”Misuno Yehowa”—Hadia Mbörö?

1-3. (a) Hamega lasura Zinunö 147? (b) Hadia wamahaʼö si tola tahalö moroi ba Zinunö 147?

ASESE tasuno zi samösa niha na so zadöni dödöda ba niwaʼönia mazui nifaluania. Sindruhu-ndruhu tefarou dödöda ba wanuno Lowalangi Yehowa! Tasuno ia börö waʼabölönia sebua, taʼila daʼö moroi ba nifazökhi dangania sahöli-höli dödö. Tasuno göi ia börö me iʼomasiʼö sibai ita, taʼila daʼö me ibeʼe Nononia tobali höli.

² Ba ginötö tabaso Zinunö 147, ba daʼö taʼila wa sindruhu-ndruhu omasi zanura zinunö ba wanuno Yehowa. Ifarou göi niha böʼö enaʼö lasuno Lowalangi simane nifaluania.​—Baso Zinunö 147:1, 7, 12.

³ Lö taʼila haniha zanura Zinunö 147. Hizaʼi, tola manö auri ia sagötö mangawuli ndraono Gizaraʼeli ba Yeruzalema me no aefa iʼefaʼö ira Yehowa moroi ba Mbabilona. (Zinunö 147:2) Ifosumange Yehowa sanura zinunö börö me tola ifuli lafosumange Yehowa iraono Gizaraʼeli ba danöra samösa. Aefa daʼö, oya nasa dani nibeʼenia ba wanuno Yehowa. Hadia manö daʼö? Ba hadia dani niʼokhögömö wa tola öwaʼö ”Haleluya!” mazui ”Misuno Yehowa”?​—Zinunö 147:1

IFADÖHÖ ZARASA TÖDÖ YEHOWA

4. Hewisa dödö ndraono Gizaraʼeli me iʼefaʼö ira Razo Kiro, ba hadia mbörö?

⁴ Khalaigö hewisa dödö ndraono Gizaraʼeli me so ira ba waniboʼö ba Mbabilona. Niha si so ba daʼö, laʼoʼaya ira ba lamane, ”Milau khöma wanunö Ziona andrö.” Hizaʼi, lö lafalua daʼö ira niha Yahudi. No adudu Yeruzalema si tobali dani sebua waʼomuso dödöra. (Zinunö 137:1-3, 6) Afatö dödöra ba daʼö, ba moguna khöra wondrara dödö. Hizaʼi, simane si no ifaʼeleʼö Taromali Lowalangi, itolo nono mbanuania Yehowa. Hewisa lalania? Razo Persia sotöi Kiro idudugö Mbabilona ba imane sanandrösa khö Yehowa, ”Yaʼia zangumaʼö khögu wolau osali khönia ba Yeruzalema.” Imane göi Kiro ba ndraono Gizaraʼeli, ”Ba haniha ami mbanuania, ba yamutolo ia Lowalanginia, ba yamöi misi yawa.” (II Ngaʼötö 36:23) No fondrara dödö sebua ba ndraono Gizaraʼeli daʼa me so ira ba Mbabilona!

5. Hadia niwaʼö zanura zinunö sanandrösa ba waʼabölö Yehowa ba wamadöhö yaʼita?

⁵ Ibeʼe wondrara dödö Yehowa ba ndraono Gizaraʼeli fefu, hizaʼi ibeʼe göi wondrara dödö ero samösa-mösana ira. Ifalua göi khöda zimane daʼö Yehowa. Isura sanura zinunö wa Lowalangi ’zangabeʼeʼö si no arasa tödö andrö, sodalu-daluni safökhö khöra’. (Zinunö 147:3) Ba ginötö mofökhö ita mazui atata wangera-ngerada, tola faduhu dödöda wa irorogö ita Yehowa. Omasi sibai Yehowa ba wondrara tödöda hegöi ba wamadöhö zokho si so ba dödöda. (Zinunö 34:19; Yesaya 57:15) Ibeʼe khöda waʼatua-tua hegöi faʼabölö irege tola tataögö gofu hadia gabula dödö si göna ita.​—Yakobo 1:5.

6. Hewisa wa tola tatema mbua moroi ba ngawua wehede zanura zinunö ba Zinunö 147:4? (Faigi gambara ba wamobörö wamahaʼö.)

