Tolo Ndraono ’Niha si Fatewu’

1, 2. (a) Hadia manö gabula dödö nitaögö ndraono niha imigran? (b) Hadia wanofu-nofu nitutunöda ba wamahaʼö daʼa?

IMANE Joshua,”Iʼotarai me ide-idedo, fahuhuo ndraʼo ba li si toʼölö laʼogunaʼö ira satuagu na so ndraʼo ba nomo hegöi ba mbanua niha Keriso. Hizaʼi, me no möido sekola, ibörögö omasido ba wangogunaʼö li sasese niʼogunaʼö ba mbanua andrö. Ba zi hauga fakhe aefa daʼö, ha li daʼö niʼogunaʼögu na fahuhuodo. Lua-luania, ambö aboto ba dödögu hadia nifaʼema ba gangowuloa, ba lö uʼila sibai hadia zi toʼölö lafalua ira satuagu.” Hadia nirasoi Joshua andrö no asese alua.

² Iadaʼa, töra 240.000.000 niha si lö toröi ba soi si tumbu yaʼira. Na yaʼugö satua imigran (si findra moroi ba soi böʼö), hewisa wameʼemö inötö si sökhi ba ndraonomö enaʼö lafahaʼö ira ba wangomasiʼö Yehowa ba ”latörö lala zindruhu”? (III Yohane 4) Ba hadia wanolo si tola labeʼe niha böʼö?

SATUA, BEʼE DUMA-DUMA SI SÖKHI

3, 4. (a) Hewisa wameʼe zatua duma-duma si sökhi ba ndraonora? (b) Hadia zi tebai latötöna ira satua ba ndraonora?

³ Satua, moguna sibai mibeʼe duma-duma ba ndraonomi na omasi ami laʼokhögö wahuwusa si sökhi khö Yehowa ba faʼauri si lö aetu. Na laʼila iraonomö wa ”miʼofönaiʼö wangalui Banua Lowalangi”, tola lafahaʼö ira ba wangodaligö Yehowa ba zoguna khöra ero maʼökhö. (Mataiʼo 6:33, 34) Ofönaiʼö wamosumange Yehowa moroi ba wangalui kefe sebua. Miʼöna-önaiʼö waʼaurimi ba böi miʼoʼömö. Fangalui ”girö-girö ba zorugo” yaʼia daʼö hadia zomasi Yehowa, abölö sökhi ia moroi ba wangalui kefe mazui ’sumange ba niha’.​—Baso Mareko 10:21, 22; Yohane 12:43.

⁴ Böi mihorigö ginötömi ba wohalöwö irege lö inötömi ba ndraonomi. Foromaʼö khöra wa omuso dödömi na lahalö gangetula ba wangofönaiʼö Yehowa moroi ba wangalui töi sebua mazui kefe, he soguna khöra samösa mazui khömi. Böi so ba wangera-ngerami wa hasambalö labeʼe waʼauri si sökhi khö zatuara iraono. Törö tödömö wa ”tenga sa iraono zangalui anaʼa khö ndra amara, ama zangalui anaʼa ba ndraono”.​—II Korindro 12:14.

SATUA, ALUI LALA BA WANGASIWAISI ABULA DÖDÖ SANANDRÖSA BA LI

5. Hana wa moguna asese latutunö ira satua sanandrösa khö Yehowa ba ndraonora?

⁵ Simane si no mufaʼeleʼö, ato niha moroi ba ’ngawalö li ba soi’ möi ba organisasi Yehowa. (Zakharia 8:23) Hizaʼi, na lö sindruhu-ndruhu aboto ba dödö ndraonomö li niʼogunaʼömö, tola manö abua khömö ba wamahaʼö yaʼira ba zindruhu. Yaʼira andre niha nifahaʼömö ba Zura Niʼamoniʼö sabölö tohude moroi ba danö böʼö, ba tola lasöndra waʼauri si lö aetu na ”aboto ba dödöra” sanandrösa khö Yehowa. (Yohane 17:3) Enaʼö aboto ba dödöra wamahaʼö moroi khö Yehowa, moguna asese ’öfahuo-huosi khöra daʼö’.​—Baso V Moze 6:6, 7.

