sebua si tebai tatema na niha böʼö zangai angetula khöda? (b) Hadia zamarou tödömö ba wangogunaʼö zi no tetehegö khömö ba lala si sökhi?

¹¹ Te abölö aoha na niha böʼö zangai angetula khöda. Hizaʼi, lö irai tatema howu-howu sebua na tafalua daʼö. Hadia daʼö? Itutunö Sura Niʼamoniʼö ba V Moze 30:19, 20. (Baso.) Ba ayati 19, ibeʼe ginötö ba ndraono Gizaraʼeli Yehowa ba wofili. Ba ayati 20, ibeʼe khöra ginötö Yehowa ba wombulöʼö faʼaurira enaʼö tola laforomaʼö hewisa waʼomasira khönia. Tola göi tafili ba wamosumange Yehowa. Tola göi taʼogunaʼö mbuala nibeʼenia khöda ba wamosumange yaʼia hegöi ba wangoromaʼö hewisa waʼomasida khönia!

BÖI FASALA WANGOGUNAʼÖDA BUALA BA WANGAI ANGETULA SAMÖSA

12. Ba wangai angetula samösa, hadia zi tebai tafalua?

¹² Duma-dumania, so mbuala sebua böli nibeʼemö khö nawömö. Khalaigö atö hewisa waʼafökhö dödömö na itiboʼö mbuala andrö ba naha zasao mazui na iʼogunaʼö daʼö ba wangafökhöiʼö tödö niha böʼö. No ibeʼe khöda Yehowa mbuala ba wangai angetula samösa. Andrö, afökhö dödönia na iʼila wa laʼogunaʼö mbuala andrö ba lala si lö tefaudu hegöi ba wangai angetula si lö sökhi mazui ba wangafökhöiʼö tödö niha böʼö. Imane Sura Niʼamoniʼö wa ba ”götö safuria” so niha ”si tebai mangandrö saohagölö”. (II Timoteo 3:1, 2) Andrö, hewisa wangoromaʼöda wa taʼandrö sibai saohagölö ba mbuala sebua böli nibeʼe Yehowa khöda? Ba hewisa enaʼö lö taʼogunaʼö daʼö ba lala si fasala?

13. Hewisa zinangeania wangogunaʼöda mbuala si no tebeʼe khöda?

¹³ Fefu ita tola tafili samösa niha si fariawö khöda, hadia niʼonukhada, fangehao mboto hegöi hiburan somasi ita. Hizaʼi, tola manö taʼogunaʼö mbuala andrö si tobali dani ba wamalua hadia zi lö omasi Lowalangi mazui ba woloʼö hadia zasese lafalua niha ba gulidanö andre. (Baso I Fetero 2:16.) Moroi na taʼogunaʼö mbuala nibeʼe khöda ba wamalua zala, abölö sökhi na taʼogunaʼö ia ba wamalua hadia ia zi möi ’famosumange Lowalangi’.​—I Korindro 10:31; Galatia 5:13.

14. Hana wa moguna taʼodaligö Yehowa ba ginötö taʼogunaʼö mbuala ba wangai angetula samösa?

¹⁴ Imane Yehowa, ”Yaʼo, Yehowa, Lowalangiu zamahaö yaʼugö ba zoguna khöu, samasao yaʼugö ba lala nitöröu.” (Yesaya 48:17) Moguna faduhu dödöda khö Yehowa ba taʼoʼö hadia zi no ihonogöi enaʼö tola tahalö gangetula si sökhi. Si fao fangide-ngideʼö tafaduhuʼö wa ”tebai ihuku lalania niha, awö wa tebai ifanandrösa mbekania niha sanörö lala”. (Yeremia 10:23) Adamo hegöi iraono Gizaraʼeli si faröi, lafili ba wanawö hadia ia zi no ihonogöi Yehowa khöra ba laʼodaligö ira samösa. Datahalö wamahaʼö moroi ba duma-duma daʼa. Moroi na taʼodaligö ita samösa, abölö sökhi na ’tadöna-döna khö Yehowa moroi siʼaikö ba dödöda’.​—Gamaedola 3:5.

