Tola Ufahaʼö Niha Böʼö, Hewaʼae Afiso Ndraʼodo

TE ME döfi 1910, findra ndra satuagu moroi ba Tbilisi, Georgia, möi ira ba Kanada. Toröi ira ba nomo side-ide si so ba kabu sahatö ba Pelly, Saskatchewan, ba Kanada tanö ba gaekhula. Tumbu ndraʼo me 1928, ba yaʼodo ziakhi moroi ba zi daönö ndraʼaga si fatalifusö. Mate bapagu önö waŵa fatua lö tumbu ndraʼo, ba mate mamagu me ono sawuyu nasa ndraʼodo. Lö ara aefa daʼö, mate gaʼagu ono alawe siaʼa sotöi Lucy ba awena 17 fakhe ndröfinia. Andrö wa sibayagu sotöi Nick zondrorogö yaʼo hegöi ira talifusögu.

Sambua inötö me ide-ide nasa ndraʼo, laʼila ira ösi nomogu me udöbi giʼo kudoma. Muʼao ira khögu enaʼö lö ufalua daʼö, börö me ataʼu ira ma dania ihösini ndraʼo kudo andrö. Hizaʼi, no uʼerogö ira ba lö urongo-rongo me lalau muʼao. Uʼandrö saohagölö börö me lö hadia ia zalua khögu. Hizaʼi, ba daʼö laʼila ira ösi nomogu wa afiso ndraʼodo.

Imane niha si fariawö ba nösi nomoma wa abölö sökhi na möido sekola ba nahia ndraono niha safiso. Andrö wa ibeʼedo sibayagu ba zekola ndraono niha safiso ba Saskatoon, Saskatchewan. Aröu sibai zekola daʼa iʼotarai nomoma, ba awena lima fakhe ndröfigu. Ataʼu sibai ndraʼo. Ha na libur mazui na baŵa lökhö falukhado ba nösi nomogu. Ba gafuriata, ufahaʼö ndraʼo ba li isyarat ba omuso dödögu famai-mai ba ndraono tanö böʼö.

UFAHAʼÖDO BA ZINDRUHU BA ZURA NIʼAMONIʼÖ

Me 1939, mangowalu gaʼagu ira alawe sotöi Marion khö Bill Danylchuck, ba yaʼira zondrorogö yaʼodo hegöi gaʼagu ira alawe sotöi Frances. Yaʼira andre ösi nomogu si oföna sibai mamahaʼö yaʼira ba Zura Niʼamoniʼö khö ndra Samaduhuʼö Yehowa. Me libur ndraʼo sagötö mbaŵa lökhö, lafalua zi tola lafalua ba wamatunö khögu hadia ia zi no lafahaʼö ira ba Zura Niʼamoniʼö. Abua khöma wahuhuosa börö me lö laʼila li zi lö hede. Hizaʼi, laʼila wa sindruhu-ndruhu omasi ndraʼodo hadia wamahaʼö sanandrösa khö Yehowa. Aboto ba dödögu wa fefu nifaluara oi moʼamakhaita ba niwaʼö Zura Niʼamoniʼö. Andrö wa faodo khöra weʼamöi manuriaigö. Lö ara aefa daʼö, omasido tebayagö idanö, ba me 5 mbaŵa si Siwa 1941, ibayagö idanö ndraʼo Bill ba zi sambua naha nidanö siʼöli. Sindruhu-ndruhu ofaku nidanö daʼö!

Me 1946, me mangawulido ba nomo me mbaŵa lökhö, möi ndraʼo ba kebaktian ba Cleveland, Ohio, AS. Ba ngaluo siföföna, isura khögu ba garate gaʼagu ira alawe hadia nifaʼema irege tola aboto ba dödögu hadia manö nifalua. Hizaʼi, ba ngaluo si dua, omuso sibai dödögu börö me so ngawawa li zi lö hede ba kebaktian andrö. Ba gafuriata, uʼila fefu hadia waö-waö nifalua, ba awena sindruhu-ndruhu aboto ba dödögu hadia wamahaʼö moroi ba Zura Niʼamoniʼö!