6. Hadia mbua nitema ndraonomö na lafahaʼö ira ba li niʼogunaʼömö? (Faigi gambara ba wamobörö wamahaʼö.)

⁶ Te moroi ba zekola mazui ba niha böʼö, lafahaʼö ira iraonomö ba li sasese muʼogunaʼö ba mbanua daʼö. Hizaʼi, tola lafahaʼö ira ba li niʼogunaʼömö na asese fahuhuo ndraʼugö khöra. Na fahuhuo ndraonomö ba li niʼogunaʼömö, tola aoha khöra ba wahuhuosa khömö hegöi ba wamatunö hadia nirasoira. Hizaʼi, so mbua tanö böʼö. Na tola fahuhuo ndraonomö ba li tanö böʼö, tola itugu tedou lala wangera-ngerara ba tola aboto ba dödöra lala wangera-ngera niha böʼö. Tola göi tebeʼe khöra ginötö ba wondrouʼö halöwöra ba wanuriaigö. Imane Carolina, satuania imigran, ”Owua-wua dödöda na so ita ba mbanua niha Keriso sangogunaʼö li böʼö, ba sökhi sibai na fao ita ba wanolo mbanua niha Keriso si lö ato sanuriaigö.”

7. Hadia nifaluamö na tobali abula dödö ba nösi nomomö sanandrösa ba li?

⁷ Hizaʼi, börö me lafahaʼö ira ba li hegöi ba zasese alua ba mbanua daʼö, so ösa ba gotalua ndraono imigran si lö omasi hegöi si lö mangila fahuhuo ba li niʼogunaʼö zatuara. Satua, na daʼö zalua ba ndraonomi, hadia mifahaʼö ami ba li niʼogunaʼö ba mbanua daʼö? Tola aoha khömö ba wangebuaʼö iraonomö tobali niha Keriso na aboto ba dödömö hadia niwaʼöra, hiburan somasi ira, halöwö ba zekola hegöi na fahuhuo ndraʼugö khö ndra gurura. Sindruhusa wa moguna tabeʼe ginötö, taforege ba moguna wangide-ngideʼö na tafahaʼö ita ba li si bohou. Hizaʼi, so mbuania. Duma-dumania, na so ndraonomö si lö hede, tatu omasiʼö öfahaʼö ndraʼugö ba li isyarat enaʼö tola fahuhuo ami. Simane daʼö göi, na so ndraonomö sonekhe fahuhuo ba li böʼö, hadia omasiʼö öfahaʼö ndraʼugö ba li daʼö?a—Faigi nisura ba gahe zura.

8. Hewisa wanolomö iraonomö na ambö aboto ba dödömö li niʼogunaʼö ba mbanua daʼö?

⁸ Tola abua khö ndra satua imigran fahuhuo ba li si bohou niʼogunaʼö ndraonora. Moguna laforege ira satua ba wanolo ndraonora enaʼö aboto ba dödöra ”Zura Niʼamoniʼö”. (II Timoteo 3:15) Na daʼa zalua khömö, tola ötolo ndraonomö enaʼö laʼila ba laʼomasiʼö Yehowa. Imane satua sokubaloi sotöi Shan, ”Ambö aboto ba dödö zatuama ira alawe hadia li sabölö aboto ba dödöma, ba yaʼodo hegöi talifusögu alawe, ambö aboto ba dödöma li niʼogunaʼönia. Hizaʼi, me maʼila wa ifahaʼö ia, ilau mangandrö, ba ifalua zabölö sökhi ba wamahaʼö zi sambua omo ero migu, aboto ba dödöma wa moguna sibai maʼokhögö waʼatua-tua sanandrösa khö Yehowa.”

9. Hadia nifalua zatua ba wanolo ndraonora samahaʼö yaʼira ba zi dombua li?

⁹ So ösa ndraono moguna lafahaʼö ira sanandrösa khö Yehowa ba zi dombua li. Hadia mbörö? Börö me sambua li niʼogunaʼöra ba zekola, ba sambua göi li niʼogunaʼöra ba nomo. Börö daʼö, so ösa zatua sangogunaʼö mbuku, rekaman audio, hegöi video ba zi dombua li andre. Moguna laforege ira satua imigran ba wanolo iraonora enaʼö tola ahatö khö Yehowa.

HADIA MOGUNA ÖʼILA LI NIʼOGUNAʼÖ BA MBANUA NIHA KERISO?