⁶ Aefa daʼö, ifaigi dalu mbanua sanura zinunö ba imane wa Yehowa andrö ”sangerai ha waʼoya ndröfi” ba ”sanötöi töira fefu”. (Zinunö 147:4) Tola iʼila ndröfi sanura zinunö, hizaʼi lö iʼila hawaʼoya zindruhunia daʼö. Iadaʼa, laʼila ira ilmuwan wa so miliaran ndröfi ba galaksida. Ba tola manö so triliun galaksi ba mbanua siawa! Lö hadöi niha gulidanö si tola mangerai hawaʼoya fefu ndröfi, hizaʼi tola ifalua daʼö Somböi. Sindruhunia, aboto ba dödönia ero sambua ndröfi irege ibeʼe döira zamösana. (I Korindro 15:41) Aboto ba dödö Lowalangi ero sambua ndröfi, tatu aboto göi ba dödönia ndraʼugö. Hasambalö iʼila hezoso so ndraʼugö, hadia nirasoimö ba hadia zoguna khömö!

7, 8. (a) Hadia zaboto ba dödö Yehowa sanandrösa khöda? (b) Beʼe duma-duma sangoromaʼö faʼomasi Yehowa?

⁷ Aboto ba dödö Yehowa hadia nitaögömö ba iʼokhögö waʼabölö ba wanolo yaʼugö ba gabula dödö nitaögömö. (Baso Zinunö 147:5.) Te abua zalua khömö andrö ba worasoimö ba tebai ötaögö ia. Aboto ba dödö Lowalangi hezo ndrege waʼabölöda, ”itörö tödönia wa no gawu-gawu ita”. (Zinunö 103:14) Lö moʼahonoa ita, andrö wa tola manö asese tafalua zala si fagölö, ba tola manö tarasoi waʼafatö dödö. Tatu so khöda waniasa ba zi no irai tawaʼö, isö-isö dödö si fasala mazui faʼafökhö dödö si no irai taʼokhögö! Lö hadöi zala nifalua Yehowa, hizaʼi sindruhu-ndruhu aboto ba dödönia hadia nirasoida.​—Yesaya 40:28.

⁸ Hadia no irai örasoi samösa waʼabölö danga Yehowa ba wanolo yaʼugö ba wangasiwaisi wanandraigö nitaögömö? (Yesaya 41:10, 13) Daʼa zalua khö zi samösa perintis ira alawe sotöi Kyoko. Me no aefa findra ia ba halöwönia si bohou, afatö sibai dödönia. Hizaʼi, hewisa wa tola iʼila Kyoko wa aboto ba dödö Yehowa hadia gabula dödönia? Ba mbanua niha Keriso sawena fao ia, ato ndra talifusöda sorasoi hadia nirasoinia. Irasoi wa imane khönia Yehowa ”Uʼomasiʼö ndraʼugö tenga ha börö me no tobali perintis ndraʼugö, hizaʼi börö me onogu alawe ndraʼugö ba me no ölulu waʼaurimö khögu. Omasido na örasoi waʼowua-wua dödö ba waʼaurimö tobali Samaduhuʼö töigu!” Hewisa wangoromaʼö Yehowa khömö wa ”no si lö fondrege waʼaboto ba dödönia andrö”?

IʼASOGÖ YEHOWA ZOGUNA KHÖDA

9, 10. Hadia lala sabölö tohude nifalua Yehowa ba wanolo yaʼita? Beʼe duma-duma.

⁹ Fefu ita moguna khöda gö, nukha hegöi nahiada. Te aombö dödömö börö me moʼamböta gö niʼami. Hizaʼi, ifazökhi gulidanö Yehowa ba wangaʼasogö fefu ngawalö gö, duma-dumania manö ”ba nono gaga andrö, siʼao khönia”. (Baso Zinunö 147:8, 9.) Na ibeʼe gö gaga Yehowa, tola faduhu dödöda wa hasambalö ihenaigö ngawalö zoguna khöda.​—Zinunö 37:25.