BA WAMAHAʼÖ SINDRUHU

Ba ginötö daʼö, arakhagö awai Wasuwöta Gulidanö II, ba omasi niha laforomaʼö wa lö faröi ira ba soira. Hizaʼi, me mangawulido moroi ba kebaktian ba ifuli möido ba zekola, uhalö gangetula wa lö faröi ndraʼo khö Yehowa. Daʼö mbörö wa lö ubeʼe yawa dangagu ba mandrera, ba woʼanunöisi zinunö kebangsaan hegöi ba wefao ba gowasa luo sebua. Uböhöli ba wefao khö ndra awögu sekola ba weʼamöi ba gereja. Lö omasi ndra gurugu, lafakao ba lalimo ndraʼo enaʼö tola ubulöʼö lala wangera-ngeragu. Laʼila ira awögu hadia zalua andrö, ba daʼö zameʼe khögu inötö ba wanutunö famatigu khöra. So ösa moroi ba ndra awögu, simane Larry Androsoff, Norman Dittrick, hegöi Emil Schneider latemaʼö zindruhu ba lafosumange Yehowa irugi iadaʼa.

Ba ginötö möi ndraʼo ba mbanua böʼö, hasambalö uforege ba wanuriaigö ba niha safiso. Duma-dumania, me so ndraʼodo ba Montreal, möido ba nahia waʼowulo niha safiso. Ba daʼö, ulau manuriaigö khö Eddie Tager, samösa ono matua sawuyu-wuyu ba gotaluara. Irugi waʼamatenia me döfi silalö, tefarahu ia ba mbanua niha Keriso sangogunaʼö li zi lö hede ba Laval, Quebec. Falukhado göi ba niha sawuyu-wuyu sotöi Juan Ardanez. Simane niha Berea ba götö siföföna, ifuli ifareso hadia sindruhu-ndruhu teʼodane-dane ba Zura Niʼamoniʼö hadia zi no ifahaʼö ia andrö. (Halöwö Zinenge 17:10,11) Ba gafuriata tebayagö ia idanö, ba tobali ia satua sokubaloi ba Ottawa, Ontario irugi waʼamatenia.

Me 1950, findra ndraʼodo ba Vancouver. Hewaʼae na omasido manuriaigö ba niha safiso, lö olifudo me ulau manuriaigö ba lala khö zi samösa ira alawe sotöi Chris Spicer. Yaʼia andre tenga niha si toʼölö. Omasi ia itemaʼö nasa majalah ba omasi ia falukhado khö woʼomonia sotöi Gary. Möido ba nomora, ba ara sibai fahuhuoga. Masura ba garate hadia niwaʼöma. Ba zi hauga fakhe aefa daʼö, awena ifuli falukhaga ba kebaktian ba Toronto, Ontario. Ba ngaluo daʼö, tebayagö idanö Gary. Moroi ba zalua andre, uhalö wamahaʼö wa moguna sibai lö mamalö möi manuriaigö, börö me tola manö niha nifalukhaisida andrö ba gafuriatania latema zindruhu.

Ba gafuriata, ufulido ba Saskatoon. Ba daʼö, falukhado khö samösa ira alawe sangandrö enaʼö ufahaʼö ba Zura Niʼamoniʼö nononia alawe si faero safiso sotöi Jean hegöi Joan Rothenberger. Ba nahia zekolagu mböröta, ba daʼö göi sekola ira. Lö ara aefa daʼö, latutunö khö ndra awöra sekola hadia zi no lafahaʼö yaʼira. Ba so dalima ndra awöra si tobali Samaduhuʼö Yehowa. Samösa moroi ba gotaluara yaʼia daʼö Eunice Colin. No irai falukhado khö Eunice me arakhagö tama ndraʼo ba zekola andrö. Ba ginötö daʼö, ibeʼe ögu sambua gulo-gulo ba isofu hadia tola fahuwu ndraʼaga. Yaʼia andre dania tobali niha si tohude sibai ba waʼaurigu. Tobali ia foʼomogu!