10. (a) Haniha zangai angetula ba wotatugöi mbanua niha Keriso sangogunaʼö li hadia fao ira? (b) Hadia zinangea ifalua niha si tobali högö yomo ba nomo fatua lö ihalö gangetula?

¹⁰ Ba ginötö aröu gotalua ’niha si fatewu’ moroi khö ndra Samaduhuʼö tanö böʼö sangogunaʼö lira, moguna fariawö ira ba mbanua niha Keriso sangogunaʼö li sasese muʼogunaʼö ba mbanua daʼö. (Zinunö 146:9) Hizaʼi, na ahatö mbanua niha Keriso sangogunaʼö lira, moguna ihalö gangetula si sökhi satua si tobali högö yomo ba nomo ba wotatugöi mbanua niha Keriso sangogunaʼö li hadia fao ira. Fatua lö ihalö gangetula, moguna ihaogö woʼangeraigö ba iʼohe ba wangandrö daʼö. Moguna göi ifahuhuosi khö woʼomonia hegöi ba ndraononia. (I Korindro 11:3) Hadia zinangea iʼangeraigö? Hadia goi-goi Zura Niʼamoniʼö sanolo yaʼia ba wangai angetula?

11, 12. (a) Hadia lua-luania ba ndraono li niʼogunaʼö ba gangowuloa? (b) Hana wa so ösa ndraono si lö omasi mamahaʼö yaʼira ba li zatuara?

¹¹ Moguna laʼangeraigö ira satua hadia zabölö moguna ba ndraonora. Enaʼö aboto ba dödöra zindruhu moroi ba Zura Niʼamoniʼö, moguna abölö oya laʼogunaʼö ginötö iraonora ba wamondro-ndrongo fanuturu lala moroi ba Zura Niʼamoniʼö, tenga ha ba zi hauga za ero migu ba gangowuloa. Hizaʼi, angeraigö daʼa: Tola latema mbua si sökhi iraono na so ira ba gangowuloa nifalua ba li sabölö aboto ba dödöra, ba tola manö oya wamahaʼö nihalöra töra moroi ba niʼangeraigö zatuara. Lö alua daʼa na lö aboto ba dödö ndraonora li niʼogunaʼö ba daʼö. (Baso I Korindro 14:9, 11.) Li niʼogunaʼönia ba waʼide-ide, tola manö lö tofakha ba dödö hegöi fangera-ngerania sagötö faʼara. So ösa ndraono si tola mamahaʼö yaʼia ba wameʼe mbua gera-era, famadumaisi, hegöi fahuhuo ba li zatuara, hizaʼi tenga soroi ba dödö hegöi fangera-ngerara daʼö.

¹² Tenga ha li zi tola mondrönisi dödö ndraono. Daʼö zalua khö Joshua, nitutunö ba wamobörö. Imane talifusönia alawe sotöi Esther, ”Ba ndraono side-ide, lafahaʼö ira ba li, si toʼölö lafalua, hegöi ba agama zatuara ba ginötö si fagölö.” Na lö fao dödö ndraono ba wamalua hadia zi toʼölö lafalua ira satuara, tola manö lö omasi ira ba wamahaʼö yaʼira ba li hegöi ba agama zatuara. Hadia zi tola ifalua satua imigran?

13, 14. (a) Hana wa findra zi sambua ösi nomo imigran ba mbanua niha Keriso sangogunaʼö li sasese muʼogunaʼö ba mbanua daʼö? (b) Hadia nifalua zatua ba wangaroʼö fahuwusara khö Yehowa?

¹³ Ira satua si no tobali niha Keriso, moguna laʼofönaiʼö zoguna ba ndraonora moroi ba zoguna khöra samösa. (I Korindro 10:24) Imane bapa Joshua hegöi Esther sotöi Samuel, ”Yaʼodo hegöi foʼomogu, mahaogö manehegö hadia li si tola mondrouʼö famati ndraonoma, ba maʼandrö waʼatua-tua. Fanema linia, tenga balazi somasi ndraʼaga samösa. Hizaʼi, me maʼila wa lö oya mbua nitemara ba gangowuloa ba li niʼogunaʼöma, mahalö gangetula findra ba mbanua niha Keriso sangogunaʼö li sasese muʼogunaʼö ba mbanua daʼö. Asese fao ndraʼaga ba weʼamöi ba gangowuloa hegöi ba wanuriaigö. Itaria makaoni ndra talifusöda ba mbanua daʼö enaʼö fao ira khöma wemanga ba manörö-nörö. Daʼa zanolo iraonoma enaʼö laʼila fefu ndra talifusöda si so ba daʼö ba aboto ba dödöra sanandrösa khö Yehowa, tenga ha si tobali Lowalangira hizaʼi Ama hegöi si Fahuwu khöra. Na ba wamaigima, abölö tohude daʼa moroi na onekhe ira ba li niʼogunaʼöma.”