AMEʼEGÖ TÖDÖ GANGETULA NIHA BÖʼÖ

15. Hadia wamahaʼö si tola tahalö moroi ba goi-goi si so ba Galatia 6:5?

¹⁵ Moguna taʼameʼegö tödö mbuala si no tetehegö ba niha böʼö ba wangai angetula ba waʼaurira. Hadia mbörö? Fefu ita no tetehegö khöda ba wangai angetula samösa, ba lö irai so darua niha Keriso sangai angetula si fagölö. Duma-dumania, angetula sanandrösa ba gamuata hegöi famosumange nifaluada. Törö tödöu goi-goi si so ba Galatia 6:5. (Baso.) Na aboto ba dödöda wa dozi niha laluʼi-luʼi samösa hadia ia gangetula nihalöra, no taʼameʼegö tödö mbuala nitehegö ba niha böʼö ba wangai angetula samösa.

16, 17. (a) Hadia zalua ba Korindro sanandrösa ba wangai angetula samösa? (b) Hadia nifalua Waulo ba wanolo niha Keriso, ba hadia wamahaʼönia khöda?

¹⁶ Datatutunö duma-duma si so ba Zura Niʼamoniʼö sangoromaʼö wa moguna sibai taʼameʼegö tödö gangetula si no lahalö ira talifusöda. Niha Keriso si so ba Korindro, ladunö-dunö sanandrösa ba gö nifamawa ba fasa si no labeʼe sumange adu. So ösa niha Keriso si manga gö daʼö börö me lawaʼö wa lö moʼamakhaita ia ba nadu. Hizaʼi, so ösa zi tetutu tödö ba lawaʼö wa na laʼa gö daʼö, hulö zi no mamosumange adu ira. (I Korindro 8:4, 7) Daʼa no sambua abula dödö sebua si tola mamabali mbanua niha Keriso. Hadia nifalua Waulo ba wanolo niha Keriso enaʼö tola teʼasiwai gabula dödö andre?

¹⁷ Si oföna, ifasugi ba dödöra Faulo wa fefu hadia ia niʼa lö tola möi fangaʼaro wahuwusara khö Lowalangi. (I Korindro 8:8) Aefa daʼö, ifangelama ira Faulo enaʼö lö latehegö hadia zi ”no tola” andrö khöra ba wangafökhöiʼö dödö side-ide niha böʼö salio tetutu. (I Korindro 8:9) Aefa daʼö, iwaʼö göi ba niha sangokhögö tödö side-ide sambö faʼabeʼe enaʼö böi lahuku niha si manga gö daʼö. (I Korindro 10:25, 29, 30) Andrö, ba ginötö so zalua soʼamakhaita ba wamosumange, moguna lahalö samösa gangetula ira niha Keriso. Hadia taʼameʼegö tödö mbuala si no tetehegö khö ndra talifusöda ba wangai angetula samösa hewaʼae na ide-ide daʼö?​—I Korindro 10:32, 33.

18. Hewisa wangoromaʼöu wa öʼandrö saohagölö ba mbuala nibeʼe khömö ba wangai angetula samösa?

¹⁸ No ibeʼe khöda mbuala Yehowa ba wangai angetula samösa, irege tola taʼokhögö waʼohahau dödö sindruhu. (II Korindro 3:17) Sindruhu-ndruhu taʼandrö saohagölö ba mbuala andrö irege tola tahalö gangetula sangoromaʼö wa taʼomasiʼö sibai Yehowa. Andrö, böi taböhöli ba wangai angetula si möi famosumange yaʼia, ba taʼameʼegö tödö gangetula nihalö niha böʼö sanandrösa ba wangogunaʼöra mbuala si sökhi andre.