Me iʼila mamania wa no ifahaʼö ia Eunice ba Zura Niʼamoniʼö, iʼandrö khö gafalo sekola enaʼö tola iʼalui lala irege iböhöli wamahaʼö yaʼia Eunice. Hewaʼae no ifalua daʼö kafalo zekola irege ihalö fefu mbuku-buku Eunice, hizaʼi no ihalö gangetula Eunice wa lö faröi ia khö Yehowa. Me omasi ia tebayagö idanö, lamane khönia ira satuania, ”Na tobali ndraʼugö Samaduhuʼö Yehowa, ofanö moroi ba nomo andre!” Andrö, me 17 fakhe ndröfinia, iröi nomora Eunice ba toröi ia ba zi sambua ösi nomo Zamaduhuʼö. Lö mamalö ifahaʼö ia, ba gafuriata tebayagö ia idanö. Me mangowalu ndraʼaga me döfi 1960, lö si möi ndra satuania ba walöwama. Hizaʼi, me no hauga fakhe aefa daʼö, ifuli laʼameʼegö tödö ndraʼaga börö nifaduhusima tödö hegöi lala wangebuaʼöma iraonoma.

LÖ MAMALÖ IROROGÖ NDRAʼO YEHOWA

Abua khöma ba wamomaha iraonoma ono matua si dafitu börö me tumbu ira simane niha si toʼölö. Hizaʼi, mafomaha göi ira ba li zi lö hede enaʼö tola fahuhuo ndraʼaga khöra ba tola mafomaha ira ba zindruhu. Latolo göi ndraʼaga ira talifusöda si so ba mbanua niha Keriso. Duma-dumania, isura khöma ba garate samösa satua wa no falele samösa ndraonoma ba Balai Mbanua Lowalangi. Daʼa zanolo yaʼaga ba wangasiwaisi zalua andrö. Daöfa nonoma matua, James, Jerry, Nicholas, hegöi Steven, no tobali ira satua sokubaloi ba lö faröi ira sifao ösi nomora hegöi foʼomora ba wamosumange Yehowa. Nicholas hegöi foʼomonia sotöi Deborah, latolo wamoʼeluaha ba li zi lö hede ba gödo ndraha Inggris. Steven hegöi foʼomonia Shannan, latolo wamoʼeluaha ba li zi lö hede ba gödo ndraha Amerika Serikat.

Sara waŵa fatua lö irugi 40 fakhe wangowaluma, mate Eunice börö wökhö kanker. Afatö sibai dödögu. Sagötö wanaögönia wökhö daʼö, lö mamalö itugu aro wamatinia ba wanusugi. Ubalo-baloi ginötö na ifuli falukhado khönia zui.

Me baŵa si Dua 2012, alabu ndraʼodo ba afatö döla zolagu. Uʼila wa moguna khögu wanolo. Andrö wa toröido ba nomo zi samösa onogu hegöi foʼomonia. Fao ndraʼaga ba Mbanua Niha Keriso Li zi Lö Hede Calgary, ba uhalö halöwö tobali satua sokubaloi. Daʼa zi oföna sibai fao ndraʼo ba mbanua niha Keriso sangogunaʼö li zi lö hede! Fatua lö daʼö, fao ndraʼo ba mbanua niha Keriso sangogunaʼö li Inggris. Andrö, hewisa enaʼö lö aetu aro wahuwusagu khö Yehowa? Itolo ndraʼo Yehowa. Ifalua hadia zi no ifabuʼu wa irorogö ndraono si lö ama. (Zinunö 10:14) Uʼandrö sibai saohagölö fefu ba niha si no omasi ba wamahaʼö yaʼira ba li zi lö hede, sanura khögu ba garate, hegöi sanolo ba wamoʼeluaha khögu ndrege niʼilara.

Itaria, lö uʼila hadia zinangea lafaʼema niha mazui urasoi wa lö hadöi niha sangokhögö faʼaboto ba dödö sanandrösa ba wanolo niha safiso. Daʼa sambua noro dödögu ba itaria afatö dödögu. Hizaʼi, na alua zimane daʼa, uʼangeraigö hadia wehede Wetero khö Yesu me imane, ’He Tua, ba haʼökhö möiga? So khöu daromali fangorifi, ba waʼauri si lö aetu.’ (Yohane 6:66-68) Simane ira talifusöda tanö böʼö si lö hede si no ara ba zindruhu, ufahaʼödo ba wanaha tödö. Ufahaʼödo göi ba wamaduhusi tödö Yehowa hegöi organisasinia, ba oya mbuania daʼö. Iadaʼa, oya publikasida ba li isyarat, ba omuso sibai dödögu börö me tola uʼondrasi gangowuloa hegöi kebaktian ba Li zi Lö Hede. Sindruhu-ndruhu owua-wua dödögu ba moʼeluaha sibai waʼaurigu börö me ufosumange Yehowa, Lowalangida sabölö.