¹⁴ Imane nasa Samuel, ”Enaʼö lö aetu aro wamatima, yaʼodo hegöi foʼomogu itaria maʼondrasi gangowuloa ba li niʼogunaʼöma. Hewaʼae marase ba oya halöwöma, hizaʼi maʼandrö saohagölö khö Yehowa, börö me ifahowuʼö famorege nifaluama hegöi hadia zi no matehegö. Fefu ndraonoma si datölu lahalö halöwö safönu inötö ba wamosumange Yehowa.”

SI TOLA LAFALUA IRA SI BOHOU EBUA

15. Hana wa so ba dödö dalifusöda sotöi Kristina wa tola ifalua zabölö sökhi na so ia ba gangowuloa sangogunaʼö li sasese muʼogunaʼö ba mbanua daʼö?

¹⁵ Me itugu ebua-bua ndraono, tola manö aboto ba dödöra wa abölö sökhi na lafosumange Yehowa ba mbanua niha Keriso sangogunaʼö li sabölö aboto ba dödöra. Na simane daʼö, böi so ba wangera-ngera zatua wa latimbagö ira iraonora. Itörö tödö Kristina, imane, ”Uʼila maʼifu li zatuagu, hizaʼi ambö aboto ba dödögu li niʼogunaʼö ba gangowuloa. Me 12 fakhe ndröfigu, möido ba kebaktian sangogunaʼö li niʼogunaʼö ba zekolagu. Ba daʼö awena sindruhu-ndruhu aboto ba dödögu wa sindruhu hadia nirongogu andrö! So mbua tanö böʼö me ubörötaigö mangandrö ba li niʼogunaʼö ba zekolagu. Tola fahuhuo ndraʼo khö Yehowa soroi ba dödö!” (Halöwö Zinenge 2:11, 41) Me 18 fakhe ndröfi Kristina, itutunö daʼa khö ndra satuania ba ihalö gangetula findra ba mbanua niha Keriso sangogunaʼö li sasese laʼogunaʼö ba mbanua andrö. Imane, ”Tedönisi dödögu ba wamalua si sökhi me ufahaʼö ndraʼo sanandrösa khö Yehowa ba li niʼogunaʼö ba zekolagu.” Lö ara aefa daʼö, tobali perintis biasa Kristina ba isöndra waʼowua-wua dödö.

16. Hana wa omuso dödö Nadia toröi ba mbanua niha Keriso sangogunaʼö li böʼö?

¹⁶ Yaʼami si bohou ebua, hadia so ba wangera-ngerami ba wangai halöwö ba mbanua niha Keriso sangogunaʼö li sasese muʼogunaʼö ba mbanua andrö? Na simanö, sofu khöu samösa hadia mbörö. Hadia findra ndraʼugö ba mbanua niha Keriso enaʼö itugu ahatö ndraʼugö khö Yehowa? (Yakobo 4:8) Mazui, börö me lö omasiʼö na laʼila ira satuamö hadia manö nifaluamö mazui börö me lö omasiʼö öfalua gofu hadia ia? Imane Nadia si no mohalöwö ba Mbetieli iadaʼa, ”Me itugu ebua-bua ndraʼodo hegöi ira talifusögu, omasi ndraʼaga findra ba mbanua niha Keriso sangogunaʼö li sasese laʼogunaʼö ba mbanua daʼö.” Hizaʼi, laʼila ira satuania wa hadia nifaluara andrö lö möi fangaʼaroʼö wahuwusara khö Yehowa. ”Iadaʼa, maʼandrö sibai saohagölö khö zatuama börö me ba ginötö daʼö lö latehe khöma wefao ba mbanua niha Keriso sangogunaʼö li böʼö hegöi me laforege ba wamahaʼö yaʼaga ba li niʼogunaʼöra. Owua-wua sibai dödöma ba tola madouʼö ginötöma ba wanolo niha böʼö enaʼö aboto ba dödöra sanandrösa khö Yehowa.”