¹⁰ Sabölö tohudenia, iʼasogö ngawalö zoguna khöda Yehowa enaʼö aro wamatida, ba ibeʼe khöda ’waʼohahau dödö andrö, khö Lowalangi, sabölö moroi ba gera-era niha fefu’. (Filifi 4:6, 7) Samösa dalifusöda sotöi Mutsuo hegöi foʼomonia, no larasoi wanolo moroi khö Yehowa. Me alua tsunami ba Jepang me 2011, arakhagö mate ira na lö manöi ira yawa ba mbumbu nomora. Ba ginötö daʼö, arakhagö taya fefu gama-gamara. Ba zi bongi, laʼagö lantai dua nomora sogömi-gömi ba sokafu. Ba zi hulö wonginia, laʼalui zi möi famarou dödöra. So sambua nisöndrara yaʼia daʼö Buku Kegiatan Saksi-Saksi Yehuwa 2006. Ba ginötö ibokai ngaʼörönia Mutsuo, iʼila duho ”Tsunami Terdahsyat yang Pernah Dicatat”. Ba faosatö daʼö, itutunö sanandrösa ba ndruru danö salua ba Sumatra me döfi 2004, sangaʼasogö tsunami sabölö mamakiko si no irai musura. Meʼe Mutsuo hegöi foʼomonia me labaso waö-waö salua khö ndra talifusöda. Larasoi wa ibeʼe khöra Yehowa wamarou dödö si tefaudu ba zoguna khöra. Irorogö göi ira Yehowa ba lala tanö böʼö. Ira talifusöda si so ba nahia tanö böʼö ba Jepang, laʼasogö gö hegöi nukha. Hizaʼi, abölö teʼaroʼö ira me möi ndra talifusöda nifatenge organisasi Lowalangi ba mbanua niha Keriso. Imane Mutsuo, ”Urasoi wa so Yehowa ba zingada zamösana, ba irorogö ita. Sindruhu-ndruhu möi fondrara dödö daʼa!” Lowalangi zi oföna mangaʼasogö hadia niʼogunaʼöda enaʼö lö mamalö aro wamatida, ba hasambalö ibeʼe zoguna khöda.

BUA MOROI BA WANOLO LOWALANGI

11. Hadia zinangea tafalua enaʼö tola tatema mbua moroi ba wanolo Lowalangi?

¹¹ ”Iʼabeʼeʼö nifakao andrö Yehowa.” Iʼomasiʼö ba hasambalö itolo ita. (Zinunö 147:6a) Hewisa enaʼö tola tatema mbua moroi ba wanolonia? Moguna taʼokhögö wahuwusa si sökhi khönia. Ba wangokhögö daʼö, moguna so khöda waʼebolo dödö. (Zefania 2:3) Niha sebolo tödö, laʼodaligö Yehowa ba wangatulöʼö fefu ngawalö zi lö atulö hegöi ba wangaʼasiwaisi wanandraigö nitaögöra. Iʼomasiʼö ira Yehowa.

12, 13. (a) Enaʼö tola tatema mbua moroi ba wanolo Lowalangi, hadia zinangea tatimbagö? (b) Haʼökhö omasi Yehowa?

¹² Baero daʼö, ”ihöndrögö zebua horö, irugi danö tou” Lowalangi. (Zinunö 147:6b) Lö omasi ita na alua khöda daʼö! Omasi ita na iforomaʼö khöda Lowalangi waʼomasinia si lö faröi. Andrö, moguna taʼogorofi hadia niʼogorofinia. (Zinunö 97:10) Duma-dumania, taʼaröuʼö ita moroi ba gamuata fohorö. Eluahania, tatimbagö gofu hadia ia zondrönisi tödöda ba wamalua yaʼia, simane pornografi. (Zinunö 119:37; Mataiʼo 5:28) Tola manö moguna taforege ba wamalua daʼö. Hizaʼi, tenga zaya-zaya gölö wamalua daʼö börö me hasambalö tatema howu-howu moroi khö Yehowa.

¹³ Tebai taʼodaligö ita samösa ba wamalua fasuwöta andre. Moguna taʼodaligö Yehowa. Hadia omuso dödönia na taʼodaligö ngawalö niʼodaligö niha böʼö ba wanolo yaʼita? Löʼö. ’Tenga faʼabölö kudo zomasi’ Yehowa. Hadia tola taʼodaligö waʼabölöda samösa mazui niha böʼö? ’Lö ba dödö Yehowa waʼesolo waha niha.’ (Zinunö 147:10) Hizaʼi, moguna böi mamalö-malö mangandrö ita khö Yehowa ba wangandrö fanolo ba taʼandrö khönia ba wangefaʼö yaʼita moroi ba zalada. Lö irai atage Yehowa ba wamondro-ndrongo fangandröda. ”Somasi Yehowa, ba sangataʼufi yaʼia, sanötöna faʼebua dödönia andrö.” (Zinunö 147:11) Börö me lö faröi ia ba me iʼomasiʼö ita, taʼila wa hasambalö itolo ita ba wolawa gisö-isö dödöda si fasala.