FANOLO SI TOLA LABEʼE NIHA BÖʼÖ

17. (a) Haʼökhö ibeʼe halöwö Yehowa ba wangebuaʼö iraono? (b) Hadia nifalua zatua enaʼö aboto ba dödö ndraonora zindruhu?

¹⁷ Ibeʼe halöwö Yehowa khö zatua ba wamahaʼö iraonora ba zindruhu. Tenga khö kakera, nenera mazui ba niha böʼö tebeʼe halöwö daʼa. (Baso Gamaedola 1:8; 31:10, 27, 28.) Hizaʼi, na so zatua si lö mangila li sasese muʼogunaʼö ba mbanua daʼö, moguna khöra wanolo enaʼö tofakha ba dödö ndraonora hadia nifahaʼöra. Ba ginötö laʼandrö wanolo ira satua, tenga daʼö geluahania wa latimbagö halöwö nibeʼe khöra ba wangebuaʼö iraonora. Hizaʼi, daʼa zanolo yaʼira ba wangebuaʼö iraonora ba ’wameʼe fotu hegöi famarou dödö moroi khö Yehowa’. (Efeso 6:4) Duma-dumania, tola laʼandrö wanolo ira satua khö ndra satua sokubaloi ba mbanua niha Keriso hewisa lala si sökhi ba wamalua famahaʼö zi sambua omo hegöi ba wangalui niha si sökhi amuata si fahuwu ba ndraonora.

18, 19. (a) Hadia zi tola lafalua ira talifusöda niha Keriso tanö böʼö ba wanolo zi bohou ebua? (b) Hadia zi lö tola löʼö lafalua ira satua?

¹⁸ Ba wanolo iraonora, tola lakaoni nösi nomo niha böʼö ira satua ba wefao khöra na lafalua wamahaʼö zi sambua omo. Ato göi zi bohou ebua zamahaʼö yaʼira khö ndra talifusöda niha Keriso na fao ira manuriaigö hegöi na fao ira ba wamalua hadia ia. (Gamaedola 27:17) Imane Shan nitutunö ba wamobörö, ”Itörö tödögu ndra talifusö sondrorogö yaʼo. Me latolo ndraʼo ba wamaʼanö faosatö niʼolohesigu ba gangowuloa, itugu oya wamahaʼö nihalögu. Owua-wua dödögu me fao ndraʼaga ba wamalua rekreasi.”

¹⁹ Tatu manö, niha nifili zatua ba wanolo iraonora hasambalö lafarou ndraono andrö enaʼö laʼameʼegö tödö zatuara. Tola lafalua daʼa na latutunö hadia manö zi sökhi sanandrösa khö zatua ba lö lahalö halöwö zatua ba wangebuaʼö iraonora. Moguna göi laʼangenanöi gamuatara enaʼö lö manahö-nahö dödö niha si so ba mbanua niha Keriso mazui niha si so ba zifasuira. (I Fetero 2:12) Hewaʼae laʼandrö wanolo ba niha böʼö ira satua, hasambalö yaʼira zangokhögö halöwö ba wamahaʼö iraonora ba zindruhu. Moguna lafaigi-faigi wanolo nibeʼe ndra talifusöda niha Keriso tanö böʼö.

20. Hadia nifalua zatua ba wanolo iraonora enaʼö tobali ira samosumange Yehowa si lö faröi?

²⁰ Satua, andrö wanolo khö Yehowa ba wangandrö ba falua zabölö sökhi. (Baso II Ngaʼötö 15:7.) Ofönaiʼö wahuwusa ndraonomö khö Yehowa moroi ba zoguna khömö samösa. Falua gofu hadia zi tola öfalua enaʼö tofakha ba dödö ndraonomö Daromali Lowalangi. Böi mamalö faduhusi tödö wa tola tobali samosumange Yehowa ndraonomö. Ba ginötö laʼoʼö Daromali Lowalangi hegöi duma-duma si sökhi nibeʼemö, tola örasoi hadia nirasoi zinenge sotöi Yohane sanandrösa ba ndraono. Imane ba ndraononia ba wamati, ”Fondrege waʼomuso dödögu daʼö, na urongo, latörö lala zindruhu iraono khögu.”​—III Yohane 4.