14. Hadia nifaduhusi tödö sanura zinunö?

¹⁴ Iʼaroʼö dödöda Yehowa wa hasambalö itolo ita ba ginötö so gabula dödöda. Ba ginötö mangawuli ndraono Gizaraʼeli ba Yeruzalema, iʼangeraigö sanura zinunö hewisa wanolo Yehowa yaʼira. Manunö ia imane, ”Yaʼia zangaro lazi andrö ba mbawa göli khöu, ba samahowuʼö iraono baewali khömö. Lö ifaʼamöi ba danöu zanuwö.” (Zinunö 147:13, 14) Me iʼaroʼö mbawa göli andrö Yehowa, lö saʼae faʼataʼu khönia. Daʼa zangaʼaroʼö tödönia wa ilumöʼö nono mbanuania Yehowa.

15-17. (a) Hadia manö nirasoida ba wanandraigö nitaögöda, hizaʼi hewisa wangogunaʼö Yehowa Taromalinia ba wanolo yaʼita? (b) Beʼe duma-duma zangoromaʼö wa ”fagohi” daromali Lowalangi ba wanolo yaʼita.

¹⁵ Tola manö örasoi waʼaombö-aombö dödö börö gabula dödömö. Hizaʼi, ibeʼe waʼatua-tua khömö Yehowa ba wanaögö yaʼia. Imane sanura zinunö wa ”ifaʼema ba danö goroisania [Lowalangi]; si fagohi daromalinia andrö”. Aefa daʼö, itutunö sanandrösa ba salju, namo si baku, hegöi teu esi. Isofu, ”Haniha zanaha faʼoʼafu andrö khönia?” Iwaʼö wa ’ilau linia Yehowa, ba mangulu ibeʼe’. (Zinunö 147:15-18) Lowalangida si tola mangila hegöi mamalua gofu hadia ia, samatörö teu esi hegöi salju, tola itolo ndraʼugö ba wangasiwaisi gofu hadia ia gabula dödömö.

¹⁶ Iadaʼa, iʼogunaʼö Daromalinia Yehowa yaʼia daʼö Sura Niʼamoniʼö ba wameʼe fanuturu lala. Imane sanura zinunö wa ”fagohi” daromali Yehowa ba wanolo yaʼita. Ibeʼe khöda wanuturu lala Lowalangi ba lala hegöi ba ginötö si tefaudu. Angeraigö lala nifaluamö ba wanema mbua moroi ba Zura Niʼamoniʼö, publikasi niʼasogö ndra ’sawuyu si lö faröi ba satua-tua’, JW Broadcasting, jw.org, ira satua sokubaloi hegöi ira talifusöda. (Mataiʼo 24:45) Hadia no irai örasoi samösa hewisa waʼalio Yehowa ba wameʼe fanuturu lala khömö?

¹⁷ No irasoi talifusöda ira alawe sotöi Simone hewisa wanolo Daromali Lowalangi yaʼia. Ba wamaiginia, lö eluaha waʼaurinia ba lö omuso dödö Yehowa khönia. Hizaʼi, ba ginötö ide-ide dödönia, ilau mangandrö khö Yehowa ba wanolo yaʼia. Itohugö göi wamahaʼö yaʼia ba Zura Niʼamoniʼö. Imane Simone, ”Ba zalua khögu, lö irai urasoi wa lö ibeʼe wanuturu lala hegöi faʼabölönia khögu Yehowa.” Daʼa zanolo yaʼia ba wangokhögö gamuata si sökhi.

18. Hana wa tola örasoi wa ahatö Yehowa khömö, ba hadia dani niʼokhögömö ba ’Wanuno Yehowa’?

¹⁸ Iʼila sanura zinunö wa no ifili Yehowa ndraono Gizaraʼeli siföföna tobali ono mbanuania ba gotalua fefu soi ba gulidanö. Ha yaʼira zanemaʼö ’taromali’ Lowalangi hegöi ”gamakhoitania”. (Baso Zinunö 147:19, 20.) Iadaʼa, taʼokhögö mbuala si sökhi börö me tefotöi ita ba döi Lowalangi. Taʼandrö sibai saohagölö börö me no taʼokhögö waʼaboto ba dödö sanandrösa khönia, taʼokhögö Daromalinia ba wameʼe fanuturu lala khöda ba tola taʼokhögö wahuwusa si sökhi khönia. Simane sanura Zinunö 147, oya dani niʼokhögömö ba ’Wanuno Yehowa’, ba öfarou göi niha böʼö ba wamalua daʼö.